1, 2. (a) O le ā le uiga ia avea ma se molimau, ma o ā mea e lē o taʻua i faasalalauga o tala fou a le lalolagi? (e) Aiseā e lē faalagolago ai Ieova i auala o faasalalauga a le lalolagi?

O LE ā le uiga ia avea ma se molimau? Ua taʻua i se tasi o lomifefiloi: “O se tasi e vaai ma lipotia se mea na tupu.” O se faaaʻoaʻoga, ua silia i le 160 tausaga o lomia le nusipepa e taʻua The Witness (Le Molimau), i Aferika i Saute. E fetaui lelei le igoa, auā o le fuafuaga o se nusipepa, ia lipotia ma le saʻo mea o loo tutupu i le lalolagi. Na taʻutino mai e le faatonu o le a lomia i lenei nusipepa “mea moni, o mea moni uma, ma e na o mea moni lava.”

² Peitaʻi, e faanoanoa ona ua tele ina lē amanaʻia pe oo lava foʻi ina lipotia sesē i faasalalauga o tala fou, mea moni e sili ona tāua e faatatau i le talafaasolopito o tagata. E leʻi taʻua ai foʻi upu moni e faatatau i le Atua ma mea na ia faia. Peitaʻi, e lē faalagolago Ieova o le Pule Silisili Ese i le aoao o mea, i auala o faasalalauga a lenei lalolagi. Na fetalai o ia e ala mai i lana perofeta o Esekielu: “O le a iloa ai foʻi e atunuu o aʻu lava o Ieova.” (Eseki. 39:7) E tusa ma le valu miliona ana Molimau o loo latou taʻu atu i tagata i le lalolagi aoao e faatatau iā te ia. O loo faalauiloa atu foʻi e lenei ʻautau o Molimau, faamanuiaga ua folafola mai e le Atua mo le fanau a tagata i le lumanaʻi. Ua taʻua i le Isaia 43:10: “O le fetalaiga lenei a Ieova: ʻO outou o aʻu molimau, o laʻu auauna ua ou filifilia.’” Pe afai e faamuamua le galuega talaʻi i o tatou olaga, ua  faamaonia atu ai o i tatou moni lava o Molimau a Ieova.

3, 4. (a) O anafea na amata ai ona faaaogā e Tagata Aʻoga o le Tusi Paia le igoa o Molimau a Ieova? (e) O ā ni o latou faalogona e faatatau i lenei igoa fou? (Tagaʻi i le ata i luga aʻe o le matua.) (i) O ā fesili o le a tatou talanoaina?

³ Maʻeu se faaeaga o le tauaveina o le suafa o Ieova, auā o ia o “le Tupu o le vavau,” o lē na fetalai: “O loʻu igoa lenā e faavavau, e manatua ai aʻu i lea tupulaga ma lea tupulaga”! (1 Timo. 1:17; Eso. 3:15; faatusatusa i le Failauga 2:16.) I le 1931, na amata ai ona faaaogā e Tagata Aʻoga o le Tusi Paia le igoa o Molimau a Ieova. Mulimuli ane, e toʻatele i latou na tusi atu e faaalia ai lo latou lotofaafetai mo lenei suiga. Na tusi atu se faapotopotoga mai Kanata: “Ua matou matuā fiafia i le tala lelei e faapea ua taʻua i tatou o ʻMolimau a Ieova,’ ma ua faatumulia i matou i le naunautaʻiga ia avea o ni ē e agavaa e tauaveina lenei igoa fou.”

⁴ E faapefea ona faaalia lou talisapaia mo le faaeaga o le tauaveina o le suafa o le Atua? E lē gata i lea, a o tatou faitau i le tusi o Isaia, pe mafai ona e faamatala mai māfuaaga ua taʻua ai e Ieova i tatou o ana Molimau?

