Skip to content

Skip to table of contents

 MEA ILOGA O LO TATOU TALAFAASOLOPITO

Na Latou Tutumau i le “Itula o Tofotofoga”

Na Latou Tutumau i le “Itula o Tofotofoga”

INA UA gāpā le Taua Muamua a le Lalolagi i le 1914, na mātauina e le toʻatele le solitū o Tagata Aʻoga o le Tusi Paia. (Isa. 2:2-4; Ioa. 18:36; Efe. 6:12) O ā mea na tutupu i auauna a le Atua i Peretania?

Henry Hudson

I le 1916, na faamalosia e le Tulafono mo Auaunaga Faavaegāʻau, le auai o tane nofofua i Peretania mai le 18 i le 40 tausaga i le vaegaʻau. Na tuusaʻoloto i latou na teena le auaunaga faavaegāʻau ona o le malolosi o o latou talitonuga faalotu. Na faatū e le malo faamasinoga faapitoa e iloilo ai ē e tatau ona tuusaʻoloto, ma galuega e tatau ona latou galulue ai.

E leʻi umi ae taofia nisi o Tagata Aʻoga o le Tusi Paia e toʻa 40 i le falepuipui a le vaegaʻau, ae na ave faamalosi le toʻa 8 i le taua i Falani. O nei gaoioiga lē tonu, na tuuina atu ai e le ʻauuso i Peretania se tusi i le palemia o Herbert Asquith, e teena ai le faafalepuipuiina o uso, faatasi ai ma se tagi na sainia e le 5,500 tagata.

O le mumusu o le toʻa 8 na auina atu i Falani e auai i le taua, na fuafua ai o le a tafana i latou. A o tutū i le laina, na toe suia la latou faasalaga e faafalepuipui mo le sefulu tausaga. Na toe faafoʻi i latou i Egelani e tuli ai la latou faasalaga.

James Frederick Scott

A o faagasolo le taua, na faamalosia foʻi le auai o tane faaipoipo. O le iʻuga o le faamasinoga i Manchester i Egelani, na molia ai Henry Hudson, o se fomaʻi ma o se Tagata Aʻoga o le Tusi Paia. Iā Aokuso 3, 1916, na molia ai o ia o sē solitulafono, faasala tupe o ia ma tuu atu i le vaegaʻau. Na faia foʻi se isi faamasinoga i Edinburgh i Sikotilani. Na faalēaogāina ai moliaga o James Frederick Scott, o se paeonia e 25 tausaga. Sa taumafai le malo e apili le iʻuga a le faamasinoga. Peitaʻi e leʻi faaauauina le apili, ona sa iai se isi faamasinoga sa faia i Lonetona, lea na molia ai le uso o Herbert Kipps, ma sa faasala tupe o ia ma tuu atu i le vaegaʻau.

Iā Setema 1916, e toʻa 264 uso na talosaga e tuusaʻoloto i latou mai i le auaunaga faavaegāʻau. E toʻa 5 na tuusaʻoloto, 154 na “faasala e faia galuega mamafa,” 23 na tofia e faia galuega i totonu o le vaegaʻau. E toʻa 82 na tuuina atu i le vaegaʻau, a o nisi o i latou na faasalaina i le faamasinoga a le vaegaʻau ona o le lē usitaʻia o faatonuga. O le tetee o tagata i le faileagaina o nei tane, na aveese ai i latou mai i falepuipui a le vaegaʻau ae galulue i galuega mamafa.

Pryce Hughes

 O Pryce Hughes, o lē na mulimuli ane avea ma ovasia o le lālā i Peretania, ma Edgar Clay na galulue i le afu telē i Uelese. A o Herbert Senior, o se tasi o le toʻavalu lea na toe faafoʻi mai i Falani, na tuuina atu i le falepuipui i Wakefield i Yorkshire. O isi na tuli a latou faasalaga mamafa i le falepuipui i Dartmoor. I lenā falepuipui sa iai le toʻatele o uso na lē auai i le vaegaʻau ona o o latou lotofuatiaifo.

O Frank Platt, o se Tagata Aʻoga o le Tusi Paia, o lē na faia galuega i le vaegaʻau, na aafia i faasalaga faaumiumi ma sauāga ogaoga ona o le musu e auai i le taua. Na aʻoaʻoina e Atkinson Padgett le upu moni ina ua faatoʻā amata i le vaegaʻau. Na mafatia o ia i sauāga ogaoga mai i taʻitaʻi o le vaegaʻau ona o le musu e auai i le taua.

Herbert Senior

E ui lava e leʻi malamalama atoatoa o tatou uso i lenā taimi i le uiga moni o le solitū, ae leʻi taofia i latou mai i le taumafai e faafiafiaina Ieova. Na faataatia e i latou uma na taʻua i lenei lipoti, se faaaʻoaʻoga lelei o le solitū a o faagasolo le “itula o tofotofoga.” (Faaa. 3:10)​—Mai i mea iloga o lo tatou talafaasolopito i Peretania.