INA ua uma ona papatiso Anita * e avea ma Molimau a Ieova, na matuā tetee lona toʻalua. Ua faapea mai Anita: “Na ia taofia aʻu mai loʻu alu i sauniga ma faasā aʻu e aua neʻi toe taʻua le suafa o le Atua. Na matuā ita loʻu toʻalua iā te aʻu pe a ou taʻuina le suafa o Ieova.”

O le aʻoaʻoina o tamaiti e faatatau iā Ieova, o se isi luʻi lea iā Anita. “Na matuā faasā le tapuaʻiga iā Ieova i totonu o loʻu lava aiga. E leʻi mafai ona matou suʻesuʻe ma laʻu fanau pe ave foʻi i latou i sauniga.”

Ua faaalia mai i le mea na tupu iā Anita, e mafai ona avea teteega mai i aiga o se luʻi i le faamaoni o se Kerisiano. O isi luʻi o se maʻi faaumiumi, le oti o se tamaitiiti po o se paaga, po o le fulitua o se tasi o le aiga iā Ieova. O le ā e mafai ona fesoasoani i se Kerisiano e tumau ai i le faamaoni iā Ieova?

O le ā e te faia pe a fesagaʻia na faafitauli? Ua faapea mai Paulo: “E tatau ona outou tumau.” (Epe. 10:36) O le ā e fesoasoani iā te oe e tumau ai?

O se tasi o vala autū e tatou te maua ai le malosi e manaʻomia ona tumau ai i tofotofoga, o le tatalo lea ma faalagolago iā Ieova. O se faaaʻoaʻoga, i se tasi o aoauli i se Aso Gafua, na tupu ai se faalavelave i le aiga o Ana. Na faafuaseʻi ona maliu lana tane ae ua 30 tausaga talu ona la faaipoipo. Na faapea mai Ana: “Na lē toe foʻi mai o ia mai i le galuega, ae e na o le 52 ona tausaga.”

Na faapefea ona faafetaiaʻia e Ana lenā luʻi? Sa tatau ona toe faigaluega Ana, ma na fesoasoani lea iā te ia auā e manaʻomia le uaʻi atu atoatoa i lana galuega, peitaʻi e leʻi aveesea ai ona tigā. Na ia faapea mai: “Na saasaa atu loʻu loto iā Ieova ma ōle atu iā te ia e fesoasoani mai i loʻu tulaga faavauvau.” Pe na taliaina e Ieova ana tatalo? Na ia mautinoa na taliaina ana tatalo. Ua faapea mai o ia: “O le filemu lea e na o le Atua e na te aumaia na faatoʻafilemu ai aʻu ma sagatonu ai pea loʻu mafaufau. Ou te mautinoa o le a toe faatūina mai e Ieova loʻu toʻalua i le aso o le toetū.”—Fili. 4:6, 7.

Ua folafola mai e “Le Faafofoga tatalo” e na te saunia mea e manaʻomia e ana auauna ina ia faamaoni ai iā te ia. (Sala. 65:2) Pe e te lē ioe o lenei faamautinoaga e faamalosia ai le faatuatua? Pe e lē fesoasoani foʻi lenā folafolaga iā te oe e tumau ai?

Ua faalaeiauina e Ieova ona tagata e ala mai i le faapotopotoga Kerisiano. O se faaaʻoaʻoga, ina ua fesagaʻi le faapotopotoga i Tesalonia ma sauāga mataʻutia, na faalaeiau atu Paulo i na Kerisiano ina ʻia latou fefaamāfanafanaaʻi pea ma atiaʻe e le tasi le isi, e pei lava ona latou faia.’ (1 Tesa. 2:14; 5:11) Na mafai e Kerisiano i Tesalonia ona sao mai i na tofotofoga o lo latou faatuatua, e ala i le autasi i le alofa ma fesoasoani le tasi i le isi. O faamaumauga o lo latou tumau ua avea ma faaaʻoaʻoga lelei mo i tatou i aso nei, ma ua faaalia mai ai e mafai foʻi ona tatou tumau.

