Skip to content

Skip to table of contents

Pe e Tatau Ona Sui Lou Mafaufau?

Pe e Tatau Ona Sui Lou Mafaufau?

UA FILIFILI ni talavou Kerisiano e ō e matamata i se ata tifaga. Sa latou faalogo o talanoa fiafia tamaiti i le aʻoga e faatatau i lea ata. Ae ina ua latou oo atu i le fale tifaga, sa latou vaai ai i pepa o loo faalauiloa ai le ata, o loo faaali mai ai auupega mataʻutia, ma fafine o loo oofu i ofu faatosina. O le ā la latou gaoioiga o le a fai? Po o le a latou ō pea i totonu e matamata i lea ata?

Ua faailoa mai i lenei faataʻitaʻiga, e tatou te feagai ma le tele o filifiliga e iai aafiaga lelei po o ni aafiaga leaga, i lo tatou itu faaleagaga ma la tatou faiā ma Ieova. E iai taimi e tatou te mananaʻo ai e faia se mea. Ae pe a tatou toe mafaufau atili i ai, e toe sui o tatou mafaufau. Po o se mea talafeagai le fai ma sui o tatou mafaufau?

Le Taimi e Lē Talafeagai ai Ona Sui Lou Mafaufau

Na uunaʻia i tatou e le alofa mo Ieova, e tuuina atu o tatou ola iā te ia ma papatiso. E tatou te naunau e tumau faamaoni iā Ieova. Peitaʻi, e maumauaʻi Satani le Tiapolo e gausia lo tatou faamaoni. (Faaa. 12:17) Ua tatou filifili e auauna iā Ieova ma usiusitaʻi i ana faatonuga. O lea, o se tulaga faanoanoa pe a suia o tatou mafaufau i lenei vala, auā e aafia ai o tatou ola.

I le silia ma le 2,600 tausaga ua mavae, na fausia ai e le tupu o Nepukanesa se tupua auro telē, ma faatonuina tagata uma ia ifo ma tapuaʻi i ai. O i latou e lē usiusitaʻi, e lafoina i le ogaumu aasa. Peitaʻi, e leʻi usiusitaʻi i ai auauna e toʻatolu a Ieova o Sataraka, Mesako ma Apeteniko. O lea, na lafoina ai i latou i le ogaumu aasa. Na latou lotomalilie e lamatia o latou ola, ina ia tausisi ai pea i la latou filifiliga e auauna i le Atua, ma na laveaʻiina faavavega i latou e Ieova.​—Tani. 3:1-27.

Sa finafinau foʻi le perofeta Tanielu i le tatalo, e ui sa faamataʻuina o le a lafo o ia  i le lua o leona. Sa tumau pea lana masaniga o le tatalo faatolu iā Ieova i le aso, ma maumauaʻi pea e tapuaʻi atu iā Ieova. O le iʻuga, na faasaoina le perofeta “mai i lima o leona.”​—Tani. 6:1-27.

O loo tausisi foʻi auauna a Ieova i aso nei, i lo latou tuuina atu iā te ia. I se aʻoga i Aferika, na teena ai e se vaega o talavou Molimau a Ieova le faʻalo i le fuʻa. Sa faamataʻuina o le a tutuli i latou mai i le aʻoga pe a lē faia faapea. Mulimuli ane, sa asiasi atu le minisita o aʻoga i le aai lenei, ma talanoa atu i tamaiti Molimau a Ieova. E latou te leʻi fefefe, peitaʻi sa faamatala atu ma le faaaloalo o latou tulaga. Talu mai lenā taimi, e leʻi toe aliaʻe mai lava lenā mataupu. Ua auai uso ma tuafāfine talavou i le aʻoga, e aunoa ma le faamalosia o i latou e faia se mea e faaleagaina ai la latou faiā ma Ieova.

