Skip to content

Skip to table of contents

Faimalaga Faatasi ma Uso Asiasi

Faimalaga Faatasi ma Uso Asiasi

 Mea Iloga o lo Tatou Talafaasolopito

Faimalaga Faatasi ma Uso Asiasi

“E LĒ mafai ona ou talaʻi mai i lea fale i lea fale!” E toʻatele tagata suʻesuʻe fou o le Tusi Paia e iai lagona faapena e faatatau i le talaʻi atu i tagata ese. O le manatu foʻi lenā na iai i se failauga tomai ma o se faiaʻoga o le Tusi Paia.

E toʻatele tagata faitau o le Zion’s Watch Tower na tuua a latou lotu, ma mananaʻo e aufaatasi ma i latou na naunau foʻi i upu moni o le Tusi Paia. Na faalaeiauina le ʻaufaitau ina ia saʻili ē o loo iai lenā ituaiga o faatuatua, ma ia faapotopoto faatasi e lē aunoa mo suʻesuʻega faale-Tusi Paia. Pe tusa o le 1894, na auina atu ai e le Watch Tower Society sui asiasi, lea na mulimuli ane taʻua o pilgrims, (e taitutusa a latou galuega ma ovasia femalagaaʻi i aso nei) e feiloaʻi ma vaega na talosagaina se asiasiga. O nei tane agamalu e iai le tomai ma o ni ē e galulue mamafa. Na filifilia i latou ona o le popoto i le Tusi Paia, o ni failauga ma o ni aʻoaʻo lelei, ma e faatuatua i le taulaga togiola. O lenei ituaiga asiasiga e pisi tele mo le tasi i le lua aso. Na faatoʻā auai le toʻatele o Tagata Aʻoga o le Tusi Paia i le auaunaga i le fanua, i le tufaina atu o valaaulia mo se lauga lautele a se uso asiasi. I se tasi afiafi, na faia ai e Hugo Riemer o lē na avea mulimuli ane ma sui o le Vaega Pule se lauga. Ina ua māeʻa lenā lauga, ona ia taliina lea o fesili faale-Tusi Paia seʻia oo lava i le vaeluaga o le pō. E ui lava i lona vaivai ae na ia fiafia, ma faapea mai, e ese le “manaia” o le sauniga.

Na taʻua i le Watch Tower o le “fuafuaga autū” o asiasiga a nei uso o le atiaʻe lea o le “aiga o le faatuatua,” e ala lea i le faia o sauniga i maota o uso talitonu. Na maua e Tagata Aʻoga o le Tusi Paia na auai, le avanoa e taliina ai a latou fesili faale-Tusi Paia e uso asiasi, ina ua māeʻa le lauga. Ona oo loa lea i le taimi e faaalia ai le agaga talimālō faa-Kerisiano. A o laʻitiiti Maude Abbot, na ia auai ai i le lauga i le taeao, ina ua māeʻa ona faapotopoto uma loa lea i se laulau umī i tuāfale. “E anoanoaʻi meaʻai matagofie—o ham, moa falai, o ituaiga falaoa eseese, pai, ma keke! Na tausasami tagata i mea na latou gafa taulimaina, ma pe ā o le itula e lua, na toe faapotopoto ai mo se isi lauga lautele.” Ae na ia faapea mai, e oo ane i lenā taimi “ua amata ona tautulemomoe le toʻatele.” Na faapea mai Benjamin Barton o sē ua loa ona avea ma uso asiasi, ʻAna ou ʻai i mea lelei uma na ofoina mai, e faapenei ua leva ona lē toe avea aʻu ma uso asiasi.’ O se tusi mai le ofisa ulu i Brooklyn na fautuaina ai tuafāfine, e sili atu ona lelei pe a saunia “ni taumafataga māmā” mo uso asiasi ma ia “lava mālōlōga a nei uso.”

E lelei tele uso asiasi i le aʻoaʻo atu ma le faaaogāina o siata, faaaʻoaʻoga, po o so o se mea lava e mafai ona faaaogā e ola ai le faiga o se mataupu. O lauga a R. H. Barber “e masani ona lelei le auala e taulima ai,” ae o W. J. Thorn, e iloa i ona uiga faatamā, ma e talanoa “e pei o se augātamā o aso anamua.” I se tasi aso a o malaga atu Shield Toutjian i se taavale, na faafuaseʻi ona ia faapea atu e “taofi le taavale.” Na ia oso i fafo, ma tau ni fugālaau, ma faia loa se lesona e faatatau i foafoaga a Ieova.

