Skip to content

Skip to table of contents

O Ieova La Tatou Uō Sili

O Ieova La Tatou Uō Sili

“Na taʻua ai o ia [Aperaamo] o le ʻuō a Ieova.’”​—IAKO. 2:23.

1. O ā tomai ua tatou maua ona ua foafoaina i tatou i le faatusa o le Atua?

E MASANI ona faapea mai tagata e faatatau i se tamaitiiti, “e soo uma lava i lona tamā.” O le māfuaaga, e mafai ona iai i le tamaitiiti uiga o ona mātua. O Ieova lo tatou Tamā faalelagi, o ia o le Puna o le ola. (Sala. 36:9) O i tatou o lana fanau ma e tele vala e tatou te pei ai o Ieova. Talu ai na foafoaina i tatou i lona “faatusa,” ua iā i tatou la le tomai e mafaufau lelei ai, faia faaiʻuga ma atiaʻe ni faauōga māfana.​—Kene. 1:26.

2. E faapefea ona avea Ieova ma a tatou Uō sili?

2 O le alofa o le Atua iā i tatou ma lo tatou faatuatua iā te ia ma lona Alo, ua mafai ai ona avea Ieova ma a tatou Uō sili. Na fetalai Iesu: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.” (Ioa. 3:16) E toʻatele tagata na iai se faauōga vavalalata ma Ieova. Peitaʻi, seʻi o tatou iloiloina ni lesona mai i ni tagata se toʻalua.

ʻO LAʻU UŌ O APERAAMO’

3, 4. Aiseā na ese mai ai le faauōga a Ieova ma Aperaamo, mai i Lana faauōga ma Isaraelu?

3 Na taʻua e Ieova Aperaamo le tamā o tagata Isaraelu o lana  “uō.” (Isa. 41:8) I le 2 Nofoaiga a Tupu 20:7, o loo taʻua ai foʻi Aperaamo, ʻo lē na alofa iā Ieova [po o “le uō a Ieova”].’ O le malosi o le faatuatua o Aperaamo, o le faavae lenā o lana faauōga vavalalata ma Lē na foafoaina o ia.​—Kene. 15:6; faitau le Iakopo 2:21-23.

4 O i latou foʻi na tupuga mai iā Aperaamo lea na faia aʻe ai le nuu o Isaraelu anamua, na taʻua Ieova o lo latou Tamā ma la latou Uō. Pagā lea, na mou atu lenā faauōga ma le Atua ona o lo latou lē faatuatuaina o folafolaga a Ieova.

5, 6. (a) Na faapefea ona avea Ieova ma au Uō? (e) O ā fesili e tatau ona tatou fesili ifo ai?

5 O le tele o mea e tatou te aʻoaʻoina e faatatau iā Ieova, o le a faamalosia ai lo tatou faatuatua iā te ia, ma faalolotoina ai lo tatou alofa mo ia. Seʻi manatu i le taimi muamua na e iloa ai o loo soifua moni le Atua, ma e mafai ona avea oe ma ana uō vavalalata. Na e iloa ai ua agasala tagata uma ona o le lē usitaʻi o Atamu. Ua e malamalama ai foʻi e toetoe o tagata uma ua vavaeese mai i le Atua. (Kolo. 1:21) Ua e iloa ai e lē o mamao ese lo tatou Tamā alofa mai iā i tatou, ma o loo naunau mai foʻi o ia. Ina ua aʻoaʻoina i tatou e faatatau i le taulaga togiola a Iesu, ma faaalia ai le faatuatua i lenā taulaga togiola, sa amata ai loa ona tatou atiaʻe se faauōga ma le Atua.

