Skip to content

Skip to table of contents

Pe e Tāua iā te Oe lo Tatou Tofi Faaleagaga?

Pe e Tāua iā te Oe lo Tatou Tofi Faaleagaga?

ʻUa silasila le Atua i nuu ese, ina ia filifilia mai ai ni tagata mo lona suafa.’​—GALU. 15:14.

1, 2. (i) O le ā na faasino atu i ai “le faleʻie o Tavita”? (ii) O le ā le auala na toe atiaʻe ai lenā faleʻie? (iii) O ai auauna a Ieova i aso nei?

I LE 49 T.A., sa faapotopoto ai i Ierusalema le vaega pule mo sa latou fonotaga tāua. Na faapea mai Iakopo: “Ua uma ona faamatala auʻiliʻili atu e Simeona [Peteru] e faapea, o le uluaʻi taimi lea ua silasila ai le Atua i nuu ese, ina ia filifilia mai ai ni tagata mo lona suafa. Ua tusa lenei mea ma upu a le ʻau Perofeta e pei ona tusia, ʻPe a mavae nei mea, ou te toe sau ma toe fausia le faleʻie o Tavita ua paʻū; ou te toe atiaʻe foʻi mea ua lepetia ma toe faatūina, ina ia mafai ai e ē ua totoe o nei tagata, ona matuā saʻili iā Ieova faatasi ai ma tagata o atunuu uma, o tagata ua valaauina i loʻu igoa, ua fetalai mai ai Ieova, o lē ua faia nei mea na iloa mai i aso anamuā.’”​—Galu. 15:13-18.

2 E faasino atu “le faleʻie o Tavita” i tupu na tupuga mai le aiga o Tavita. Na “paʻū” lenā faleʻie ina ua aveesea Setekaia, le tupu mulimuli o Iuta. (Amo. 9:11) Peitaʻi, o loo taʻua i lenā valoaga o le a “toe atiaʻe” e le Atua lenā faleʻie. O lona uiga, o le a tulaʻi mai se isi tupu, ma e faasino atu iā Iesu, o lē e tupuga mai iā Tavita. (Eseki. 21:27; Galu. 2:29-36) Na toe faapea mai Iakopo o le a avea tagata Iutaia faapea tagata mai Nuu Ese ma tupu faauuina faatasi ma Iesu i le lagi. O loo galulue faatasi le ʻaufaauuina ma “isi mamoe” i le talaʻia o le upu moni.​—Ioa. 10:16.

FAAAUNUUA TAGATA IUTAIA

3, 4. O le ā na fesoasoani i tagata Iutaia e mafuta vavalalata atu ai iā Ieova?

3 E 70 tausaga o faaaunuua tagata Iutaia i Papelonia.  Sa faamaonia ai le paʻū o “le faleʻie o Tavita.” Sa matuā taatele lotu sesē i Papelonia. Peitaʻi, sa faapefea ona tumau ma le faamaoni tagata o Ieova a o iai i inā? Sa fesoasoani iā i latou le iai o se tofi tautele faaleagaga. O le auala foʻi lenā o loo tumau ai ma le faamaoni tagata o Ieova i aso nei, i le lalolagi a Satani.—1 Ioa. 5:19.

4 Ua tatou maua foʻi le Afioga a le Atua, o se isi lea vala o lo tatou tofi faaleagaga. E leʻi maua e tagata Iutaia i Papelonia le Tusi Paia atoa, ae sa latou malamalama i le Tulafono a Mose lea e aofia ai Tulafono e Sefulu. Na latou iloa foʻi “pese o Siona,” ma le tele o faataoto, faapea isi auauna faamaoni a Ieova sa iai. E leʻi galo iā i latou Ieova, ma na latou fetagisi i le toe fia foʻi i lo latou nuu. (Faitau le Salamo 137:1-6.) Na fesoasoani lenā iā i latou e mafuta vavalalata ai iā Ieova, e ui sa taatele faiga ma aʻoaʻoga sesē i Papelonia.

E LĒ FOU LE TOLUTASI

5. O ai atua tolutasi sa talitonu i ai tagata Papelonia ma tagata Aikupito?

5 I aso anamua, sa tapuaʻi tagata i atua e taʻitolu o latou vaega, po o le tolutasi. O se faaaʻoaʻoga, sa tapuaʻi tagata Papelonia i le atua o le masina, le atua o le lā, ma le atua fafine o le fanautama ma faigātaua. I Aikupito, sa tapuaʻi foʻi tagata i se atua tolutasi, lea e aofia ai se tamā, tinā ma le atalii. E ui o i latou o se vaega o le tolutasi, ae e lē tutusa i taimi uma o latou tulaga. O se tasi o tolutasi sa iai i Aikupito, o le atua o Osiris, le atua fafine o Isis, ma le la tama o Huro.

