Skip to content

Skip to table of contents

Po o iā te Oe ʻse Loto e Iloa ai’ Ieova?

Po o iā te Oe ʻse Loto e Iloa ai’ Ieova?

“Ou te foaʻiina atu iā i latou se loto ina ia iloa ai aʻu, o aʻu o Ieova; e avea i latou ma oʻu nuu.”​—IERE. 24:7.

1, 2. O le ā le faatusatusaga na faia e Ieova, ma e faapefea ona tatou aafia ai?

E FIAFIA le toʻatele i le fua o le mati. I Isaraelu anamua, e tāua tele iā i latou fua o lenei laau. (Nau. 3:12; Luka 13:6-9) E anoanoaʻi minerale aogā o loo iai, ma e lelei foʻi mo le fatu.

2 Ua faatusa e Ieova loto o tagata i le mati. E mafai ona aafia o tatou loto i lenā fetalaiga a Ieova. E leʻi uiga Lana fetalaiga i le taumafaina o se mati moni. Peitaʻi, na ia fetalai i se uiga faafaatusa. A o iloiloina lana fetalaiga, seʻi vaai po o le ā le auala e mafai ona tatou aafia ai.

3. O le ā na faasino i ai mati na taʻua i le Ieremia mataupu e 24?

3 Seʻi o tatou iloiloina le fetalaiga a Ieova iā Ieremia e faatatau i le mati. Sa matuā leaga le tulaga faaleagaga o le nuu o Iuta i le 617 T.L.M. O lea na faailoa atu ai e Ieova se vaaiga e faatatau i lo latou lumanaʻi, ma na faaāta mai e ʻmati lelei’ ma ʻmati leaga.’ (Faitau le Ieremia 24:1-3.) Na faasino atu mati leaga i le tupu o Setekaia, ma i latou uma na faapuapuagatia e Nepukanesa ma ana ʻau. Peitaʻi o mati lelei sa aofia ai Esekielu, faapea Tanielu ma ana aumea. Sa aofia ai foʻi nisi o tagata Iutaia ua toeitiiti ona faaaunuua lea. O nisi o i latou na toe foʻi ma fausia le malumalu i Ierusalema.​—Iere. 24:8-10; 25:11, 12; 29:10.

4. Aiseā e faalaeiauina ai i tatou i le fetalaiga a Ieova e faatatau i mati lelei?

4 Na fetalai Ieova i ē na faaāta mai e mati lelei e faapea: “Ou te foaʻiina atu iā i latou le loto e iloa  ai aʻu, o aʻu o Ieova; e avea i latou ma oʻu nuu.” (Iere. 24:7) E faalaeiauina i tatou i le iloa o loo naunau Ieova e foaʻi mai ʻse loto e iloa’ ai o ia. E faasino le “loto” i inei i le ituaiga o tagata e iai i tatou. E tatou te mananaʻo i se loto e iloa ai Ieova, ma avea i tatou ma ona tagata. Ina ia ausia lenā vala, e tatau ona suʻesuʻe ma faatatauina le Tusi Paia, salamō ma liliuese mai ala leaga, tuuina atu iā Ieova, ma papatiso i le suafa o le Tamā, le Alo, ma le agaga paia. (Mata. 28:19, 20; Galu. 3:19) Atonu ua māeʻa po ua amata foʻi ona e uia na laasaga, ma faatasitasi foʻi ma Molimau a Ieova.

5. O ai na faaautū atu i ai le tusi a Ieremia?

5 E tusa po ua tatou uia na laasaga, ae e tāua ona tatou uaʻi pea i o tatou uiga faaalia ma amioga. Na taulaʻi isi vaega o le tusi a Ieremia i isi nuu tuaoi. Peitaʻi, na tele ina faaautū atu i le nuu o Iuta a o faagasolo nofoaiga a tupu e toʻalima. (Iere. 1:15, 16) O lea, na tusi Ieremia e faatatau i se nuu sa tuuina atu iā Ieova. Na ofo atu o latou augātamā e avea i latou ma nuu filifilia o le Atua. (Eso. 19:3-8) I aso o Ieremia, na latou faapea mai: “Ua matou ō atu iā te oe, auā o oe Ieova e, o lo matou Atua.” (Iere. 3:22) Peitaʻi, na faapeʻī o latou loto?

