Skip to content

Skip to table of contents

Po o E Piiama Atu i le Faalapotopotoga a Ieova?

Po o E Piiama Atu i le Faalapotopotoga a Ieova?

“O loo silasila mai fofoga o Ieova i ē e amiotonu.”​—1 PETE. 3:12.

1. O le ā le faalapotopotoga na filifilia e tauaveina le suafa o Ieova, ina ia suia ai le nuu lē faamaoni o Isaraelu? (Tagaʻi i le ata i luga aʻe o le matua.)

UA TALAFEAGAI ona faapea atu o Ieova na faavaeina le faapotopotoga Kerisiano i le uluaʻi senituri, ma toe faafoʻisia mai le tapuaʻiga moni i aso nei. Na taʻua i le mataupu ua mavae, sa suia le nuu lē faamaoni o Isaraelu i le faalapotopotoga na faia aʻe i uluaʻi soo o Iesu, lea e tauaveina le suafa o Ieova. Sa faasaoina le faalapotopotoga fou a le Atua mai i le faatafunaga o Ierusalema i le 70 T.A. (Luka 21:20, 21) O na mea na tutupu i le uluaʻi senituri, ua faaāta mai ai mea iloga e tutupu e aofia ai ma auauna a Ieova i aso nei. Ua toe o se aga ona faaiʻuina lea o le faiga o mea a Satani, ae o le a faasaoina le faalapotopotoga a le Atua. (2 Timo. 3:1) E faapefea ona tatou mautinoa i lenei mea?

2. O le ā le fetalaiga a Iesu e faatatau i le “puapuaga tele,” ma o le a faapefea ona amata?

2 A o talanoa Iesu e faatatau i lona faatasi mai lē vaaia ma le taufaaiʻuiʻuga o le faiga o mea a le lalolagi, na fetalai o ia: “O le a tupu le puapuaga tele, e leai sona tusa talu le amataga  o le lalolagi, e oo mai lava i aso nei, ma o le a lē toe tupu foʻi se mea faapea.” (Mata. 24:3, 21) O le a amata le puapuaga tele pe a faaaogā e Ieova faigāmalo faaletagata e faaumatia “Papelonia le Aai Tele,” po o lotu sesē uma i le lalolagi. (Faaa. 17:3-5, 16) O le ā le isi mea o le a sosoo ai?

O LE OSOFAʻIGA A SATANI

3. Pe a uma ona faaumatia lotu sesē, o le ā o le a tupu i tagata o Ieova?

3 Pe a uma le faaumatiaga o lotu sesē, o le a osofaʻia auauna a Ieova e Satani ma lana lalolagi. Talu ai o auauna a Ieova o ē e tausia le filemu, o le a foliga mai ai e leai so latou puipuiga. Ua valoia i le Tusi Paia e faatatau iā “Koku mai i Makoku” e faapea: “O le a e sau e pei o se matagi malosi. E pei oe o ao e ufitia ai le laueleele, o oe ma au ʻautau uma ma le toʻatele o tagata faatasi ma oe.” Peitaʻi, o le a matuā sesē lenā manatu!​—Eseki. 38:1, 2, 9-12.

4, 5. O le ā le tali mai a Ieova pe a osofaʻia e Satani Ona tagata?

4 O le ā le tali mai a Ieova pe a osofaʻia e Satani Ona tagata? Pe a osofaʻia auauna a Ieova, e silasila i ai Ieova e pei ua osofaʻia o ia. (Faitau le Sakaria 2:8.) Talu ai o Ieova o le Pule Silisili Ese Aoao, o le a vave ona ia faalaa mai e laveaʻi i tatou. E mautinoa o le a lē faatagaina e Ieova Satani e na te faatamaʻia Ana auauna. O le a taualuga lenā laveaʻiga i le faaumatiaga o le lalolagi a Satani iā Amaketo, “le taua o le aso tele o le Atua o Lē e ona le malosi uma lava.”​—Faaa. 16:14, 16.