6. (i) O le ā le Tolutasi? (ii) Aiseā e lē talitonu ai auauna a Ieova i lenā aʻoaʻoga?

6 O loo aʻoaʻoina foʻi i lotu ua faapea mai o Kerisiano i aso nei le Tolutasi. O lenei aʻoaʻoga ua taʻufaatauvaaina ai le pule silisili ese a Ieova, faapea le avea o ia ma Atua moni e toʻatasi. Peitaʻi, o loo puipuia e Ieova ona tagata mai i nei aʻoaʻoga sesē. I le Teuteronome 6:4, ua tatou aʻoaʻoina ai “o Ieova lo tatou Atua, o Ieova e toʻatasi lava ia.” Na toe taʻua e Iesu na upu, ma e talitonu Kerisiano moni i na fetalaiga.​—Mare. 12:29.

7. O le ā e tatau ona talitonu i ai se tasi a o leʻi papatiso?

7 Na poloaʻia e Iesu ona soo, ina ia “fai tagata o nuu uma lava ma soo, ma papatiso atu iā i latou i le suafa o le Tamā, ma le Atalii, ma le agaga paia.” (Mata. 28:19) Pe a fia papatiso se tasi ina ia avea o se Kerisiano moni ma o se Molimau a Ieova, e tatau ona ia talitonu e sili atu Ieova iā Iesu. O Iesu o le Alo o le Atua, ma na afio mai i le lalolagi e fai ma togiola. E lē gata i lea, o le agaga paia o le mana galue o le Atua, ae e lē o se vaega o le Tolutasi. (Kene. 1:2) O lea, o le Tolutasi e lē gata o se aʻoaʻoga sesē, ae ua taʻufaatauvaaina ai foʻi Ieova. O lenā mea moni, o se isi lea vala o lo tatou tofi faaleagaga.

FAIGA FAAAGAGA

8. O le ā le talitonuga o tagata Papelonia e faatatau i o latou atua ma temoni?

8 Sa talitonu foʻi tagata Papelonia i temoni ma faiga faaagaga. Na faapea mai se lomifefiloi, sa talitonu tagata Papelonia, e iai le mana o temoni e faapogaia ai faamaʻi. O lea, e latou te talosaga atu i o latou atua, ina ia puipuia i latou mai i temoni.—The International Standard Bible Encyclopaedia.

9. (i) Na faapefea ona lolo atu le toʻatele o tagata Iutaia i aʻoaʻoga sesē? (ii) E faapefea ona puipuia i tatou mai faiga faaagaga?

 9 Na aafia le toʻatele o tagata Iutaia sa faaaunuua i Papelonia i aʻoaʻoga sesē. Na amata ona taaʻina o latou olaga i aʻoaʻoga faa-Eleni. Sa latou talitonu e lelei nisi temoni. Peitaʻi, ua tatou iloa e inosia ma taʻusalaina e Ieova faiga faaagaga, po o le taumafai e fesootaʻi ma agaga leaga. O lenā mea moni, o se isi lea vala o lo tatou tofi faaleagaga. (Isa. 47:1, 12-15) E tatou te maua le puipuiga, pe a usitaʻia le taʻitaʻiga a Ieova ina ia tetee atu i faiga faaagaga.​—Faitau le Teuteronome 18:10-12; Faaaliga 21:8.

10. (i) O ai Papelonia le Aai Tele? (ii) O fea na tupuga mai ai aʻoaʻoga sesē ma faiga faapaupau?

10 I aso nei, o loo faia foʻi e le toʻatele o tagata lotu faiga faaagaga, e pei o tagata Papelonia. O le māfuaaga lea ua taʻua ai e le Tusi Paia lotu sesē uma i le lalolagi, o Papelonia le Aai Tele. (Faaa. 18:21-24) Ua pei lotu sesē i aso nei o Papelonia anamua, lea na tupuga mai ai aʻoaʻoga sesē, faapea faiga faapaupau. Ua toe o se aga ona faaumatia lea o Papelonia le Aai Tele, ona o ana faiga faaagaga, le ifo i tupua, faapea ma isi agasala.​—Faitau le Faaaliga 18:1-5.

