Skip to content

Skip to table of contents

Ia Faamalosia Lau Faaipoipoga e Ala i Fesootaʻiga Lelei

Ia Faamalosia Lau Faaipoipoga e Ala i Fesootaʻiga Lelei

“O le upu e fai atu i le taimi tatau, e pei o apu auro i totonu o mea siliva ua togitogiina.”​—FAATA. 25:11.

1. E faapefea ona fesoasoani le lelei o fesootaʻiga i se faaipoipoga?

NA FAAPEA mai se uso mai Kanata: ʻE sili ona ou fiafia e faifaimea faatasi ma laʻu avā nai lo o se isi. E faateleina ai loʻu fiafia i le olaga, ma faaitiitia ai popolega.’ Na faapea mai se tane mai Ausetalia: “I le 11 tausaga o la ma mafutaga, e leai se aso e ma te lē fetalanoaaʻi ai. E leai se lē mautonu, po o se vala e ono faalētonu ai le mafutaga. Na fesoasoani iā i maʻua le lelei o fesootaʻiga.” Na faapea mai se tuafafine mai Costa Rica: “O talanoaga lelei e lē gata e faamalosia ai se faaipoipoga, mafuta vavalalata ai iā Ieova, puipuia ai mai tofotofoga, autasia ai pea se ulugalii, ma faalolotoina ai pea le alofa.”

2. O ā ni vala e ono aafia ai fesootaʻiga lelei?

2 Po o lelei a oulua fesootaʻiga ma lau paaga, po o se luʻi i lau faaipoipoga lenā vala? O le faaipoipoga e tuufaatasia ai ni tagata lē lelei atoatoa se toʻalua. (Roma 3:23) E ono iai faafitauli, auā e eseese o la uiga, aganuu, faapea le auala na ola aʻe ai. O se tulaga e masani ai le eseese o auala e fesootaʻi ai le tasi i le isi. Na faapea mai tagata suʻesuʻe o John M. Gottman ma Nan Silver: “E saosaolaumea le lototele, maumauaʻi, ma le vave faaleleia o se faalētonu, ina ia tumau ai se faaipoipoga.”

3. O le ā e mafai ona faamalosia ai se faaipoipoga?

3 O faaipoipoga e taulau manuia, e manaʻomia ai taumafaiga malolosi. Peitaʻi, e mafai ona maua ai le fiafia ma iʻuga lelei. O le alofa o le tasi i le isi, e mafai ona maua ai se faaipoipoga fiafia. (Fai. 9:9) Na mafuta Isaako ma Repeka mo le tele o tausaga o se ulugalii. Peitaʻi, e leai se taimi na tau mou atu ai lo  laʻua alofa. (Kene. 24:67) E faapena foʻi le toʻatele o ulugalii i aso nei. O le ā na fesoasoani iā i latou? Na latou iloa le tāua o le faailoa ma le faamaoni o faalogona o le tasi i le isi i se auala agalelei, e ala i le faaalia o le alofa, faautauta, faaaloalo, faapea le lotomaulalo. O le a tatou iloiloina le auala e saosaolaumea ai nei uiga i le iai o fesootaʻiga lelei i le faaipoipoga.

IA FAAALIA LE TOFAMAMAO

4, 5. E faapefea ona fesoasoani le tofamamao i le ulugalii ina ia malamalama ai le tasi i le isi? Aumai ni faataʻitaʻiga.

4 Ua faapea mai le Faataoto 16:20, “o lē e faaalia le tofā mamao i se mataupu, e maua e ia le mea lelei.” E tāua lenā vala i le faaipoipoga. (Faitau le Faataoto 24:3.) E tatou te maua le faautauta ma le atamai mai le Tusi Paia. I le Kenese 2:18, na foafoaina e le Atua le fafine ina ia avea ma fesoasoani talafeagai i le tane. E eseese le tane ma le avā, ma o le māfuaaga lenā e eseese ai auala e fesootaʻi ai. E fiafia fafine e talanoa e faatatau i o latou faalogona, faatatau i isi tagata, faapea le faiā ma isi. Peitaʻi, e fiafia tamāloloa e talanoa i galuega fai, faapea faafitauli ma auala e foʻia ai. E naunau foʻi tamāloloa e faaaloalogia i latou.