5 Ua valoia i le Ieremia 25:31-33 e faatatau iā Amaketo e faapea: “ʻO loo faia e Ieova le finauga ma atunuu. E faamasino foʻi e ia tagata uma. E tuuina atu e ia o ē e amioleaga i le pelu,’ ua fetalai mai ai Ieova. O le mea lenei ua fetalai mai ai Ieova o ʻau, ʻFaauta! E alu atu le malaia mai i lea atunuu i lea atunuu, e oso aʻe foʻi le afā mataʻutia mai i vaega pito i mamao o le lalolagi. O i latou e fasia e Ieova i lea aso, e amata mai lava i le tasi pito o le lalolagi e oo atu i le isi pito o le lalolagi. E leai nisi e tagituʻi iā i latou, e lē aoaoina foʻi pe tanuina i latou. E fai i latou ma otaota i luga o le laueleele.’” O le a tafiesea le lalolagi a Satani iā Amaketo, ae faasaoina le vaega faalelalolagi o le faalapotopotoga a Ieova.

MĀFUAAGA O LE FAATUPULAʻIA PEA O LE FAALAPOTOPOTOGA A IEOVA

6, 7. (a) O fea e ō mai ai i latou o loo faia aʻe ai le “motu o tagata e toʻatele”? (e) O ā faatelega na iai i tausaga talu ai nei?

6 O loo tumau ma faatuputupulaʻia pea le vaega faalelalolagi o le faalapotopotoga a le Atua, ona ua maua e tagata o loo avea ma vaega o lenā faalapotopotoga le finagalo malie o le Atua. Ua faamautinoa mai i le 1 Peteru 3:12: “O loo silasila mai fofoga o Ieova i ē e amiotonu, e faafofoga mai foʻi ona taliga i la latou talosaga.” E aofia ai i ē amiotonu “se motu o tagata e toʻatele” o ē “ua sao mai i le puapuaga tele.” (Faaa. 7:9, 14) O nei tagata ua faasaoina e lē na o “se motu o tagata,” ae o “se motu o tagata e toʻatele.” Po o e iloa atu oe iā i latou na o le a faasaoina mai i le “puapuaga tele”?

7 O fea e ō mai ai i latou o loo faia aʻe ai le motu o tagata e toʻatele? Ua aoaoina i latou, ona na valoia e Iesu o se vala o le faailoga o lona faatasi mai. Na fetalai o ia: “O le a talaʻiina atu lenei tala lelei o le malo i le lalolagi atoa e fai ma molimau i atunuu uma; ona oo mai ai lea o le iʻuga.” (Mata. 24:14) O le galuega autū lenei a Molimau a Ieova i nei aso e gata ai. O le iʻuga, ua aʻoaʻoina ai  le faitau miliona o tagata e tapuaʻi i le Atua “i le agaga ma le upu moni.” (Ioa. 4:23, 24) O se faaaʻoaʻoga, i tausaga faaleauaunaga mai le 2003 i le 2012, e silia i le 2,707,000 i latou na faailogaina lo latou tuuina atu iā Ieova e ala i le papatisoga. Ua silia nei i le 7,900,000 Molimau a Ieova i le lalolagi aoao, ma e faitau miliona isi o loo aufaatasi ma i latou, aemaise lava i taimi o le Faamanatuga o le maliu o Iesu. E tatou te matuā olioli ona o le vave faatupulaʻia o le motu o tagata e toʻatele, ma ua tatou iloa o Ieova o loo ia faatupuina.​—1 Kori. 3:5-7.

