Skip to content

Skip to table of contents

O le Faateʻaina o se Sauniuniga Alofa

O le Faateʻaina o se Sauniuniga Alofa

NA FAAPEA mai Julian: “I le taimi na ou faalogo ai i le faasilasilaga ua faateʻaina loʻu atalii, sa pei ua leai soʻu faamoemoe. O ia o le ulumatua o le fanauga, sa māfana la ma faiā, ma o le tele o taimi sa ma faifaimea faatasi. Sa avea o ia o se atalii amiolelei, peitaʻi na faafuaseʻi lava ona sui ona uiga. Sa matuā tagi laʻu avā, ma ou te leʻi iloa le auala e faamāfanafana ai iā te ia. Sa ma fesili ifo pea po o le ā se vala e ma te leʻi taulau ai o ni mātua.”

E faapefea ona tatou faapea atu o le faateʻaina o se Kerisiano o se sauniuniga alofa, pe afai e oo mai ai tigā? O ā ni faavae faale-Tusi Paia mo lenei faasaʻoga mamafa? O le ā e taʻitaʻia atu i le faateʻaina o se tasi?

O VALA E LUA E TAʻITAʻIA ATU AI I LE FAATEʻAINA

O ā vala e lua e taʻitaʻia atu i le faateʻaina o se Molimau a Ieova? Muamua, ua faia e se Molimau ua māeʻa ona papatiso se agasala matuiā. Lona lua, e leʻi salamō o ia mai i lana agasala.

E ui e lē faatalitalia e Ieova se lelei atoatoa mai iā i tatou, peitaʻi, ua iai ana tapulaa paia e tatau ona tatou ausia. O se faaaʻoaʻoga, e maumauaʻi Ieova ia tatou ʻalofia le faia o agasala matuiā e pei o amioga lē mamā, ifo i tupua, gaoi, taufaavalea, fasioti tagata ma faiga faaagaga.​—1 Kori. 6:9, 10; Faaa. 21:8.

Pe e tatou te lē ioe ea e aogā tapulaa mamā a Ieova, ma e puipuia ai i tatou? Po o ai e lē manaʻo e ola i se siʻomaga filemu e iai ni ē maufaatuatuaina? E tatou te maua se siʻomaga faapena i o tatou uso ma tuafāfine faaleagaga, ona o le folafolaga sa tatou faia i le taimi na tuuina atu ai o tatou ola i le Atua, ina ia usiusitaʻi i taʻiala o loo i lana Afioga.

Ae faapefea pe a faia e se Kerisiano ua papatiso se agasala matuiā ona o se vaivaiga? E iai auauna faamaoni a Ieova i aso anamua sa latou faia agasala faapena, ma e leʻi teena i latou e le Atua. O se faaaʻoaʻoga o le tupu o Tavita. Sa ia faia le mulilua ma le fasioti tagata. E ui i lea, na faailoa atu e le perofeta o Natano iā te ia: “Ua faamagaloina e Ieova lau agasala.”​—2 Samu. 12:13.

Sa faamagalo e Ieova le agasala a Tavita, ona sa ia faaalia le salamō moni. (Sala. 32:1-5) I se tulaga talitutusa, e faateʻaina se auauna a Ieova pe a lē faaalia le salamō pe faaauau pea ona ina faia mea leaga. (Galu. 3:19; 26:20) Pe a mātauina e toeaina o loo iai i le komiti faafaamasinoga le lē faaalia e le tagata faimea sesē o le salamō moni, ona latou faateʻaina lea o ia.

I le taimi muamua, e tatou te manatu o se faiga lē alofa le faateʻaina o se tagata faimea sesē, aemaise lava pe a māfana la tatou faiā ma lenā tagata. Peitaʻi, ua aumaia i le Afioga a Ieova  māfuaaga talafeagai, e tatou te talitonu ai o lenā faaiʻuga o se fuafuaga alofa.

O AOGĀ O LE FAATEʻAINA

Na fetalai Iesu “e taʻuamiotonuina le atamai i ana galuega.” (Mata. 11:19) O se filifiliga atamai le faateʻaina o le tagata faimea sesē e lē salamō, auā e fuaina mai ai fua o le amiotonu. Seʻi o tatou iloiloina ni māfuaaga se tolu:

O le faateʻaina o le tagata faimea sesē e faamamaluina ai le suafa o Ieova. Talu ai e tatou te tauaveina le suafa o Ieova, o a tatou amioga la e mafai ona aafia ai lona suafa. (Isa. 43:10) O amioga a se tamaitiiti e mafai ona taʻuleleia pe e taʻuvalea ai ona mātua. E faapena le vaaiga e faatatau iā Ieova, ona o amioga lelei po o amioga leaga a tagata o loo tauaveina lona suafa. E faamamaluina le suafa lelei o Ieova pe a ola tagata o loo tauaveina lona suafa i ana tapulaa. E faapena foʻi le tulaga i aso o Esekielu, na mātaulia e tagata o nuu ese tagata Iutaia i le suafa o Ieova.​—Eseki. 36:19-23.

