Skip to content

Skip to table of contents

Fesili Mai le ʻAufaitau

Fesili Mai le ʻAufaitau

Pe e talafeagai mo mātua Kerisiano ona nonofo faatasi i taimi o sauniga, ma lo la alo talavou faateʻaina o loo i lalo o le la vaavaaiga?

E leai se māfuaaga e soona popole ai i le mea e nofo ai le tagata faateʻaina i taimi o sauniga. O loo taumafai lenei mekasini e faalaeiau mātua Kerisiano, ina ia saunia le fesoasoani faaleagaga mo le tamaitiiti faateʻaina o loo latou nonofo faatasi, pe a talafeagai ona faia faapea. E pei ona taʻua i le Olomatamata o Oketopa 1, 2001 i le itulau e 16-18, e ono mafai ona suʻesuʻeina faatasi le Tusi Paia e mātua ma o latou alo talavou faateʻaina o loo latou nonofo faatasi. O le fuafuaga, ina ia maua e le tamaitiiti faalaeiauga talafeagai e faasaʻo ai ona ala.

E lē o se faafitauli pe a nofo filemu se tamaitiiti faateʻaina ma ona mātua i le Maota mo Sauniga. Talu ai e lē tau manaʻomia ona nofo se tagata faateʻaina i nofoa pito i tua, e leai la se afāina o le nofo o le talavou faateʻaina i autafa o ona mātua, e tusa po o fea lava e nonofo ai. Ona o mātua e tausia le itu faaleagaga o lo la alo talavou, e mautinoa e la te mananaʻo e faamautinoa o loo uaʻi totoʻa atu le talavou i le sauniga. Atonu e fesoasoani le nonofo faatasi ma le talavou nai lo o le tuu o ia e nofo solo ona e lē uaʻi lelei ai.

Ae faapefea pe afai e lē o toe nonofo faatasi le talavou faateʻaina ma ona mātua? Po o lona uiga e lē tatau ona latou nonofo faatasi i le sauniga? I le taimi ua mavae, na taʻua manino mai i la tatou lomiga le uiga e tatau i se Kerisiano ona taumafai e faatumau, pe a faifaimea faatasi ma se tauaiga faateʻaina e lē o toe nonofo faatasi. * Peitaʻi, e matuā eseese le nonofo filemu o le tagata faateʻaina ma lona aiga i sauniga, mai le taumafai o sui faamaoni o le aiga e saʻili se avanoa e faifaimea faatasi ai ma le tagata faateʻaina. Atonu e leai se afāina o le nonofo faatasi i sauniga, pe afai e saʻo le vaaiga a sui faamaoni o le aiga e faatatau i le tagata faateʻaina, ma o loo latou taumafai e mulimuli i taʻiala a le Tusi Paia e faatatau i le faifaimea faatasi ma ia.​—1 Kori. 5:11, 13; 2 Ioa. 11.

E leai se afāina o le nofo o se tagata faateʻaina i autafa o sona tauaiga po o se isi sui o le faapotopotoga, pe afai e nofo filemu le tagata faateʻaina. O le puleaina o le nofoa e fia nofo ai le tagata, e mafai ona tulaʻi mai ai faafitauli. Pe afai o loo faaauau pea ona faaalia e i latou uma i sauniga, e aofia ai ma tauaiga faamaoni le faaaloalo i mataupu silisili o le Tusi Paia e faatatau i ē faateʻaina, ma e lē avea o se mea e tausuai ai le ʻauuso, e leai la se māfuaaga e popole ai i nofoa e fia nonofo ai i latou e auai i sauniga. *

^ pala. 6 O lenei faamatalaga ua suia ai le faamatalaga o loo lomia i le Watchtower o Aperila 1, 1953, itulau e 223.