Skip to content

Skip to table of contents

Ia Manatua i Latou o Loo i le Auaunaga Faataimi Atoa

Ia Manatua i Latou o Loo i le Auaunaga Faataimi Atoa

“Ua matou manatua ai pea a outou galuega o le faatuatua, o lo outou tautigā ma le alofa.”​—1 TESA. 1:3.

1. O ā faalogona o Paulo e faatatau i ē na auauna ma le filigā iā Ieova?

SA MANATUA e Paulo i latou sa galulue mamafa mo le tala lelei. Na tusi o ia: “I le silafaga a lo tatou Atua le Tamā, ua matou manatua ai pea a outou galuega o le faatuatua, o lo outou tautigā ma le alofa, ma lo outou tumau ona o le faamoemoe i lo tatou Alii o Iesu Keriso.” (1 Tesa. 1:3) E manatua foʻi e Ieova galuega alofa a ana auauna faamaoni uma, e tusa pe e mafai e o latou tulaga ona faia ni mea se tele pe itiiti.​—Epe. 6:10.

2. O le ā o le a tatou iloiloina i lenei mataupu?

2 O le toʻatele o o tatou uso ma tuafāfine i taimi ua mavae ma i taimi nei, ua latou faia le tele o faataulaga ina ia auauna faataimi atoa ai iā Ieova. Seʻi o tatou iloiloina le auala na auauna ai nisi i le uluaʻi senituri. O le a tatou iloiloina foʻi nisi o vala o le auaunaga faataimi atoa i aso nei, ma auala e mafai ona tatou manatua ai ē e pele na lotomalilie e ofo atu i latou lava, e auauna i auala faapitoa.

KERISIANO I LE ULUAʻI SENITURI

3, 4. (a) Sa faapefea ona auauna nisi i le uluaʻi senituri? (e) Sa faapefea ona tausia o latou manaʻoga faaletino?

3 E leʻi umi ona mavae le papatisoga o Iesu, ae ia faavaeina loa se galuega o le a oo atu i le lalolagi atoa. (Luka 3:21-23; 4:14, 15, 43) Ina ua mavae lona maliu, na taʻimua ona aposetolo i le faalauteleina  atu o lenei galuega talaʻi. (Galu. 5:42; 6:7) Sa auauna nisi o Kerisiano e pei o Filipo, o ni faievagelia ma misionare i Palesitina. (Galu. 8:5, 40; 21:8) Na faimalaga atu Paulo ma isi i oganuu mamao. (Galu. 13:2-4; 14:26; 2 Kori. 1:19) Sa auauna foʻi nisi e pei o Siluano (Sila), Mareko ma Luka, o ni tusitala po o failautusi. (1 Pete. 5:12) Sa galulue faatasi tuafāfine Kerisiano ma nei uso faamaoni. (Galu. 18:26; Roma 16:1, 2) O tala o mea na tutupu iā i latou, ua avea ai Tusitusiga Paia Eleni o se mea e fiafia e faitau i ai. O loo faamatilatila mai ai foʻi, e manatua pea ma le fiafia e Ieova ana auauna uma.

4 Sa faapefea ona lagolagoina manaʻoga faaletino, o auauna faataimi atoa i le uluaʻi senituri? O nisi taimi sa talimālō ai nisi o uso Kerisiano iā i latou ma maua isi fesoasoani, ae e latou te leʻi tagisā mo na fesoasoani. (1 Kori. 9:11-15) Sa lotomalilie nisi ma faapotopotoga e ofo atu le lagolagosua. (Faitau le Galuega 16:14, 15; Filipi 4:15-18.) Sa iai foʻi galuega faavaitaimi a Paulo ma ē na latou faimalaga faatasi, ina ia tausia ai i latou lava.