11. O ā lapataʻiga o loo aumaia i a tatou lomiga e faatatau i faiga faaagaga?

11 Na fetalai Ieova i le Isaia 1:13: “Ua ou lē lavā onosaia faiga faataulāitu.” Sa matuā talitonu le toʻatele i faiga faaagaga. O lea, sa talanoaina ai lenā mataupu i le Zion’s Watch Tower iā Me 1885. Na taʻua ai le aʻoaʻoga a lotu anamua e faapea, o loo feola pea ē ua maliliu. E faavae a latou talatuu i le talitonuga, pe a oti le tagata, e alu lona agaga i se isi nofoaga. O loo taʻua atili ai, e faaaogā e agaga leaga tagata ua maliliu, e fesootaʻi ai ma tagata. O le iʻuga, ua latou taaʻina mafaufauga ma gaoioiga a le toʻatele o tagata. O lapataʻiga foʻi na o loo taʻua i le tamaʻitusi, What Say the Scriptures About Spiritism? (ua lē o toe lomia), faapea ma isi a tatou lomiga.

PE E IAI SE NOFOAGA E FAAPUAPUAGATIA AI?

12. O le ā na taʻua e Solomona e faatatau i ē ua maliliu?

12 E malamalama “i latou uma ua iloa le upu moni,” e lē o faapuapuagatia ē ua maliliu i se isi nofoaga. (2 Ioa. 1) I le Failauga 9:4, 5, 10, na taʻua ai e Solomona le tulaga o ē ua maliliu e faapea: ʻE sili le taʻifau ua ola nai lo o le leona ua mate. Auā o ē ua ola ua latou iloa e oti i latou; a o ē ua oti, latou te lē iloa se mea. O mea uma ua e iloa e faia e ou lima, inā faia ia ma lou malosi, auā e leai se galuega, po o ni fuafuaga, po o le poto, po o le atamai i le Tuugamau o loo e alu atu i ai.’

13. O le ā le talitonuga sa taliaina e tagata Iutaia?

13 Sa faailoa atu e Ieova i tagata Iutaia le mea moni e faatatau i ē ua maliliu. Peitaʻi, ina ua pulea e Eleni Iuta ma Suria, na latou taumafai e faatalitonu tagata i a latou tapuaʻiga faapea a latou tū ma aga. O le iʻuga, na taliaina e tagata Iutaia le talitonuga, e iai se vaega o le tagata e ola pea pe a oti le tino, ma o le a faapuapuagatia i se isi nofoaga. E leʻi tupuga mai i Eleni le talitonuga o le faapuapuagatia o tagata i se isi nofoaga. Na taʻua i se tasi tusi, sa talitonu tagata Papelonia,  o loo faapuapuagatia tagata i se isi nofoaga e atua malolosi ma temoni. (The Religion of Babylonia and Assyria) Na talitonu tagata Papelonia, e ola pea le agaga pe a oti le tagata.

14. O ā mea sa iloa e Iopu ma Aperaamo e faatatau i ē ua maliliu, faapea le faamoemoe o le toetū?

14 E ui e leʻi maua e Iopu Tusitusiga Paia, ae sa ia malamalama i le mea moni e faatatau i ē ua maliliu. Sa ia iloa foʻi o Ieova o se Atua alofa, ma e naunau e toe faatūina mai o ia. (Iopu 14:13-15) Na talitonu foʻi Aperaamo i le faamoemoe o le toetū. (Faitau le Eperu 11:17-19.) Sa talitonu Iopu ma Aperaamo i le faamoemoe o le toetū, ona o le fesoasoani a le agaga o Ieova. E leʻi talitonu nei tane, e iai se agaga o le tagata e ola pea pe a oti. Afai e ola pea le agaga o le tagata i se isi nofoaga, e lē tau manaʻomia la le faamoemoe o le toetū. O nei upu moni e aofia ai foʻi i lo tatou tofi faaleagaga.

ʻFAASAʻOLOTOINA E ALA I LE TOGIOLA’

15, 16. Ua faapefea ona faasaʻolotoina i tatou mai i le agasala ma le oti?

15 E faafetaia Ieova, ona ua ia faailoa mai foʻi le auala ua ia faasaʻolotoina ai i tatou mai i le agasala ma le oti. (Roma 5:12) Ua faapea mai le Mareko 10:45, e leʻi afio mai Iesu ʻina ia auauna tagata iā te ia, ae ia auauna atu, ma foaʻi atu lona ola e fai ma togiola e sui aʻi tagata e toʻatele.’ Maʻeu le tāua o le iloa o le faasaʻolotoina o i tatou, “e ala i le togiola a Keriso Iesu.”​—Roma 3:22-24.