5, 6. (a) Sa faapefea i mātua Isaraelu ona molimau atu e faatatau iā Ieova? (e) O le ā le isi mea sa tatau i mātua Isaraelu ona fai, ma aiseā e tatau ai foʻi i mātua i aso nei ona faia faapea?

⁵ Sa avea tagata Isaraelu taʻitoʻatasi i aso o Isaia ma “molimau” a Ieova, ma na avea le nuu atoa ma “auauna” a Ieova. (Isa. 43:10) O se tasi o auala na molimau atu ai mātua Isaraelu, o le aʻoaʻoina lea o a latou fanau e faatatau i feutagaʻiga a Ieova ma o latou augātamā. O se faaaʻoaʻoga, ina ua avatu le faatonuga ia faamanatu le Paseka i tausaga uma, na taʻu atu i tagata e faapea: “Pe a fesili mai o outou atalii iā te outou, ʻO le ā le uiga o lenei vala o le tapuaʻiga iā te outou?’ ona outou tali atu lea, ʻO le taulaga o le paseka iā Ieova, o lē na  sopoloa i fale o tagata Isaraelu i Aikupito ina ua ia faaoo le malaia i tagata Aikupito, ae faasaoina o tatou aiga.’” (Eso. 12:26, 27) Sa faamatala atu e na mātua i a latou fanau e faapea, na musu Farao e tuu mai tagata Isaraelu e ō i le toafa e tapuaʻi iā Ieova. Na faapea mai Farao: “O ai Ieova ou te faalogo ai i lona leo ma tuu atu tagata Isaraelu e ō?” (Eso. 5:2) Sa faamatala atu foʻi e mātua le auala na tali mai ai Ieova i le fesili a Farao, ma le auala na faaalia atu ai e Ieova i tagata uma o ia o Lē e Silisili Ese. Sa ia aumaia mala e sefulu i le nuu o Aikupito, ma faasaoina tagata Isaraelu mai le ʻautau a Aikupito i le Sami Ulaula. Sa vāaitino tagata Isaraelu o Ieova o le Atua moni, ma e na te faataunuu i taimi uma ana folafolaga.

⁶ Sa manatu tagata Isaraelu o se faaeaga le avea ma molimau a Ieova. Sa latou faamatala atu i a latou fanau ma so o se pologa na auauna i o latou aiga, mea matagofie na faia e Ieova. Sa iloa foʻi e tagata Isaraelu e tatau ona paia a latou amio. Na fetalai Ieova: “E ao ona paia outou, auā o aʻu o Ieova o lo outou Atua, e paia lava aʻu.” Sa tatau i mātua Isaraelu ona aʻoaʻo a latou fanau ia paia, pe ia ola e tusa ai ma tapulaa a Ieova i vala uma o le olaga. (Levi. 19:2; Teu. 6:6, 7) E tatau foʻi i mātua i aso nei ona faia faapea, e ala i le aʻoaʻo o a latou fanau ia ola i se auala e faamamaluina ai le suafa mamalu o Ieova.​—Faitau le Faataoto 1:8; Efeso 6:4.

7. (a) Ina ua usiusitaʻi tagata Isaraelu iā Ieova, o le ā se aafiaga i nuu na siʻomia ai i latou? (e) O le ā le tiute tauave ua iai i tagata uma o loo tauaveina le suafa o le Atua?

⁷ Ina ua usiusitaʻi tagata Isaraelu i le Atua, sa ia faamanuia iā i latou. Na taʻu atu iā i latou e faapea: “O le a iloa ai e nuu uma o le lalolagi ua taʻua oe i le suafa o Ieova, e latou te fefefe foʻi iā te oe.” (Teu. 28:10) Ae pagā lea, o le tele lava o le talaaga o tagata Isaraelu, e leʻi usiusitaʻi iā Ieova. Sa latou tapuaʻi i tupua, o atua o Kanana, ma na latou sauā ai e pei lava o na atua. Sa faaaogā a latou lava fanau e ofo atu ai taulaga, ma faileagaina tagata matitiva. O la latou faaaʻoaʻoga leaga ua aumaia ai se lesona mo i tatou. E ao ona tatou taumafai i taimi uma ia paia, e ala i le faaaʻoaʻo i Lē e Sili Ona Paia, lea o loo tatou tauaveina lona suafa.

