Skip to content

Skip to table of contents

 TALAAGA O LE SOIFUAGA

O le Faalagolago iā Ieova e Faatamaoaigaina Ai

O le Faalagolago iā Ieova e Faatamaoaigaina Ai

E ui e lē mailoa mea e tutupu i le olaga ma e ono faigatā ona taulima, peitaʻi e faamanuia e Ieova i latou e faalagolago iā te ia ae lē o i latou lava. O le mea lenā na tupu iā i maʻua ma laʻu avā a o faagasolo le olaga. O se tala puupuu lenei o le ma auaunaga.

NA MASANI oʻu mātua i se tauaofiaga a Tagata Aʻoga o le Tusi Paia i le 1919, lea na faia i Cedar Point i Ohio i le Iunaite Setete, ma na faaipoipo ai i lenā lava tausaga. Na ou fanau i le 1922, ae na fanau loʻu uso o Paulo i le lua tausaga mulimuli ane. Na fanau laʻu avā o Grace i le 1930. Na feola aʻe ona mātua o Roy ma Ruth Howell o ni Tagata Aʻoga o le Tusi Paia. Na avea foʻi mātua o ona mātua ma Tagata Aʻoga o le Tusi Paia, ma o i latou o ni faauō a le uso o Charles Taze Russell.

Na ma masani ma Grace i le 1947, ae na ma faaipoipo iā Iulai 16, 1949. A o ma leʻi faaipoipo, sa ma talatalanoa e faatatau i lo ma lumanaʻi, ma na ma filifili e lē faia se fanau ae auauna faataimi atoa i le faiva. Iā Oketopa 1, 1950, na amata ai le ma auaunaga paeonia. Ae i le 1952, na valaaulia ai i maʻua e auai i le galuega femalagaaʻi.

GALUEGA FEMALAGAAʻI MA TOLENIGA O LE AʻOGA O KILIATA

Sa ma manaʻomia tele le fesoasoani ina ia faataunuu ai le ma faaeaga fou. Na fesoasoani mai uso ua lava le poto masani iā te aʻu, ae sa ou saʻilia foʻi se fesoasoani mo Grace. Na ou talanoa atu iā Marvin Holien, o se faauō ua leva a lo matou aiga ma ua iai le poto masani i le galuega femalagaaʻi. Na ou fesili iā te ia pe mafai ona ia saʻilia se tasi e galulue faatasi ma Grace, ina ia maua ai se toleniga. Talu ai e laʻitiiti o ia ma e leai se poto masani. Na ia tali mai: “E mafai ona fesoasoani iā te ia Edna Winkle, o se paeonia ua lava le poto masani.” Mulimuli ane, na faapea mai Grace e faatatau iā Edna: “Sa ou lagona le toʻafilemu i le talaʻiga, ma e na te iloa lelei le auala e taulima ai teteega. Na ia aʻoaʻoina foʻi aʻu e faalogologo lelei i lē e ona le fale, ina ia ou iloa le faamatalaga talafeagai e fai atu. O ia o se fesoasoani talafeagai mo aʻu.”

Mai le itu agavale: Nathan Knorr, Malcolm Allen, Fred Rusk, Lyle Reusch, Andrew Wagner

Na ma auauna ma Grace i ni matagaluega se lua i le setete o Iowa, e aofia ai ma ni vaega o setete o Minnesota ma South Dakota. Ona auina atu lea o i maʻua i New York Circuit 1, lea e aofia  ai aai o Brooklyn ma Queens. E lē galo iā i maʻua le leai o so ma tomai e faataunuu ai lenā faaeaga fou. Na aofia i lenā matagaluega le faapotopotoga i Brooklyn Heights, lea e feiloaʻi i le Maota mo Sauniga i le Peteli, ma e auai ai le toʻatele o sui o le aiga Peteli ua lava le poto masani. Ina ua māeʻa laʻu lauga muamua o le auaunaga, na faafeiloaʻi aʻu e le uso o Nathan Knorr ma fai mai: “Malcolm, ua talafeagai lelei fautuaga na e tuuina mai mo i matou e galulue i ai. Aua neʻi galo, a e lē fesoasoani mai i le aumaia o fautuaga agalelei, e itiiti lou aogā i le faalapotopotoga. Ia faaauau pea galuega lelei o loo e faia.” Na ou faamatala lenā mea iā Grace ina ua tuua le sauniga. Na ma ō loa i lo ma potu i le Peteli, ua matuā ma lēlavavā lava ma fetagisi ona o le popole tele.