6 Pe a mafaufau i le auala na amata ai ona tatou iloa Ieova, e tatau ona tatou fesili ifo: ʻPo o faia ni aʻu taumafaiga e faaleleia atili ai le ma faauōga ma le Atua? Po o malosi loʻu maufaatuatuaina o Ieova? Po o faatuputeleina loʻu alofa mo Ieova i aso taʻitasi?’ O lea, seʻi o tatou iloiloina le faaaʻoaʻoga a Kitiona, o se tasi o uō vavalalata a le Atua, po o le ā e mafai ona tatou aʻoaʻoina mai ai.

O IEOVA O LE FILEMU

7-9. (a) O ā mea mataʻina na tutupu iā Kitiona, ma o le ā le iʻuga? (Tagaʻi i le ata i luga aʻe o le matua.) (e) E faapefea ona avea i tatou ma uō a le Atua?

7 Na auauna le faamasino o Kitiona iā Ieova a o faagasolo se vaitaimi faigatā, ina ua māeʻa ona ulu atu Isaraelu i le Nuu Folafolaina. Na faamataʻu ane le ʻau Mitiana iā Isaraelu, ma e tele taimi na latou osofaʻia ai fanua o tagata Isaraelu. O lea, na soli faalilolilo ai e Kitiona saito i le mea e soli ai vine nai lo o le soli i le fanua, ina ia vave ai ona natia le saito. O loo taʻua i le Faamasino mataupu e 6, na asiasi atu le agelu a Ieova iā Kitiona i Ofira. Na faateʻia Kitiona ina ua faapea atu le agelu, o ia o le “tagata malosi ma toa.” Na iloa e Kitiona na laveaʻiina e Ieova tagata Isaraelu mai i Aikupito. Peitaʻi, na ia taumasalosalo pe faamata o le a fesoasoani le Atua iā i latou i lenā taimi. Na auina atu e Ieova sana agelu e faamautinoa atu iā Kitiona, o le a fesoasoani le Atua iā te ia.

8 E leʻi mautinoa e Kitiona pe faapefea ona ia ʻfaaolaina Isaraelu mai i lima o Mitiana.’ Na fetalai manino atu Ieova iā te ia e faapea: “Talu ai ou te faatasi ma oe, e te fasiotia lava tagata Mitiana e pei o se tagata e toʻatasi.” (Faama. 6:11-16) Atonu na taumānatu Kitiona pe faapefea ona tupu lenā mea, o lea na ia fesili atu ai i le Atua mo se faailoga. Ia mātau, na mautinoa lelei e Kitiona o loo soifua le Atua, ina ua ia feutagaʻi ma Ia.

9 Na faamalosia le faatuatua o Kitiona ma vavalalata atu i le Atua, ona o le mea sa tupu. Na saunia e Kitiona se taumafataga ma tuu atu i le agelu. Na paʻi atu le tootoo a le agelu i le meaʻai ma mū ai. Na fefe Kitiona ina ua ia iloa o lenei agelu na auina mai e le Atua, o lea na ia faapea atu ai: “Auē! Ieova e, le Alii Pule Silisili Ese, ua ma  faafesagaʻi lava ma le agelu a Ieova.” (Faama. 6:17-22) Pe na aafia ai le faauōga a Kitiona ma Ieova i lenā mea? E leai, auā sa lagona e Kitiona le filemu ma le Atua. O lea na ia fausia ai se fata faitaulaga ma faaigoa o “Ieova-saloma,” o lona uiga o Ieova o le Filemu. (Faitau le Faamasino 6:23, 24) Pe a tatou manatunatu loloto i mea o loo faia e Ieova mo i tatou i aso uma, e tatou te iloa ai o ia o se Uō moni. O le tatalo e lē aunoa iā Ieova, o le a faateleina ai lo tatou filemu ma faamalosia ai la tatou faauōga ma Ia.

ʻO AI E FAI MA MĀLŌ I LE FALEʻIE A IEOVA’?