8. O le ā na fetalai atu Ieova iā Isaia e fai, ma na faapefea ona tali atu Isaia?

⁸ Sa faaaogā e Ieova Isaia e lapataʻia tagata Isaraelu e faapea, o le a Ia faaumatia lo latou laumua o Ierusalema, ae tuu atu Ona tagata e ave faapagota. Sa valoia foʻi e Ieova o le a ia faia “se mea fou,” ma faasaʻoloto i se auala mataʻina ona tagata mai le faaaunuua. (Isa. 43:19) O loo iai i uluaʻi mataupu e ono o le tusi o Isaia, le tele o lapataʻiga e faatatau i le mala o le a oo iā Isaraelu ma aai na siʻomia ai. O Ieova o lē e silafia lelei loto o tagata, na fetalai iā Isaia ia faaauau ona folafola atu nei lapataʻiga e ui lava o le a atili ai ona lē tali lelei mai tagata. Sa faateʻia Isaia ma fia iloa po o le ā le umi o le a faaauau ai ona lē salamō le nuu o le Atua. Sa tali mai le Atua: “Seʻia faatafunaina aai, ma leai se isi e nofo ai, ma faagaogaoina fale e leai se tagata e nofo ai, ma matuā faatamaʻia foʻi le laueleele.”​—Faitau le Isaia 6:8-11.

9. (a) O anafea na taunuu ai le valoaga a Isaia e faatatau iā Ierusalema? (e) O le ā le lapataʻiga e tatau ona tatou utagia i aso nei?

⁹ Na maua e Isaia lenei faatonuga i le tausaga mulimuli o le nofoaiga a le tupu o Usia, pe tusa o le 778 T.L.M. Pe ā ma le 46 tausaga na faaauau ai lana auaunaga faaperofeta seʻia mavae le 732 T.L.M., i le taimi o le nofoaiga a le tupu o Esekia. O le taimi lenā e 125 tausaga a o lumanaʻi le faaumatiaga o Ierusalema i le 607 T.L.M. O lea, e tele tausaga na muaʻi lapataʻia ai tagata o le Atua e faatatau i le mea o le a tupu i le nuu. I aso nei, ua faaaogā foʻi e Ieova ona tagata ina ia lapataʻia isi e faatatau  i mea o le a tutupu i le lumanaʻi. Talu mai le taimi o le uluaʻi lomiga o le Watchtower, ua 135 tausaga o lapataʻia tagata e faapea, ua lē o toe umi ae faaiʻuina le pulega amioleaga a Satani, ae suia i le Pulega a Iesu Keriso mo le Afe Tausaga.​—Faaa. 20:1-3, 6.

10, 11. O le ā le faataunuuga o le valoaga a Isaia sa molimauina e tagata Isaraelu i Papelonia?

¹⁰ O le toʻatele o tagata Iutaia usiusitaʻi na siilima i ʻautau a Papelonia, sa faasaoina mai le faaumatiaga o Ierusalema ma ave faatagataotauaina i Papelonia. (Iere. 27:11, 12) I le 70 tausaga mulimuli ane, na molimauina ai e tagata o le Atua le faataunuuga o le valoaga mataʻina e faapea: “O le fetalaiga lenei a Ieova, o Lē e toe faatauina outou, o Lē e Paia o Isaraelu: ʻOna o outou, o le a ou aauina atu i latou i Papelonia ma ave ifo pou faalava o faitotoʻa.’”​—Isa. 43:14.

