Skip to content

Skip to table of contents

Ia Faapelepele i Lou Faaeaga o le Galulue Faatasi ma Ieova

Ia Faapelepele i Lou Faaeaga o le Galulue Faatasi ma Ieova

“O i matou o le ʻaufaigaluega faatasi ma le Atua.”​—1 KORI. 3:9.

1. O ā faalogona o Ieova e faatatau i galuega, ma ona o lea, o le ā ua ia faia?

E FIAFIA Ieova i ana galuega e fai. (Sala. 135:6; Ioa. 5:17) Ina ia fiafia foʻi ana foafoaga atamamai ma lagona le faamalieina i mea e latou te faia, o lea ua tofia mai ai e Ieova iā i latou ni galuega e fiafia ma faamalieina. O se faaaʻoaʻoga, sa ia faaaofia lona Alo ulumatua i Ana galuega o le foafoaga. (Faitau le Kolose 1:15, 16.) Ua taʻua i le Faataoto 8:30 a o leʻi afio mai Iesu i le lalolagi, sa faatasi o ia ma le Atua i le lagi “o se tufuga poto.”

2. O le ā e faaalia ai o loo tofia atu pea i foafoaga agaga galuega tāua ma faamalieloto?

2 O loo iai i le Tusi Paia mai i le amataga seʻia oo i le faaiʻuga, le tele o faaaʻoaʻoga e faaalia ai e tofia atu pea e Ieova galuega i ona atalii agaga. Ina ua agasala Atamu ma Eva ma tuliesea mai i le Parataiso, sa “tuu ai [e le Atua] kerupi i le itu i sasaʻe o le faatoʻaga o Etena, ma le pelu afi mumū o loo taavili pea, e leoleo ai le ala i le laau o le ola.” (Kene. 3:24) Ua taʻua foʻi i le Faaaliga 22:6, ʻna auina mai e Ieova lana agelu ina ia faaali mai i ana pologa o mea ua toeitiiti ona tutupu lea.’

 AE FAAPEFEA TAGATA?

3. Sa faapefea ona faaaʻoaʻo Iesu i lona Tamā a o iai i le lalolagi?

3 A o iai Iesu i le lalolagi, sa ia faia ma le fiafia le galuega na tuuina atu i ai e Ieova, ma faaaʻoaʻo i lona Tamā e ala i le tofia atu foʻi o galuega tāua i ona soo. Ina ia faaosofia i latou e naunau i le galuega o le a latou faia, na fetalai atu Iesu: “E moni, e moni, ou te fai atu iā te outou, O lē e faatuatua mai iā te aʻu; e na te faia galuega na ou faia, ma na te faia foʻi galuega e sili atu, auā ua ou alu atu i loʻu Tamā.” (Ioa. 14:12) Ina ia faamatilatila le faanatinati o na galuega, na fetalai Iesu: “E tatau ona tatou faia galuega a lē na auina mai aʻu manū o ao; e oo mai le pō, e lē mafai ona toe galue ai se tasi.”​—Ioa. 9:4.

4-6. (a) Aiseā e tatou te lotofaafetai ai ona na faataunuu e Noa ma Mose galuega na tofia atu e Ieova iā i laʻua? (e) O ā iʻuga e maua mai i galuega uma ua tofia mai e Ieova i tagata?

4 A o leʻi taitai foʻi oo i aso o Iesu, sa tuuina mai i tagata galuega faamalieloto e latou te faia. E ui lava e leʻi taulau Atamu ma Eva i le faia o galuega na tofia atu e la te faia, ae na iai lava isi sa faia galuega na poloaʻia e le Atua i latou e fai. (Kene. 1:28) Sa tuuina atu faatonuga maʻoti iā Noa i le auala e fau ai le vaa ina ia faasaoina ai mai i le Lolo. Sa ia faia e pei ona poloaʻi atu ai Ieova. E tatou te lotofaafetai i lona faamaoni lea ua mafai ai ona tatou ola mai i aso nei!​—Kene. 6:14-16, 22; 2 Pete. 2:5.

5 Sa tuuina atu faatonuga maʻoti iā Mose mo le fausiaina o le faleʻie paia, ma le faamaopoopoina o le faiva faaositaulaga. Sa faia e Mose e pei ona faatonuina ai o ia. (Eso. 39:32; 40:12-16) E oo mai lava i aso nei o loo tatou maua aogā i lona faamaoni e faataunuu lenā tofiga. E faapefea? Na taʻua e Paulo o le faleʻie paia ma le faaositaulaga, ua faaāta mai ai “mea lelei i le lumanaʻi.”​—Epe. 9:1-5, 9; 10:1.

