Skip to content

Skip to table of contents

O se Fonotaga Matagofie na Mātaulia i le Autasi

O se Fonotaga Matagofie na Mātaulia i le Autasi

 Lipoti o le Fonotaga Faaletausaga

O se Fonotaga Matagofie na Mātaulia i le Autasi

E MASANI ona maua le olioli i fonotaga faaletausaga a le Watch Tower Bible and Tract Society of Pennsylvania. Maʻeu le moni o lenā mea i le fonotaga faaletausaga lona 127, na faia i le Aso Toonaʻi, Oketopa 1, 2011! Na ofaga potopoto mai le ʻauvalaaulia mai i tafa eseese o le lalolagi i le Maota Fono o Molimau a Ieova i Jersey City i New Jersey, i le Iunaite Setete o Amerika.

O Gerrit Lösch o se sui o le Vaega Pule, na faafeiloaʻia le ʻauvalaaulia mai i atunuu pe ā ma le 85. Na ia faapea atu iā i latou, ua tatou olioli i se autasi uigaese faavaomalo. O lenā autasi ua avea ma molimau lelei, ma ua faapaiaina ai Ieova. Na matilatila i lenā fono le autasi.

O SE LIPOTI LELEI MAI I MEKISIKŌ

O le vaega muamua o le polokalame na faamatilatila mai ai le autasi o tagata o Ieova. Na faatalanoa e Baltasar Perla ni sui e toʻatolu o le aiga Peteli i Mekisikō, e faatatau i le tuufaatasia ai o isi ofisa o lālā e ono i Amerika Tutotonu, i lalo o le vaavaaiga a le lālā i Mekisikō. O lenei suiga ua tele ai aganuu ma ituaiga tagata eseese i le aiga Peteli i Mekisikō. O le taunuu mai ai o uso talitonu mai i vaipanoa eseese, na iʻu ai i le fetufaaʻiga o faalaeiauga. E peiseaʻī o Ieova na aveesea atoatoa papuipui na vaevaeina ai nei atunuu.

O se tasi o luʻi na tulaʻi mai i lenei suiga, o le taumafai lea e fesoasoani i tagata talaʻi e manatua, e lē o vavaeeseina i latou mai i le faalapotopotoga a Ieova, e ui lava i le lē toe iai o ofisa o lālā i o latou atunuu. O le faia faapea, ua mafai ai e faapotopotoga taʻitasi ona iai se imeli malupuipuia e fesootaʻi ai, e oo lava i nofoaga maotua e mafai ona latou fesootaʻi tuusaʻo atu i le ofisa o le lālā.

SE TALA LATA MAI I IAPANI

Na faamatala e James Linton mai le lālā i Iapani, aafiaga na oo i o tatou uso ona o le mafuiʻe ma sunami, na afātia ai lenā atunuu iā Mati o le 2011. E toʻatele Molimau na leiloloa ai soifua o ē pele iā i latou faapea a latou meatotino. Na foaʻi atu e uso mai i vaega e leʻi aafia i le mala le silia i le 3,100 fale e faamautū ai latou na aafia, faapea le faitau selau o taavale. O le ʻautauofo faatasi ai ma le Komiti o Faugāfale o le Vaipanoa, na galulue pea i le toe faaleleia o maota ma fale o uso. E silia ma le 1,700 le ʻautauofo na fesoasoani i le mea na iai le manaʻoga. O se vaega o le ʻaugalulue tauofo mai le Iunaite Setete, na fesoasoani i le toe faaleleia o Maota mo Sauniga, ma e 575 le ʻautauofo na galulue i lenā galuega.

E telē le fesoasoani na tuuina atu iā i latou na aafia, e fesagaʻia ai mafatiaga ma faamalosia ai lo latou itu faaleagaga. E silia i le 400 toeaina na auauna i nofoaga na manaʻomia ai le galuega faaleoleo mamoe. Na faamaonia le manatu mamafa o le Vaega Pule i le itu faaleagaga, ina ua auina atu ni ovasia se lua o le sone mai le ofisa ulu i nofoaga sa afātia. Na faamāfanafanaina i latou na afātia, ona o le faailoaina atu o le manatu mamafa o o latou uso i le lalolagi aoao iā i latou.

