Alu i mataupu o loo iai

Alu i le lisi o mataupu

Ia Tumau i le Vanu o le Puipuiga a Ieova

Ia Tumau i le Vanu o le Puipuiga a Ieova

ʻE tau Ieova faasaga i na nuu e pei o le aso na tau ai o ia, i le aso o le taua.’​—SAKA. 14:3.

1, 2. (i) O le ā le taua ua toe o se aga ona gapā lea? (ii) O le ā le gaoioiga e tatou te lē faia i lenā taua?

IĀ Oketopa 30 i le 1938, na faalogologo ai le faitau miliona i le Iunaite Setete i se polokalame i luga o se alāleo faasalalau. Na faailoa mai ai ua osofaʻia ma faaleagaina e i latou mai le paneta o Mars le lalolagi. E leʻi iloa e le toʻatele, o lenei polokalame ua na o se talafatu. Na fefefe tagata ona e manatu ua gapā se taua moni. O le iʻuga, na taumafai le toʻatele e puipuia i latou.

2 Ua toe o se aga ona gapā lea o se taua moni, peitaʻi, e lē o nofosauni ai le fanau a tagata. O le taua iā Amaketo, o le a tau ai le Atua faasaga i lenei lalolagi amioleaga. O lenei taua e lē o se talafatu, auā ua faailoa mai e Ieova i le Tusi Paia. (Faaa. 16:14-16) E tatou te lē tau i lenā taua. Peitaʻi, o le a faaaogā e Ieova lona mana e puipuia ai i tatou i se auala mataʻina.

3. O le ā le valoaga o le a tatou talanoaina, ma aiseā e tāua ai mo i tatou i aso nei?

3 Ua faamatala i le valoaga o loo i le Sakaria mataupu 14, le taua iā Amaketo. E ui na tusia lenā valoaga i le pe ā ma le 2,500 tausaga ua mavae, ae e aogā tele iā i tatou. (Roma 15:4) O loo talanoaina ai mea na tutupu i tagata o Ieova, talu mai ona pule Iesu i le lagi i le 1914. E lē gata i lea, o mea mataʻina ua toe o se aga ona faataunuuina lea. O loo taʻua ai foʻi se “vanu telē” faapea le “vai ola.” (Saka. 14:4, 8) O le a talanoaina i lenei mataupu, po o le ā lenā vanu, ma e faapefea ona sosola i ai tagata o Ieova mo le puipuiga. O le a iloiloina ai foʻi po o le ā le vai ola, ma e faapefea ona maua mai ai aogā. O le iʻuga, e lē gata o le a tatou iloa e tatau ona tatou inuina le vai ola, ae o le a tatou lagonaina foʻi le fia taumafa ai. O lea, seʻi o tatou uaʻi totoʻa atu a o talanoaina lenei valoaga.​—2 Pete. 1:19, 20.

UA AMATA LE ʻASO O IEOVA’

4. (i) O anafea na amata ai le ʻaso o Ieova’? (ii) O le ā na talaʻia e Kerisiano faauuina mo le tele o tausaga a o leʻi oo i le 1914? (iii) O le ā le auala na tali atu ai taʻitaʻi lotu ma taʻitaʻi faapolotiki?

4 Na amata le mataupu e 14 o le tusi o Sakaria i le faapea mai: “O le a oo mai le aso, o le aso lea o Ieova.” (Faitau le Sakaria 14:1, 2.) O le ā lenā aso? E tutusa ma le “aso o le Alii,” lea na amata i le 1914 ina ua avea Iesu ma Tupu o le Malo o le Atua i le lagi. (Faaa. 1:10; 11:15) Na talaʻia e Kerisiano faauuina mo le tele o tausaga, le māeʻa o “taimi atofaina o nuu ese” i le 1914. Na latou talaʻia foʻi o le a matuā faateteleina faafitauli i le lalolagi talu mai lenā tausaga. (Luka 21:24) Pe na uaʻi atu “nuu ese” i lenā lapataʻiga? E leai. Na faifai i ai taʻitaʻi lotu ma taʻitaʻi faapolotiki, ma o latou sauāina Kerisiano faauuina. O le faia faapea, ua latou faifai ai i le Atua Pule Silisili Ese, auā o Kerisiano faauuina o sui o le Malo o le Atua.​—Epe. 12:22, 28.