O Ē O LOO AUAUNA FAATAIMI ATOA I ASO NEI

5. O ā faalogona na taʻua e se ulugalii e faatatau i o la olaga i le auaunaga faataimi atoa?

5 I aso foʻi nei, e toʻatele ua ofo atu i latou lava i vala eseese o le auaunaga faataimi atoa. (Tagaʻi i le pusa “ Vala o le Auaunaga Faataimi Atoa.”) O ā ni o latou faalogona e faatatau i le galuega ua latou filifilia? O le fesili lenā e mafai ona e fesili atu ai iā i latou, ma e lē taumatea o le a faalaeiauina oe i a latou tali. Manatu i se faaaʻoaʻoga: Na auauna se uso o se paeonia sauatoa, paeonia faapito, misionare ma o se sui o le aiga Peteli i se isi atunuu. Na ia faapea mai: “Ou te manatu o le galue i le auaunaga faataimi atoa, o se tasi lea o filifiliga sili na ou faia. Ina ua 18 oʻu tausaga, sa ou lē mautonu i aʻu filifiliga e tusa ai o toleniga na ofo mai i le iunivesite, se galuega faataimi atoa ma le paeonia. O mea na tutupu na ou iloa ai, e lē mafai ona faagaloina e Ieova faataulaga e te faia ina ia auauna faataimi atoa ai iā te ia. Sa mafai ona ou faaaogā so o se taleni ma tomai na foaʻi mai e Ieova, i ni auala e lē mafai ona faaaogā ai pe ana faapea na ou filifilia se galuega i le lalolagi.” Na faapea mai lana avā: “Sa fesoasoani tofiga uma iā te aʻu ina ia tuputupu aʻe ai faaleagaga. E tele taimi ua ma tofo ai i le puipuiga ma le taʻitaʻiga a Ieova, i ni auala e lē mafai ona tupu ai pe ana faapea e ma te ola pea i se olaga faifailemū. Ou te faafetaia Ieova i aso uma ona ua faaaogā o ma olaga i le auaunaga faataimi atoa.” Pe e te manaʻo e maua se olaga faapena?

6. O le ā le mea e tatau ona mautinoa e tagata uma e faatatau i faalogona o Ieova?

6 E iai nisi e lē o mafai ona auai i le auaunaga faataimi atoa i aso nei ona o o latou tulaga. E tatou te mautinoa e matuā tāua foʻi iā Ieova taumafaiga ma le lotoatoa a i latou na. Seʻi manatu iā i latou na taʻua e Paulo i le Filemoni 1-3, e aofia ai i latou uma sa i le faapotopotoga i Kolose. (Faitau.) Sa talisapaia e Paulo ma Ieova i latou. E faapena foʻi ona talisapaia e lo tatou Tamā lau auaunaga. Peitaʻi, e faapefea ona e lagolagosua i ē o loo i le auaunaga faataimi atoa i aso nei?

FESOASOANI I PAEONIA

7, 8. O le ā e aofia ai i le auaunaga paeonia, ma e faapefea ona fesoasoani isi i le faapotopotoga i paeonia?

7 I le pei o faievagelia i le uluaʻi senituri, ua avea paeonia maelega ma puna o faalaeiauga i faapotopotoga. O le toʻatele o i latou o loo taumafai e faaalu itula e 70 i masina taʻitasi i le faiva. E mafai faapefea ona e fesoasoani iā i latou?

8 Na faapea mai le tuafafine paeonia o Shari: “E foliga mai e malolosi paeonia, auā e talaʻi i aso uma. Peitaʻi, e latou te manaʻomia foʻi faalaeiauga.” (Roma 1:11, 12) Na faapea mai se isi tuafafine na paeonia mo ni tausaga, e faatatau i paeonia i lana faapotopotoga: “E latou te  galulue mamafa ma lē faavaivai. E latou te matuā lotofaafetai pe a ofo atu isi e faaaogā a latou taavale e ō ai i le talaʻiga, valaaulia i latou mo se taumafataga, foaʻi atu sina seleni mo le penisini po o isi fesoasoani tautupe e manaʻomia. E faaalia atu ai e te manatu mamafa moni lava iā i latou.”

9, 10. O le ā na faia e nisi ina ia fesoasoani ai i paeonia i a latou faapotopotoga?