E taʻuleagaina le suafa paia o le Atua pe a tatou faia amioga lē mamā. Na fautua atu le aposetolo o Peteru i Kerisiano: “E faapei o fanau usiusitaʻi, aua le amioaʻi e tusa ai ma o outou tuʻinanauga na iai muamua a o leʻi malamalama outou, ae e tusa ai ma Lē e Paia na valaauina outou, ia faapea foʻi ona paia outou uma i a outou amio, auā ua tusia: ʻE tatau ona paia outou, auā o aʻu nei e paia lava aʻu.’” (1 Pete. 1:14-16) O amioga paia ma mamā e faamamaluina ai le suafa o le Atua.

Pe a faia e se Molimau a Ieova ni amioga leaga, e lē taumatea o le a iloa uma e ana uō ma tagata e latou te masani. O le faateʻaina o lenā tagata, e atagia atu ai e iai tagata mamā o Ieova o loo pipii atu i taʻiala o le Tusi Paia, e faatumauina ai lo tatou tulaga mamā. Sa auai se tagata ese i le sauniga i se tasi o Maota mo Sauniga i Suisilani, ma na ia faailoa mai lona manaʻo e avea ma sui o le faapotopotoga. Sa faateʻaina lona tuafafine ona o amioga lē mamā. Na ia faapea mai e fia auai i se faalapotopotoga e “lē faatagaina ai amioga leaga.”

O le faateʻaina e puipuia ai le mamā o le faapotopotoga Kerisiano. Na lapataʻia e Paulo uso i Korinito i le mataʻutia o le faatagaina pea i le faapotopotoga o se tagata o loo faia pea ma le loto i ai le agasala. Na ia faatusaina aafiaga leaga o lenā tagata i le aafiaga o le fefete i se paluga. Na ia faapea mai: “O se fefete itiiti e faafefeteina ai le paluga atoa.” Na ia fautuaina i latou i le faapea mai: “Ia faateʻaeseina lenā tagata leaga mai iā te outou.”​—1 Kori. 5:6, 11-13.

O le “tagata leaga” na taʻua e Paulo sa faaauau pea ona ia faia amioga lē mamā. Sa amata ona taʻutonuina e isi sui o le faapotopotoga amioga a lenei tagata. (1 Kori. 5:1, 2) Pe ana faatagaina le faaauau pea ona faia e lenei tagata o le agasala, atonu o le a mulimuli ai foʻi isi Kerisiano i amioga lē mamā a tagata sa nonofo i lenā aai. O le lē faia o se gaoioiga i tagata e faia ma le loto i ai le agasala, e manatu māmā ai isi i tapulaa a le Atua. (Fai. 8:11) Ae sili atu i lenā, o le a avea le tagata agasala e lē salamō o se “papa ua natia i le vai,” ma e mafai ona faavaatuʻia ai le faatuatua o isi i le faapotopotoga.​—Iuta 4, 12.

O le faateʻaina atonu e toe sagatonu ai le mafaufau o le tagata faimea sesē. Na fetalai Iesu e faatatau i se talavou na ia tuua lona aiga, ae alu ma faamaumau lona tofi. Na aʻoaʻoina e le uii faamaumauʻoa le faigatā o le olaga pe a aunoa ma lona aiga. Sa toe sagatonu lona mafaufau, salamō ma toe foʻi i lona aiga. (Luka 15:11-24) O le auala na faamatala ai e Iesu faalogona fiafia o le tamā alofa ina ua suia le loto o lona atalii, e fesoasoani iā i tatou e malamalama ai i faalogona o Ieova. Ua ia faamautinoa mai: “Ou te fiafia, e lē i le oti o le tagata amioleaga, ae pe a liliuese le tagata amioleaga mai i lona ala, ma ola ai pea o ia.”​—Eseki. 33:11.