8. O le ā le māfuaaga o le faatelega mataʻina i le faalapotopotoga a Ieova i aso nei?

8 O loo faatupulaʻia le aofaʻi o auauna a Ieova ona o loo ia lagolagoina ana Molimau. (Faitau le Isaia 43:10-12.) Sa valoia i le Isaia 60:22 lenei faatelega: “O le a avea lē e toʻaitiiti ma toʻaafe, e avea foʻi lē e faatauvaa ma se atunuu malosi. O aʻu o Ieova ou te faavave ona fai i ona aso.” I le amataga sa pei le vaega totoe faauuina o “lē e toʻaitiiti,” ae na faatupulaʻia lo latou aofaʻi a o aoaoina mai isi tagata Isaraelu faaleagaga i le faalapotopotoga a le Atua. (Kala. 6:16) O le faamanuia a Ieova i tausaga taʻitasi, ua faatuputupulaʻia ai pea le motu o tagata e toʻatele.

LE FINAGALO O IEOVA MO I TATOU

9. O le ā e tatau ona tatou faia ina ia maua le lumanaʻi matagofie ua folafola mai e Ieova?

9 E tusa po o i tatou o ni Kerisiano faauuina po o ni sui o le motu o tagata e toʻatele, ae ua folafola mai e Ieova se lumanaʻi matagofie mo i tatou uma. Ina ia maua lenā lumanaʻi, e tatau ona tatou usitaʻia poloaʻiga a Ieova. (Isa. 48:17, 18) O se faaaʻoaʻoga, sa finagalo Ieova i tagata Isaraelu ia latou usitaʻia lana Tulafono. Sa puipuia e le Tulafono i latou ma aʻoaʻo i latou i le auala e maua ai ni aiga fiafia ma uō lelei, le auala e faamaoni ai i faiga faapisinisi, ma le auala e feutagaʻi ai ma le agalelei ma isi. (Eso. 20:14; Levi. 19:18, 35-37; Teu. 6:6-9) O le a tatou maua foʻi aogā i aso nei pe a usitaʻia poloaʻiga a Ieova, ma e lē mamafa ana poloaʻiga. (Faitau le 1 Ioane 5:3.) O lea, afai e tatou te usitaʻia tulafono ma mataupu silisili a Ieova, e lē gata e puipuia ai i tatou, ae sili atu ai, o le a faaauau ona tatou “malolosi i le faatuatua.”​—Tito 1:13.

10. Aiseā e tatau ai ona faatulaga se taimi e suʻesuʻe ai le Tusi Paia, ma faia ai le Tapuaʻiga a le Aiga?

10 E tele auala ua agaʻi ai i luma le vaega faalelalolagi o le faalapotopotoga a Ieova. O se faataʻitaʻiga, o loo faaauau ona faamanino mai lo tatou malamalamaga i upu moni o le Tusi Paia. Ua taʻua i le Faataoto 4:18: “O le ala o ē e amiotonu ua pei o le susulu o le malamalama lea e atili ai ona malamalama ma malamalama pea, seʻia oo ina matuā ao lelei le aso.” E ao ona tatou fesili ifo: ʻPo o oʻu piiama i fetuunaʻiga i lo tatou malamalamaga i upu moni o le Tusi Paia? Po o fai ma aʻu masani le faitau e lē aunoa o le Tusi Paia? Pe ou te naunau e faitau a tatou lomiga? Po o fai i vaiaso taʻitasi la matou Tapuaʻiga a le Aiga?’ E lē faigatā ona fai nei mea, ae e tatau ona faatulaga le taimi e fai ai. E tāua tele ona tatou suʻesuʻe ma iloa le poto saʻo i le Tusi Paia, faatatau, ma agaʻigaʻi i luma faaleagaga, aemaise lava i lenei taimi a o lata tele mai le puapuaga tele.

