Skip to content

Skip to table of contents

E Avea Outou “ma Malo o Ositaulaga”

E Avea Outou “ma Malo o Ositaulaga”

“E avea outou ma malo o ositaulaga ma le nuu paia.”​—ESO. 19:6.

1, 2. O le ā le puipuiga na manaʻomia e le fanau a le fafine, ma aiseā?

E TĀUA tele le uluaʻi valoaga o loo faamauina i le Tusi Paia, i le faataunuuina o le finagalo o Ieova. Ina ua faia le folafolaga i Etena, na fetalai le Atua: “Ou te faatupuina le feitagaʻi i le va o oe [Satani] ma le fafine, ma i le va o lau fanau ma lana fanau.” O le ā le mataʻutia o lenei feitagaʻiga? Na fetalai Ieova: “O le a ia [le fanau a le fafine] tuʻimomomoina oe [Satani] i le ulu, ae o le a e tuʻimomomoina o ia i le mulivae.” (Kene. 3:15) E matuā mataʻutia le feitagaʻiga i le va o le gata ma le fafine, auā ua taumafai malosi Satani e tafiesea le fanau a le fafine.

2 E lētioa a ōle atu le faisalamo i le Atua e faatatau i Ona tagata filifilia, i le tatalo e faapea: “Faauta! ua vāvāō ou fili; ma ua ea foʻi i luga ulu o ē e matuā ita iā te oe. Ua faatogafiti ona latou talanoa faalilolilo e faatatau i lou nuu; ma ua latou taupulepule foʻi faasaga i ē ua e natia. Ua latou faapea ane: ʻInā ō mai ia ma seʻi o tatou faaumatia i latou ia lē toe avea ma nuu.’” (Sala. 83:2-4) Sa tatau ona puipuia le gafa e tupuga mai ai le fanau a le fafine, ia lē faaumatia ma faaleagaina. O lea na faia ai e Ieova isi faatulagaga faaletulafono, ina ia puipuia ai le faataunuuina o lona finagalo.

 SE FEAGAIGA E PUIPUIA AI LE FANAU

3, 4. (a) O anafea na amata ai le feagaiga o le Tulafono, ma o le ā na lotomalilie le nuu o Isaraelu e fai? (e) O le ā sa fuafuaina e puipuia i le feagaiga o le Tulafono?

3 A o faatupulaʻia i le faitau miliona ē na tupuga mai iā Aperaamo, Isaako ma Iakopo, na faia aʻe e Ieova le nuu o Isaraelu anamua mai iā i latou. E ala iā Mose, na faia ai e Ieova se feagaiga faapitoa ma le nuu o Isaraelu e ala i le tuuina atu i ai o le Tulafono, ma na latou talia āiāiga o lenā feagaiga. O lenā feagaiga ua taʻua o le feagaiga o le Tulafono. Ua taʻua i le Esoto 24:3-8: “Ua ia [Mose] ave le tusi o le feagaiga ma faitau atu a o faalogo mai le nuu. Ona latou faapea mai lea: ʻO mea uma ua fetalai mai ai Ieova, e matou te malilie e fai ma usiusitaʻi i ai.’ Ona ave lea e Mose o le toto ma sausau ai le nuu ma faapea atu: ʻO le toto lenei o le feagaiga ua osia e Ieova ma outou e tusa ai ma upu uma ua outou faalogo i ai.’”

4 Na amata le feagaiga o le Tulafono i le Mauga o Sinai i le 1513 T.L.M. O lenā feagaiga na avea ai Isaraelu anamua ma nuu filifilia o le Atua. Na avea Ieova ma ʻo latou Faamasino, o lo latou Faitulafono, ma o lo latou Tupu.’ (Isa. 33:22) Ua faaalia mai i le talafaasolopito o Isaraelu le mea e tupu, pe afai e usitaʻia pe lē amanaʻia foʻi tapulaa amiotonu a le Atua. Sa faasā i le Tulafono ona faaipoipo atu i tagata faapaupau ma auai i tapuaʻiga sesē. Sa fuafuaina le Tulafono ina ia puipuia ai le gafa o Aperaamo mai i le faaleagaina.​—Eso. 20:4-6; 34:12-16.

5. (a) O le ā le faaeaga na maua e Isaraelu ona o le feagaiga o le Tulafono? (e) Aiseā na teena ai e le Atua Isaraelu?

