Skip to content

Skip to table of contents

Pe Mafai Ona E Faaaogā Avanoa Uma e Lapataʻia ai Isi?

Pe Mafai Ona E Faaaogā Avanoa Uma e Lapataʻia ai Isi?

Na matuā fia matamata tagata i le ata na faaigoaina A Trip Down Market Street. O lenā ata e leai se leo ae na o faaaliga o ata, o loo faaalia ai le olaga i aso faisoo i San Francisco i le Iunaite Setete, i le vaitausaga o le 1900. Na tuu e le ʻau puʻeata se mea puʻeata vili lima i luma o se taavale, ona agaʻi saʻo atu lea o le taavale i luma o le auala tele o loo tumutumu ai tagata. E aofia i na ata taavale solofanua, taavale, le ʻau fai faatau ma le ʻau faatau nusipepa o loo faia a latou galuega.

O le vaaiga sili ona faanoanoa, o ata na puʻeina iā Aperila i le 1906, a o leʻi tupu le mafuiʻe mataʻutia ma le afi tele iā Aperila 18. Na fasiotia ai le faitau afe o tagata ma na toetoe faatamaʻia ai lenā vaega atoa o le aai. Atonu o nisi tagata sa iai i le ata na feoti ai. Na faapea mai Scott Miles, o sē na tupuga mai i se tasi na aofia i le faiga o le ata: ʻNa ou matuā alofa i tagata sa iai i le ata, ona e latou te leʻi iloa le mea o le a tupu iā i latou.’

I le 1906, na tulaʻi mai ai se mafuiʻe e aunoa ma se lapataʻiga, lea na iʻu ai i se afi tele ma faatamaʻia ai se vaega telē o le aai o San Francisco

E talitutusa lenā tulaga ma o tatou aso, lea e manaʻomia ona tatou mafaufau loloto i ai. E tatou te alolofa i o tatou tuaoi. O loo faia a latou galuega masani e aunoa ma le iloa o le aso mataʻutia o loo faaloloʻi mai, le faaumatiaga o lenei faiga o mea. E tatou te lē mailoa le taimi e tupu ai se mafuiʻe. Peitaʻi, o loo iai le avanoa e tatou te lapataʻia ai o tatou tuaoi e faatatau i le aso faamasino a Ieova. E mafai ona faatulaga sou taimi i vaiaso taʻitasi e auai ai i le talaʻiga, ae pe mafai ona e faaaogā avanoa uma e lapataʻia ai isi?

NA NOFOSAUNI MA LOTOMALIE IESU E TALAʻI

E mataʻina le faaaʻoaʻoga a Iesu auā sa nofosauni o ia e talaʻi i tagata uma e feiloaʻi ai, e pei o le aolafoga na la feiloaʻi i le auala ma le fafine sa i le vaieli a o mālōlō i le aoauli. (Luka 19:1-5; Ioa. 4:5-10, 21-24) Na lotomalie foʻi Iesu e faaaogā le taimi na ia faatulaga e mālōlō ai, ina ia aʻoaʻo atu ai i isi. O lona alofa mutimutivale i ona tuaoi, na uunaʻia ai o ia e fai le mea e sili atu nai lo o le tau ina talaʻi atu i tagata. (Mare. 6:30-34) Ua faapefea ona faaaʻoaʻo le toʻatele i aso nei i le uiga o le faanatinati o Iesu?

NA LATOU FAAAOGĀ SO O SE AVANOA

O Melika, e nofo i se fale mautotogi telē e matuā leoleoina lelei, ma o le toʻatele o ona tuaoi o tagata  aʻoga mai i isi atunuu. E lē mafai ona maua a latou numera telefoni, ma e lē faamauina o latou igoa i le lisi o loo faapipii i le vaega e ulufale mai ai tagata. Na ia talisapaia le avanoa faapitoa na ia maua e amata ai talanoaga faale-Tusi Paia ma ē mautotogi, pe a feiloaʻi i le vaega e ulufale mai ai faapea luga o lifi. Na ia manatu i ai o lana oganuu lea, ma e masani ona iai ana lomiga i gagana eseese i le tele o taimi. E toʻatele na talia sāvali ma mekasini. Na ia faasino foʻi iā i latou le tuatusi i le Initaneti o le jw.org, ma ua ia faia le tele o suʻesuʻega faale-Tusi Paia.

E faigaluega Sonia i le ofisa o se fomaʻi, ma e mataala i avanoa e talaʻi atu ai i so o se tagata e feiloaʻi i ai. O lona sini ia avatu se molimau māeʻaeʻa i tagata taʻitoʻatasi i le fale faigaluega. E taumafai o ia e malamalama i manaʻoga ma mea e fiafia ai tagata taʻitoʻatasi, ona faaaogā lea o lona taimi mālōlō e saʻili ai i latou mo se talanoaga faale-Tusi Paia. O le iʻuga, na mafai ona amata e Sonia ni suʻesuʻega faale-Tusi Paia se lua. Ua ia fuafua foʻi e faaaogā nisi o ona taimi mālōlō e talanoa ai i tagata, o loo faatalitali i le taimi e vaai ai le fomaʻi.

IA FAAAOGĀ TATAU AVANOA

Na faapea mai se tasi na sao mai i le mafuiʻe i le 1906: “O se mala lea e sili ona mataʻutia e leʻi tupu muamua lava i se isi mea.” Peitaʻi, o mala uma e lē mafaatusalia i le aso o le tauimasui o loo fotuaʻi mai, “i ē e lē iloa le Atua.” (2 Tesa. 1:8) E naunau Ieova i tagata ina ia suia o latou mafaufau ma loto, ina ia talia le feʻau lapataʻi o loo folafolaina atu e ana auauna.​—2 Pete. 3:9; Faaa. 14:6, 7.

Pe mafai ona e faaaogā tatau avanoa uma e molimau atu ai a o faia au galuega masani?

Ua iā te oe le faaeaga e faamalamalama ai i tagata ua tatou ola i aso faigatā. Ia fesoasoani iā i latou e ʻalofia faanaunauga manatu faapito, ina ia mafai ai ona saʻili atu iā Ieova. (Sefa. 2:2, 3) Pe mafai ona e faaaogā tatau avanoa uma e molimau atu ai i tagata tou te faigaluega faatasi, tuaoi ma ē tou te feiloaʻi i aso uma? Pe mafai ona e faaaogā avanoa uma e lapataʻia ai isi?