O le atiaʻe o se faauōga māfana ma sui o le faapotopotoga, e fesoasoani iā i tatou e fefaasoaaʻi ai i “mea e atiaʻe ai e le tasi le isi.” (Roma 14:19) E tāua tele le faia faapea aemaise lava i taimi o puapuaga. Na oo le tele o tofotofoga iā Paulo, ae na avatu e Ieova iā te ia le malosi e tumau ai. E ala i uso talitonu na saunia ai e le Atua le tele o faalaeiauga mo Paulo. O se faaaʻoaʻoga, ina ua auina atu e Paulo ona alofaaga i sui o le faapotopotoga i Kolose, na ia faapea atu: “O i latou foʻi nei na avea ma fesoasoani e faamalosiau iā te aʻu.” (Kolo. 4:10, 11) O lo latou alolofa iā Paulo, na uunaʻia ai i latou e faamāfanafana ma faamalosia o  ia i taimi o ona puapuaga. Atonu sa e mauaina foʻi se faalaeiauga ma le lagolagosua mai sui o lau faapotopotoga.

O toeaina, o se isi vala ua saunia mai ai e le Atua le lagolagosua i faapotopotoga Kerisiano. O nei tane taʻumatuaina faaleagaga e pei o “lafitaga mai i le matagi ma se mea e malu ai mai i timuga mamafa, e pei o vaitafe i atunuu e leai ni vai, e pei foʻi o le paolo o le papa tele i le laueleele naumati.” (Isa. 32:2) Maʻeu se faamautinoaga e faafouina ai! Po o e faaaogāina lenei sauniuniga alofa? O le faalaeiau ma le lagolagosua a toeaina e fesoasoani iā te oe e tumau ai.

O toeaina, e lē o i latou o ni fai vavega. O i latou o tagata e lē lelei atoatoa, ʻe iai vaivaiga e pei lava o i tatou.’ (Galu. 14:15) E ui i lea, e matuā telē le aogā o a latou faatoga e faia mo i tatou. (Iako. 5:14, 15) Na faapea mai se uso i Italia, o lē sa onosaia mo le tele o tausaga se maʻi tugā e faaleagaina ai musele o le tino: “O le alofa faapelepele o uso faatasi ai ma lo latou asiasi mai, na fesoasoani iā te aʻu e tumau ai.” Po o aogā iā te oe le sauniuniga alofa a Ieova o toeaina?

E iai isi mea e mafai ona tatou faia ina ia tumau ai, e pei o le tausia o se faasologa faaleagaga. Seʻi o tatou iloiloina le faaaʻoaʻoga a Ioane e 39 tausaga, o lē na maua i le kanesa. Ua ia faapea mai: “Na ou manatu pe aiseā ua ou maua ai i lenei maʻi tugā ae e leʻi taitai loʻu olaga.” O le taimi lenā faatoʻā tolu tausaga o lona atalii. Ua faapea mai Ioane: “O lona uiga, e lē gata i le vaaia e laʻu avā o la ma tama laʻitiiti, ae e tatau foʻi ona ia tausia aʻu ma fesoasoani i taimi ou te alu ai e vaai le fomaʻi.” Na lagona e Ioane le matuā vaivai ma le faafaufau ona o togafitiga o lona kanesa. Ae e leʻi pau ai lenā. Na maʻi tigāina le tamā o Ioane ma manaʻomia le tausiga a le aiga.

Na faapefea ona faafetaiaʻia e Ioane ma lona aiga lenei tulaga faigatā? Ua ia faapea mai: “E ui i loʻu vaivai ae na ou faamautinoa o loo tausisi lo matou aiga i se faasologa lelei faaleagaga. E matou te auai i sauniga uma, faia so matou sao i le faiva i vaiaso taʻitasi, ma faia e lē aunoa la matou tapuaʻiga a le aiga e ui lava i faigatā.” Na iloa e Ioane, o le ki e tumau ai i so o se luʻi, o le tausia lea o lona itu faaleagaga. Pe e iai sana fautuaga mo i latou o feagai ma tulaga faigatā? Ua ia faapea mai: “E matuā faateʻia i tatou i le taimi muamua ona o popolega, peitaʻi a o faagasolo taimi e mafai ona suia na faalogona i le alofa ma le mana o Ieova. E mafai ona faamalosia oe e Ieova e pei ona ia faia iā te aʻu.”

E mautinoa o le lagolagosua a Ieova e mafai ai ona tatou tumau i tofotofoga faigatā, po o tulaga e tatou te fesagaʻia i le taimi lenei po o le lumanaʻi. Seʻi o tatou tatalo ma faalagolago iā Ieova, atiaʻe se faauōga māfana ma i latou i le faapotopotoga, talia le fesoasoani a toeaina Kerisiano, ma tausisi i se faasologa faaleagaga. O le faia faapea ua tatou faatatauina ai upu a Paulo: “E tatau ona outou tumau.”