9 Pe e te fia fesoasoani i paeonia i le faiva? Na talosaga mai le paeonia e igoa iā Bobbi: “E matou te matuā manaʻomia le lagolagosua a o faagasolo le vaiaso.” Na faapea mai foʻi se isi paeonia i le faapotopotoga lava lenā: “O se faafitauli le maua o ni paga i le aoauli.” Sa faamatala fiafia mai e se tuafafine o loo auauna nei i le Peteli i Brooklyn, lana auaunaga paeonia e faapea: “Na fai mai se tasi tuafafine e iai lana taavale, ʻSo o se taimi lava e leai ai sau paga, vili mai ona ou alu atu lea e ta te ō e talaʻi.’ O le mea moni sa mafai ona faaauau laʻu paeonia ona o ia.” Sa taʻua foʻi e Shari: “E masani ona lagona e paeonia nofofua le tuua toʻatasi pe a uma le talaʻiga. O nisi taimi e te ono valaaulia uso po o tuafāfine nofofua e auai i la outou tapuaʻiga a le aiga. O le faaaofia o i latou i isi meafai, e mafai foʻi ona fesoasoani iā i latou ia malolosi ai pea.”

10 Pe a toe tepa i tua i la latou auaunaga paeonia ma isi tuafāfine nofofua, na faapea mai se tuafafine sa i le auaunaga faataimi atoa mo le toetoe 50 tausaga: “E iai masina e asiasi mai ai a matou toeaina i paeonia. E latou te fesili mai e faatatau i lo matou soifua mālōlōina ma galuega totogi, ma po o iai ni mea o matou popole ai. E latou te naunau moni mai lava. E latou te asiasi mai i mea e matou te nonofo ai, ina ia vaai pe matou te manaʻomia se fesoasoani.” E ono faamanatu mai ai iā te oe le talisapaia e Paulo o le fesoasoani a se tamāloa ma lona aiga iā te ia i Efeso.​—2 Timo. 1:18.

11. O ā mea e aofia ai i le auauna o se paeonia faapito?

11 Ua faamanuiaina nisi faapotopotoga ona o le iai o ni paeonia faapito e auauna faatasi ma i latou. O le toʻatele o nei uso ma tuafāfine, e latou te taumafai e faaalu le 130 itula i le talaʻiga i masina taʻitasi. Talu ai e tele le taimi e latou te faaalu i le faiva ma fesoasoani ai i isi auala, e itiiti ai pe e leai foʻi so latou taimi mo ni galuega totogi. Ua saunia e le ofisa o le lālā se alauni  talafeagai i masina taʻitasi, ina ia mafai ona latou uaʻi atu i le faiva.

12. O ā auala e ono fesoasoani ai toeaina ma isi i paeonia faapito?

12 E faapefea ona tatou fesoasoani i paeonia faapito? Na faamatala mai e se toeaina i se ofisa o le lālā, o lē e masani ona fesootaʻi ma le toʻatele o paeonia faapito e faapea: “E ao i toeaina ona talanoa atu ma ia iloa po o ā tulaga o feagai ma i latou, ona fuafua lea pe faapefea ona fesoasoani i ai. E manatu nisi Molimau o loo lelei le tausiga o paeonia faapito ona o loo maua a latou alauni. Peitaʻi e tele auala e mafai ona fesoasoani ai uso o le faapotopotoga iā i latou.” I le pei o paeonia sauatoa, e talisapaia foʻi e paeonia faapito le iai o nisi e latou te galulue faatasi i le talaʻiga. Pe e mafai ona e fesoasoani iā i latou i lenā auala?

FESOASOANI I OVASIA FEMALAGAAʻI

13, 14. (a) O le ā e tatau ona tatou manatua e faatatau i ovasia matagaluega? (e) O le ā sou manatu, o le ā e mafai ona e faia e fesoasoani ai i ē o loo galulue i le galuega femalagaaʻi?