6 E eseese galuega e tofia atu e Ieova i ana auauna mai i lea taimi i lea taimi, e fua i le agaʻi i luma o le faataunuuina o lona finagalo. Peitaʻi, e faamamaluina pea Ieova ma maua e tagata talitonu aogā mai i galuega uma ua tofia atu iā i latou. E moni lenei manatu pe a fua i mea na faataunuu e Iesu, a o leʻi afio mai i le lalolagi ma a o soifua i le lalolagi. (Ioa. 4:34; 17:4) I se tulaga talitutusa, e faamamaluina Ieova i galuega ua tofia mai iā i tatou i aso nei. (Mata. 5:16; faitau le 1 Korinito 15:58.) Aiseā?

IA IAI PEA SE VAAIGA SAʻO I TOFIGA

7, 8. (a) O le ā le galuega ua maua e Kerisiano le faaeaga e faia i aso nei? (e) O le ā le auala e tatau ona tatou tali atu ai i taʻiala a Ieova?

7 O se faaeaga le valaaulia e Ieova o tagata lē lelei atoatoa, e auauna o se ʻaufaigaluega faatasi ma ia. (1 Kori. 3:9) O ē o loo aofia i le fausiaina o Maota mo Fonotaga, Maota mo Sauniga ma ofisa o lālā, o loo faia sa latou vaega i se polokalame o faugāfale i le itu faaletino, e pei ona faia e Noa ma Mose. E tusa po o e galue i le toe faaleleia o se Maota mo Sauniga i lou vaipanoa, po o le fausiaina o la tatou ofisa ulu i Warwick i Niu Ioka, ia faapelepele i lenā faaeaga auā o se auaunaga paia. (Tagaʻi i le ata i luga aʻe o le matua.) Peitaʻi, ua valaaulia Kerisiano uma e auai i se polokalame o faugāfale i le itu faaleagaga. Ua saunia foʻi lenei galuega ina ia faamamaluina ai Ieova, ma maua e tagata usiusitaʻi aogā. (Galu. 13:47-49) Ua saunia mai e le faalapotopotoga a le Atua taʻiala talafeagai, i le auala e sili ona lelei e faatino ai lenei galuega. O lea, o nisi taimi atonu e tuuina mai ai iā i tatou ni tofiga fou.

8 E naunau i taimi uma auauna faamaoni a  Ieova e gauaʻi atu i ana taʻiala. (Faitau le Eperu 13:7, 17.) Atonu i le taimi muamua e tatou te lē malamalama atoatoa, i māfuaaga e faatino ai o tatou tofiga i se auala patino. Peitaʻi, ua tatou iloa lelei aogā e maua mai i le lagolagosua iā Ieova, i so o se fetuunaʻiga e na te silafia ua tatau ona faia.

9. O le ā le faaaʻoaʻoga ua faataatia e toeaina mo le faapotopotoga?

9 E faaalia le matuā naunau o toeaina e faataunuu le finagalo o Ieova, i le auala e latou te taʻimua ai i le faapotopotoga. (2 Kori. 1:24; 1 Tesa. 5:12, 13) E latou te lotomalilie e galulue mamafa ma mulimuli i suiga e tulaʻi mai. E latou te naunau e fetuunaʻi i auala fou e faatino ai le galuega talaʻi o le Malo o le Atua ua faavaeina. O nisi atonu na faatalatū i le taimi muamua i le faatulagaga o le molimau atu i telefoni, uafu po o nofoaga faitele. Ae na mulimuli ane latou mātauina iʻuga lelei. O se faaaʻoaʻoga, na faatulaga e toeaina ni paeonia se toʻafā i Siamani, e galulue i se oganuu pisinisi ua umi e leʻi toe galueaʻiina. Ua taʻua e Michael: “Ua tele tausaga e leʻi toe faia lenei ituaiga o auaunaga, o lea sa matou matuā popole ai. Atonu sa silafia mai e Ieova lenei tulaga, auā sa ia aumaia se taeao manaia i le talaʻiga, ma e lē faagaloina. Maʻeu le fiafia ona sa matou mulimuli i taʻiala mai i La Tatou Faiva o le Malo, ma faalagolago i le fesoasoani a Ieova!” Po o e naunau e faataʻitaʻi i lau oganuu metotia fou e talaʻi ai?