Na iai luʻi i le galuega faigatā a uso asiasi, aemaise lava i latou ua teʻa le malaulau o le talavou. Peitaʻi o se tofotofoga tele mo nisi o i latou le faatāua lea o le galuega talaʻi mai lea fale i lea fale, ma ua faatalitalia i latou e taʻimua i le galuega talaʻi. Na taʻua i le Watch  Tower o Mati 15, 1924, “o se tasi o galuega autū” a Kerisiano moni “o le molimau atu lea e faatatau i le malo, ma o le fuafuaga lenā o le auina atu o uso asiasi.”

E iai nisi o uso asiasi e leʻi fiafia i lenei suiga, o lea na latou tuua ai le galuega femalagaaʻi, o isi na tuumuli ma faia a latou lava vaega faalelotu. Na faapea mai Robie D. Adkins, sa iai se uso asiasi na mātaulia o se failauga lelei, na faapea mai ma le faanoanoa: “E pau le mea e mafai ona ou faia o le lauga mai i le pulelaa. E lē mafai ona ou talaʻi atu mai i lea fale i lea fale.” Na toe faapea mai le uso o Adkins: “Na ou toe vaai i lea uso i le tauaofiaga i Columbus i Ohio i le 1924. O ia le tagata mata faanoanoa na ou vaai i ai i inā, o tūtū na o ia i lalo o se laau, ma o loo faanoanoa a o fiafia le faitau afe o uso. Ou te leʻi toe vaai lava iā te ia, ma e leʻi leva lava ae ia tuua le faalapotopotoga.” E ui i lea, “e toʻatele na ave a latou tusi i a latou taavale,” ma sa naunautaʻi e molimau atu mai i lea i lea fale.—Galu. 20:20, 21.

O le toʻatele foʻi o uso asiasi na popole i le talaʻi atu mai i lea fale i lea fale, e tai pei foʻi o uso na tatau ona latou toleniina, peitaʻi na tuu uma o latou loto i le galuega talaʻi. E tusa ai ma le talaʻi atu mai i lea fale i lea fale, na tusi mai ai se tasi o uso asiasi e suafa iā Maxwell G. Friend e tautala i le gagana Siamani e faapea, “O lenei vala o le galuega a uso asiasi, e faaopoopoina ai faamanuiaga i le asiasiga.” Na lipotia e le uso asiasi o John A. Bohnet e faapea, e toetoe o uso uma na faatāuaina le talaʻia o le Malo. E tusa ma lana faamatalaga, o le toʻatele na “matuā faatumulia i le maelega, ma na matuā naunau e faia se sao i le galuega talaʻi.”

A o faagasolo tausaga, na avea uso faamaoni femalagaaʻi ma taaʻiga lelei mo uso ma tuafāfine. Na faapea mai Norman Larson o sē ua leva ona avea ma Molimau a Ieova, “Na ou mātauina mai lava i loʻu laʻitiiti le lē fesiligia o le aogā ma le tāua o le galuega a uso asiasi, ma na tele so latou sao i le taʻitaʻia o aʻu i le ala saʻo.” E oo mai lava i aso nei, o loo faaauau pea e nei ovasia femalagaaʻi, o ni ē e faamaoni ma faia faataulaga totino, ona fesoasoani atu i o latou uso talitonu e faapea atu, “E mafai ona matou talaʻi atu mai i lea fale i lea fale!”

[Faamatalaga faaopoopo i le itulau 32]

O se aso e fiafia ai ina ua asiasi mai le uso asiasi!

[Ata i le itulau 31]

Pe ā ma le 170 asiasiga na faia e Benjamin Barton i le 1905

[Ata i le itulau 32]

O Walter J. Thorn o se uso asiasi, sa masani ona valaau iā “Papa” ona o ona uiga faatamā

[Ata i le itulau 32]

Pe tusa o le 1902, na auina atu ai J. A. Browne o se uso asiasi i Jamaica, ina ia faamalosia ma faalaeiauina ni vaega toʻaitiiti se 14

[Ata i le itulau 32]

Na atiaʻe e le galuega a uso asiasi le faatuatua, faamalosia le autasi o Kerisiano, ma tosina mai uso i le faalapotopotoga