 IʻUGA LELEI FAAFAAMASINOGA

Na matuā uaʻi totoʻa atu le aofia a o tauaaoina e le uso Stephen Hardy mai le lālā i Peretania, le talanoaina o iʻuga lelei faafaamasinoga talu ai nei. O se faataʻitaʻiga, na tāpā e le faigāmalo i Falani le $82 miliona (U.S) o lafoga mai Molimau a Ieova i Falani. Na foʻia le mataupu ina ua lagolagoina e le Faamasinoga o Aiā Tatau i Europa la tatou itu, e faapea ua solia e le faigāmalo a Falani le Vaega 9 o le Maliega mo Aiā Tatau a Tagata i Europa, lea e puipuia ai le saʻolotoga o lotu. O le faaupuina o le faaiʻuga e faaalia ai e leʻi taumafai o tatou uso i ina e ʻalofia le totogiina o lafoga. O se faataʻitaʻiga, na taʻuleagaina ma teena e le faigāmalo a Falani le avea o Molimau a Ieova o se faalapotopotoga faalelotu, aveesea la latou aiā faaletulafono, ma taumafai e tafiesea Molimau a Ieova mai le atunuu.

Na lagolagoina foʻi e le Faamasinoga o Aiā Tatau i Europa la tatou itu i se mataupu e aofia ai le atunuu o Armenia. Talu mai le 1965 na manatu ai le Faamasinoga o Aiā Tatau i Europa e faapea, e lē puipuia e le Maliega a Europa tagata taʻitoʻatasi mai le faamalosia e auai i vaegaʻau. Na faapea mai le Faamasinoga Sili—le vaega maualuga o Faamasinoga i Europa—“o i latou e teena le auai i vaegaʻau, ona o ni māfuaaga tatau,” e tatau ona puipuia e le Maliega a Europa. O lenei faaiʻuga na tatau ai ona aloaʻia ma amanaʻia e faigāmalo aiā tatau a tagata lautele i Armenia, ma isi atunuu e pei o Azerbaijan ma Turkey.

O GALUEGA TAU FAUGĀFALE

Na faailoa mai e le failauga na sosoo ai, o Guy Pierce o se sui o le Vaega Pule, le fia malamalama o i latou na auai, e faatatau i galuega tau faugāfale o le a faia i le Setete o Niu Ioka. Na ia faaalia mai le ata vitiō, ua faailoa mai ai fuafuaga ua faataatitia i Wallkill ma Patterson, faapea fanua ua faatauina i Warwick ma Tuxedo i Niu Ioka. I Wallkill, ua fausia ai se maota fou ua fuafua e faamāeʻaina i le 2014, lea o le a maua ai isi potu faaopoopo e 300.

Ua iai fuafuaga e faatoʻaina se fanua e 248 eka (100 ha) i Warwick. Na faapea mai le uso o Pierce: “E ui lava e matou te lē o mautinoa i le finagalo o Ieova e faatatau i le fanua i Warwick, ae ua faaauau pea ona faia galuega e faatoʻa lenei fanua, ma le faanaunauga ina ia siitia atu ai le ofisa ulu o Molimau a Ieova i inā.” Ua iai fuafuaga e faaaogā le fanua e 50 eka (20 ha) lea e ono maila (10 km) le mamao i le itu i mātū o Warwick, e faatū ai se fale mo masini ma mea faufale. Na faapea mai le uso o Pierce: “Pe a maua loa le faatagaga e faia ai lea galuega, ua iai le faamoemoe e tatau ona faamāeʻaina i totonu o le fā tausaga, ona faatau ese loa lea o fanua ma fale o loo i Brooklyn.”

Na fesili le uso o Pierce: “Pe ua suia le manatu o le Vaega Pule e faatatau i le lata mai o le puapuaga tele?” Na ia faapea mai: “E leai, ae a faasalavei e le puapuaga tele a tatou fuafuaga, o se mea e matuā manaia tele!”

IA MATAALA I LE LEONA TAANOA

Na sosoo ai ma Stephen Lett o se sui o le Vaega Pule, lea na talanoaina le 1 Peteru 5:8: “Ia faaauau ona outou mafaufau lelei ma ia mataala. O loo fealuaʻi lo outou fili, o le Tiapolo lea, e pei o se leona o loo tagi leotele, e saʻili se tasi e na te ʻaina.” Na taʻua e le uso o Lett vala eseese e faatatau i se leona, ua avea ai le talafaatusa a Peteru o se faataʻitaʻiga e fetaui lelei i le Tiapolo.

