Skip to content

Skip to table of contents

Lomiga o le Watchtower i le Gagana Faafaigofie—O le ā le Fuafuaga?

Lomiga o le Watchtower i le Gagana Faafaigofie—O le ā le Fuafuaga?

 Lomiga o le Watchtower i le Gagana Faafaigofie—O le ā le Fuafuaga?

E TOʻATELE tagata i le lalolagi aoao ua talisapaia ma maua aogā, mai i faamatalaga faale-Tusi Paia o loo i a tatou lomiga o Le Olomatamata. Iā Iulai i le 2011, na lomia ai le uluaʻi lomiga i le gagana faafaigofie i le faa-Peretania. Na faailoa mai ai e faapea: “O le a faataʻitaʻi lenei lomiga mo se tausaga, ma pe a fai e lelei iʻuga e maua mai ai, ona faaauau lea o le lolomiina.”

E fiafia e faailoa atu, ua matou filifili nei e faaauau pea ona lomiaina lenei lomiga. I se taimi mulimuli mai, o le a maua foʻi lenei lomiga i le gagana Falani, Potukali ma le gagana Sepania.

O AOGĀ

Ina ua mauaina lenei lomiga e le toʻatele i le Pasefika i Saute, na latou faapea mai: “Ua faigofie ona malamalama atoatoa uso i manatu o loo i Le Olomatamata.” Na tusi mai se tasi e faapea: “O le tele o le taimi lea sa faaalu i le suʻeina o uiga o upu ma taumafai e faamatala, o lea ua faaaogā e suʻesuʻe loloto ai i mau sii, faapea le auala e mafai ona faatatauina ai.”

Na faapea mai se tamaʻitaʻi na faauu mai i aʻoga maualuluga i le Iunaite Setete: “E 18 tausaga o fai ma aʻu masani, le tautala ma tusitusi i le gagana maotua. Na ou iloa sa manaʻomia ona faia ni suiga i le auala ou te tautala ma mafaufau ai.” Ua avea nei o ia o se tagata talaʻi e uigā lana aʻoaʻo atu. Ua ia faapea mai: “E telē le fesoasoani ua ou maua mai le lomiga i le gagana faafaigofie. O le auala e faaupu ai, ua ou  iloa ai e tatau ona faafaigofie le auala ou te tautala ma mafaufau ai.”

Na faapea mai se tuafafine mai Egelani na papatiso i le 1972: “Ina ua ou faitau i le uluaʻi lomiga, na ou lagona ai le māfana e pei o loo opoina aʻu e Ieova ma faitau faatasi lenei lomiga. E pei o loo faamatalaina atu e se tamā se fagogo i lona afafine.”

Na faapea mai se tuafafine mai le Peteli i le Iunaite Setete, ua silia ma le 40 tausaga talu ona papatiso, e tele mea fou ua ia malamalama i ai ona o le fesoasoani a lenei lomiga. O se faataʻitaʻiga, i le lomiga o Setema 15, 2011, o loo iai le pusa ua faaulutalaina “Uiga o Faaupuga.” O loo faamatalaina ai le uiga o le faaupuga, “o molimau e matuā toʻatele e pei o se ao tele,” o loo i le Eperu 12:1 e faapea: “E lē mafaitaulia lo latou aofaʻi.” Na taʻua e le tuafafine: “O lenā manatu na faalautele ai loʻu malamalamaga e faatatau i lenā fuaitau.” Na ia faapea atili mai: “Pe a faaaogā e se tamaitiiti le lomiga i le gagana faafaigofie e fai ai ana tali, e fou i le faalogo a le aofia, auā e ese le auala o loo faaupuina ai mai le lomiga masani, lea e faaaogāina e le toʻatele.”

Na tusi se isi tuafafine mai le Peteli: “Ou te tulimataʻia taimi e fai ai tali a tamaiti i le faapotopotoga. Ua fesoasoani le lomiga o le Watchtower i le gagana faafaigofie, e faia ai ma le mautinoa a latou tali, ma e matuā faalaeiauina ai aʻu.”

Na faaalia e se tuafafine na papatiso i le 1984 lona talisapaia o lenei lomiga, ina ua ia faapea mai: “Na tusia faapitoa lenei lomiga mo  aʻu. Ua faigofie ona ou malamalama i mea o loo faitauina. Ua ou maua foʻi le lototele e tali ai i le Suʻesuʻega o le Olomatamata.”

FESOASOANI MO MĀTUA

Na faapea mai le tinā o se tamaitiiti e fitu tausaga: “Pe a faia a matou sauniuniga mo le Suʻesuʻega o le Olomatamata, e masani ona umi se taimi e faamalamalama ai iā te ia le uiga o se manatu, ma e lagona ai foʻi le fiu.” Na faapefea ona aogā iā te ia le lomiga i le gagana faafaigofie? Na tusi mai lenei tinā: “Ou te maofa ona ua mafai ona ia maua le manatu tāua pe a faitauina palakalafa. Ua ia lagona le toʻa ona o le faigofie ma le pupuu o fuaiupu. Ua fai lava ana tali e aunoa ma laʻu fesoasoani, ma a o faagasolo le suʻesuʻega e uaʻi atu o ia i le mataupu o loo faia.”

Na faapea mai le tinā o se teineitiiti e iva tausaga: “Ua mafai ona ia faaupuina ana lava tali, nai lo o le mea sa iai muamua. E lē o toe tele se taimi e faaalu e fesoasoani ai iā te ia, ina ia malamalama i uiga o faaupuga. Ua faigofie ona ia malamalama i le mataupu o loo talanoaina i le Suʻesuʻega o le Olomatamata.”

FAALOGONA O TAMAITI

E manatu le toʻatele o tamaiti, na saunia faapitoa lava lenei lomiga faafaigofie o le Watchtower mo i latou. Na talosaga mai Repeka e 12 tausaga e faapea: “Faamolemole ia faaauau pea ona lomia lenei lomiga. E ese le manaia o le mataupu ua faaulutalaina, ʻUiga o Faaupuga,’ ma e faigofie ona malamalama i ai tamaiti.”

Na faapea mai Nicolette e fitu tausaga: “Sa faigatā iā te aʻu ona malamalama i mataupu o le suʻesuʻega o Le Olomatamata. Ae i le taimi lenei, ua mafai ona ou faaupuina aʻu lava tali.” Na tusi Ema e iva tausaga e faapea: “Ua telē le fesoasoani a lenei lomiga iā te aʻu ma loʻu tuagane e ono tausaga. Ua faigofie ona ma malamalama i mataupu o loo talanoaina ai. Faafetai lava!”

Ua mafai e le lomiga o Le Olomatamata i le gagana faafaigofie, ona faamalie le manaʻoga o tagata, ina ia maua faamatalaga i se auala e faigofie ona malamalama i ai. O le a faaauau pea ona lomiaina lenei lomiga faatasi ma le lomiga e masani ai o Le Olomatamata, lea na lomia talu mai le 1879.

[Ata i le itulau 30]

[Ata i le itulau 30]

[Faamatalaga faaopoopo i le itulau 30]

“O le tele o le taimi lea sa faaalu i le suʻeina o uiga o upu ma taumafai e faamatala, o lea ua faaaogā e suʻesuʻe loloto ai i mau sii, faapea le auala e mafai ona faatatauina ai”

[Ata i le itulau 31]

[Faamatalaga faaopoopo i le itulau 31]

“Ou te maofa ona ua mafai ona ia maua le manatu tāua pe a faitauina palakalafa”