5, 6. (i) O le ā na faia e fili o tagata o le Atua? (ii) O ai le vaega “totoe o le nuu”?

5 Na faamatala mai e Sakaria mea o le a faia e fili o tagata o le Atua e faapea, o le a latou ʻfaatoʻilaloina le aai.’ O “le aai,” o Ierusalema, ua faaataina mai ai le Malo o le Atua. O le vaega totoe o le ʻaufaauuina o loo i le lalolagi, o se vaega o lenā Malo. (Fili. 3:20) Na “faatoʻilaloina” le aai a o faagasolo le Taua Muamua o le Lalolagi, ina ua faafalepuipui uso na taʻimua i le faalapotopotoga a Ieova i Atlanta i Georgia, i le Iunaite Setete o Amerika. Na agaleaga fili o tagata o le Atua i le ʻaufaauuina. Na faasāina a latou lomiga ma taumafai e taofia le galuega talaʻi, o lea, na latou ʻfaoa fale’ o le aai.

6 E ui ina sauāina e nei fili tagata o le Atua, ma tuuaʻia sesē i latou, ae e leʻi mafai ona latou tafiesea le tapuaʻiga moni. Na tumau faamaoni Kerisiano faauuina. E pei ona taʻua e Sakaria, o i latou na “o ē e totoe o le nuu,” e leʻi mananaʻo e ʻfaaumatia i latou mai i le aai.’

7. O le ā le faaaʻoaʻoga ua faataatia e Kerisiano faauuina mo i tatou?

7 E leʻi uma ai sauāga a fili o tagata o le Atua ina ua māeʻa le Taua Muamua o le Lalolagi. Na valoia e Sakaria e faaauau pea sauāga. (Faaa. 12:17) O se faataʻitaʻiga, na matuā sauāina o tatou uso a o faagasolo le Taua Lona Lua a le Lalolagi. O le faamaoni o Kerisiano faauuina, e faalaeiauina ai i tatou ina ia tutumau e tusa po o ā teteega e tatou te fesagaʻia. E aofia ai luʻi mai tauaiga, o fale faigaluega, faapea faifaiga mai ē e tatou te aʻoʻoga faatasi ona o lo tatou faatuatua. (1 Pete. 1:6, 7) Ia tatou maumauaʻi e faamaoni ma lē fefefe i faamataʻuga a ē e tetee mai. (Fili. 1:27, 28) Peitaʻi, e faapefea ona maua le saogalemu e ui ina itagia i tatou e le lalolagi?​—Ioa. 15:17-19.

UA FAAVAEINA E IEOVA SE “VANU TELĒ”

8. (i) O le ā ua faatusa i ai mauga i nisi taimi i le Tusi Paia? (ii) O le ā ua faaatagia mai e le “mauga o laau olive”?

8 Ua faaāta mai e “le aai” o Ierusalema, le Malo o le Atua. Ae o le ā ua faaāta e le “mauga o laau o olive, o loo i luma o Ierusalema”? E faapefea ona ʻvaeluaina lea mauga’ ma avea ai ma mauga e lua? Aiseā e taʻua ai e Ieova nei mauga, ʻo ana mauga’? (Faitau le Sakaria 14:3-5.) E faatusa e le Tusi Paia i nisi taimi mauga, i faigāmalo. Ua taʻua foʻi i le Tusi Paia e maua mai le mauga o Ieova faamanuiaga ma le puipuiga. (Sala. 72:3; Isa. 25:6, 7) O lea, ua faaāta mai e le mauga o laau olive, le Pule Silisili Ese a Ieova i le aoao o mea.

9. O le ā le uiga o le “vaeluaina” o le mauga o laau olive?

9 Ua faapea mai le valoaga e ʻvaeluaina i le ogatotonu’ le mauga o laau olive. O le ā le uiga o lenā manatu? E faasino atu i le faavaeina e Ieova o se isi pulega mo se fuafuaga faapitoa. O Ieova e ana lenā pulega, po o le Malo faa-Mesia, ma ua avea ai Iesu ma tupu. Ona o Ieova e ana nei pulega, o le māfuaaga lea ua taʻua ai nei mauga, o ʻana mauga.’—Saka. 14:4, 5.

