O LE tau māfanafana i le 1970, na ou taoto ai i le falemaʻi i Valley Forge, i Phoenixville i Pennsylvania i le Iunaite Setete. E taʻi 30 minute ma siaki e le tama tausimaʻi loʻu toto. O aʻu o se fitafita e 20 tausaga ua mafatia i se maʻi tugā. Ua foliga popole le tausimaʻi ma e matua teisi iā te aʻu. A o faasolosolo ona paʻū i lalo loʻu toto, na ou faapea atu: “Na e vaai muamua i se tagata ae oti?” Na popole o ia ma faapea mai: “E leai.”

I lenā taimi na foliga mai ua leai soʻu faamoemoe i le lumanaʻi. Ae aiseā na taofia ai aʻu i le falemaʻi? Seʻi ou faamatala atu se vaega o le talaaga o loʻu olaga.

A o faagasolo le taua i Vietiname na ou aafia i se maʻi a o oʻu galue i le potu e fai ai taotoga. Na ou fiafia e fesoasoani i tagata mamaʻi ma manunuʻa, ma sa ou manaʻo e avea aʻu ma fomaʻi tipitipi. Na ou taunuu i Vietiname iā Iulai i le 1969. E pei o isi tagata fou uma, na tuu mai iā te aʻu le vaiaso atoa e faamasani ai i suiga o le taimi ma le vevela o le tau.

Na ou alu i laʻu galuega i le falemaʻi e faia ai taotoga i Mekong Delta i Dong Tam. Na taunuu ni helikopa o loo aumai ai tagata manunuʻa. O loʻu faamaoni ma le naunau e galue, na ou manaʻo ai e amata loa. Na faamamā manuʻa o tagata lavevea ma avatu loa i totonu o container ʻea mālūlū lea na faia ai taotoga. O loo feomaʻi ai i totonu le fomaʻi tipitipi, fomaʻi e na te tuia le vai moe, ma tausimaʻi e fesoasoani i le taotoga, ma faia le mea sili e faasao ai ola. Na ou mātauina e leʻi aveesea ato uli mai i le uta a le helikopa. Na taʻu mai iā te aʻu o na ato o loo iai vaega o tino o fitafita na feoti i le taua. O loʻu uluaʻi taimi lenā i le taua.

I le taimi a o oʻu talavou, na iai la matou fesootaʻiga ma Molimau a Ieova. Na suʻesuʻeina e si oʻu tinā le Tusi Paia faatasi ma Molimau, ae e leʻi agaʻigaʻi o ia i luma i le papatisoga. Sa ou matuā fiafia lava e auai i suʻesuʻega a loʻu tinā. I se tasi taimi, na ma pasia ai ma loʻu tamāfai le Maota o le Malo. Na ou fesili atu iā te ia: “O le ā le la fale?” Na tali mai o ia: “Aua lava neʻi e faalatalata i  tagata la!” Na ou usitaʻi i le fautuaga a loʻu tamāfai ona ou te alofa ma maufaatuatuaina o ia. O lea, na muta ai a matou fesootaʻiga ma Molimau a Ieova.

Ina ua ou toe foʻi mai i Vietiname, na ou lagona ai le manaʻomia o le Atua i loʻu olaga. O le manatuaina o mea mataʻutia na tutupu i le taua, na matuā aafia ai oʻu faalogona. E foliga mai e leai se tasi na malamalama i mea na tutupu i Vietiname. Na ou manatuaina solo tetee ia na taʻua ai o fitafita o le Iunaite Setete na fasiotia pepe ona o le lipotia mai o le fasiotia o tamaiti i le taua.

Na amata ona ou auai i lotu eseese ina ia faamalieina ai loʻu galala faaleagaga. Ou te alofa i le Atua ae ou te leʻi fiafia i mea na tutupu i lotu. Ae i se tasi o Aso Sa iā Fepuari i le 1971, na iʻu ina ou alu i le Maota o le Malo o Molimau a Ieova i Delray Beach i Florida.

Ou te oo atu ua toeitiiti uma le lauga i le lautele, o lea na ou nofo ai i le suʻesuʻega o Le Olomatamata. Ou te leʻi manatuaina le mataupu sa talanoaina, ae ou te manatua tamaiti ma le suʻeina o a latou Tusi Paia. Na matuā faagaeetia ai aʻu! Na ou faalogologo ma le totoʻa ma mātauina mea. Ae ou te leʻi tuua le Maota o le Malo na faalatalata mai se uso e pe ā ma le 80 tausaga. O lona suafa o Jim Gardner. Na ia tuu mai le tusi O Le Upu Moni E Taʻitaʻia Ai I Le Ola Faavavau ma faapea mai: “Pe e te fia suʻesuʻe i le tusi lenei?” Na faatulaga le taeao o le Aso Tofi e fai ai la maʻua uluaʻi suʻesuʻega.