13 E masani ona manatu i ovasia matagaluega ma a latou avā, o ni tagata e malolosi faaleagaga ma aumalosi. E moni lenei manatu, peitaʻi e latou te manaʻomia foʻi faalaeiauga, nisi e latou te galulue i le talaʻiga, ma faaaofia i latou i evaevaga ma faafiafiaga. Ae faapefea pe afai e mamaʻi i latou ma faataotolia i falemaʻi, ma atonu ua manaʻomia se taotoga pe mālōlō foʻi? E latou te lagona le matuā faafouina, pe a naunau moni ma fesoasoani atu uso ma tuafāfine o le faapotopotoga iā i latou. E mafai ona faaāta i o tatou mafaufau le naunau sa faaalia e “le fomaʻi pele” o Luka, o le tusitala o le tusi o Galuega, iā Paulo ma isi aumea femalagaaʻi.​—Kolo. 4:14; Galu. 20:5–21:18.

14 E manaʻomia ma e tāua tele i ovasia femalagaaʻi ma a latou avā le iai o ni uō mamae. Na tusi se ovasia matagaluega e faapea: “E foliga mai e iloa lelei e aʻu uō taimi ou te manaʻomia ai ni faalaeiauga. E latou te fai mai ni fesili faautauta, ma e fesoasoani lea ou te talanoa atu ai e faatatau i mea o loo oʻu popole ai. Ua avea i latou ma fesoasoani tele iā te aʻu, i le tau ina avea ma ē e faalogologo lelei.” E matuā talisapaia e ovasia matagaluega ma a latou avā, le naunau moni o loo faaalia atu e o latou uso ma tuafāfine.

IA LAGOLAGOSUA I SUI O LE AIGA PETELI

15, 16. (a) O le ā le auaunaga ua saunia e i latou o loo auauna i Peteli ma Maota mo Fonotaga? (e) E faapefea ona tatou lagolagosua iā i latou?

15 E tāua tele le lagolagosua o loo saunia e i latou o loo auauna i Peteli ma Maota mo Fonotaga, i le galuega o le Malo i atunuu o loo vaavaaia e a latou ofisa o lālā. Pe afai o loo iai i la outou faapotopotoga po o le matagaluega ni sui o le Peteli, e faapefea ona faaalia o loo e manatua i latou?

16 Ina ua latou faatoʻā taunuu i le Peteli, atonu e latou te misia aiga ma uō. Maʻeu lo latou lotofaafetai pe a faauō atu isi sui o le Peteli ma tagata o a latou faapotopotoga fou! (Mare. 10:29, 30) E ese mai i la latou faasologa masani o galuega i le Peteli, o loo latou auai i sauniga a le faapotopotoga, ma fai se sao i le galuega talaʻi i vaiaso taʻitasi. Peitaʻi, o isi taimi atonu e iai nisi tiute faaopoopo o le ʻau Peteli. E maua e tagata uma aogā pe afai e malamalama faapotopotoga i lenei tulaga, ma talisapaia sui o le Peteli ma galuega o loo latou faia.​—Faitau le 1 Tesalonia 2:9.

FESOASOANI I Ē O LOO AUAUNA FAATAIMI ATOA I ISI ATUNUU

17, 18. O ā vala o le auaunaga e aofia ai i tofiga i isi atunuu?

17 Ua talia e nisi o loo i le auaunaga faataimi atoa se tofiga i se isi atunuu. Atonu o nisi meaʻai e fou iā i latou, aʻoaʻo se gagana fou, ma tau  faamasani i aganuu ma se olaga fou. Aiseā ua latou lotomalilie ai e feagai ma nei luʻi ma suiga?