10. O ā suiga na faia talu ai nei i le faalapotopotoga?

10 O nisi taimi e iai suiga e manaʻomia ona faia i le faalapotopotoga. I tausaga talu ai nei, na tuufaatasia ai nisi o ofisa o lālā. E ui lava o na suiga sa manaʻomia ai i uso ma tuafāfine na galulue i nei ofisa ona faia ni fetuunaʻiga, ae e leʻi umi ae iloa e i latou uma na aofia ai aogā o nei suiga. (Fai. 7:8) Ua matuā olioli na tagata faigaluega, ona o le lotomalilie e faia se vaega i le talafaasolopito o tagata o Ieova!

11-13. O ā luʻi ua fesagaʻi ma nisi ona o suiga i le faalapotopotoga?

11 E tatou te aʻoaʻoina ni lesona tāua mai i ē na aafia tuusaʻo i suiga o lālā na tuufaatasi. O nisi sa auauna faataimi atoa mo le tele o tausaga, i aiga Peteli sa vaavaaia le galuega i o latou atunuu. Sa iai se ulugalii na auauna i se aiga Peteli toʻaitiiti i Amerika Tutotonu, ae na talosagaina e ō atu i se aiga Peteli i Mekisikō, e toetoe 30 taimi e telē atu ai i le aiga Peteli i Amerika Tutotonu. Ua faapea mai Rogelio: “Sa faigatā tele ona tuua aiga ma uō.” Ua taʻua e Juan, o se isi foʻi uso na talosagaina e siitia atu i Mekisikō, sa pei lava ua toe amata lona olaga. E ao ona ia faamasani i aganuu ma auala fou e mafaufau ai.

12 Sa talosagaina tagata Peteli mai i isi atunuu o Europa e siitia atu i le ofisa o le lālā i Siamani, ma sa fesagaʻi foʻi i latou ma luʻi. O nisi na siitia mai i Suisilani, sa latou matuā misia vaaiga i atumauga matagofie o Alpine. Sa misia e i latou na siitia mai i Oseteria le iai i se aiga Peteli e toʻaitiiti.

13 Mo ē ua siitia atu i se isi atunuu, e ao ona latou faamasani i fale fou e nonofo ai, le galulue faatasi ma uso ma tuafāfine e latou te leʻi iloa muamua, ma atonu foʻi i se galuega fou. Ua tofia i latou i se faapotopotoga fou ma talaʻi i se oganuu fou, pe atonu foʻi e talaʻi i se isi gagana. E faigatā tele ona faia na suiga. Peitaʻi, o le toʻatele o tagata Peteli ua latou taliaina ma faia. Aiseā ua latou faia ai faapea?

14, 15. (a) Ua faaalia faapefea e le toʻatele e latou te faapelepele i le faaeaga, o le galulue faatasi ma Ieova i so o se galuega? (e) O le ā le vala ua avea ai i latou ma faaaʻoaʻoga mo i tatou uma?

14 Ua faapea mai Grethel: “Sa ou talia le valaaulia ona o le auala lenā e faaalia atu ai  iā Ieova, e sili atu loʻu alofa iā te ia i lo o se atunuu, se fale po o se faaeaga.” Ua faapea mai Dayska: “Sa ou talia ma le fiafia le valaaulia ona na ou iloa e mai iā Ieova.” Ua faapea mai André ma Gabriela: “Na ma vāai i lenei tulaga o se isi avanoa lea e auauna ai iā Ieova, e ala i le lē amanaʻia o o ma faanaunauga faaletagata. Na ma faapea ifo, ʻPe a aumaia e Ieova ni suiga, e sili ona lelei pe a talia nai lo o le faatautee i ai.’”

O lo tatou faaeaga silisili, o le avea ma ʻaufaigaluega faatasi ma Ieova!

15 Ina ua tuufaatasia lālā, na toe tofia nisi tagata Peteli e auauna o ni paeonia. O le tulaga lenā na tupu i nisi ina ua tuufaatasia lālā i Tenemaka, Nouē ma Suetena, ina ia faia aʻe ai le ofisa o le lālā o Scandinavia. Ua faapea mai Florian ma Anja: “Sa ma vāai i lo ma tofiga fou o se luʻi, ae o se mea foʻi e fiafia ai. O se fiafiaga le faaaogā o i maʻua e Ieova e tusa lava po o fea e ma te auauna ai. E mafai ona faapea atu ma le faamaoni, ua matuā faamanuiaina i maʻua!” E ui lava o le toʻatele o i tatou atonu e lē o faia ni fetuunaʻiga faapena, ae e mafai ona tatou faaaʻoaʻo i nei uso ma tuafāfine, ua lotomalilie e faamuamua manaʻoga o le Malo. (Isa. 6:8) E faamanuia pea e Ieova i latou e faapelepele i lo latou faaeaga o le galulue faatasi ma ia, e tusa po o fea e galulue ai.