5 Na saunia foʻi i le feagaiga o le Tulafono se faatulagaga mo le faiva faaositaulaga, e faaāta mai ai se faatulagaga sili i le lumanaʻi. (Epe. 7:11; 10:1) O lenā feagaiga na maua ai e Isaraelu le faaeaga mataʻina o le avea “ma malo o ositaulaga,” ma sa tatau ona latou usitaʻia tuutuuga o tulafono a Ieova. (Faitau le Esoto 19:5, 6.) Peitaʻi, e leʻi usitaʻia e Isaraelu nei tuutuuga. E latou te leʻi talia le Mesia, o le vaega autū o le fanau a Aperaamo, ae na latou teena o ia. O le iʻuga, na teena e le Atua i latou.

O le lē usiusitaʻi o Isaraelu e leʻi uiga ai e faapea ua lē taulau le feagaiga o le Tulafono (Tagaʻi i le palakalafa 3-6)

6. O le ā le fuafuaga o le Tulafono?

6 Talu ai e leʻi tumau ona faamaoni Isaraelu iā Ieova, o lea e leʻi avea ai i latou ma malo o ositaulaga. Peitaʻi, e leʻi faapea ai ua lē taulau le Tulafono. Sa fuafuaina le Tulafono ina ia puipuia ai le fanau ma faailoa atu i tagata le Mesia, ma na manino mai le fuafuaga o le Tulafono ina ua afio mai Keriso i le lalolagi ma iloa o ia. Ua taʻua i le Roma 10:4, “o le iʻuga o le Tulafono o Keriso lea.” Ae o loo tumau pea le fesili: O ai la o le a maua le avanoa e avea ma malo o ositaulaga? Na  saunia e Ieova se isi feagaiga faaletulafono ina ia faia aʻe ai se nuu fou.

ALIAʻE MAI SE NUU FOU

7. O le ā na valoia e Ieova e ala mai iā Ieremia?

7 A o leʻi taitai ona faalēaogāina le feagaiga o le Tulafono, sa valoia e Ieova e ala mai i le perofeta o Ieremia, o le a Ia osia “se feagaiga fou” ma le nuu o Isaraelu. (Faitau le Ieremia 31:31-33.) O lenā feagaiga e lē pei o le feagaiga o le Tulafono, auā e mafai ona faamagaloina ai agasala e aunoa ma le faia o ni taulaga i manu. E faapefea ona tupu lenā mea?

8, 9. (a) O le ā ua mafai ona faia ona o le toto maligi o Iesu? (e) O le ā le faaeaga na tatalaina mo ē e iai i le feagaiga fou? (Tagaʻi i le ata i luga aʻe o le matua.)

8 I senituri mulimuli ane, na faavae ai e Iesu le Talisuaga Afiafi a le Alii iā Nisani 14, 33 T.A. Na faapea atu Iesu i ona aposetolo faamaoni e toʻa 11 e faatatau i le ipu uaina: “O lenei ipu, o le faatusa lea o le feagaiga fou e ala i loʻu toto lea o le a faamaligiina mo outou.” (Luka 22:20) O loo sii mai i le Mataio 26:27, 28 fetalaiga a Iesu e faatatau i le uaina e faapea: “O le faatusa lenei o loʻu toto o le ʻtoto o le feagaiga,’ e faamaligiina mo tagata e toʻatele e faamagalo ai agasala.”

9 O le toto maligi o Iesu ua faamausalīina ai le feagaiga fou, ma ua mafai ai foʻi ona faamagaloina atoatoa agasala a le toʻatele. E lē aofia ai Iesu i le feagaiga fou, auā e leai sana agasala ma e na te lē manaʻomia se faamagaloga. Peitaʻi, ua mafai ona faaaogā e le Atua le tāua o le toto maligi o Iesu i le fanau a Atamu. Ua mafai foʻi ona ia vaetamaina nisi o tagata faamaoni e fai ma “atalii,” e ala i le faauuina o i latou i le agaga paia. (Faitau le Roma 8:14-17.) Ua mafai ona silasila le Atua iā i latou e pei ona ia silasila i lona Alo o Iesu, o lē e leai sana agasala. O nei Kerisiano faauuina o le a avea ma “suli faatasi ma Keriso,” ma maua le avanoa e avea ai ma “malo o ositaulaga.” O lenei faaeaga sa ono mafai ona maua e le nuu o Isaraelu i lalo o le Tulafono. E tusa ai o ē e “suli faatasi ma Keriso,” na taʻua e Peteru: “O outou o ʻse vaega ua filifilia, o ositaulaga ua avea ma tupu, o le nuu paia, o tagata ua faapitoa mo le Atua, ina ia outou faalauiloa atu uiga silisili ona lelei’ o lē na valaauina outou mai i le pōuliuli i lona malamalama ofoofogia.” (1 Pete. 2:9) E tāua tele le feagaiga fou! Ua mafai ai ona avea soo o Iesu ma vaega lona lua o le fanau a Aperaamo.