Seʻi mafaufau foʻi i le faaaʻoaʻoga a Iosefa, lea na tigāina lana avā i le kanesa ma maliu faafuaseʻi ai. Sa malamalama ma faaaloalo aiga o Iosefa i ona manaʻoga e faatatau i tū ma aganuu e faia i le maliu. Peitaʻi, e lē upu moni le aiga o lana avā, ma na mananaʻo e faatino nisi o tū masani i le taimi e tanu ai. Na faapea mai Iosefa: “E leʻi suia loʻu mafaufau, o lea na latou taumafai e faaaafia ai ma laʻu fanau. E leʻi suia ai foʻi mafaufau o laʻu fanau. Na latou taumafai e fai ni leo i lo matou fale. Peitaʻi, na ou faailoa i ai, pe a latou maumauaʻi e fai leo, e lē mafai ona faia i loʻu fale. Sa latou iloa e lē talafeagai nei tū ma o maʻua talitonuga ma laʻu avā. O lea, ina ua māeʻa se talanoaga umi, sa faia ai loa faiga leo i se isi nofoaga.

“A o faagasolo nei taimi faanoanoa, sa ou ōle atu iā Ieova mo le fesoasoani ina ia aua neʻi o matou solia ana tulafono. Na faafofoga mai o ia i aʻu tatalo, ma fesoasoani mai iā i matou e tumau faamaoni e ui i omiga.” E leʻi mafaufau Iosefa ma lana fanau e suia la latou filifiliga e usiusitaʻi iā Ieova.

Le Taimi e Mafai ai Ona Sui Lou Mafaufau

I le 32 T.A., na talosaga atu ai se fafine e lē o se Iutaia, iā Iesu ina ia tuliese le temoni mai i lana tama. Sa talosaga atu pea lenei fafine, peitaʻi e leʻi tali ane Iesu. Sa fetalai atu o ia i ona soo: “E leʻi auina mai aʻu i nisi, ae na o mamoe o le aiga o Isaraelu ua leiloloa.” Ae ina ua talosaga atu pea le fafine, ona fetalai atu lea o Iesu: “E lē tatau ona lafo falaoa a tamaiti i tamaʻi taʻifau.” Peitaʻi, o le faatuatua tele o lenei fafine na ia tali atu ai: “E saʻo lava oe le Alii e, a o le mea moni, e ʻai e tamaʻi taʻifau fasi falaoa e paʻuʻū mai i laulau a o latou matai.” Sa talia e Iesu lana talosaga, ma faamālōlōina ai lana tama.​—Mata. 15:21-28.

O le faia faapea, sa faataʻitaʻi ai Iesu iā Ieova i le faaalia o le fetuutuunaʻi pe a manaʻomia. O se faaaʻoaʻoga, na filifili Ieova e faaumatia tagata Isaraelu ina ua latou fausia le tamaʻi povi auro. Peitaʻi, na suia lona finagalo ina ua talosaga atu Mose iā te ia.​—Eso. 32:7-14.

Sa faaaʻoaʻo le aposetolo o Paulo iā Ieova ma Iesu. Sa iai le taimi na lē manaʻo ai Paulo e ave Ioane Mareko i malaga faamisionare, ona sa ia tuulafoaʻia Paulo ma Panapa i le uluaʻi malaga faamisionare. E ui i lea, sa iloa mulimuli ane e Paulo, ua iai se suiga lelei iā Mareko, ma o se tagata foʻi e aogā iā te ia. O lea na ia faapea atu ai iā Timoteo: “Ia oulua ō mai ma Mareko, auā e aogā o ia iā te aʻu i le auaunaga.”​—2 Timo. 4:11.

Ae faapefea i tatou? O le faaaʻoaʻo i lo tatou Tamā alofa mutimutivale ma onosaʻi, o le a tatou iloa ai e mafai foʻi ona sui o tatou mafaufau. O se faaaʻoaʻoga, e mafai  ona sui o tatou manatu e faatatau i isi. E tatou te lē tutusa ma Ieova ma Iesu, auā e tatou te lē lelei atoatoa. Peitaʻi, sa la lotomalilie e fetuutuunaʻi. Pe e lē tatau foʻi la ona tatou lotomalilie e sui o tatou mafaufau e faatatau i isi, pe afai ua tatou malamalama lelei i o latou tulaga?

