Skip to content

Skip to table of contents

Aua le Faavaivai!

Aua le Faavaivai!

Pe na avea oe ma Molimau a Ieova mo le tele o tausaga ma o loo e naunau foʻi i lau paaga ina ia tapuaʻi iā Ieova?

Po ua faavaivaia oe ona ua amata ona mou atu le fiafia i le upu moni o sau tagata suʻesuʻe?

 O le a talanoaina nisi o mea na tutupu i Peretania, e iloa ai le māfuaaga e lē tatau ai ona tatou faavaivai. O le a iloa ai foʻi le auala e ʻlafo atu ai lau falaoa i le vai,’ ina ia fesoasoani ai i isi e iloa le upu moni.​—Fai. 11:1.

E TĀUA LE TUMAU

E tāua ona tatou tumau, ma piiama atu pea iā Ieova ma le upu moni. (Teu. 10:20) Ina ua suʻesuʻe Georgina ma Molimau a Ieova i le 1970, na matuā tetee lona toʻalua o Kyriacos. Na ia faasā Molimau a Ieova mai lona fale, ma aveesea lomiga na ia mauaina.

Na atili ona ita Kyriacos ina ua alu Georgina i sauniga. O se tasi aso na ia alu ai i le Maota o Sauniga ma amata se vevesi. Na iloa ai e se tasi o tuafafine e tautala Kyriacos i le gagana Eleni. O lea, na ia faafesootaʻia ai se uso Eleni i se tasi o faapotopotoga ina ia fesoasoani iā te ia. Na tali lelei Kyriacos i le uso ma amata ai lana suʻesuʻega. Peitaʻi, na ia faamutaina i se taimi mulimuli ane.

Na feagai Georgina ma teteega mo le tolu tausaga na sosoo ai. Na folafola e lona toʻalua lona tuua o ia, pe afai e papatiso. Na tatalo le tuafafine iā Ieova ina ia aua neʻi tuua o ia e lona toʻalua. Ina ua ō atu uso e ave le tuafafine i le fonotaga, na faapea atu Kyriacos: “O le a ma mulimuli atu i le tou taavale.” Na ia auai i le polokalame i le taeao, ma molimauina le papatisoga o lona toʻalua.

Na papatiso le tane a Georgina ina ua mavae le toetoe 40 tausaga talu ona ia feiloaʻi ma Molimau a Ieova

Na faasolosolo mālie ona faia suiga i le olaga o Kyriacos. Na ia papatiso ina ua mavae le toetoe 40 tausaga talu ona ia feiloaʻi ma Molimau a Ieova. O le ā na fesoasoani iā te ia? Na ia faapea mai: “Ou te fiafia ona e leʻi faavaivai loʻu toʻalua.” Na faapea mai Georgina: “E leʻi taofia e teteega laʻu auaunaga iā Ieova. Na ou tatalo pea, ma e leʻi mou atu loʻu faamoemoe.”

E TĀUA UIGA FAA-KERISIANO

E tāua foʻi le atiaʻe o uiga faa-Kerisiano ina ia fesoasoani ai i se paaga lē talitonu. Na fautua Peteru i avā Kerisiano i le 1 Peteru 3:1 ina ʻia gauaʻi atu i a latou lava tane, ma afai e lē usiusitaʻi nisi i le upu, e mafai ona maua i latou i le amiolelei a a latou avā e aunoa ma se upu.’ Na faatatau e Christine lenā fautuaga e fesoasoani ai i lana tane mo le tele o tausaga. Na avea o ia ma Molimau a Ieova mo le silia i le 20 tausaga ua mavae. Peitaʻi, e leʻi naunau lana tane o John e fia malamalama e faatatau i le Atua. E leʻi fia faia foʻi sana vaega i mataupu tau lotu, e ui sa ia iloa ni aafiaga lelei i lana avā. Na faapea mai John: “Sa ou vaaia le fiafia o laʻu avā i lana tapuaʻiga. Na avea o ia ma avā lelei, ma na ia fesoasoani i le tele o oʻu faafitauli.”

E leʻi faamalosia e Christine lana tane e talia le upu moni. Na faapea mai John: “Na iloa e Christine e sili ai pe a lē talanoa mai iā te aʻu i ona talitonuga. Na ia tuu i laʻu lava ia faitalia.” Pe a tau Christine i a tatou lomiga i ni mataupu e fiafia ai John e pei o le faasaienisi, e masani ona ia faapea atu iā John: “Ou te iloa e te fiafia i le mataupu lenei.”

Ina ua litaea John, ona fai lea o ana galuega teu fanua, ma tele ai ona taimi avanoa. Sa amata ona ia mafaufau i fesili tāua e pei o le, ʻPe na teʻi lava ua iai tagata, ma pe na foafoaina i latou ma se fuafuaga aogā?’ Na ofoina e se uso na talatalanoa ma John se suʻesuʻega iā te ia. Na faapea mai John: “Ua amata ona ou talitonu i le Atua, ma ou manaʻo loa e faia laʻu suʻesuʻega.”