Ona e sili atu ona malolosi ma saoasaoa leona nai lo o tagata, e lē tatau la ona tatou taumafai e teena pe sosola ese mai iā Satani i so tatou lava malosi. E tatou te manaʻomia le fesoasoani a Ieova. (Isa. 40:31) E faafuaseʻi lava osofaʻiga a se leona, o lea, e tatau ona tatou ʻalofia le pogisa faaleagaga lea e saʻilia ai e Satani tagata e na te puʻea. E pei lava ona faaumatia e se leona se manu e pei o se zebra, e faapena le leai o se alofa o Satani ma fiafia e fasiotia i tatou i le itu  faaleagaga. Pe a māeʻa ona faamalie e le leona lona manaʻo, e faigatā ona iloa po o le ā le manu na osofaʻia e le leona, e faapena foʻi le tulaga o le tagata pe a osofaʻia, “e sili atu ona leaga lo latou iʻuga nai lo o le amataga.” (2 Pete. 2:20) O lea, e manaʻomia ona tatou tetee iā Satani ma piiama i mataupu silisili o le Tusi Paia.—1 Pete. 5:9.

IA TALISAPAIA LOU TULAGA I LE FALE O IEOVA

Na faapea mai le failauga na sosoo ai o Samuel Herd, o se sui o le Vaega Pule: “E iai uma o tatou tulaga i le fale o Ieova.” O Kerisiano uma e iai o latou tulaga i le “fale” o le Atua—lona malumalu faaleagaga—o le faatulagaga e tapuaʻi atu ai iā te Ia e faavae i le taulaga togiola a Iesu. O se tulaga e tatou te faatāua e pei o se faaeaga tautele. E pei o Tavita, e tatou te naunau e ʻnonofo i le fale o Ieova i aso uma o o tatou ola.’—Sala. 27:4.

Na faasino atu le uso o Herd i le Salamo 92:12-14 ma fesili: “E faapefea ona fesoasoani Ieova iā i tatou ina ia fua mai?” Na ia tali: “I le parataiso faaleagaga, ua mafai ona faamāfanafanaina, puipuia, ma tuuina ifo e le Atua vai o le upu moni iā i tatou.” Na ia toe uunaʻia le aofia: “Ia tatou faafetai atu iā te ia mo lenā mea. O lea, ia tatou maumauaʻi e nonofo i le fale o Ieova, e lē mo se taimi puupuu ae seʻia oo lava i le faavavau.”

E FAATĀUAINA E KERISIANO LE AFIOGA A LE ATUA

Na faamatala e le failauga na sosoo ai o David Splane, o se sui o le Vaega Pule, e faapea e masani ona faaaloalogia e Kerisiano moni le Afioga a le Atua. I le uluaʻi senituri, na latou faalagolago i le Tusi Paia ina ia foʻia ai le mataupu e faatatau i le peritomeina. (Galu. 15:16, 17) Peitaʻi i le senituri lona lua, na sili atu ona faatāuaina e nisi o i latou na faapea mai o Kerisiano, filosofia faa-Eleni nai lo o Tusitusiga Paia. Mulimuli ane, na suia ai e isi aʻoaʻoga a le Tusi Paia, i manatu a i latou e taʻua o Faatamā o Lotu ma emeperoa o Roma, ma amataina ai aʻoaʻoga sesē.

Na faamatalaina foʻi e le uso o Splane se tasi o talafaatusa na taʻua e Iesu, lea e faasino atu i le iai pea o Kerisiano moni faauuina i luga o le lalolagi, e puipuia le upu moni. (Mata. 13:24-30) E lē mafai ona tatou fai atu ma le mautinoa po o ai i latou. Peitaʻi a o faagasolo  senituri, e toʻatele na taʻusalaina talitonuga ma tū e lē faale-Tusi Paia. O nisi o i latou e pei o le akiepikopō o Agobard o Lyons i le senituri lona 9, o Peter o Bruys, Henry o Lausanne, ma Valdès (po o Ualete) i le senituri lona 12, Ioane Uikilifi i le senituri lona 14, Viliamu Tiniteli i le senituri lona 16, ma Henry Grew ma George Storrs i le senituri lona 19. O loo faaauau pea ona taofimau Molimau a Ieova i aso nei i tapulaa faale-Tusi Paia, ma talia le Tusi Paia e avea ma faavae o o tatou talitonuga. O le māfuaaga lenā ua filifilia ai e le Vaega Pule le Ioane 17:17, e avea ma mau o le tausaga 2012: “O lau afioga o le upu moni lea.”