10. I le Salamo 15:3, 5, o ā mea e manaʻomia mai e Ieova iā i tatou pe a fia avea i tatou ma ana uō?

10 E manaʻomia ona tatou uia ni laasaga ina ia avea ai Ieova ma a tatou Uō. Na pese Tavita i le Salamo e 15 i mea e tatau ona faia, ina ia avea ai i tatou ma mālō i le faleʻie o Ieova pe avea ma uō a le Atua. (Sala. 15:1) Seʻi o tatou uaʻi atu i nei mea e lua: (1) ia ʻalofia le faia o tala taufaaleaga ma (2) ia faamaoni i a tatou feutagaʻiga ma isi. Na faapea mai Tavita e faatatau i se tasi e avea ma mālō i le faleʻie o Ieova: ʻE leʻi tautala lona laulaufaiva i upu taufaaleaga. E na te leʻi talia foʻi faiga faatogafalea ina ia tuuaʻia ai le tagata ua lē sala.’​—Sala. 15:3, 5.

11. Aiseā e tatau ai ona tatou ʻalofia le faia o tala taufaaleaga?

11 I se isi salamo, na lapataʻi mai ai Tavita e faapea: “Ia leoleo lou laulaufaiva mai i mea leaga.” (Sala. 34:13) Pe a tatou teena lenā fautuaga, o le a aafia ai la tatou faauōga ma lo tatou Tamā faalelagi. O le faia o tala taufaaleaga o se tasi o uiga o Satani le Tiapolo, le fili sili o Ieova. O le upu “Tiapolo,” e sau mai i le upu Eleni o lona uiga o le “taufaaleaga.” Pe a tatou faaeteete i faamatalaga e fai atu i isi, ma tala e tatou te faia e faatatau iā i latou, e fesoasoani lenā e tatou te vavalalata ai iā Ieova. Ae e tatau ona sili atu ona tatou faaeteete, i o tatou uiga e faaalia i uso taʻimua ua tofia e Ieova i le faapotopotoga.​—Faitau le Eperu 13:17; Iuta 8.

12, 13. (a) Aiseā e tatau ai ona tatou faamaoni i mea uma? (e) O le ā le iʻuga pe a tatou faamaoni?

12 Ua lauiloa auauna a Ieova o ni tagata e faamaoni. Na tusi Paulo e faapea: “Ia tatalo e lē aunoa mo i matou, auā ua matou talitonu ua iā i matou se lotofuatiaifo lelei, ona matou te mananaʻo ina ia faia mea uma ma le faamaoni.” (Epe. 13:18) Talu ai ua tatou maumauaʻi “ia faia mea uma ma le faamaoni,” e tatou te ʻalofia ai le faaaogā o o tatou uso Kerisiano. O se faataʻitaʻiga, pe a iai sa tatou pisinisi ma o loo faigaluega ai ni uso, ia faamautinoa ia feutagaʻi ma le lē manatu faapito ma i latou, ma ia tuuina atu lo latou totogi atoa. I le avea ai ma Kerisiano, e tatou te faamaoni ai i tagata uma ma ē e faigaluega iā i tatou. Afai foʻi e tatou te faigaluega i se uso, e lē tatau ona faatalitalia o ia e feutagaʻi ma i tatou i se auala faapitoa.

13 E masani lava ona faamālō mai tagata o le lalolagi i le faamaoni o Molimau a Ieova. O se faataʻitaʻiga, na mātauina e le pule o se kamupani telē le tausisi o Molimau a Ieova i a latou folafolaga. Na ia taʻua: “E tou te tausisi lava i mea e tou te fai mai ai.” (Sala. 15:4) E fesoasoani iā i tatou le faamaoni e tumau ai ona avea i tatou ma uō a Ieova, ma faamamaluina ai lo tatou Tamā alofa i le lagi.

FESOASOANI I ISI IA AVEA MA UŌ A IEOVA

E tatou te fesoasoani i isi e avea ma uō a Ieova (Tagaʻi i le palakalafa 14, 15)

14, 15. E faapefea ona tatou fesoasoani i isi i la tatou faiva, ina ia avea ma uō a Ieova?