Na tauia le lē faavaivai o Christine. Na ia taulau manuia foʻi i le faatatauina o le fautuaga o loo i le 1 Peteru 3:1. Na ia tatalo mo le silia i le 20 tausaga ina ia talia e John le upu moni. Na iʻu ina papatiso o ia, ma o loo laʻua auauna nei ma le maelega iā Ieova. Na faapea mai John: “E lua vala patino na fesoasoani iā te aʻu e talia ai le upu moni. E lē gata o le agalelei, ae faapea foʻi uiga faaleuō o Molimau a Ieova.” Na ia faapea atili mai: “Pe a e faaipoipo i se Molimau a Ieova, o le a e maua se toʻalua e faamaoni, maufaatuatuaina, ma lē manatu faapito.”

 E FUA MAI LE FATU I SE TAIMI MULIMULI ANE

Ae faapefea tagata suʻesuʻe ua amata ona mou atu lo latou fiafia? Na faapea mai Solomona i le Failauga 11:6: “Ia e lūlū fatu i le taeao ma aua neʻi mālōlō lou lima seʻia oo i le afiafi, auā e te lē iloa po o lē fea e taulau manuia, a lē o i inei po o i inā, pe tutusa ona lelei o ia mea e lua.” Atonu e manaʻomia se taimi umi ina ia tupu ai le fatu o le upu moni. O lea, atonu e iai le taimi e iloa ai e le tagata le tāua o le iai o se faiā ma Ieova, ma faafiafiaina ai i tatou.​—Iako. 4:8.

Seʻi mafaufau iā Alice, o lē na siitia mai Initia i Egelani. Na amata ona ia suʻesuʻe i le 1974. Sa tautala o ia i le gagana Hindi. Peitaʻi sa ia manaʻo e fai lana suʻesuʻega i le gagana Peretania, ina ia faaleleia ai lana tautala i lea gagana. Na amata ona ia auai i sauniga i le faapotopotoga faa-Peretania. Na ia iloa le upu moni, ae e leʻi naunau moni i ai. Sa ia pupū i le saʻilia o tupe faapea faafiafiaga. O le iʻuga, e leʻi toe faia lana suʻesuʻega.

Sa masani ona faia e Stella le suʻesuʻega a Alice. Na ia maua se tusi mai iā Alice ina ua mavae le toetoe 30 tausaga. Na ia tusi mai e faapea: “E mautinoa le faateʻia o oe ina ua papatiso i se tauaofiaga talu ai nei se tasi na oulua suʻesuʻe i le 1974. Na telē lau fesoasoani i loʻu olaga. E ui ou te leʻi sauni i lenā taimi, ae na tupu pea i loʻu loto ma loʻu mafaufau le fatu na e totōina.”

Na tusi Alice iā Stella e faapea: “E mautinoa le faateʻia o oe ina ua papatiso i se tauaofiaga talu ai nei se tasi na oulua suʻesuʻe i le 1974”

Na faamatala e Alice lona faanoanoa ina ua maliu lana tane i le 1997. E leʻi umi ona ia tatalo iā Ieova, ae asiasi atu ni Molimau e tautatala i le gagana Punjabi. Na la tuuina iā te ia le sāvali, O le ā le Faamoemoe mo Ē ua Maliliu? Na ia mafaufau loa e toe fesootaʻi ma Molimau a Ieova. Na ia suʻeina se api sa ia faamauina ai le nofoaga e faia ai sauniga a le faapotopotoga i le gagana Punjabi. Na faafeiloaʻia ma le māfana Alice e uso e tautatala i lenā gagana. Na ia faapea mai: “O uiga māfana o uso na faamāfanafanaina ai aʻu.”

Na ia toe auai i sauniga, faaauau lana suʻesuʻega, ma papatiso ai i le 2003. Na ia aʻoaʻoina foʻi le gagana Punjabi. Na faaiʻu lana tusi i le faapea mai: “Faafetai mo le totōina o le fatu o le upu moni iā te aʻu i le 29 tausaga ua mavae, faapea foʻi ma faaaʻoaʻoga lelei.”

“Faafetai mo le totōina o le fatu o le upu moni iā te aʻu i le 29 tausaga ua mavae, faapea foʻi ma faaaʻoaʻoga lelei.”​—Alice

O le ā e tatou te aʻoaʻoina mai na tala? Atonu e umi se taimi ona faatoʻā tali mai lea o se tagata i le feʻau. Peitaʻi e faatupu e Ieova fatu o le upu moni, pe a lotomaulalo le tagata ma naunau moni i lona itu faaleagaga. E manatua ai le talafaatusa a Iesu: “Ua tātupu ma ola le fatu ae e na te leʻi iloa pe na faapefea ona tupu. Ua tupu fua le fatu mai i le palapala ma faasolo mālie ona fua mai, ona matala lea o ona lau ma ua fuga mai, ma mulimuli ane ua iai saito matua.” (Mare. 4:27, 28) Atonu e faasolosolo lava ona tuputupu aʻe lenā fatu. E tatou te lē iloa le auala e tupu ai lenā mea. O lea, e tāua ai ona lūlū pea le fatu, auā e iai le taimi e fua mai ai.

Na tatalo pea Georgina ma Christine iā Ieova. O lea, ia “finafinau i le tatalo” ma aua neʻi o tatou faavaivai. Atonu “pe a mavae aso e tele,” ona toe maua mai lea o la tatou “falaoa” na lafo i le vai.​—Roma 12:12; Fai. 11:1.