FETUUNAʻIGA MATAʻINA MO TOLENIGA MA LE AUAUNAGA

O se faasilasilaga na faia e le uso o Anthony Morris o se sui o le Vaega Pule, na faataatitia mai ai fetuunaʻiga mo misionare ma paeonia faapito. Iā Setema o le 2012, o le a faia ai vasega o le Aʻoga Faale-Tusi Paia mo Ulugalii Kerisiano Faaipoipo, i atunuu ua filifilia. Ua suia le manulauti o le Aʻoga o Kiliata. Na amata mai iā Oketopa i le tausaga ua mavae, o i latou uma e toleniina i Kiliata e tatau ona iai i so o se vala o le auaunaga faapitoa faataimi atoa—e pei o misionare e leʻi auai i le Aʻoga o Kiliata, paeonia faapito, ovasia femalagaaʻi, po o i latou i Peteli. O le a faaaogāina i latou ua faauu mai e faamalosia ma faatumauina tagata o le Atua e ala i le galulue i ofisa o lālā, i le galuega femalagaaʻi, po o le auauna i nofoaga e toʻatele tagata e nonofo ai, lea e mafai ai ona latou faamalosia faapotopotoga e ala i le talaʻiga.

O le a faaopoopoina paeonia faapito e amata le galueaʻiina o oganuu maotua. Iā Ianuari 1 o le 2012, o nisi na faauu mai le Aʻoga Faale-Tusi Paia mo Uso Nofofua, ma le Aʻoga Faale-Tusi Paia mo Ulugalii Kerisiano Faaipoipo, o le a tofia e galulue lē tumau o ni paeonia faapito, ma faaaogā e amataina ma faalautele le galueaʻiina o oganuu maotua. O le a latou maua le faaeaga e auauna ai o ni paeonia faapito mai le tasi tausaga seʻia oo atu i le tolu tausaga. O i latou e maua ni iʻuga lelei, o le a latou mauaina tofiga tumau.

Na avea le fonotaga faaletausaga i le 2011 o se taimi e olioli ai. E tatou te faalagolago iā Ieova mo le faamanuiaina o faatulagaga fou ina ia faamalosia ai la tatou talaʻiga, ma faamalosia atili ai lo tatou autasi o se ʻauuso, e faia mea uma mo le viiga o Ieova.

[Pusa/​Ata i le itulau 18, 19]

O Se Avanoa E Faamasani Lelei Ai

Na aofia foʻi i le polokalame se faatalatalanoaga ma avā o loo soifua pea a nisi o tane ua maliliu, na avea ma sui o le Vaega Pule. Na faamatala e tuafāfine o Marina Sydlik, Edith Suiter, Melita Jaracz, Melba Barry, ma Sydney Barber le auala na latou aʻoaʻoina ai le upu moni, ma ulu atu ai i le auaunaga faataimi atoa. Na latou faamatala i le aofia mea mataʻina na tutupu iā i latou, faapea faamatalaga e faatatau i a latou tane, ma faamanuiaga na latou olioli faatasi ai. Na matuā pāʻia loto o le aofia i lenei faatalatalanoaga, a o latou usuina le pese numera 86, ua faamatuaina “Fafine Faatuatua, Tuafāfine Kerisiano.”

[Ata]

(Pito i luga) Daniel ma Marina Sydlik; Grant ma Edith Suiter; Theodore ma Melita Jaracz

(Pito i lalo) Lloyd ma Melba Barry; Carey ma Sydney Barber

[Faafanua i le itulau 16]

(Tagaʻi i le lomiga mo le ata atoa)

O lālā e ono ua tuufaatasia i lalo o le vaavaaiga a le lālā i Mekisikō

MEKISIKŌ

KUATEMALA

HONDURAS

EL SALVADOR

NICARAGUA

COSTA RICA

PANAMA

[Ata i le itulau 17]

O se ata o le galuega o le ofisa ulu o Molimau a Ieova, ua fuafua e faia i Warwick i Niu Ioka