Alu i mataupu o loo iai

Alu i le lisi o mataupu

Ia Nofouta i Faanaunauga o le Loto

Ia Nofouta i Faanaunauga o le Loto

Ua faapea mai le Ieremia 17:9, “e sili ona faaʻoleʻole le loto nai lo o mea uma, ma e matuā leaga lava.” Pe e tatou te faia ni faamolemolega ina ia faataunuu ai o tatou faanaunauga?

O loo lapataʻi mai le Tusi Paia e faapea: “E sau mai i le loto o mafaufauga leaga, o le fasioti tagata, mulilua, faitaaga, gaoi, molimau pepelo, ma upuleaga.” (Mata. 15:19) E mafai e o tatou loto ona faasesēina pe uunaʻia foʻi i tatou e faia gaoioiga e lē ōgatusa ma le finagalo o Ieova. Ae atonu e faatoʻā o tatou iloa le sesē o lenā gaoioiga, pe a māeʻa ona faatinoina. E faapefea ona iloa faanaunauga o o tatou loto, a o leʻi faia se gaoioiga sesē?

E FAAPEFEA ONA ILOA O TATOU FAANAUNAUGA?

O le ā le aafiaga i o tatou loto o le faitauina i aso taʻitasi o le Tusi Paia?

Faitau i aso taʻitasi le Tusi Paia, ma mafaufau loloto i ai.

I le Eperu 4:12, na tusi Paulo e faapea: “O loo ola le afioga a le Atua ma e matuā malosi foʻi, e sili atu lona maʻai i lo o le pelu e faatau maʻai ona itu, ma e ati e oo lava i le vaevaeina o le tino ma le agaga. E mafai foʻi ona faamasino i manatu ma faanaunauga o le loto.” E iloa faanaunauga o o tatou loto, pe a faatusatusa o tatou uiga ma taʻiala o le Tusi Paia. O lea, e tāua tele ai ona faitau i aso taʻitasi le Tusi Paia, ma mafaufau loloto i ai. O le faia faapea, e tatou te malamalama ai i le finagalo o Ieova.

E iai se aafiaga i o tatou lotofuatiaifo, o le taliaina o fautuaga a le Tusi Paia, ma faatatau mataupu silisili o loo iai. I le Roma 9:1, o loo taʻua ai o tatou lotofuatiaifo o se “molimau,” lea e mafai ona taofia i tatou mai le taʻutonuina o se gaoioiga sesē o le a faia. O loo iai foʻi i le Tusi Paia faaaʻoaʻoga e “lapataʻia ai i tatou.” (1 Kori. 10:11) O lesona e tatou te aʻoaʻoina mai i na faaaʻoaʻoga, e fesoasoani e taofia i tatou mai le faia o se gaoioiga sesē. O le ā e tatau ona tatou faia?

E fesoasoani le tatalo e tatou te iloa ai le tagata lilo i totonu

Tatalo iā Ieova ina ia e iloa faanaunauga moni o lou loto.

Ua faapea mai le 1 Nofoaiga Tupu 29:17, o Ieova o lē e “suʻesuʻe i le loto.” O loo taʻua foʻi i le 1 Ioane 3:20, ʻe sili atu o ia i o tatou loto, e na te silafia foʻi mea uma lava.’ E lē mafai ona tatou ʻolegia le Atua. Ia faailoa atu o tatou faalogona, popolega, ma faanaunauga iā te ia i le tatalo. O le a ia fesoasoani mai ai ina ia tatou iloa faanaunauga o o tatou loto. E tatou te talosaga atu foʻi iā te ia ina ia ʻfaia se lotomamā mo i tatou,’ e pei ona taʻua i le Salamo 51:10. O lea, e tāua tele le tatalo ina ia iloa ai o tatou faanaunauga moni.

E fesoasoani sauniga e malamalama ai i faanaunauga o o tatou loto

Ia uaʻi totoʻa atu a o faia sauniga.