Sa tatau ona ou faigaluega i le pō o le Aso Sa lava lenā. Na faafaigaluega aʻu e se falemaʻi tumaʻoti i Boca Raton i Florida i le potu mo faalavelave faafuaseʻi. E amata laʻu sifi i le 11:00 i le pō seʻia oo i le 7:00 i le taeao. Sa mafai ona ou faitauina ai le tusi o le Upu Moni ona o le toʻafilemu o le pō. Na faalatalata mai se tausimaʻi sinia ma seʻi atu le tusi, na autilo i le faavaa ma avaavau mai: “Aua lava neʻi e alu i lenā lotu.” Na ou aapa atu ma aumai laʻu tusi ma faapea atu, “Ua faatoʻā ʻafa le tusi i laʻu faitau, ae foliga mai o le a avea aʻu ma se tasi o Molimau!” Na alu ese o ia ae faauma ona faitau laʻu tusi i lenā pō.

Na amata la maʻua suʻesuʻega muamua ma le uso o Gardner i loʻu fesili atu: “O ā la ta mea o le a suʻesuʻe?” Na ia tali mai: “O le tusi lea na ou avatu iā te oe.” Na ou faapea atu: “Ua uma ona ou faitauina.” Na tali mai ma le agalelei le uso: “Seʻi o ta iloiloina le mataupu muamua.” Na faateʻia aʻu i le tele o mea na ou misia. Na ia fai mai iā te aʻu e suʻe le tele o mau i laʻu Tusi Paia o le King James Version. Na aʻoaʻoina aʻu e faatatau i le Atua moni o Ieova. E tolu mataupu o le tusi o le Upu Moni na ma suʻesuʻeina i lenā taeao ma le uso o Gardner, lea na ou valaauina o ia o Jim. E tolu mataupu e ma te suʻesuʻeina i taeao o Aso Tofi uma. Na ou matuā olioli i na suʻesuʻega.  Maʻeu se faaeaga na ou maua o le aʻoaʻoina lea o aʻu e se uso faauuina na masani lelei iā Charles T. Russell!

Na faamaonia le avea o aʻu ma tagata talaʻi ina ua mavae ni nai vaiaso. Na fesoasoani Jim iā te aʻu i le tele o mea sa ou popole ai, e aofia ai le luʻi o le auai i le talaʻiga mai i lea fale i lea fale. (Galu. 20:20) Na ou olioli i le galuega talaʻi a o ma galulue ma Jim. Ou te manatu pea i le faiva o loʻu faaeaga sili lea. Maʻeu le fiafia i le avea ma ʻaufaigaluega faatasi ma le Atua!​—1 Kori. 3:9.

Seʻi oʻu faamatala atu se mea e sili ona pele i loʻu loto, o loʻu uluaʻi alofa lea mo Ieova. (Faaa. 2:4) O lenā alofa mo Ieova na fesoasoani iā te aʻu pe a toe manatua mea mataʻutia na tutupu i le taua ma le tele o isi tofotofoga.​—Isa. 65:17.

Ou te manatua se aso faapitoa i le tau e totogo ai mea i le 1971. E leʻi leva ona tuliese aʻu mai i le fale lea na tuu mai e oʻu mātua ou te nofo ai. E lē toe taliaina e loʻu tamāfai se Molimau a Ieova i lona fanua! E lē telē saʻu tupe na iai i lenā taimi. E taʻi lua vaiaso ma totogi aʻu e le falemaʻi lea na ou faigaluega ai, ma na ou faaaluina le tele o loʻu totogi i le faatauina o oʻu lavalava e faaaogā i le faiva ina ia faamamaluina ai Ieova. Na sefe sina aʻu tupe, peitaʻi o loo teu i le faletupe i le setete o Michigan lea na ou ola aʻe ai. Na ou moe i laʻu taavale mo ni nai aso. Ou te faaaogāina le fale taʻele a pamu penisini ou te taʻele ma sele ai laʻu ʻava.