“A e lē fesoasoani mai i le aumaia o fautuaga agalelei, e itiiti lou aogā i le faalapotopotoga. Ia faaauau pea galuega lelei o loo e faia”

I nai masina mulimuli ane, na valaaulia ai i maʻua mo le vasega lona 24 o le Aʻoga o Kiliata, lea na faia le faauuga iā Fepuari i le 1955. Na faailoa mai ai o lenā aʻoga e lē toleniina ai i maʻua e avea ma misionare, ae e faaleleia atili ai le ma auaunaga i le galuega femalagaaʻi. O le auai i le aʻoga, o se avanoa matagofie ma na iloa ai lo ma tulaga faatauvaa.

Fern ma George Couch faatasi ai ma i maʻua ma Grace i Kiliata, i le 1954

Ina ua māeʻa lenā, ona tofia lea o i maʻua i le galuega faaitumalo, lea e aofia ai setete o Indiana, Michigan ma Ohio. Ae iā Tesema 1955, na faateʻia ai i maʻua ina ua tusi mai le uso o Knorr e faapea: ʻIa faailoa saʻo mai se lua manatu. Taʻu mai pe lua te lotomalilie e ō mai i le Peteli ma nonofo ai, pe lua te talia se tofiga e auauna i se isi atunuu pe a māeʻa sina taimi i le Peteli. Ou te fia iloa foʻi pe sili atu ona oulua fiafia i le galuega femalagaaʻi.’ Na ma tali atu e ma te talisapaia so o se faaeaga e tuuina mai. E leʻi umi lava, ae tofia loa i maʻua e auauna i le Peteli.

TAUSAGA MATAʻINA I LE PETELI

Na aofia i laʻu auaunaga i le Peteli, faaeaga o le faia o lauga i faapotopotoga, tauaofiaga ma fonotaga i le Iunaite Setete atoa. Na ou toleniina ma fesoasoani i uso talavou o ē na mulimuli ane tauaveina le tele o tiute tauave i le faalapotopotoga a Ieova. Na ou galue mulimuli ane o se failautusi a le uso o Knorr, i le ofisa na faamaopoopo ai le galuega talaʻi i le lalolagi aoao.

Galue i le Matagaluega o le Auaunaga i le 1956

Na sili atu ona ou fiafia i tausaga na ou auauna ai i le Matagaluega o le Auaunaga, lea sa ma galulue ai ma T. J. (Bud) Sullivan, o sē ua loa tausaga o avea ma ovasia i lenā matagaluega. Peitaʻi, sa iai foʻi nisi na fesoasoani tele iā te aʻu lea e aofia ai Fred Rusk. Na tofia o ia e toleniina  aʻu. Ou te manatua sa ou fesiligia o ia pe aiseā e na te faia ai le tele o suiga i nisi o aʻu tusi. Ae na ʻata o ia ma faailoa mai le manatu tāua lenei: “Malcolm, pe a e faia se tala, e mafai ona faalautele le manatu i nisi upu, ae pe a e tusia se tusi aemaise pe a auina atu i nei, e tatau ona manino, saʻo ma talafeagai.” Ona ia faapea mai lea ma le agalelei: “Ia lototele. O loo e faia se galuega lelei, ma o le a faasolo ina e agaʻigaʻi i luma.”

Sa fiafia Grace i le tele o galuega sa ia faia i le Peteli, lea e aofia ai le faamamāina o potu. I aso nei, pe a ma fetaui i nisi uso sa auauna i le Peteli a o talavou, e latou te faamatala atu ma le fiafia iā Grace le talisapaia o le toleniga sa ia faia i le auala e teu ai moega, ma sa fiafia i ai o latou tinā. Sa fiafia foʻi Grace e galue i Matagaluega o Mekasini, matagaluega e gafa ma le taliina o tusi mai i tagata, ma le matagaluega e sauniunia ai kaseti ma lipine (Tape Duplicating). Na manatu Grace, o nei faaeaga eseese na fesoasoani iā te ia e talisapaia mea e tatou te faia i le faalapotopotoga a Ieova, ma po o fea lava e tatou te auauna i ai, o se faaeaga ma o se faamanuiaga.

FETUUNAʻIGA NA MA FAIA

I le taulotoaʻiga o tausaga o le 1970, na ma iloa ai ua matuā manaʻomia e o ma mātua ua matutua le fesoasoani. O lea, na tatau ai ona ma faia se faaiʻuga e ui lava sa leʻi faigofie. E ma te leʻi mananaʻo e tuua le Peteli faapea uso ma tuafāfine na ma māfana iai, peitaʻi na ou manatu o loʻu tiute tauave le tausia o o ma mātua. O lea, na ma filifili ai e tuua le Peteli, ae na ma faamoemoe e toe foʻi mai pe a suia le tulaga o mea.