11. Aiseā e auai ai tagata o Ieova i sauniga, fonotaga ma tauaofiaga?

11 O loo faia e le faalapotopotoga a Ieova le mea sili mo lo tatou lelei. O le pogai lea ua uunaʻia ai i tatou e utagia le fautuaga  a Paulo o loo i le Eperu 10:24, 25: “Ia tatou manatunatu foʻi le tasi i le isi ina ia faatupu ai le alofa ma galuega lelei, aua neʻi tuulafoaʻiina le faapotopotoina o i tatou e pei o le masani a isi, a ia fefaalaeiauaʻi, ia sili foʻi ona faia faapea auā ua outou iloa ua matuā latalata mai lava le aso.” Sa faapotopoto e lē aunoa tagata Isaraelu anamua e tapuaʻi ma aʻoaʻoina e Ieova. O se tasi o na faatasiga sa latou maua ai le fiafia, o le Tausamiga o Fale Lauvao i aso o Neemia. (Eso. 23:15, 16; Nee. 8:9-18) E tatou te maua foʻi aogā mai i sauniga, fonotaga ma tauaofiaga. E tatau ona tatou taumafai e auai i nei faatasiga uma, ona e fesoasoani e tatou te vavalalata atu ai iā Ieova, ma fiafia i le auaunaga iā te ia.​—Tito 2:2.

12. O le ā le vaaiga e tatau ona iā i tatou e faatatau i le galuega talaʻi o le Malo?

12 I le avea ai ma sui o le faalapotopotoga a Ieova, e tatau ona fai so tatou sao i le “galuega o le folafola atu o le tala lelei a le Atua.” O le faia o se sao i lenei “galuega paia,” ua avea ai i tatou ma “ʻaufaigaluega faatasi” ma Ieova o “Lē e Paia.” (Roma 15:16; 1 Kori. 3:9; 1 Pete. 1:15) O le talaʻia o le tala lelei ua saosaolaumea i le faamamaluina o le suafa paia o Ieova. E mautinoa o se faaeaga tautele le tuuina mai iā i tatou o le “tala lelei mamalu a le Atua fiafia.”​—1 Timo. 1:11.

13. O le ā e faalagolago i ai lo tatou malolosi faaleagaga ma le mauaina o le ola?

13 E finagalo Ieova ia tatou malolosi pea faaleagaga, e ala i le tumau ma le faamaoni iā te ia ma lagolagoina atoatoa lana faalapotopotoga. Na faapea atu Mose i tagata Isaraelu: “Ou te faia le lagi ma le lalolagi ma molimau e faasagatau iā te outou i le asō, ou te tuuina atu le ola ma le oti i ou luma, o le manuia ma le malaia; ma ia e filifili i le ola ina ia e ola ai pea, o oe ma lau fanau, e ala i le alofa iā Ieova lou Atua, e ala i le faalogo i lona siʻufofoga ma pipii atu iā te ia; auā o ia e tuuina mai lou ola ma le tele o ou aso, ina ia e nofo ai i le laueleele lea na tautō ai Ieova i ou augātamā o Aperaamo, o Isaako ma Iakopo e avatu iā i latou.” (Teu. 30:19, 20) E faalagolago lo tatou mauaina o le ola, i le faia o le finagalo o Ieova, alolofa iā te ia, faalogo ma usitaʻi i lona siʻufofoga, ma tumau faamaoni iā te ia.

14. O le ā le lagona sa iai i se uso e faatatau i le faalapotopotoga a Ieova?

14 Sa aʻoaʻoina e le uso o Pryce Hughes le upu moni a o leʻi oo i le 1914. Sa tumau faamaoni o ia iā Ieova ma lana faalapotopotoga i lona olaga atoa. I le talaaga o lona olaga, na ia taʻua ai o le lesona e sili ona tāua na ia aʻoaʻoina, o le piiama atu lea i le faalapotopotoga a Ieova ma aua le faalagolago i manatu faaletagata. Sa fesoasoani lenei mea iā te ia e onosaia ai tulaga na tofotofoina ai lona faatuatua. Na taʻua e Pryce e faapea, e na o le pau le auala e maua ai le finagalo malie o Ieova, o le faaauau lea ona mulimuli i le taʻitaʻiga a Lana faalapotopotoga.

IA AGAʻI PEA I LUMA FAATASI MA LE FAALAPOTOPOTOGA A IEOVA

15. Taʻu mai se faaaʻoaʻoga i le Tusi Paia, e faaalia ai le vaaiga e tatau ona iā i tatou i fetuunaʻiga i lo tatou malamalamaga i le Tusi Paia.