I se tasi o aso a o oʻu nofo pea i laʻu taavale, na ou taunuu ai i le Maota o le Malo a o toe o ni nai itula amata le feiloaʻiga mo le talaʻiga. Ua faatoʻā  ou mānava mai lava i le falemaʻi. A o oʻu nofo i le pito i tua o le Maota o le Malo i le mea e lē iloa mai ai e se tasi aʻu, na toe fetuleni mai mafaufauga o le taua i Vietiname, le sasala o le manogi o tino oti na mū, ma le tele o le toto masaa. E pei lava o loo oʻu faalogoina ma iloa atu tama talavou o loo ʻaiʻoi mai iā te aʻu, “Ta fia ola! Ta fia ola!” Na ou iloa o le a feoti i latou, ae na ou taumafai e faia le mea sili e faalaeiau ai i latou, e aunoa ma le iloa mai o oʻu foliga popole. Na ou matuā lagona le mafatia a o oʻu nofonofo ai i inā.

Na maligi faavai oʻu loimata a o fai laʻu tatalo. (Sala. 56:8) Na amata ona ou mafaufau loloto e uiga i le faamoemoe o le toetū. Na pāʻia ai loʻu loto, ona e ala i le toetū o le a aveesea ai e Ieova le Atua le tele o le toto masaa, ma faalogona tigā na oo iā te aʻu ma isi ona o le taua. O le a toe faatutūina e le Atua na tane talavou, ma o le a latou maua le avanoa e aʻoaʻo ai le upu moni e faatatau iā te ia. (Galu. 24:15) Na faatumuina loʻu loto i le alofa mo Ieova ma matuā pāʻia ai lava loʻu loto. E lē mafai ona galo iā te aʻu lenā aso. Talu mai lenā taimi, na ou faia le mea sili e faatumau ai loʻu uluaʻi alofa mo Ieova, aemaise lava pe a feagai ma tofotofoga ma faigatā.

E faia e tagata mea mataʻutia i taimi o taua, ma na ou faia foʻi na mea. Peitaʻi na fesoasoani iā te aʻu le mafaufau loloto i mau e lua e sili ona ou fiafia i ai. O le mau muamua o le Faaaliga 12:10,11, o loo taʻua ai e tatou te manumalo i le Tiapolo e ala i le upu o loo tatou talaʻia ma le toto o le Tamaʻi Mamoe. Lona lua o le Kalatia 2:20, na ou iloa ai mai i lenā fuaiupu na maliu Iesu Keriso “mo aʻu.” O loo silasila alofa mai Ieova iā te aʻu, ma ia faamagaloina mea sa ou faia e ala i le toto o Iesu. O le iloaina o lenā mea ua mafai ai ona ou maua se lotofuatiaifo mamā, ma uunaʻia aʻu e faia le mea sili e fesoasoani ai i isi ia iloa le upu moni e faatatau i lo tatou Atua alofa mutimutivale o Ieova.​—Epe. 9:14.

Pe a ou toe mafaufau i loʻu olaga, ou te matuā talisapaia le tausiga a Ieova. O se faaaʻoaʻoga, o le aso lava na iloa ai e Jim o loo oʻu nofo i le taavale, na ia faafesootaʻia se tuafafine e iai sona fale mautotogi. Na ou matuā talitonu na faaaogā e Ieova Jim ma le tuafafine peleina e saunia se fale manaia ou te nofo ai. E maʻeu le agalelei o Ieova! E na te tausia ona tagata tapuaʻi faamaoni.

Iā Me i le 1971, na iai ni aʻu mea e tatau ona fai i Michigan o lea na ou malaga ai loa. A o leʻi tuua le faapotopotoga i Delray Beach i Florida, na faatumu le keli o laʻu taavale i lomiga ma ou malaga loa i le itu i mātū e ui atu i auala tetele o le Inter-state 75. Na leai se lomiga na totoe i laʻu taavale a o leʻi tuua le setete o Georgia. Na ou maelega e talaʻi le tala lelei o le Malo i nofoaga uma. Na ou ofo atu lomiga i falepuipui, ma ofo atu foʻi sāvali i tamāloloa i fale tāʻele i nofoaga e mālōlō ai. Ou te tomānatu pea po ua ola na fatu.​—1 Kori. 3:6, 7.

Ina ua ou faatoʻā aʻoaʻoina le upu moni, ou te leʻi faautauta pe a talaʻi aemaise lava pe a ou talanoa i loʻu aiga. Talu ai sa matuā malosi loʻu uluaʻi alofa mo Ieova, na ou lototele ai e talaʻi atu ae ou te leʻi faautauta. Ou te alofa faapelepele i nai oʻu uso o John ma Ron, ma na ou talaʻi faamalosi atu le upu moni iā i laʻua. Mulimuli ane, na tatau ona ou faatoese iā i laʻua ona o loʻu lē magafagafa. E leʻi mapu aʻu tatalo ina ia la taliaina le upu moni. Talu mai lenā taimi, na aʻoaʻoina ai aʻu e Ieova, ma ua sili atu ona ou faautauta pe a ou talaʻi ma aʻoaʻo atu.​—Kolo. 4:6.