IA PERITOMEINA LE LOTO

6. Aiseā e tāua ai iā i tatou le iloiloina e Ieova o tatou loto?

6 Ua mafai e le atamai faaonapōnei ona iloa ai le tulaga o o tatou fatu. Peitaʻi, e sili atu ai le silafaga a Ieova e pei ona taʻua i le Ieremia 17:9, 10 e faapea, ʻe sili ona faaʻoleʻole le loto nai lo o mea uma, ma e matuā leaga lava. O ai sē e mafai ona iloa? O aʻu o Ieova, o loo saʻiliʻili i le loto, ina ia tuuina atu i tagata taʻitoʻatasi e tusa ma ona ala, e tusa foʻi ma le fua o ana mea na fai.’ E silafia e Ieova ou faanaunauga, mafaufauga, faalogona, uiga, faapea ou sini. E iloilo e Ieova lou loto. Peitaʻi, e mafai foʻi ona e faia se iloiloga o lou lava loto.

7. Na faapefea ona faamatalaina e Ieremia loto o tagata Iutaia i ona aso?

7 Ina ia faia lenā iloiloga, ia tatou fesili ifo: ʻE faapeʻī loto o le toʻatele o tagata Iutaia i aso o Ieremia?’ Na faapea mai Ieremia, ʻe leʻi peritomeina loto o le aiga uma o Isaraelu.’ Pe na faasino atu Ieremia i le peritomeina o tane Iutaia? E leai, auā na ia faapea mai: “ʻFaauta! E oo mai ona aso,’ ua fetalai mai ai Ieova, ʻou te taui atu ai iā i latou uma ua peritomeina ae e leʻi peritomeina lava.’” E oo lava i tane Iutaia ua uma ona peritome, ʻe leʻi peritomeina o latou loto.’ (Iere. 9:25, 26) O le ā le uiga o lenā manatu?

8, 9. O le ā na tatau ona faia e le toʻatele o tagata Iutaia?

8 E tatou te iloa le uiga o le ʻlē peritomeina o le loto,’ ina ua uunaʻia e Ieova tagata Iutaia e ʻaveese paʻu o latou loto, ina ia lē alu atu ai lona ita, ona o a latou mea leaga na fai.’ E mautinoa na tupuga mai na mea leaga mai i o latou loto. (Faitau le Mareko 7:20-23.) Na latou fouvale ma lē mananaʻo e suia o latou ala. O lea, e leʻi faamalieina Ieova i o latou mafaufauga ma uunaʻiga o o latou loto. (Faitau le Ieremia 5:23, 24; 7:24-26.) Na fetalai Ieova iā i  latou: “Inā peritome ia outou iā Ieova, ma aveese paʻu o outou loto.”​—Iere. 4:4; 18:11, 12.

9 Na manaʻomia ona ʻperitomeina loto’ o tagata Iutaia i aso o Ieremia, e pei o i latou i aso o Mose. (Teu. 10:16; 30:6) O le ʻaveesea o paʻu o o latou loto,’ na uiga atu i le aveesea o mea na lē gaoioi ai o latou loto. E aofia ai mafaufauga, faanaunauga, ma uunaʻiga o latou loto na feteenaʻi ma le finagalo o Ieova.—Galu. 7:51.

IA IAI ʻSE LOTO E ILOA AI’ IEOVA

10. O le ā lo tatou faanaunauga e tatau ona iai?

10 E faafetaia Ieova ona ua ia fesoasoani iā i tatou e malamalama i o tatou loto. Peitaʻi, e tatou te ono taumānatu, pe aiseā e tatau ai i Molimau a Ieova ona mafaufau loloto i lenā vala. O le toʻatele o Kerisiano o loo auauna ma le faamaoni, ma e lē o i latou o ni ʻmati leaga.’ Peitaʻi, e tutusa o latou faanaunauga ma Tavita o lē na faapea atu iā Ieova: “Le Atua e, ia e saʻili mai iā te aʻu, ma silafia ai loʻu loto. Ia e suʻesuʻe mai iā te aʻu, ma silafia ai oʻu popolega, ma ia e silafia ai po o iā te aʻu se ala e tigā ai.”​—Sala. 17:3; 139:23, 24.