¹¹ E mataʻina le auala na faataunuu ai e Ieova lenā valoaga. I se tasi pō iā Oketopa i le 539 T.L.M., sa faia ai e le tupu o Papelonia ma ona tamālii se tausamiga i o latou atua. Sa latou feinu mai i ipu na latou faoa mai i le malumalu o Ieova. Ae i lenā lava pō, na osofaʻia ai ma faatoʻilalo e le tupu o Kuresa le aai o Papelonia. I le 538 po o le 537 T.L.M., na poloaʻia ai e Kuresa tagata Iutaia e toe foʻi i Ierusalema ma toe fausia le malumalu o le Atua. O nei mea uma na valoia e Isaia, e aofia ai le folafolaga a Ieova o le a ia saunia mea e manaʻomia, ma puipuia ona tagata salamō a o toe foʻi atu i Ierusalema. Sa taʻua e Ieova i latou “o le nuu ua faia mo aʻu, ina ia latou taʻutaʻu atu pea loʻu viiga.” (Isa. 43:21; 44:26-28) Ina ua toe foʻi atu i Ierusalema nei tagata sa aveina faapagota, ma toe fausia le malumalu o Ieova, sa latou molimauina le mea moni e faapea, o Ieova o le Atua moni e toʻatasi, ma e na te faataunuu i taimi uma ana folafolaga.

12, 13. (a) O le ā na tupu ina ua toe foʻi tagata Isaraelu e toe fausia le malumalu? (e) O le ā le faaeaga ua maua e “isi mamoe,” ma o le ā e mafai ona latou tulimataʻia i le lumanaʻi?

¹² Ina ua toe foʻi tagata Isaraelu e toe fausia le malumalu, e faitau afe tagata o nuu ese na aufaatasi ma i latou i le tapuaʻiga iā Ieova. Mulimuli ane, e toʻatele isi o nuu ese sa aufaatasi ma i latou. (Esera 2:58, 64, 65; Eseta 8:17) I aso nei, o loo lagolagoina ma le faamaoni e se “motu o tagata e toʻatele” o “isi mamoe” a Iesu, ia Kerisiano faauuina, o ē ua faia aʻe ai “le Isaraelu a le Atua.” (Faaa. 7:9, 10; Ioa. 10:16; Kala. 6:16) Ua maua e le ʻaufaauuina ma isi mamoe le faaeaga o le taʻua o ni Molimau a Ieova.

¹³ A o faagasolo le Pulega a Keriso i le Afe Tausaga, o le a matuā fiafia le motu o tagata e toʻatele e faamatala atu i ē o le a toetutū mai, pe sa faapeʻī le avea ma Molimau a Ieova i aso  e gata ai o lenei faiga o mea. Peitaʻi, e faatoʻā mafai ona maua lenei faaeaga pe afai e tatou te faamaoni i aso nei i lo tatou igoa, ma taumafai e tumau ona paia i vala uma o le olaga. E ui lava foʻi e tatou te taumafai malosi e ola e tusa ai ma tapulaa a Ieova, ae o aso uma lava e tatou te sesē ai. O lea, ia ōle atu iā Ieova i aso uma mo le faamagaloga. Pe afai e tumau ona tatou paia, ua faaalia ai lo tatou lotofaafetai ona ua faaaogā i tatou e Ieova e fai ma ona sui.​—Faitau le 1 Ioane 1:8, 9.

14. O le ā le uiga o le suafa o Ieova?

¹⁴ Ina ia faalautele lo tatou talisapaia mo le faaeaga o le tauaveina o le suafa o le Atua, e ao ona tatou manatunatu i le uiga o lona suafa. O le suafa o Ieova e maua mai i se upu Eperu e mafai ona faaliliuina e faapea “e avea,” ma e faamatala ai se gaoioiga. O lea, ua talafeagai ona faapea atu o le uiga o le suafa o le Atua, “E Gaoioi o Ia e Tusa ai ma Tulaga Manaʻomia.” O lenei faamatalaga e fetaui lelei ma le matafaioi a Ieova, o Lē na foafoaina mea uma, ma o Lē e na te faataunuuina ana folafolaga. E faaauau ona faataunuu e Ieova lona finagalo, e tusa po o le ā le taumafai o so o se tasi e tetee, e pei o Satani, ina ia taofia le galueaʻiina ma le faataunuuina faasolosolo o lona finagalo.