UA AMATA LE FEAGAIGA FOU

10. O anafea na amata ai le feagaiga fou, ma aiseā na faatoʻā amata ai i lenā taimi?

10 O anafea na amata ai le feagaiga fou? E leʻi amataina ina ua taʻua e Iesu i le pō o le Talisuaga Afiafi a le Alii. Ina ia faamausalī lenei feagaiga, sa tatau ona faamaligiina le toto o Iesu ma ofo atu le tāua o lona toto iā Ieova i le lagi. Sa manaʻomia foʻi ona liligi ifo le agaga paia i luga o ē e fai ma “suli faatasi ma Keriso.” O lea, na amata le feagaiga fou i le Penetekoso 33 T.A., ina ua faauuina soo faamaoni o Iesu i le agaga paia.

11. (a) Na faapefea i le feagaiga fou ona mafai ai ona avea tagata Iutaia ma tagata o Nuu Ese, ma vaega o le Isaraelu faaleagaga? (e) E toʻafia e iai i le feagaiga fou?

11 Sa peiseaʻī na “faalēaogāina” le uluaʻi feagaiga o le Tulafono, ina ua faailoa mai e Ieova e ala iā Ieremia o le a Ia osia se feagaiga fou ma Isaraelu. Peitaʻi, na faatoʻā muta le feagaiga o le Tulafono ina ua amata le feagaiga fou. (Epe. 8:13) Ina ua tupu lenā mea, sa tutusa le silasila a Ieova i tagata Iutaia ma tagata o Nuu Ese e leʻi peritomeina na talitonu, auā ʻua peritomeina i o latou  loto e ala i le agaga, ae e lē tusa ma le tulafono na tusia.’ (Roma 2:29) Na tuuina e le Atua ana tulafono ʻi o latou mafaufau, ma e na te tusia i o latou loto’ e ala i le osia o le feagaiga fou ma i latou. (Epe. 8:10) O le aofaʻi o ē e iai i le feagaiga fou e 144,000, ma ua faia aʻe ai se nuu fou, o “le Isaraelu a le Atua” po o le Isaraelu faaleagaga.​—Kala. 6:16; Faaa. 14:1, 4.

12. E faapefea ona faatusatusa le feagaiga o le Tulafono ma le feagaiga fou?

12 E faapefea ona faatusatusa le feagaiga o le Tulafono ma le feagaiga fou? O le feagaiga o le Tulafono e i le va o Ieova ma Isaraelu faaletino, a o le feagaiga fou e i le va o Ieova ma le Isaraelu faaleagaga. Sa avea Mose ma puluvaga o le feagaiga o le Tulafono, ae sa avea Iesu ma puluvaga o le feagaiga fou. Sa faamaonia le feagaiga o le Tulafono i le toto o manu, ae sa faamaonia le feagaiga fou i le toto maligi o Iesu. Sa faamaopoopoina le nuu o Isaraelu e ala i le feagaiga o le Tulafono i le taʻitaʻiga a Mose, a ua faamaopoopoina i latou e i le feagaiga fou i le taʻitaʻiga a Iesu le Ulu o le faapotopotoga.​—Efe. 1:22.

13, 14. (a) O le ā le fesootaʻiga o le feagaiga fou i le Malo? (e) O le ā e manaʻomia mo le Isaraelu faaleagaga ina ia mafai ai ona pule faatasi ma Keriso i le lagi?

13 E fesootaʻi atu le feagaiga fou i le Malo, ona ua saunia ai se nuu paia e maua le faaeaga o le avea ma tupu ma ositaulaga i lenā Malo i le lagi. O lenā nuu ua faia aʻe ai le vaega lona lua o le fanau a Aperaamo. (Kala. 3:29) O lea, o le feagaiga fou ua faamalosia ai le feagaiga ma Aperaamo.

14 E toe tasi le vala o le Malo e tatau ona faavaeina. Manatua foʻi, o le feagaiga fou ua maua ai le Isaraelu faaleagaga, ma ua fai ma faavae mo ona sui e avea ai ma “suli faatasi ma Keriso.” Peitaʻi, e manaʻomia se feagaiga faaletulafono, ina ia mafai ai ona faataga i latou e faatasi ma Iesu i lona Malo o ni tupu ma ositaulaga i le lagi.