10. O le ā ua faaāta mai e le “vanu telē”?

10 E tusa ai ma le valoaga, pe a vaeluaina le mauga o laau olive, ona tū lea o le tasi mauga i mātū, ae tū le isi i saute. Peitaʻi, o le a tū aao o Ieova i luga o nei mauga. O le vaeluaina o nei mauga, o le a maua mai ai se “vanu telē,” lea o le a tū ai i luga aʻe Ieova. O le ā lenā vanu? Ua faaāta mai ai le puipuiga a Ieova. E malupuipuia tagata i se vanu i le va o ni mauga se lua, e faapena foʻi le puipuiga e maua e auauna a Ieova mai i Lana pule, faapea le pulega a lona Alo. E lē faatagaina e Ieova le tafiesea o le tapuaʻiga moni. Na vaeluaina le mauga o laau olive i le 1914, ina ua pule Iesu i le lagi. Ua faapea mai foʻi le valoaga, e sosola atu tagata o Ieova i lenā “vanu telē.” O anafea na tupu ai lenā mea?

UA AMATA LE SOLAAGA I LE VANU

11, 12. (i) O anafea na amata ai ona sosola tagata o Ieova i le vanu faafaatusa? (ii) O le ā e faamaonia ai le a puipuia e Ieova ona tagata?

11 Na lapataʻia e Iesu ona soo: “O le a inosia foʻi outou e nuu uma ona o loʻu igoa.” (Mata. 24:9) Na faateteleina sauāga talu mai le 1914, ina ua amata aso e gata ai. A o faagasolo le Taua Muamua a le Lalolagi, na matuā sauāina ai Kerisiano faauuina faamaoni e o latou fili. Peitaʻi, e leʻi mafai ona tafiesea le tapuaʻiga moni. I le 1919, na saʻoloto ai tagata o Ieova mai lotu sesē, po o Papelonia le Aai Tele. (Faaa. 11:11, 12) * O le tausaga lenā na amata ai ona sosola tagata o Ieova i le vanu faafaatusa.

12 Talu mai le 1919, o loo faaauau pea ona puipuia e Ieova ona tagata. Na taumafai nisi faigāmalo e taofia le galuega talaʻi ma lomiga a Molimau a Ieova. O loo tupu pea lenā mea i nisi atunuu. Peitaʻi, e lē faatagaina e Ieova pulega faaletagata e tafiesea le tapuaʻiga moni. Po o ā lava taumafaiga a faigāmalo, e faaaogā e Ieova lona mana e puipuia ai ona tagata.​—Teu. 11:2.

13. (i) E faapefea ona tatou tumau i le vanu o le puipuiga a Ieova? (ii) Aiseā e sili ai ona tāua i le taimi lenei ona tatou tumau i lenā vanu faafaatusa?

13 E faaauau pea ona tatou iai i le vanu o le puipuiga a Ieova, pe a tatou faamaoni pea iā te ia. E leai se mea e mafai ona aveesea le puipuiga a Ieova ma lona Alo mai iā i tatou. (Ioa. 10:28, 29) Ua fesoasoani Ieova iā i tatou ina ia faamaoni i Lana pule, faapea le pulega a lona Alo. Peitaʻi, e sili atu ona tatou manaʻomia lenā puipuiga, pe a oo mai le puapuaga tele. E tāua tele i le taimi lenei ona tatou tumau i le vanu o le puipuiga a Ieova.

LE ASO “O LE A TAU AI O IA”

14, 15. O le ā e tupu i tagata e lē iai i le vanu o le puipuiga a Ieova, i le aso e tau ai ma ona fili?

14 A o lalata i le iʻuga o lenei lalolagi amioleaga, o le a faasolo ina malolosi osofaʻiga a Satani i tagata o le Atua. Ua toe o se aga, ona oo mai lea o le osofaʻiga mulimuli a Satani. I lenā aso, o le a tau ai Ieova ma faaumatia fili uma o ona tagata. O le aso lenā e “tau ai o ia” e pei ona valoia e Sakaria. O le taua tele o le a faaalialia ai i lumamea, o Ieova o le Toa.​—Saka. 14:3.