Ou te manatuaina loʻu alofa mo Ieova, ae lē faagaloina foʻi isi e sili ona ou alofa i ai. O se tasi o i latou o si aʻu avā pele o Susan. Na ou manaʻomia se paaga e fesoasoani iā te aʻu i le faia o le galuega o le Malo. O Susan o se tuafafine e malosi faaleagaga. Ou te manatua pea se tasi o aso na ou asiasi atu ai iā te ia a o ma tuutala. O loo saofaʻi Susan i le polotito i luma o le fale o ona mātua i Cranston i Rhode Island. O loo ia faitauina Le Olomatamata ma lana Tusi Paia. Na faagaeetia aʻu ona o loo ia faitauina se tasi o mataupu ma suʻe mau. Na ou mafaufau:ʻO ia o se tuafafine faaleagaga!’ Na ma faaipoipo iā Tesema i le 1971, ma ou te matuā talisapaia o ia, ona o lona lagolagosua malosi iā te aʻu. O le itu e sili ona ou talisapaia ai o ia, ona e ui e alofa iā te aʻu ae e sili atu lona alofa mo Ieova.

Na faamanuiaina i maʻua ma Susan i sa maʻua fanau tama e toʻalua, o Jesse ma Paul. Na faatasi Ieova ma i laʻua a o la tuputupu aʻe. (1 Samu. 3:19) O lo laʻua malolosi i le upu moni, ua taʻuleleia ai i maʻua ma Susan. Ua faaauau pea ona la auauna iā Ieova ona o loo la manatuaina lo laʻua uluaʻi alofa mo ia. E silia ma le 20 tausaga o auai i laʻua uma i le auaunaga faataimi atoa. Ou te mitamita foʻi i avā a nai oʻu atalii o Stephanie ma  Racquel, ua pei lava o ni oʻu afafine moni i laʻua. O i laʻua o ni tuafāfine e malolosi faaleagaga ma e alolofa iā Ieova ma o la lotoatoa ma tagata atoa.​—Efe. 6:6.

Ina ua mavae loʻu papatisoga, na ou auauna ai i Rhode Island mo le 16 tausaga, lea na ou atiaʻe ai ni faauōga māfana. E tele mea lelei ou te manatua e uiga i toeaina na matou galulue faatasi. Ou te lotofaafetai foʻi i le tele o ovasia femalagaaʻi, o i latou ia sa iai se aafiaga lelei iā te aʻu. Maʻeu se faaeaga o le galulue faatasi ma na tane o ē na tumau lo latou uluaʻi alofa mo Ieova! Na matou siitia atu i North Carolina i le 1987 e auauna i le vaipanoa o loo telē ai le manaʻoga, o i inā na ou atiaʻe ai nisi faauōga māfana. *

Iā Aokuso 2002, na ma taliaina ai ma Susan le valaaulia e avea ma sui o le aiga Peteli i Patterson i le Iunaite Setete. Na ou galue i le Matagaluega o le Auaunaga, ae galue Susan i le faletāmea. Na matuā fiafia o ia e galue i inā! Ae iā Aokuso 2005, na ou maua ai le faaeaga e auauna o se sui o le Vaega Pule. Na ou lagona loʻu faatauvaa i lenei tofiga. Na popole laʻu avā pe a mafaufau i le tele o tiute tauave, o galuega ma femalagaaʻiga o le a aofia ai. E lē fiafia Susan e faimalaga i vaalele, ae o le a tele ina ma malaga i vaalele. Ua faapea mai Susan, o manatu lelei ma le alofa o avā a isi sui o le Vaega Pule, na fesoasoani iā te ia e lagolagosua ai iā te aʻu i le tele e mafai ai. Sa ia faia faapea, ma ou te matuā talisapaia o ia ona o lea tulaga.

I loʻu ofisa e tele ata o loo iai e matuā tāua iā te aʻu! Ua faamanatu mai ai iā te aʻu le olaga lelei ua ou olioli ai. Ua ou maua faamanuiaga matagofie ona o le faia o le mea sili e manatua ai loʻu uluaʻi alofa mo Ieova.