Skip to content

Skip to table of contents

 MEA ILOGA O LO TATOU TALAFAASOLOPITO

Na Ia Mātauina le Alofa o Ē na Galulue i le Faleʻaiga

Na Ia Mātauina le Alofa o Ē na Galulue i le Faleʻaiga

MAʻEU le olioli pe a tatou ofaga faatasi i tauaofiaga ina ia maua taumafa faaleagaga! Pe a potopoto faatasi tagata o le Atua mo se faigaʻai faaleagaga, e maua foʻi le olioli i le fetufaaʻi o taumafa faaletino.

Iā Setema 1919, na usuia ai e Tagata Aʻoga o le Tusi Paia se tauaofiaga e valu aso i Cedar Point i Ohio, i le Iunaite Setete. Na saunia ai e faletalimālō potu ma meataumafa mo le ʻauusufono, ma e faitau afe na auai ae e leʻi faatalitalia. O le toʻatele naʻuā o le ʻauusufono na faamavae ai le ʻaufaigaluega i faleʻaiga. Na talosagaina e se pule o le faleʻaiga le ʻauusufono talavou pe mafai ona fesoasoani, ma e toʻatele na lotomalilie e fesoasoani. O se tasi o i latou o Sadie Green. Ua ia faapea mai: “O le taimi muamua lea na ou galue ai i se faleʻaiga, ae sa ou fiafia lava.”

Sierra Leone i le 1982

I tausaga mulimuli ane ai, na faatulaga ai faleʻaiga i tauaofiaga lea na mafai ai e le ʻautauofo ona auauna i o latou uso ma tuafāfine. O le galulue faatasi ma uso talitonu na fesoasoani i le toʻatele o talavou ia faatutū ni sini faaleagaga. Sa galue Gladys Bolton i le faleʻaiga i le tauaofiaga i le 1937. Na ia taʻua: “Na ou feiloaʻi i tagata mai i vaipanoa eseese, ma na ou iloa ai le auala na foʻia ai o latou faafitauli. O i inā na amata ai ona ou fia paeonia.”

Na faapea mai se sui usufono e suafa iā Beulah Covey: “O le tuutoina o le ʻaugalulue na sologa lelei ai mea uma.” E iai luʻi o le galuega. I le 1969 ina ua taunuu Angelo Manera i Dodger Stadium i Los Angeles i Kalifonia, na ia iloa ai ua tofia o ia e vaaia le faleʻaiga. Na ia faapea mai: “Na matuā faateʻia lava aʻu!” O sauniuniga mo le tauaofiaga e aofia ai le eliina o se pu e 0.4 kilomita le umi e faataatia ai le paipa mo le kesi o le umukuka.

Frankfurt i Siamani i le 1951

I le 1982 i Sierra Leone, e tatau i le ʻautauofo galulue mamafa ona faamamā muamua le fanua ona faatū ai lea o le faleʻaiga. I Frankfurt i Siamani i le 1951, na faaaogā ai e uso se nofoaafi e maua mai ai le vevela ina ia mafai ona ola ai ogaumu tetele e 40. E 30,000 ipu meaʻai na saunia e le ʻaukuka i le itula e tasi. Ina ia faamāmā le avega mo le ʻaugalulue e toʻa 576 i le matagaluega o le faamamāina o  ipu, na sau ai le sui usufono ma aumai lana naifi ma lana tui e faaaogā. I Yangon i Myanmar, na faaitiitia ai le faaaogāina e le ʻaukuka o mea feū i a latou meaʻai ina ia mafai ona taumamafa ai sui usufono faavaomalo.

“E LATOU TE TUTŪ MA AAI”

O le tū i se laina umī i le faleʻaiga i le vevela o le lā i se tauaofiaga i le Iunaite Setete i le 1950, o se faamanuiaga lea iā Annie Poggensee. Na ia faapea mai: “Na ou faalogologo lelei i le talanoaga a ni tuafāfine se toʻalua na malaga mai i Europa i se vaa.” Na la faamatalaina le auala na fesoasoani ai Ieova iā i laʻua ina ia auai i le tauaofiaga. Na faapea mai Annie: “E leai ma se tasi e sili atu ona fiafia nai lo o tuafāfine nei e toʻalua. Sa o se meanoa iā i laʻua le faatalitali i le laina i le vevela o le lā.”

Seoul i Korea i le 1963

I le tele o tauaofiaga tetele, o faleʻaiga e faia i faleʻie tetele o loo iai laina o laulau maualuluga ma e faalaeiau sui usufono ina ia faanatinati le tausami ae faaavanoa laulau mo isi. E na o le pau lea o le auala na mafai ai ona taumamafa le faitau afe i le aoauli. Na mātauina e se tagata e lē o se Molimau e faapea: “E matuā ese lava lea lotu, e latou te tutū ma aai.”

Na matuā maofa ni sui o le malo ma le vaegaʻau i le maopoopo o uso. Ina ua māeʻa ona asiasia e i latou e vaaia le vaegaʻau a le Iunaite Setete la matou faleʻaiga i le Yankee Stadium i Niu Ioka, ona latou faalaeiauina lea o Major Faulkner o le Matagaluega a le British War ina ia faia se asiasiga faapea. Na auai i laʻua ma lana avā i le fonotaga i Twickenham i Egelani i le 1955 lea na faamatuaina “Le Malo Manumalo.” Na ia faapea mai na ia mātauina, o le alofa faaleuso na māfua ai ona maopoopo i latou na galulue i le faleʻaiga.

Na lotomalilie le ʻaugalulue e saunia meataumafa e mālōlōina ma taugofie, mo le lelei o sui usufono mo le tele o tausaga. O lenei galuega telē e manaʻomia ai le toʻatele o ē tauofo ia galulue mo ni itula uumi ma e misia ai nisi vaega po o le polokalame atoa foʻi. Sa faafaigofie le faatulagaga o meaʻai o le tauaofiaga i le tele o nofoaga i vaitausaga o le 1970. Ae i le amataga o le 1995, na talosagaina ai sui usufono ina ia aumaia a latou lava meataumafa i tauaofiaga. O le faia faapea ua mafai ai e le toʻatele ona olioli i le polokalame faaleagaga ma le aufaatasiga faa-Kerisiano. *

Maʻeu le faatāuaina e Ieova o i latou na galulue mamafa e auauna mo o latou uso talitonu! O nisi atonu ua latou misia na aso fiafia na galulue ai i faleʻaiga. Ae e tasi le mea e mautinoa: O loo tumau pea ona avea le alofa o le vala autū o a tatou tauaofiaga.​—Ioa. 13:34, 35.

^ pala. 12 O loo iai pea avanoa mo le ʻautauofo e fesoasoani ai i isi matagaluega o tauaofiaga.