18 O nisi o loo galulue o ni misionare, ma e tele lo latou taimi e faaalu i le galuega talaʻi, i vaipanoa e mafai ai e le toʻatele ona maua aogā mai i a latou toleniga faapitoa. Ua saunia e le ofisa o le lālā se fale talafeagai ma se alauni mo misionare, ina ia totogi ai a latou tupe faaalu. O isi o loo auauna i isi atunuu, ua tofia e auauna i se ofisa o le lālā pe fesoasoani i le fausiaina o ofisa o lālā, ofisa faaliliu, Maota mo Fonotaga po o Maota mo Sauniga. Ua saunia meaʻai, fale ma isi auaunaga mo i latou. I le pei o sui o le aiga Peteli, e auai foʻi e lē aunoa i latou nei i sauniga ma talaʻi faatasi ma faapotopotoga o loo auai ai. O lea, e tele auala ua avea ai i latou ma faamanuiaga.

19. O le ā e tatau ona tatou manatua e faatatau i ē o loo auauna i isi atunuu?

19 E faapefea ona e manatua na auauna faataimi atoa? O le mea muamua lava, ia manatua atonu e latou te lē masani i meaʻai o le atunuu. Ia manatua lenei mea pe a valaaulia i latou mo se taumafataga. Ia fesili muamua i ai po o ā meaʻai e lē mafai ona latou aai ai, pe fia aai ai foʻi. Ia onosaʻi a o latou taumafai e aʻoaʻo le gagana ma le aganuu. Atonu e umi se taimi faatoʻā latou malamalama i au tala uma o loo fai atu. Peitaʻi, e mafai ona e fesoasoani ma le agalelei iā i latou i le faaleoina o upu. O loo latou mananaʻo e aʻoaʻoina na mea uma!

20. O le ā le auala lelei e tatou te manatua ai ē o loo i le auaunaga faataimi atoa ma o latou mātua?

20 E faasolo ina matutua ē o loo i le auaunaga faataimi atoa, faapea o latou mātua. Pe afai o mātua o ni Molimau, e mautinoa o lo latou faanaunauga sili ia tumau a latou fanau i o latou faaeaga. (3 Ioa. 4) E moni o le a faia e auauna faataimi atoa mea uma e latou te mafaia, e tausia ai o latou mātua pe a manaʻomia, ma fesoasoani atu iā i latou i le tele e mafai ai. Peitaʻi, e ono fesoasoani isi o loo iai faatasi ma mātua o ē o loo i le faiva faataimi atoa, e ala i le nofosauni e tausia i latou pe a manaʻomia se fesoasoani. Ia manatua, o ē o loo i le auaunaga faataimi atoa e iai o latou tiute tauave tāua, i le galuega e sili ona tāua i le lalolagi i aso nei. (Mata. 28:19, 20) Pe e mafai e lau faapotopotoga po o oe ona fesoasoani atu, pe a manaʻomia e mātua o ē o loo i le auaunaga faataimi atoa se fesoasoani?

21. O ā faalogona o ē o loo i le auaunaga faataimi atoa, e faatatau i fesoasoani ma faalaeiauga e tuuina atu e isi?

21 O ē ua auai i le faiva faataimi atoa, ua latou faia faapea ina ia foaʻi atu iā Ieova ma isi, ae e lē ina ia maua ai ni tupe. E latou te matuā talisapaia so o se fesoasoani e te tuuina atu. Ua faaleo mai e se tuafafine o loo auauna i se isi atunuu, faalogona o le toʻatele o i latou e faapea: “E tusa pe e na o se faaupuga e tusia e faaleo mai ai le talisapaia, ae e faaalia ai o loo mafaufau isi e faatatau iā te oe, ma o loo fiafia i le auaunaga o loo e faia.”

22. O le ā sou manatu e faatatau i le auaunaga faataimi atoa?

22 O le mea moni, o le auauna faataimi atoa iā Ieova o le auala sili lea ona tauia o le olaga. E iai luʻi, e aʻoaʻoina ai mea, ma maua ai se olaga faamalieina. O se auala lelei foʻi e sauniunia ai mo le auaunaga tumau e olioli ai, lea o le a faia e auauna faamaoni uma a Ieova i le taimi o le pulega a lona Malo. Tau ina ia ʻfaaauau ona manatua pea galuega o le faatuatua ma le tautigā ma le alofa,’ a ē o loo i le auaunaga faataimi atoa.​—1 Tesa. 1:3.