5 Na faapea mai se tuafafine mai Peretania: ʻE naunau laʻu tane e fofō se faafitauli, nai lo o le faalogo mai iā te aʻu. E masani ona ou lē fiafia ai, ona ou te manaʻo e tau lava o lona faalogologo lelei, ma malamalama i oʻu faalogona.’ Na tusi mai se tane e faapea: “Ina ua ma faatoʻā faaipoipo, sa ou naunau e foʻia so o se faafitauli e tulaʻi mai. Ae na ou iloa mulimuli ane, e pau le mea sa manaʻo ai laʻu avā o loʻu faalogologo lelei lea iā te ia.” (Faata. 18:13; Iako. 1:19) O le tane e iai le tofamamao, e malamalama i faalogona o lana avā ma taumafai e fetuunaʻi le auala e talanoa ai. E tatau foʻi ona ia faatāua manatu ma faalogona o lana avā. (1 Pete. 3:7) E tatau foʻi i le avā ona malamalama i manatu o lana tane. O le a maua le fiafia, pe a malamalama ma faataunuu o laʻua tiute tauave e ōgatusa ma taʻiala a le Tusi Paia. O le a mafai ai foʻi ona laʻua faia ni filifiliga lelei.

6, 7. (i) E faapefea ona fesoasoani le Failauga 3:7 i se ulugalii i le faaalia o le tofamamao? (ii) E faapefea ona faaalia e le avā le tofamamao? (iii) O ā taumafaiga e tatau ona faia e le tane?

6 E iloa e ulugalii e iai le tofamamao, e iai le “taimi e filemu ai ma le taimi e tautala ai.” (Fai. 3:1, 7) Na faapea mai se tuafafine ua 10 tausaga talu ona faaipoipo: “Ua ou iloa e iai taimi e lē tatau ona ou lāgā ai se mataupu. E tatau ona ou talanoa i laʻu tane i se isi taimi, pe afai o loo pisi i se galuega ma isi tiute tauave. O le iʻuga, o le a sologa lelei le talanoaga.” E tautala faaaloalo foʻi se avā, pe a ia iloa o upu e filifili lelei “e fai atu i le taimi tatau,” e taliagofie ma talisapaia e le tane.​—Faitau le Faataoto 25:11.

O gaoioiga lāiti e mafai ona iai ni ona aafiaga lelei i le faaipoipoga

7 E fai le pito laau a le tane e ala i le faalogo i manatu a lana avā, ma faailoa manino atu foʻi ona manatu. Na faapea mai se toeaina ua 27 tausaga talu ona faaipoipo: “Na ou galue malosi e faailoa atu i laʻu avā mea o loo i loʻu loto.” Na faamatala foʻi e se uso ua 24 tausaga talu ona faaipoipo, o le lē talanoaina o se mataupu, o le a mou atu ai le faafitauli. Ae na ia iloa mulimuli ane, e lē o se vaivaiga le faamatala atu o ona faalogona. Pe a faigatā ona faailoa atu ona manatu,  e masani ona ia tatalo mo upu logoleleia e talanoa ai. Ia saʻo foʻi le taimi e talanoa ai, e pei o le taimi e iloilo ai le mau o le aso pe faitau faatasi foʻi le Tusi Paia.

8. Ina ia taulau manuia se faaipoipoga, o le ā e tatau ona faia e se ulugalii Kerisiano?

8 E tāua i le tane ma le avā ona tatalo ma le faanaunauga e faaleleia le auala e fesootaʻi ai. E lē faigofie ona taumafai e fai se suiga. Ae e mafai ona fesoasoani iā i laʻua le alolofa iā Ieova, tatalo mo le agaga paia ma vaai i le la mafutaga o se mea e paia. Na faapea mai se avā ua 26 tausaga talu ona faaipoipo: “E ma te lē mafaufau ma laʻu tane e nonofo eseese, ona e tāua iā i maʻua le silafaga a Ieova i le faaipoipoga. O lea, e ma te galulue ai e foʻia faafitauli e ala i le fetalanoaaʻi.” O le faamaoni e faafiafiaina ai le finagalo o Ieova ma iʻu ai i le tele o faamanuiaga.​—Sala. 127:1.

IA FAALOLOTO LE ALOFA

9, 10. O ā auala e mafai ai e se ulugalii ona faamalosia le fusi o le alofa?