SE FEAGAIGA UA MAFAI AI ONA PULE FAATASI ISI MA KERISO

15. O le ā le feagaiga patino na faia e Iesu ma ona aposetolo faamaoni?

15 Ina ua uma ona faavaeina le Talisuaga Afiafi a le Alii, sa faia e Iesu se feagaiga ma ona aposetolo faamaoni, lea e masani ona taʻua o le feagaiga o le Malo. (Faitau le Luka 22:28-30.) O lenei feagaiga e lē pei o isi feagaiga ia e aofia ai Ieova. Peitaʻi, e patino i le va o Iesu ma ono soo faauuina. Ina ua fetalai Iesu e faapea, “e pei lava ona osia e loʻu Tamā se feagaiga ma aʻu,” e mautinoa sa faasino atu o ia i le feagaiga na faia i le va o i laʻua ma Ieova, e avea ai o ia ma “ositaulaga e faavavau e uiga faatasi ma Mekisateko.”—Epe. 5:5, 6.

16. O le ā ua mafai ona maua e Kerisiano faauuina ona o le feagaiga o le Malo?

16 Sa tumau aposetolo faamaoni e toʻa 11 ʻiā Keriso i taimi o ona puapuaga.’ Sa faamautinoa atu iā i latou i le feagaiga o le Malo, o le a latou faatasi ma Iesu i le lagi, ma nonofo i nofoālii e pule o ni tupu ma auauna o ni ositaulaga. Peitaʻi, e lē na o i latou e toʻa 11 e mauaina lenā faaeaga. Sa faaali atu Iesu i se faaaliga iā Ioane ma faapea atu: “O lē e manumalo ou te aumaia o ia ma te nonofo faatasi i loʻu nofoālii, e pei foʻi ona ou manumalo ma nonofo faatasi ma loʻu Tamā i lona nofoālii.” (Faaa. 3:21) O lea, ua faia le feagaiga o le Malo faatasi ma Kerisiano faauuina e 144,000. (Faaa. 5:9, 10; 7:4) O lenei feagaiga ua faia ai se faavae faaletulafono mo i latou e pule faatasi ma Iesu i le lagi. E talitutusa lea ma se tamaʻitaʻi faaipoipo  mai i se aiga taualoa, atonu e faaipoipo atu i se tupu ma mafai ai ona la pule faatasi ma le tupu. O loo taʻua Kerisiano faauuina i le Tusi Paia o le “tamaʻitaʻi faaipoipo” a Keriso, ma “o se taupou mamā” ua tautō e faaipoipo atu i le Keriso.​—Faaa. 19:7, 8; 21:9; 2 Kori. 11:2.

IA FAATUATUA MAUSALĪ I LE MALO O LE ATUA

17, 18. (a) Faamatala mai feagaiga e ono na tatou talanoaina e fesootaʻi atu i le Malo. (e) Aiseā e mafai ai ona tatou faatuatua ma le mausalī i le Malo?

17 O feagaiga uma na tatou talanoaina i nei mataupu e lua, e fesootaʻi atu i se vala tāua se tasi pe sili atu o le Malo. (Tagaʻi i le siata “Auala o le a Faataunuu ai e le Atua Lona Finagalo.”) Ua faamatilatila mai ai, o le faatulagaga o le Malo ua faavaeina ma le mausalī i feagaiga faaletulafono. O lea, ua iā i tatou māfuaaga maumaututū e faatuatua atoatoa ai e faapea, ua faaaogā e le Atua le Malo faa-Mesia ina ia faataunuu ai lona finagalo na iai i le amataga mo le lalolagi ma tagata.​—Faaa. 11:15.

O le a faataunuu e Ieova lona finagalo mo le lalolagi e ala i le Malo Faa-Mesia (Tagaʻi i le palakalafa 15-18)

18 E lē taumatea o mea o le a faataunuuina i le Malo o le a aumaia ai faamanuiaga tumau mo le fanau a tagata. O le mautinoa atoatoa e mafai ai ona tatou faalauiloa atu ma le maumauaʻi e faapea, o le Malo o le Atua ua na o le pau lea o le vaifofō tumau mo faafitauli uma o tagata. O lea, tau ina ia tatou folafola atu ma le maelega lenā upu moni i isi!​—Mata. 24:14.