11, 12. (i) Aiseā e tatau ai ona iloilo o tatou lava loto? (ii) O le ā le gaoioiga e lē faia e Ieova i o tatou loto?

11 E finagalo Ieova e tatou te maua lona finagalo malie. Na faapea mai Ieremia: “O oe, Ieova o ʻau e, o loo e suʻesuʻe i le tagata amiotonu; o loo e silasila foʻi i manatu ma le loto.” (Iere. 20:12) Pe afai e iloilo e Ieova loto o tagata amiotonu, pe e lē tatau ea la ona faia se iloiloga faamaoni o i tatou lava? (Faitau le Salamo 11:5.) Atonu o lenā iloiloga e tatou te iloa ai se vaega e manaʻomia ona tatou uaʻi atu i ai. E tatau ona aveese se vala e māfua ai ona lē gaoioi lelei o tatou loto, e pei ona ʻaveesea paʻu o o tatou loto.’ O le auala lenā e faia ai se taotoga o o tatou loto i se uiga faafaatusa. O lea, o le ā e tatau ona tatou uaʻi i ai pe a iloilo o tatou loto? O le ā le auala e tatou te faia ai ni fetuutuunaʻiga manaʻomia?​—Iere. 4:4.

12 E lē faamalosia e Ieova i tatou ina ia faia ni suiga i o tatou olaga. Na foaʻiina e Ieova i ʻmati lelei’ se ʻloto e iloa ai’ o Ia. E leʻi faamalosia e Ieova i latou e faia ni suiga i o latou loto. Na manaʻomia ona latou naunau e iloa Ieova. O le faanaunauga foʻi lenā e tatau ona iā i tatou.

E maua faamanuiaga pe a iloilo o tatou loto ma faasaʻo ni faanaunauga lē talafeagai

13, 14. E faapefea i le loto o se Kerisiano ona aafia ai o ia?

13 Na fetalai Iesu i le Mataio 15:19 e faapea, “e sau mai i le loto o mafaufauga leaga, o le fasioti tagata, mulilua, faitaaga, gaoi, molimau pepelo, ma upuleaga.” E ono faia e se tasi le faitaaga  po o le mulilua, pe afai e iai ni faanaunauga leaga i lona loto. O le a ia lē toe mauaina le finagalo malie o Ieova, pe a ia lē faaalia le salamō. Peitaʻi, e mafai ona tuputupu aʻe ni faalogona lē talafeagai i lona loto, e tusa pe na te lē faatinoina. (Faitau le Mataio 5:27, 28.) O lea, e tatau ona tatou faia se iloiloga faamaoni o o tatou loto. Pe afai o iai ni o tatou faalogona lē talafeagai i se tasi o le isi itupā, e tatau ona liaʻieseina ona e taʻusalaina e Ieova.

14 Atonu e lē faia e se tasi le “fasioti tagata,” peitaʻi e amata ona tuputupu aʻe i lona loto le ʻinoʻino i se isi Kerisiano. (Levi. 19:17) E tatau ona ia taumafai malosi e aveese na faalogona.​—Mata. 5:21, 22.

15, 16. (i) Aumai se faataʻitaʻiga e iloa ai e ʻleʻi peritomeina le loto’ o se Kerisiano. (ii) Aiseā e lē fiafia ai le finagalo o Ieova i se ʻloto e lē peritomeina?’

15 O le toʻatele o Kerisiano e leai ni faanaunauga faapena i o latou loto. Peitaʻi, na fetalai foʻi Iesu e faatatau i “mafaufauga leaga.” E faasino lenā i manatu lea e aafia ai a tatou gaoioiga masani o le olaga. O se faataʻitaʻiga, o le manatu sesē e faapea, e tatau ona lagolagoina o tatou tauaiga, e tusa po o le ā le tulaga e oo i ai. E tāua mo Kerisiano ona iai le “lotoaiga,” ona e lē o toe taatele lenā uiga i nei “aso e gata ai.” (2 Timo. 3:1, 3) O le lotoaiga e manatu ai nisi, “e sili atu ona mamafa le toto nai lo o le vai.” E faia e nisi gaoioiga e puipuia ai o latou tauaiga. Atonu o faalogona malolosi foʻi lenā na uunaʻia ai tuagane o Tina e faia se gaoioiga sesē. (Kene. 34:13, 25-30) Aiseā na fasiotia ai e Apisaloma Amanono? (2 Samu. 13:1-30) E mautinoa o “mafaufauga leaga,” na uunaʻia ai i latou e faia na gaoioiga.