IA OLIOLI PEA I LOU FAAEAGA O LE GALULUE FAATASI MA IEOVA

16. (a) O le ā ua taʻu mai i le Kalatia 6:4 iā i tatou e fai? (e) O le ā le faaeaga silisili e mafai ona maua e so o se tasi?

16 O i tatou o tagata lē lelei atoatoa, e masani ona faatusatusa i tatou i isi. Peitaʻi, ua taʻua i le Tusi Paia e ao ona tatou taulaʻi atu i mea e mafai ona tatou faia. (Faitau le Kalatia 6:4) O le toʻatele o i tatou e lē o iai i se tulaga pule i le faalapotopotoga, ma e lē o i tatou uma foʻi e mafai ona avea ma paeonia po o ni misionare, pe auauna i Peteli. E mautinoa o nei tofiga o ni faaeaga mananaia! Peitaʻi, ia aua neʻi galo, o i tatou uma lava o loo faia se sao i le faaeaga silisili e mafai e so o se tasi ona ia mauaina. O lenā faaeaga, o le avea lea ma ʻaufaigaluega faatasi ma Ieova i le faiva  faa-Kerisiano. O lea, tau ina ia tatou faapelepele i lenei faaeaga!

17. (a) O le ā le tulaga moni o le a faaauau ona iai a o iai pea lenei lalolagi a Satani? (e) Aiseā e lē tatau ai ona avea lenā ma itu e tatou te faavaivai ai?

17 A o iai pea lenei lalolagi a Satani, atonu e tapulaa mea e mafai ona tatou faia i le auaunaga iā Ieova. Atonu e lē mafai ona tatou puleaina o tatou tiute tauave i le aiga, faafitauli i le soifua mālōlōina po o isi tulaga. Peitaʻi, e lē tatau ona avea lenā ma itu e tatou te faavaivai ai. Ia aua neʻi galo, e mafai ona lua galulue faatasi ma le Atua e ala i le molimau atu i lona suafa, ma faalauiloa atu lona Malo i so o se avanoa e maua. O le mea e sili ona tāua, ia fai le mea sili e te mafaia e galulue faatasi ai ma Ieova, ma tatalo ia faamanuia i ou uso ma tuafāfine, o ē e sili atu mea e mafai ona latou faia nai lo o oe. Ia manatua, o so o se tagata lava e viviia le suafa o Ieova, e tāua o ia i lana silafaga!

18. O ā mea e ao ona tatou lotomalilie e tuu ese, ma aiseā?

18 E ui lava i o tatou vaivaiga ma tulaga lē lelei atoatoa, ae e finagalo Ieova e faaaogā i tatou o se ʻaufaigaluega faatasi ma ia. Maʻeu le talafeagai mo i tatou ona faapelepele i lo tatou faaeaga, o le galulue faatasi ma lo tatou Atua i nei aso e gata ai! O lea, ia tatou lotomalilie e tuu ese le tele o mea e tatou te fiafia e fai. Ua tatou iloa, i le lalolagi fou a Ieova, o le a tatou olioli i “le ola moni,” o le ola e faavavau i tulaga fiafia ma filemu.​—1 Timo. 6:18, 19.

Po o e faapelepele i lou faaeaga o le auauna iā Ieova? (Tagaʻi i le palakalafa 16-18)

19. O le ā le faamoemoe o le a tuuina mai e Ieova mo i tatou i le lumanaʻi?

19 A o tatou tulata atu i le lalolagi fou, seʻi manatu i upu a Mose na fai atu i tagata Isaraelu, a o toeitiiti ulu atu i le Nuu Folafolaina. Na faapea atu o ia: “O le a faapogaia e Ieova lou Atua ina ia lava ma totoe mea ua e maua i galuega a ou lima.” (Teu. 30:9) Pe a māeʻa Amaketo, o le a tuuina mai e Ieova i ē o loo pisi e galulue faatasi ma ia, le laueleele na ia folafolaina mai mo i latou. I lenā taimi, o le a tatou uaʻi atu ai i se tofiga fou, o le galueaʻiina lea o le lalolagi e avea ma parataiso matagofie!