Ina ia tausia i maʻua lava, na amata ona ou faigaluega i le fale fai inisiua. Ou te manatua le tala a se tasi o pule na faapea mai, o le pisinisi lenei, e leai se isi mea e sili atu ona tāua, nai lo o lou alu e ofo atu inisiua i tagata e manaʻomia i afiafi uma. Na ou tali atu: “Ou te faaaloalo i lou manatu ona ou te iloa ua e malamalama lelei i le galuega. Ae e iai foʻi oʻu tiute tauave faaleagaga ua ou masani ai, e lē mafai ona ou tuulafoaʻia. E mafai ona ou faigaluega i isi afiafi, ae o afiafi o Aso Lua ma Aso Tofi, e tatau ona ou auai ai i sauniga e sili ona tāua iā te aʻu.” Na faamanuia aʻu e Ieova ona o loʻu lē misia o sauniga ona o le galuega.

Iā Iulai 1987, na maliu ai loʻu tinā i le fale e tausia ai tagata matutua, a o ma iai i autafa o lona moega. Na faapea atu le pule o tausimaʻi iā Grace: “Alu i le fale e fai sau mālōlōga. Ua iloa uma e tagata ua leva ona e i inei e vaai le tinā o lau tane. Ia faatoʻafilemu lou mafaufau.”

Iā Tesema 1987, na ma toe talosaga ai i le Peteli, le nofoaga e ma te fiafia i ai. Ae i nai aso mulimuli ane, ae maua loa Grace i le kanesa o le  taufale. Ina ua māeʻa lona taotoga, na maua mai le iʻuga ua mafai ona togafitia lona kanesa. I le taimi e tasi, na ma maua ai se tusi mai i le Peteli e faaauau pea la ma auaunaga i le faapotopotoga sa ma iai. Na ma maumauaʻi e faaauau pea le ma galuega talaʻi.

Ina ua maua laʻu galuega i Texas, na ma filifili ai loa e siitia atu i inā ona e talafeagai le tau māfanafana mo i maʻua. E 25 tausaga o matou vavalalata ma uso ma tuafāfine o ē na matuā ma māfana i ai.

LESONA NA MA AʻOAʻOINA

E ui sa tauivi Grace ma maʻi eseese o le kanesa e aofia ai le kanesa o le taufale, le kanesa o le thyroid ma le kanesa o le susu (seʻi tulou), ae na te leʻi faitioina lona tulaga pe fesiligia foʻi mataupu silisili i le tulaga ulu ma le felagolagomaʻi. Sa masani ona fesiligia o ia, po o le ā le ki o le ma taulau manuia o se ulugalii ma le fiafia o loo ma mauaina. Na ia taʻua māfuaaga e fā: “O maʻua o se uō mamae, e ma te talatalanoa e lē aunoa, fiafia e faifaimea faatasi i aso uma, ma e lē mafai ona ma momoe a o leʻi foʻia ni feeseeseaʻiga.” O le mea moni e iai taimi e ma te feeseeseaʻi ai, peitaʻi e ma te fefaamagaloaʻi ma faagalo ni sesē, ma e ese le aogā o lenā auala.

“Ia faalagolago i taimi uma iā Ieova. Ia talia so o se mea e faataga e Ieova e tutupu iā i tatou”

O faigatā uma na ma fesagaʻia, e iai ni lesona lelei na ma aʻoaʻoina mai ai:

  1. Ia faalagolago i taimi uma iā Ieova. Ia talia so o se mea e faataga e Ieova e tutupu iā i tatou, ae aua neʻi faalagolago i lou lava atamai.​—Faata. 3:5, 6; Iere. 17:7.

  2. Faalagolago atu i le Afioga a le Atua mo le taʻitaʻiga i vala uma o le olaga. E tāua le usitaʻi iā Ieova ma ana tulafono. E lē mafai ona tatou faagutugutulua pe usiusitaʻi iā Ieova pe leai.​—Roma 6:16; Epe. 4:12.

  3. O le faia o se igoa lelei ma Ieova e pau lenā o le mea e sili ona tāua i le olaga. Ia faamuamua le auaunaga iā Ieova ae lē o le saʻilia o meafaitino.​—Faata. 28:20; Fai. 7:1; Mata. 6:33, 34.

  4. Ia tatalo iā Ieova ina ia e fua tele mai ma agaʻigaʻi i luma i lau auaunaga i le mea e gata ai lou mafai. Ia taulaʻi i mea e mafai ona e faia ae lē o mea e lē mafai ona e faia.​—Mata. 22:37; 2 Timo. 4:2.

  5. Ia mautinoa e leai lava se isi faalapotopotoga e maua ai le finagalo malie o Ieova ma ana faamanuiaga.​—Ioa. 6:68.

Ua silia i le 75 tausaga o ma auauna iā Ieova. Mai i lenā vaitaimi, e toetoe 65 tausaga o ma auauna faatasi o se ulugalii. Maʻeu le matagofie o taimi na ma auauna faatasi ai iā Ieova mo le tele o tausaga. E ma te faamoemoe ma tatalo mo uso ma tuafāfine uma, ina ia mafai ona latou tofo foʻi i le taulau manuia o le olaga pe a faalagolago iā Ieova.