E talafeagai foʻi ona suia o tatou mafaufau pe a iloilo sini faaleagaga. O nisi o loo suʻesuʻeina le Tusi Paia ma auai i sauniga, peitaʻi e faatuai ona filifili e papatiso. O nisi e faatalatū e auai i le auaunaga paeonia, e ui o loo mafai ona faalautele atu la latou faiva. E lē gata i lea, e iai nisi uso e lē fia aapa atu i faaeaga i le faapotopotoga. (1 Timo. 3:1) Po o tupu lenā mea iā te oe? Ua valaaulia i tatou e Ieova ina ia auai i na vala o le auaunaga. O lea, pe e lē tatau ea ona sui o tatou mafaufau, ma maua ai le olioli i le auauna atu i le Atua ma isi?

O le suia o lou mafaufau e maua ai faamanuiaga

Na faapea mai Ella e faatatau i lana auaunaga i le ofisa o le lālā i Aferika: “Ou te leʻi mafaufau e nofo mo se taimi umi, ina ua ou faatoʻā taunuu i le Peteli. Sa ou naunau e auauna iā Ieova ma le lotoatoa, peitaʻi sa ou matuā misia foʻi loʻu aiga. Sa faalaeiau mai lē sa ma potu faatasi ina ia ou nofo pea. O lea ua mavae le sefulu tausaga, ma ua ou manaʻo e nofo mo se taimi umi e auauna i uso ma tuafāfine e ala i loʻu faaeaga i le Peteli.”

Le Taimi e Tatau ai Ona Sui Lou Mafaufau

Pe e te manatua le mea na tupu iā Kaino ina ua lotoleaga i lona uso ma atili ai ona ita? Na faatonu e le Atua lenei tamāloa ita leaga ia faia le mea lelei, ina ia  maua ai lona finagalo malie. E lē gata i lea, ia pulea lona ita auā ua ʻfaatalitali mai le agasala i le faitotoʻa.’ Sa ono mafai ona suia le mafaufau ma uiga o Kaino, peitaʻi sa ia lē amanaʻia fautuaga a le Atua. Sa fasiotia e Kaino lona uso, ma avea ai o ia ma uluaʻi fasioti tagata.​—Kene. 4:2-8.

Ae faapefea pe ana sui le mafaufau o Kaino?

Seʻi o tatou iloiloina le faaaʻoaʻoga a le tupu o Usia. I le taimi muamua, sa ia faia mea lelei i le silafaga a Ieova ma saʻili atu pea iā te ia. Peitaʻi, e faanoanoa ona sa faamaualuga Usia ma faaleagaina ai mea lelei sa ia faia. Sa ia ulufale atu i le malumalu ma ofo atu mea manogi, e ui e lē o ia o se ositaulaga. Pe na suia lona mafaufau, ina ua lapataʻia o ia e ositaulaga e faatatau i lana gaoioiga faamaualuga? E leai. Sa “matuā ita” Usia ma lē amanaʻia le lapataʻiga. O le iʻuga, na taia o ia e Ieova i le lepela.​—2 No. 26:3-5, 16-20.

E iai taimi e tatau ai ona sui o tatou mafaufau. O se tasi o faaaʻoaʻoga i aso nei, o le uso o Ioakima lea na papatiso i le 1955. Peitaʻi, na faateʻaina o ia i le 1978. I le silia i le 20 tausaga mulimuli ane, sa ia faaalia le salamō ma toe avea ai ma Molimau a Ieova. Sa fesili se toeaina iā te ia i le māfuaaga ua umi ai faatoʻā talosaga mai e toe faaaʻe. Na faapea mai Ioakima: “Sa ou ita ma faamaualuga. Ua ou toe salamō i le umi ona ou faatali. A o oʻu faateʻaina, sa ou iloa o loo aʻoaʻo e Molimau a Ieova le upu moni.” Sa tatau ona sui ona uiga ma faaalia le salamō.

Atonu e tatou te feagai ma tulaga e manaʻomia ai ona sui o tatou mafaufau ma ala. Pe a tatou lotomalilie e faia faapea, o le a faafiafiaina ai Ieova.​—Sala. 34:8.