15 O le ā e tupu i tagata e lē iai i le vanu o le puipuiga a Ieova, i le aso e tau ai ma ona fili? Ua faapea mai le valoaga o le a latou lē maua le ʻmalamalama tāua,’ po o le finagalo malie o Ieova. Ua faaauau mai le valoaga, o ʻsolofanua, miula, kamela, asini poʻa, ma isi ituaiga o manu lalata,’ o le a ʻmalō uma ona o le mālūlū.’ O le a malō a latou meatau, pe i nisi upu, o le a faalēaogāina uma. E lē gata i lea, o le a faaumatia e Ieova ona fili i le “mala” po o se faamaʻi. O le a ʻpala foʻi o latou mata ma laulaufaiva.’ E tatou te lē iloa pe o le a tupu se faamaʻi moni. Peitaʻi, e lē aafia ai tagata o Ieova ma o le a faamuta ai faifaiga a ona fili. (Saka. 14:6, 7, 12, 15) O le a lagolagoina e “tupu o le lalolagi ma a latou ʻautau” le itu a Satani. Peitaʻi, e tusa po o fea e latou te iai, o le a faaumatia lava i latou. (Faaa. 19:19-21) “O i latou e fasia e Ieova i lea aso, e amata mai lava i le tasi pito o le lalolagi e oo atu i le isi pito o le lalolagi.”​—Iere. 25:32, 33.

16. (i) O ā fesili e tatau ona tatou iloiloina? (ii) O le ā e tatau ona tatou faia a o faagasolo le puapuaga tele?

16 E aafia tagata uma pe a tupu se taua, e oo lava i ē e manumalo. Atonu e tatou te mafatia foʻi, a o faagasolo le puapuaga tele. Atonu e itiiti a tatou meataumafa, leiloloa a tatou meatotino, pe e lē tele foʻi se saʻolotoga e maua. Pe a tutupu na mea, o le ā le auala e tatou te tali atu ai? Pe e tatou te lagona le atuatuvale? Po o le a faavaivaia i tatou ma mou atu lo tatou faamoemoe? Po o le a tatou auauna pea iā Ieova? I le puapuaga tele, e tatau ona tatou tumau i le vanu o le puipuiga, e ala i le faamaoni iā Ieova ma faatuatuaina lana puipuiga.​—Faitau le Sapakuka 3:17, 18.

“O LE A TAFE MAI LE VAI OLA”

17, 18. (i) O le ā le “vai ola”? (ii) O le ā ua faaāta mai e le “sami i sasaʻe,” faapea le “sami i sisifo”? (iii) O le ā e tatau ona tatou maumauaʻi e fai?

17 Pe a māeʻa Amaketo, ona tafe mai lea o “vai ola” mai le Malo o Keriso. O nei “vai ola” ua faaatagia mai ai sauniuniga a Ieova mo tagata, ina ia maua ai le ola e faavavau. I le valoaga a Sakaria, ua faaatagia mai e le “sami i sasaʻe” le Sami Mate, lea e faaāta ai i latou o loo momoe i tuugamau. Ae o le “sami i sisifo” o le Sami o Metitirani, ua faaatagia ai le “motu o tagata” lea o le a faasaoina mai iā Amaketo. (Faitau le Sakaria 14:8, 9; Faaa. 7:9-15) O le a feinu nei vaega o tagata i “vai ola,” mai le “vaitafe o le vai ola.” O le iʻuga, o le a latou maua le tulaga lelei atoatoa faapea le ola e faavavau.​—Faaa. 22:1, 2.

Ia maumauaʻi e tumau i le vanu o le puipuiga a Ieova

18 E puipuia ma faasaoina e Ieova i tatou i lana lalolagi fou amiotonu, pe a ia faaumatia lenei lalolagi amioleaga. E ui e itagia i tatou e le lalolagi, ae ua tatou filifili e faamaoni i le Malo o le Atua, ma maumauaʻi e tumau i le vanu o le puipuiga a Ieova.