16 Ina ia maua le faamagaloga, sa tatau i tagata i le uluaʻi senituri ona salamō mai i a latou agasala, ma faaalia le faatuatua i le taulaga togiola a Iesu. O le tulaga foʻi lenā i aso nei. (Ioa. 3: 16, 36) E lē maua e se tasi aogā o le togiola, pe a talitonu pea i aʻoaʻoga sesē e pei o le ola pea o le agaga o le tagata pe a oti, faapea le Tolutasi. Peitaʻi, e mafai ona tatou maua aogā o le togiola. Talu ai ua tatou iloa le upu moni e faatatau i le ʻAlo pele o le Atua, o ia ua faasaʻolotoina ai i tatou e ala i le togiola, o le faamagaloina lea o a tatou agasala.’​—Kolo. 1:13, 14.

AUAUNA PEA IĀ IEOVA!

17, 18. (i) E faapefea ona tatou iloa lo tatou talafaasolopito? (ii) Aiseā e tāua ai ona iloilo lo tatou talafaasolopito?

17 E aofia foʻi i lo tatou tofi faaleagaga mea ua aʻoaʻoina ai i tatou e Ieova, faapea auala ua ia fesoasoani ma faamanuia ai i tatou. O loo faamatala i a tatou tusi tausaga, auaunaga a tagata o Ieova. E tatou te aʻoaʻoina le talafaasolopito o Molimau a Ieova i vitiō o le Faith in Action, Vaega 1 ma le 2, faapea lomiga e pei o le Jehovah’s Witnesses—Proclaimers of God’s Kingdom, ma le polosiua Molimau a Ieova i Samoa-O se Tala o le Lototele ma le Faamaoni. O loo faamatalaina foʻi i a tatou lomiga, tala faagaeeloto e faatatau i o tatou uso ma tuafāfine.

18 Sa aogā iā Isaraelu le iloaina o le auala sa laveaʻia ai e Ieova i latou mai Aikupito. (Eso. 12:26, 27) E tatou te maua foʻi aogā pe a iloiloina le talafaasolopito o Molimau a Ieova. I le Teuteronome 32:7, na faapea atu ai Mose i le nuu o Isaraelu: “Ia manatua aso ua mavae, ia manatunatu i tausaga ua tuanaʻi mai i lea tupulaga i lea tupulaga; ia fesili i lou tamā, ma e na te taʻuina mai iā te oe; i o outou toeaina foʻi, ma e latou te taʻuina mai iā te oe.” E tatou te vivii iā Ieova ma le fiafia, ma faailoa atu i isi ana galuega mamana. (Sala. 79:13) O le a fesoasoani lesona e tatou te aʻoaʻoina mai i lo tatou talafaasolopito, ina ia auauna ai pea iā Ieova.

19. O le ā e tatau ona tatou faia, ona ua tatou iloa le upu moni?

19 E ui o loo tatou ola i lenei lalolagi leaga, ae e lagona le olioli, ona ua faailoa mai e Ieova le upu moni. (Faata. 4:18, 19) O lea, ia suʻesuʻe pea ma le filigā le Tusi Paia, ma talaʻi atu i isi. E pei o tatou lagona o le faisalamo o lē na faapea mai: “Ou te taʻu atu lau amiotonu, e na o oe lava. Le Atua e, na e aʻoaʻo mai iā te aʻu talu mai loʻu talavou, ma e oo mai nei lava, ou te taʻutaʻu atu pea au galuega ofoofogia. Le Atua e, aua lava e te tuua aʻu, e oo lava ina ou toeaina ma ulusinā, seʻia ou taʻu atu e uiga i lou aao malosi i le tupulaga o loo fāi mai, iā i latou uma o loo fāi mai, e uiga i lou malosi.”​—Sala. 71:16-18.

20. (i) O le ā ua faamaonia i lo tatou faamaoni iā Ieova? (ii) O ā ni ou faalogona e faatatau i le pule silisili ese a Ieova?

20 O lo tatou faamaoni iā Ieova, e faaalia ai e tatou te talitonu i le tonu o lana pule silisili ese, ma ua na o ia e tatau ona tapuaʻi i ai. (Faaa. 4:11) O le agaga paia o Ieova, ua mafai ai ona tatou faailoa atu i isi le tala lelei, ma avatu le faamoemoe ma faamāfanafanaga iā i latou. (Isa. 61:1, 2) E lē mafai ona taulau Satani i le puleaina o tagata. Tau ina ia tatou faatāua lo tatou tofi faaleagaga, ma maumauaʻi e tumau ma le faamaoni iā Ieova, seʻia oo i le faavavau.​—Faitau le Salamo 26:11; 86:12.