Skip to content

Skip to table of contents

Sa Ia “Iloa le Ala”

Sa Ia “Iloa le Ala”

NA MUTA le soifuaga faalelalolagi o Guy Hollis Pierce, o se sui o le Vaega Pule o Molimau a Ieova, i le Aso Lua, Mati 18, 2014. E maliu o ia ua 79 ona tausaga, ma taunuu ai lona faamoemoe o le avea ma uso ua toe faatūina o Keriso.​—Epe. 2:10-12; 1 Pete. 3:18.

Sa soifua mai Guy Pierce i Amerika, i Auburn i Kalifonia, iā Novema 6, 1934, ma na papatiso i le 1955. Sa faaipoipo ma lana avā pele o Penny i le 1977, ma tausia aʻe se aiga. O ona uiga faatamā sa pei ai o ia o se tamā i le toʻatele o isi tagata. Sa amata la laʻua auaunaga paeonia ma Penny i le 1982, ae i le 1986, na amata ai ona ia galue o se ovasia matagaluega i le Iunaite Setete mo le 11 tausaga.

Sa amata ona auauna Guy ma Penny Pierce i le Peteli i le Iunaite Setete i le 1997. Sa galue le uso o Guy i le Matagaluega o le Auaunaga, ma i le 1998, na tofia ai o ia e fesoasoani i le Komiti o le ʻAufaigaluega a le Vaega Pule. I le fono faaletausaga a le Watch Tower Bible and Tract Society of Pennsylvania lea na faia iā Oketopa 2, 1999, sa faasilasila ai le avea o le uso o Guy Pierce ma sui o le Vaega Pule. I tausaga talu ai nei, sa auauna o ia i komiti o le ʻAufaigaluega, Tusitusiga, Lomitusi, ma Sooupu.

Sa māfana tagata o atunuu ma aganuu eseese i le uso o Guy, ona o ona laufofoga fiafia ma uiga agamālie. Peitaʻi sa sili ona pele o ia i ona uiga e pei o le alofa, lotomaulalo, tausisi i tulafono ma mataupu silisili amiotonu, ma lona faatuatua atoatoa iā Ieova. Sa manatu Guy Pierce e ono iai se aso e lē oso mai ai le lā, ae o folafolaga uma a Ieova e lē mafai ona lē taunuu. Sa manaʻo foʻi o ia e taʻu atu i le lalolagi atoa lenā upu moni.

Sa matuā maelega le uso o Guy i le auaunaga iā Ieova, auā sa vave ona amata faigaluega i taeao uma, ma e masani ona tuai ona mānava i pō. Sa faimalaga o ia i vaipanoa eseese o le lalolagi ina ia faalaeiau i ona uso ma tuafāfine Kerisiano. Sa ia faaavanoa lona taimi e faifaimea faatasi ai ma sui taʻitasi o le aiga Peteli, faapea isi sa manaʻomia se fesoasoani ma ni ana fautuaga. E tusa lava foʻi po o le ā le tele o tausaga ua mavae, e manatua pea e uso ma tuafāfine ona uiga talimālō, faaleuō, ma ana fautuaga mai i le Tusi Paia.

O loo soifua pea le avā a lo tatou uso ma le uō pele, le fanau e toʻaono, faapea fanau a lana fanau ma fanau o fanau a lana fanau. Sa iai foʻi le toʻatele o ana fanau faaleagaga. O Mark Sanderson, o se sui o le Vaega Pule, sa faia le lauga o le maliu o le uso o Guy Pierce i le Peteli i Brooklyn, i le Aso Toonaʻi, Mati 22, 2014. Sa talanoa o ia e faatatau i le faamoemoe faalelagi o le Uso o Guy ma faitau fetalaiga a Iesu e faapea: “E tele mea e nonofo ai i le maota o loʻu Tamā. . . . Afai foʻi ou te alu ma sauni se nofoaga mo outou, ou te toe sau ona ou talia lea o outou, ina ia iai foʻi outou i le mea ou te iai. O le mea ou te alu i ai, ua outou iloa le ala.”​—Ioa. 14:2-4.

E mautinoa e tatou te matuā misia le uso o Guy Pierce. Peitaʻi, e tatou te fiafia ona sa ia “iloa le ala” i le ʻmea e nofo’ ai e faavavau.