14 E ui e tatou feiloaʻi i le faiva ma tagata atonu e talitonu o loo soifua le Atua, peitaʻi e lē manatu le toʻatele i le Atua o sa latou Uō sili. E faapefea ona tatou fesoasoani iā i latou? Mātau le faatonuga na tuuina atu e  Iesu i ona soo e 70, ina ua ia auina atu i latou e talaʻi. Na ia fetalai: “Afai tou te ulu atu i se fale, ia muamua ona outou faapea atu, ʻIa filemu le aiga nei.’ Afai o iai i inā se tagata o le filemu, ia maua e ia lo outou filemu. Afai e leai, ia toe faafoʻi mai le filemu iā te outou.” (Luka 10:5, 6) Atonu o le a fia aʻoaʻoina e tagata le upu moni, pe afai e tatou te faaalia uiga faaleuō. Pe a feita ma tetee mai tagata, atonu o le a fesoasoani lo tatou agalelei e faatoʻafilemu ai i latou. Atonu foʻi o le a latou lotomalilie ai e faalogo i le upu moni i se isi taimi.

15 Ia faaauau ona faaalia le filemu ma uiga faaleuō i tagata mapolotu e tatou te feiloaʻi ai, po o i latou o loo mulimuli i tū faalotu. E tatou te faafeiloaʻia ma le māfana tagata uma i a tatou sauniga, aemaise tagata ua lē fiafia i le tulaga o le lalolagi i aso nei, ma ē o loo mananaʻo e aʻoaʻo atili e faatatau i le Atua o loo tatou tapuaʻi i ai. E tele faaaʻoaʻoga o tagata faapena o loo taʻua i le faasologa o mataupu, “Suia e le Tusi Paia Olaga.”

GALULUE FAATASI MA LA TATOU UŌ SILI

16. E faapefea ona avea i tatou ma uō ma “ʻaufaigaluega faatasi” ma Ieova?

16 E masani ona atiaʻe e tagata e galulue faatasi se faauōga vavalalata. O i latou ua uma ona tuuina atu iā Ieova, e lē gata e taʻua i latou o Ana uō, ae o i latou foʻi o le “ʻaufaigaluega faatasi” ma ia. (Faitau le 1 Korinito 3:9.) A o tatou auai i le talaʻiga ma faia isi ma soo, o le a tatou aʻoaʻoina atili ai e faatatau i uiga matagofie o lo tatou Tamā faalelagi. Ua tatou vaaia foʻi le auala ua fesoasoani ai lona agaga paia iā i tatou i le talaʻia o le tala lelei.

17. E faapefea i fonotaga ma tauaofiaga ona faamaonia ai o Ieova o la tatou Uō?

17 Pe a faatele so tatou sao i le galuega talaʻi, o le a atili ai ona tatou vavalalata atu iā Ieova. Ua tatou vaaitino i le lē faatagaina e Ieova o tagata tetee e taofia le galuega talaʻi. Ua ia taʻitaʻia foʻi i tatou. E tatou te maofa i le faaauau ona ia aʻoaʻoina o i tatou i meaʻai faaleagaga e sili ona lelei, e ala mai i sauniga ma lomiga. E tatou te iloa mai i a tatou tauaofiaga ma fonotaga, le malamalama lelei o Ieova i o tatou manaʻoga ma faafitauli. Ina ua māeʻa se tasi o tauaofiaga, na tusi mai se aiga e faapea: “Na matuaʻi pāʻia o matou loto i le polokalame. Na matou iloa ai le alofa tele o Ieova i tagata taʻitoʻatasi uma, ma o lona finagalo ia tatou taulau manuia.” Ina ua māeʻa se tauaofiaga faapitoa i Aialani, na talisapaia ai e se ulugalii mai i Siamani le auala māfana ma le agalelei na faafeiloaʻia ai i laʻua. Na la faapea mai: “E sili ona ma faafetaia Ieova ma lana Tupu o Iesu Keriso, auā na la valaauliaina i maʻua e avea o se vaega o se nuu ua  iai le autasi moni. O lo tatou autasi e lē na o upu, ae aofia ai gaoioiga. E faamanatu mai pea iā i maʻua i mea na tutupu i le tauaofiaga faapitoa i Dublin, le faaeaga tautele o le auauna faatasi ma o tatou uso i le Atua sili.”