16 E feita nisi pe afai na agaleagaina o latou tauaiga. Pe atonu e feita nisi ona e manatu na faileagaina sona tauaiga. O le iʻuga, atonu e latou te lē talia se valaaulia pe talimālō foʻi i se uso latou te manatu na agaleaga i sona tauaiga. (Epe. 13:1, 2) E lē tatau ona tatou manatu māmā i na ituaiga o mafaufauga sesē, ona e iloa ai e tatou te lē alolofa. E silasila Ieova i lenā tulaga e pei e ʻleʻi peritomeina o tatou loto.’  (Iere. 9:25, 26) Ia manatua, na uunaʻia e Ieova tagata Iutaia ina ia ʻaveese paʻu o o latou loto.’​—Iere. 4:4.

IA IAI PEA SE “LOTO E ILOA” IEOVA

17. O le ā le aogā i o tatou loto o le mataʻu iā Ieova?

17 Ae faapefea pe a lē gaoioi o tatou loto e ōgatusa ma tapulaa a Ieova? Atonu e tatou te fefefe i tagata, naunau i le fia mauʻoa, po o le uiga foʻi o le fia tutoʻatasi. Peitaʻi, e lē na o i tatou e iai na uiga. (Iere. 7:24; 11:8) Na faapea mai Ieremia e faatatau i tagata Iutaia lē faamaoni i ona aso, o i latou o ni ē ʻmaaa ma fouvale o latou loto.’ Sa latou lē “matataʻu iā Ieova,” e ui ina ia alofa ma tausia i latou. (Iere. 5:23, 24) Pe e lē fesoasoani lo tatou matataʻu iā Ieova i le aveesea o ʻpaʻu o o tatou loto’? O le mataʻu iā Ieova, e fesoasoani i o tatou loto e gaoioi e ōgatusa ma lona finagalo.

18. O le ā le folafolaga a Ieova iā i latou o loo i le feagaiga fou?

18 E fesoasoani Ieova i le ʻfoaʻiina mai o se loto’ e iloa ai o ia. Na ia folafola atu i Kerisiano faauuina o loo i le feagaiga fou: “Ou te tuuina laʻu tulafono i totonu iā i latou, ma ou te tusiaina foʻi i o latou loto. E fai aʻu ma o latou Atua, e fai foʻi i latou ma oʻu nuu.” Na ia toe faapea mai: “E lē toe aʻoaʻo atu foʻi se tasi i lana aumea, e lē toe aʻoaʻo atu foʻi se tasi i lona uso, e faapea atu, ʻIa outou iloa Ieova!’ auā e iloa aʻu e i latou uma, e amata mai i lē e aupito faatauvaa e oo i lē e sili o i latou . . . Auā ou te faamagaloina a latou mea sesē, ma ou te lē toe manatuaina a latou agasala.”​—Iere. 31:31-34. *

19. O le ā e tatou te tulimataʻia i le lumanaʻi?

19 E tatou te tulimataʻia le faataunuuga o folafolaga a le Atua i le lumanaʻi. E tatau ona tatou naunau e iloa Ieova ma avea i tatou ma ona tagata. Ina ia maua faamanuiaga, e manaʻomia ona faamagaloina a tatou agasala e ala i le taulaga togiola a Iesu. O le iloa e mafai ona faamagaloina i tatou, e uunaʻia ai i tatou e faamagalo atu i isi, e ui e lē faigofie i nisi taimi. E tatau ona tatou taumafai malosi e aveese so o se faalogona ita mai i o tatou loto. E faaalia ai le faasolosolo ina tatou iloa lelei Ieova, faapea lo tatou faanaunauga e auauna iā te ia. Atonu e pei i tatou o ē na fetalai i ai Ieova e ala iā Ieremia e faapea: “ʻE tou te saʻili mai iā te aʻu ma outou maua aʻu, auā e tou te saʻili mai iā te aʻu ma o outou lotoatoa, e tou te maua lava aʻu.’”​—Iere. 29:13, 14.