9 O le alofa o le “fusi lea e atoatoa ona autasi ai,” o se uiga e tāua tele i le faaipoipoga. (Kolo. 3:14) E faalolotoina le alofa o se ulugalii a o la iai faatasi i taimi fiafia ma taimi faigatā o le olaga. E atili māfana ai foʻi le la mafutaga. O gaoioiga lāiti e mafai ona iai ni ona aafiaga lelei i le faaipoipoga. O se faataʻitaʻiga, o se faamālō, laufofoga fiafia, o le fesili atu “pe ā mai le aso,” faapea gaoioiga agalelei i aso uma. O se tasi ulugalii ua 19 tausaga talu ona faaipoipo, e lafo atu se feʻau tusitusia pe vili foʻi e tau lava ina faamautinoa po o ā mai le isi a o faagasolo le aso.

10 O le alofa e uunaʻia ai se ulugalii e faaauau ona faamasani le tasi i le isi. (Fili. 2:4) O le malamalama lelei o le tasi i le isi, e faamalosia ai lo laʻua alofa e ui i o la vaivaiga. O se ulugalii e taulau manuia, e faaauau pea ona faamalosia le la faiā a o faagasolo taimi. Afai ua e faaipoipo, ia fesili ifo iā te oe lava: ʻPo ua ou iloa lelei laʻu paaga faaipoipo? Po ua ou iloa lelei ona manatu ma ona faalogona i se mataupu? Pe e masani ona ou mafaufau i uiga lelei o laʻu paaga na ou tosina ai i le taimi muamua?’

 IA FAAALIA LE FAAALOALO

11. Aiseā e tāua ai le faaaloalo i se faaipoipoga? Ia faataʻitaʻi.

11 E oo lava i ulugalii fiafia, e lē ioe faatasi i se mataupu i taimi uma. E iai foʻi mataupu e leʻi ioe faatasi i ai Aperaamo ma Sara. (Kene. 21:9-11) Ae e leʻi faaleagaina ai le la faaipoipoga. O le māfuaaga, na faaaloalo ma faamamaluina e le tasi le isi. O se faataʻitaʻiga, na faaaogā e Aperaamo le upu “faamolemole,” ina ua talosaga atu iā Sara. (Kene. 12:11, 13) Na taʻua foʻi e Sara Aperaamo o lona “alii” ma usitaʻi iā te ia. (Kene. 18:12) E iloa le leai o se faaaloalo i se faaipoipoga i le auala e feutagaʻi ai se ulugalii. (Faata. 12:18) Pe a lē amanaʻia e se ulugalii lenā vala, e mafai ona oo atu ai le faaipoipoga i se tulaga pagatia.​—Faitau le Iakopo 3:7-10, 17, 18.

12. Aiseā e tatau ai i ulugalii fou ona taumafai e talanoa i se auala faaaloalo?

12 E tatau i ulugalii fou ona taumafai malosi e faaalia le faaaloalo o le tasi i le isi, ma feutagaʻi i se auala agalelei. O le faia faapea, e faigofie ona fefaasoaaʻi ai manatu. Na faapea mai se tasi tane: “O uluaʻi tausaga o se faaipoipoga, o se vaitaimi fiafia. Ae e avea foʻi o se luʻi. E lē faigofie le taumafai e femalamalamaaʻi i manaʻoga, ma mea e fiafia ai le isi. Peitaʻi, e maua iʻuga lelei pe a magafagafa, laumata ʻataʻata ma faaalia le lotomaulalo ma le onosaʻi, ma faalagolago iā Ieova.”

IA FAAALIA LE LOTOMAULALO

13. Aiseā e tāua ai le lotomaulalo i se faaipoipoga fiafia ma taulau manuia?

13 O le lelei o fesootaʻiga e tai pei o se vai e tafe lemū i se togālaau. E fesoasoani tele le “lotomaulalo” i lenā vala. (1 Pete. 3:8) Na faapea mai se uso ua 11 tausaga talu ona faaipoipo: ʻO le lotomaulalo e vave ona foʻia ai se faafitauli, ma e uunaʻia ai se tasi e faatoese atu.’ Na faapea mai foʻi se toeaina ua 20 tausaga talu ona faaipoipo, ʻo nisi taimi e sili atu ona tāua le faatoese atu, nai lo o le faapea atu i lau paaga e te alofa iā te ia.’ Na  ia toe faaopoopo mai: “O se tasi o auala sili e atiaʻe ai le lotomaulalo o le tatalo. Pe a ma tatalo faatasi ma laʻu avā, e faamanatu mai ai lo ma tulaga lē lelei atoatoa faapea le agalelei faifua o le Atua. E fesoasoani iā i maʻua e maua ai se vaaiga saʻo i le tulaga o mea.”