E fesoasoani lenā tulaga i le faia o se iloiloga faamaoni o o tatou loto. Atonu e lē o sauniga uma e talanoaina ai ni manatu fou. Peitaʻi, o le auai i sauniga e faateleina ai lo tatou malamalama i mataupu silisili, ma faamanatu mai ai le tāua o le iloilo o o tatou faanaunauga. E faaleleia atili tulaga o o tatou loto, i tali a uso ma tuafāfine i sauniga. (Faata. 27:17) E lē atamai le faaesea o i tatou lava mai le faatasitasi ma uso i sauniga. O le faia faapea, e iʻu ai i le ʻsaʻilia o o tatou lava faanaunauga,’ e pei ona taʻua i le Faataoto 18:1. E tāua ona tatou fesili ifo, ʻPo o fai ma aʻu masani le auai i sauniga uma, ma maua mai ai aogā?’​—Epe. 10:24, 25.

O Ā FAANAUNAUGA O O TATOU LOTO?

E tele vala o le olaga e faasesēina ai i tatou e o tatou loto taufaaʻoleʻole. O nisi nei o vala o le a iloiloina: le saʻilia o meafaitino, le faaaogāina o le ʻava malosi, filifiliaina o a tatou aumea, faapea ma faafiafiaga.

Le saʻilia o meafaitino.

O se faalogona masani le naunau e faamalie o tatou manaʻoga faaletino. Peitaʻi, na lapataʻi mai Iesu ina ia aua neʻi avea na mea ma taulaʻiga o o tatou olaga. I se tasi o talafaatusa, na ia taʻua ai se tamāloa mauʻoa na tutumu ana fale saito. Ua leai se avanoa e teu ai nisi saito, o lea sa ia filifili ai loa e tala i lalo nei fale, ae fau nisi fale tetele. Na ia faapea mai: “O i inā o le a ou teuina ai aʻu saito ma aʻu mea lelei uma. Ona ou faapea ifo lea iā te aʻu: ʻUa ou maua le tele o mea lelei ua faaputuina mo le tele o tausaga; ia ou faifaimālie ai, ia ʻai ma inu, ma fiafia.’” Peitaʻi, e leʻi mafaufau lenei tamāloa e mafai ona ia oti i lenā lava pō.​—Luka 12:16-20.

E tatou te ono popole pe faapefea ona tausia o tatou manaʻoga pe a faasolo ina matutua. Atonu o le a faia ai ma faamolemolega o le faigaluega ovataimi i aso sauniga, ma faatalalē ai i o tatou tiute tauave o ni Kerisiano. Ia tatou mataala pe a tuputupu aʻe na faanaunauga. Talavou, ua tatou iloa e leai se isi olaga e sili atu nai lo o le auaunaga faataimi atoa. Peitaʻi, pe e māfua ona tuai ona e paeonia, ona o lou naunau e faamautū muamua lou tulaga faaletino? Ia tatou taumafai e mauʻoa i le silafaga a le Atua. E tatou te lē iloa pe e tatou te feoti a taeao.

Le faaaogāina o le ʻava malosi.

Ua faapea mai le Faataoto 23:20, “aua neʻi avea oe o sē e inu tele i le uaina.” E faia e se tasi faamolemolega ina ia inu ai i aso uma, pe a matuā naunau i le ʻava malosi. Atonu e faapea mai, e na o sina faamalositino lava, ae lē ina ia onā ai. Pe afai o lea, e lelei ona toe faia se iloiloga faamaoni o o tatou loto.

Filifiliaina o a tatou aumea.

E lē mafai ona tatou ʻalofia fesootaʻiga ma ē e lē talitonu i aʻoga, fale faigaluega, faapea foʻi le faiva i le fanua. Peitaʻi, e ese mai ai le faifaimea faatasi ma i latou, ma oo ai ina māfana a tatou faauōga. Pe e tatou te faia faamolemolega e faatasitasi ai ma i latou i le manatu e faapea, e tele o latou uiga lelei? Ua lapataʻi mai le 1 Korinito 15:33 e faapea: “Aua neʻi faasesēina outou. O aumea leaga e faaleagaina ai mea lelei ua masani ai tagata.” E faaleagaina e sina vai oona se suāvai mamā, e faapena foʻi ona faaleagaina lo tatou itu faaleagaga pe a faauō ma ē e lē amioatua. O le a tatou faataʻitaʻi ai foʻi i le auala o loo manatu, lāʻei, tautatala, ma amioaʻi ai tagata o le lalolagi.