I se tulaga talitutusa, e iloa e i latou ua lē toe iai i le faapotopotoga Kerisiano po o lo latou aiga faaleagaga, le telē o le mea ua latou misia. O āuga leaga o a latou agasala, faapea taimi mananaia sa latou fiafia faatasi ai i se faiā lelei ma Ieova ma ona tagata, e mafai ona toe sagatonu ai o latou mafaufau.

 E manaʻomia le alofa ma le maumauaʻi ina ia maua ai iʻuga lelei. Na faapea mai le faisalamo o Tavita: “Pe a fasia aʻu e lē e amiotonu, o le alofa faamaoni lea. Pe a ia aʻoaʻia foʻi aʻu, ua avea lea ma suāuu i loʻu ulu.” (Sala. 141:5) O se faataʻitaʻiga, seʻi mafaufau i se tagata o loo ʻai sana meaʻai, ma laoa ai. Ua faigatā ona mānava ma amata ai ona vaivai. Ua tau lē mafai foʻi ona tautala. E oti o ia pe a lē vave fai se gaoioiga. O lea, na tapō ai e lana uō lona tua ma taumafai e fesoasoani iā te ia. Atonu e tigā ai lona tua, peitaʻi e mafai ona laveaʻia ai lona ola. I se tulaga talitutusa, na iloa e Tavita e manaʻomia e le tagata amiotonu faasaʻoga tigā mo lona lava lelei.

I le tele o tulaga, o le faateʻaina e avatu ai i le tagata faimea sesē le aʻoaʻiga. Ina ua mavae le pe ā ma le sefulu tausaga, na toe faamamā le olaga o le atalii o Julian lea na taʻua i le amataga. Sa ia toe foʻi i le faapotopotoga ma ua auauna nei o se toeaina. Na ia faapea mai: “O le faateʻaina na ou tofo ai i āuga o aʻu mea sesē. O le ituaiga o faasaʻoga lea na ou manaʻomia.”​—Epe. 12:7-11.

LE AUALA ALOFA E FEUTAGAʻI AI MA LE TAGATA FAATEʻAINA

E moni o le faateʻaina o se tulaga e faanoanoa ai, peitaʻi e lē tatau ona avea o se mala mataʻutia. E tatau ona faia uma so tatou sao ina ia iai se aogā o le faateʻaina.

O taumafaiga e fesoasoani ai i lē ua salamō ina ia toe foʻi iā Ieova

Toeaina. O toeaina e gafa ma le tiute tauave faigatā o le faafesootaʻi o le tagata faateʻaina, e tatau ona taumafai e faaatagia atu le alofa o Ieova. Pe a faailoa i le tagata la latou faaiʻuga, e latou te faamatala atu i se auala manino ma agalelei laasaga e uia ina ia toe foʻi mai ai i le faapotopotoga. O le faamanatu pea i le tagata faateʻaina o le auala e toe foʻi mai ai iā Ieova, e asiasi ai toeaina mai i lea taimi i lea taimi iā i latou ua amata ona suia o latou ala. *

Tagata o le aiga. E faaalia lo latou alolofa i le faapotopotoga ma le tagata faimea sesē e ala i le talia o le faaiʻuga o le faateʻaina. Na faapea mai Julian: “Sa avea pea o ia ma oʻu atalii, ae o le auala na ia ola ai sa lē toe iai ai sa ma faiā.”

Tagata i le faapotopotoga. E latou te faaalia le alofa e faavae i mataupu silisili, e ala i le ʻalofia o fesootaʻiga ma talanoaga ma le tagata faateʻaina. (1 Kori. 5:11; 2 Ioa. 10, 11) E latou te lagolagoina le aʻoaʻiga mai iā Ieova e ala mai i toeaina. E lē gata i lea, e latou te faaalia le alofa ma lagolagosua i le aiga o le tagata faateʻaina o loo matuā mafatia, ma e lē tatau i tagata o le aiga ona mafaufau ua faaesea foʻi i latou mai i uso ma tuafāfine.​—Roma 12:13, 15.

Na faaiʻu le faamatalaga a Julian i le faapea mai: “O le faateʻaina o se faatulagaga e tatou te manaʻomia, e fesoasoani iā i tatou e ola ai i tapulaa a Ieova. E ui ina tigā, ae a o faagasolo taimi o le a maua ai iʻuga lelei. Pe ana ou taliaina amioga leaga a loʻu atalii, semanū e lē toe foʻi mai i le upu moni.”

^ pala. 24 Tagaʻi i Le Olomatamata, Aokuso 15, 1991, itulau e 17-19.