Ia faatumau fesootaʻiga lelei i lau faaipoipoga

14. E faapefea i le faamaualuga ona aafia ai se faaipoipoga?

14 O le tagata e faamaualuga e lē naunau e faia se faaleleiga. E mafai ona taofia ai fesootaʻiga lelei ma le faanaunauga e faatoese atu. O le tagata faamaualuga e faia faamolemolega, nai lo o le lotomaulalo ma faatoese atu. E lē vaai i ona vaivaiga, ae faasinosino lima i isi. Pe a tigā lona loto, nai lo o le tausia o le filemu, e oso lona ita ma tali atu i upu faatigā, pe e lē fia talanoa foʻi. (Fai. 7:9) O le faamaualuga e mafai ona faaleagaina ai le faaipoipoga. E tāua ona manatua, “e tetee atu le Atua i ē e faamaualuluga, ae foaʻi mai le agalelei faifua i ē e lotomaulalo.”​—Iako. 4:6.

15. Faamatala le auala e fesoasoani ai le Efeso 4:26, 27 i le ulugalii pe a aliaʻe faafitauli i le faaipoipoga.

15 E lē atamai ona tatou mafaufau e tatou te lē aafia i le faamaualuga. Peitaʻi, e tatau ona tatou nofouta i lenā vala. Na fautua mai Paulo: “Aua neʻi goto le lā o tumau pea lo outou ita, aua foʻi neʻi tuua e outou se mea e mautū ai le Tiapolo.” (Efe. 4:26, 27) O le lē amanaʻia o lenā fautuaga e oo atu ai i faafitauli. Na faapea mai se tuafafine na lē faatatauina ma lana tane lenā fautuaga: “O le iʻuga, ou te leʻi moe lelei i le tele o pō.” Ina ia faaleleia se faafitauli, e tāua ona vave talanoa. E tāua foʻi i nisi taimi ona faatoʻafilemu le mataupu, ma tatalo iā Ieova mo mafaufauga lelei. O le lotomaulalo o le a e uaʻi ai i le faafitauli nai lo o oe lava, ma lē faateteleina ai le faafitauli.​—Faitau le Kolose 3:12, 13.

16. E faapefea i le lotomaulalo ona fesoasoani i se tasi e vaai ai i uiga lelei o lana paaga?

16 O le lotomaulalo ma le faamaulalo e fesoasoani i se tasi e vaai ai i uiga lelei o lana paaga faaipoipo. O se faataʻitaʻiga, e ono iai i le avā se tomai e mafai ona fesoasoani i le tausiga o le aiga. Pe afai e lotomaulalo lana tane o le a ia lē lotoleaga ai. Nai lo o lea, o le a ia faalaeiauina o ia, ma faailoa atu lona faatāuaina o ia. (Faata. 31:10, 28; Efe. 5:28, 29) Ae i le taimi e tasi, o le lotomaulalo ma le faamaulalo o le avā, o le a ia lē manatu faatauvaa ai i lana tane. O i laʻua o le “tino e tasi,” o lea o gaoioiga a le tasi e mafai ona aafia ai le isi.​—Mata. 19:4, 5.

17. E faapefea ona maua le fiafia i faaipoipoga, ma viia ai Ieova?

17 E mautinoa e tatou te naunau i se faaipoipoga fiafia, e tumau ma viia ai Ieova e pei o Aperaamo ma Sara, faapea Isaako ma Repeka. O lea, ia tatou vaai i le faaipoipoga e pei ona silasila i ai Ieova. Ia vaai i lana Afioga mo le atamai ma le tofamamao. Ia atiaʻe le alofa moni ma talisapaia lau paaga faaipoipo. (Pese 8:6) Ia taumafai malosi foʻi e atiaʻe le lotomaulalo. Ia faaaloalo i lau paaga. O le faia o nei vala uma, e mafai ona fiafia ai le faaipoipoga faapea le Tamā o i le lagi. (Faata. 27:11) O lea, atonu e tutusa o tatou faalogona ma lagona o se tane ua 27 tausaga talu ona faaipoipo lea na faapea mai: “E lē mafai ona ou ola e aunoa ma laʻu avā. E faamalosia la ma faaipoipoga mai lea aso i lea aso, ona o lo ma alolofa iā Ieova, faapea a ma fesootaʻiga e lē aunoa.”