Faafiafiaga.

O le saoasaoa o le atamai faaonapōnei, ua faigofie ai i tagata ona maua faafiafiaga eseese, lea e tele ina lē talafeagai mo se Kerisiano. I le Efeso 5:3, na tusi Paulo e faapea: ʻO amioga lē mamā uma, aua lava neʻi taʻua iā te outou.’ E manaʻomia e tagata uma lava sina faafiafiaga. Ae faapefea pe a naunau o tatou loto e faalogologo, pe matamata i mea e lē talafeagai? Atonu e tatou te manatu o lenā mataupu e fitoitonu i le tagata lava ia. Peitaʻi, ia tāmau i o tatou mafaufau le fautuaga a Paulo, ma ʻalofia le faalogologo ma matamata i mea e lē mamā.

E MAFAI ONA SUIA O TATOU ALA

E tusa pe na tatou lolo atu i faanaunauga o o tatou loto taufaaʻoleʻole, ma fai ma masani le taʻutonuina o ni gaoioiga sesē, e mafai lava ona suia o tatou ala. (Efe. 4:22-24) Seʻi mātau ni faaaʻoaʻoga se lua.

Sa tatau iā Miguel * ona fetuunaʻi le auala e mafaufau ai i meafaitino. Na ia faapea mai: “O lo matou aiga e mai i se atunuu e faatāua le mauaina o masini faaonapōnei, faapea se olaga e tū lelei. I se tasi taimi, sa avea ma taulaʻiga o loʻu olaga le saʻilia o mea a le lalolagi, ma manatu ou te lē aafia ai i le uiga matapeʻapeʻa. Ae na ou iloa mulimuli ane, e lē gata mai loʻu manaʻo i meafaitino. Sa ou tatalo iā Ieova e faatatau i laʻu vaaiga i le tulaga o mea, faapea faanaunauga o loʻu loto. Sa ou faailoa atu foʻi lo matou faanaunauga o se aiga, e auauna iā te ia ma le lotoatoa. Sa faafaigofie o matou olaga, ma siitia atu i se vaipanoa o loo telē ai le manaʻoga. Mulimuli ane, sa avea i maʻua o ni paeonia. Ua matou iloa, e lē manaʻomia le tele o meafaitino, ina ia maua ai le fiafia moni.”

O le isi faaaʻoaʻoga o Lee. Sa faia se iloiloga faamaoni o lona loto, ma na fesoasoani iā te ia e tuua ai ana aumea leaga. Na ia faapea mai: “I laʻu galuega, sa tele ina ou faifaimea faatasi ma ē e faia fefaatauaʻiga. Sa ou fiafia i na faatasitasiga, ma sa lē pulea le faaaogāina o le ʻava malosi. O le tele o taimi, sa ova laʻu inu ma toetoe lava ina onā, ae na ou toe salamō mulimuli ane ai. O lea, sa tatau ona faia se iloiloga faamaoni o loʻu loto. Sa aogā iā te aʻu taʻiala mai le Tusi Paia ma fautuaga mai toeaina. Na ou iloa ai, sa ou faauō i tagata e lē alolofa iā Ieova. O lea, ua ou faaaogā le telefoni i le tele e mafai ai, ina ia faaitiitia ai le faatasitasi ma nei tagata faipisinisi.”

E tatau ona faia se iloiloga faamaoni o i tatou lava, ma iloa ai o tatou faanaunauga. Ia saʻili i le taʻitaʻiga a Ieova e ala i le tatalo, auā “e na te silafia mea lilo i le loto.” (Sala. 44:21) O lana Afioga foʻi ua pei o se fāʻata. (Iako. 1:22-25) E tāua faamanatu ma fautuaga e maua mai i lomiga faale-Tusi Paia, faapea sauniga. O nei sauniuniga, e leoleomaluina ai o tatou loto, ma faaauau ai ona savavali i le ala o le amiotonu.

^ pala. 18 Ua suia igoa.