15 Ina ia tatou maua le finagalo malie o Ieova ma ana faamanuiaga, e tatau ona lagolagoina lana faalapotopotoga, ma talia fetuunaʻiga i lo tatou malamalamaga i le Tusi Paia. Ina ua maliu Iesu, o nisi Kerisiano Iutaia sa mananaʻo e tausia pea le Tulafono. (Galu. 21:17-20) Peitaʻi, na fesoasoani  le tusi a Paulo i Kerisiano Eperu e latou te talia ai le mea moni e faapea, e lē faapaiaina i latou i taulaga “na ofoina atu e tusa ai ma le Tulafono,” ae ua faapaiaina “i le ofoina atu o le tino o Keriso Iesu, lea e na o le faatasi lava ona faia.” (Epe. 10:5-10) O le toʻatele o na Kerisiano Iutaia, na vave ona suia o latou mafaufauga ma agaʻi i luma faaleagaga. E tatau foʻi ona tatou filigā e suʻesuʻe, ma ia talia fetuunaʻiga i lo tatou malamalamaga i le Afioga a le Atua po o la tatou galuega talaʻi.

16. (a) O ā faamanuiaga matagofie o le a iai i le lalolagi fou? (e) O le ā o loo e tulimataʻia i le lalolagi fou?

16 O ē uma e tumau faamaoni iā Ieova ma lana faalapotopotoga, o le a latou maua ana faamanuiaga e faavavau. O le a maua e Kerisiano faamaoni ua faauuina, faaeaga tautele i le avea ma suli faatasi ma Keriso i le lagi. (Roma 8:16, 17) Seʻi faaāta i le mafaufau le matuā olioli o i latou o le a ola e faavavau i le Parataiso i le lalolagi. I le avea ai ma vaega o le faalapotopotoga a Ieova, e tatou te matuā fiafia e taʻu atu i isi le lalolagi fou ua folafola mai e le Atua. (2 Pete. 3:13) Ua taʻua i le Salamo 37:11: “O ē e agamalu, e fai mo i latou le lalolagi, e matuā faafiafiaina foʻi i latou ona o le tele o le filemu.” Ua taʻua i le Isaia 65:21, 22 o le a ʻfausia e tagata fale ma nonofo ai,’ ma fiafia “i galuega a o latou lima.” O le a lē toe iai ni faiga sauā, mativa ma le fia ʻai. (Sala. 72:13-16) O le a lē toe iai Papelonia le Aai Tele e faasesē i tagata, ma o le a toetutū mai ē ua maliliu ma maua le ola e faavavau. (Isa. 25:8; Galu. 24:15; Faaa. 18:8, 21) Pe afai e faamalosia la tatou faiā ma Ieova ma faaauau ona agaʻi i luma faatasi ma lana faalapotopotoga, o le a tatou tofo moni lava i nei folafolaga matagofie.

Po o e iloa atu oe i le Parataiso? (Tagaʻi i le palakalafa 16)

17. O le ā le uiga e tatau ona iā i tatou e faatatau iā Ieova ma lana faalapotopotoga?

17 A o lata mai le iʻuga o lenei faiga o mea, seʻi o tatou tutumau i le faatuatua ma matuā talisapaia le faatulagaga a Ieova mo le tapuaʻiga. Sa iai i le faisalamo o Tavita lenā uiga ina ua pese e faapea: “E tasi lava le mea ua ou talosaga atu ai iā Ieova o le mea lea o loo oʻu naunau i ai, ina ia ou nofo i le fale o Ieova i aso uma o loʻu ola, e iloa ai le matagofie o Ieova ma ia ou vaai atu ai ma le fiafia i lona malumalu.” (Sala. 27:4) Tau ina ia tatou taʻitoʻatasi ma tumau faamaoni iā Ieova, ia aufaatasi pea ma ona tagata, ma faaauau ona piiama atu i lana faalapotopotoga.