15. O le ā e tatou te aʻoaʻoina e faatatau i le suafa o Ieova, mai i lana fetalaiga iā Mose? (Tagaʻi i le pusa “ Se Suafa e Loloto Lona Uiga.”)

¹⁵ Sa faamatala atili atu e Ieova iā Mose le uiga o lona suafa. Ina ua auina atu e Ieova Mose e faasaʻoloto mai Ona tagata mai i Aikupito, na fetalai o ia: “E Avea Aʻu ma Lē ou te Loto i Ai.” Na fetalai atili Ieova: “Ia faapenei ona e fai atu i le fanauga a Isaraelu, ʻE Avea Aʻu ma Lē ou te Loto i Ai, o ia lea ua na auina mai aʻu iā te outou.’” (Eso. 3:14) O lea, o le a avea Ieova ma lē e loto i ai, i so o se tulaga lava e manaʻomia ina ia faataunuu ai lona finagalo. I tagata Isaraelu sa nofo pologa, sa faamaonia na avea Ieova ma Lē e laveaʻia, puipuia, taʻitaʻia, ma saunia mea e manaʻomia, ina ia faamalie ai o latou manaʻoga faaletino ma le faaleagaga.

16, 17. (a) E faapefea ona faaalia lo tatou lotofaafetai, mo le faaeaga o le tauaveina o le suafa o le Atua? (e) O le ā o le a talanoaina i le mataupu e sosoo mai?

¹⁶ O loo faaauau ona faamaoni Ieova i aso nei i le uiga o lona suafa, e ala i le tausia o o tatou manaʻoga uma faaleagaga ma faaletino. Peitaʻi, e iai se isi mea e aofia ai i le uiga o lona suafa, i lo o le tau ina avea ma lē e loto i ai. E mafai e Ieova ona faapogaia ana foafoaga e avea ma so o se tulaga e manaʻomia, ina ia faataunuu ai lona finagalo. O se faaaʻoaʻoga, e na te faaaogā ana Molimau ina ia faia lana galuega. O le manatunatu loloto i lenei vala, o le a uunaʻia ai i tatou e faaauau ona ola e tusa ai ma lona suafa. O Kåre ua 84 ona tausaga, o se Molimau maelega i Nouē mo le 70 tausaga ua mavae. Ua ia faapea mai: “Ou te lagona o se faaeaga sili le auauna iā Ieova, o le Tupu o le vavau, ma avea o se vaega o tagata o loo tauaveina lona suafa paia. E avea pea o se faaeaga tāua le faamatala atu o upu moni o le Tusi Paia, ma vaai atu ua fiafia tagata ona ua malamalama i na upu moni. O se faaaʻoaʻoga, ou te lagona le matuā faamalieina pe a ou aʻoaʻoina i latou i le auala na faatulaga ai le taulaga togiola a Keriso, ma le auala e mafai ai i lenā taulaga togiola, ona latou maua ai le ola e faavavau i se lalolagi fou filemu ma amiotonu.”

¹⁷ I nisi oganuu, ua faigatā ona maua ni tagata e naunau e aʻoaʻoina e faatatau i le Atua. Peitaʻi, i le pei o Kåre, e tatou te matuā fiafia pe a maua se tagata se toʻatasi e fia aʻoaʻoina e faatatau i le suafa o Ieova. Ae e faapefea ona avea i tatou ma Molimau a Ieova, a o le taimi e tasi e avea ma molimau a Iesu? O le a taliina lenei fesili i le mataupu e sosoo mai.