IA FETALANOAAʻI

18. O le ā e tatau ona tatou fesili ifo ai e faatatau i la tatou fesootaʻiga ma Ieova?

18 E māfana ni faiā faaleuō pe a lelei fesootaʻiga. Ua faaaogā i le tele o taimi e tagata i aso nei le Initaneti ma feʻau tusitusia i telefoni feaveaʻi e fesootaʻi ai. Ae o le ā le tele o le taimi o loo tatou fesootaʻi atu ai i la tatou Uō sili o Ieova? O Ieova o le “Faafofoga tatalo.” (Sala. 65:2) Pe e masani ona tatou tausolomua e talanoa atu iā te Ia?

19. O le ā e fesoasoani iā i tatou, pe a faigatā ona faaleo atu o tatou faalogona iā Ieova i le tatalo?

19 E lē faigofie i nisi o auauna a Ieova ona faaleo atu o latou faalogona loloto. Peitaʻi, e finagalo Ieova ia sasaa atu o tatou faalogona pe a tatou tatalo. (Sala. 119:145; Aue. 3:41) Ua tatou maua le fesoasoani pe a faigatā ona maua ni upu e faamatala atu ai o tatou faalogona. Na tusi Paulo i Kerisiano i Roma: “O le faafitauli, e tatou te lē iloa po o ā mea e ao ona tatou tatalo atu ai, a ua ʻaiʻoi atu le agaga mo i tatou ma le ōi e lē mafai ona faamatalaina. O lē e suʻesuʻe i loto, ua ia silafia gaoioiga a le agaga, auā o le agaga lea o loo ʻaiʻoi atu i le Atua mo le ʻaupaia.” (Roma 8:26, 27) E fesoasoani iā i tatou le faitauina o le tusi o Iopu, Salamo ma le Faataoto, e iloa ai le auala e faamatala atu ai o tatou faalogona iā Ieova.

20, 21. Ua faapefea ona faamāfanafanaina i tatou i upu a Paulo i le Filipi 4:6, 7?

20 Pe a tatou fetaiaʻi ma faafitauli ogaoga, ia manatua upu a Paulo i uso i Filipi e faapea: “Aua neʻi popole i se mea, ae ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai.” O le a tatou maua le faamāfanafanaga moni, pe a tatou tatalo faapena iā Ieova. Na faapea atili mai Paulo: “Ona leoleoina ai lea o o outou loto ma mafaufau i le filemu mai i le Atua, e silisili i mea uma lava e manatu i ai, e ala iā Keriso Iesu.” (Fili. 4:6, 7) E tatau ona talisapaia i taimi uma le filemu e lē mafaatusalia mai i le Atua, lea e fesoasoani moni i le puipuia o o tatou loto ma mafaufau.

E faapefea i le tatalo ona faamalosia ai la tatou faauōga ma le Atua? (Tagaʻi i le palakalafa 21)

21 E fesoasoani iā i tatou le tatalo e atiaʻe ai la tatou faauōga ma Ieova. O lea, e tatau ai ona tatou “tatalo e lē aunoa.” (1 Tesa. 5:17) E tatau ona faamalosia pea la tatou faauōga ma le Atua, ma faia mea uma o loo ia faafinagaloina mai iā i tatou. Seʻi o tatou faaalu se taimi e mafaufau ai i faamanuiaga ua tatou maua, auā o Ieova o lo tatou Tamā, Atua ma o la tatou Uō.