Skip to content

Skip to table of contents

‘Ua Loto le Atalii e Faaali Mai le Tamā’

‘Ua Loto le Atalii e Faaali Mai le Tamā’

 ʻUa Loto le Atalii e Faaali Mai le Tamā’

“E leai se tasi ua iloa le Tamā e na o le Atalii, ma sē ua loto le Atalii e faaali i ai.”—LUKA 10:22.

O LE Ā SAU TALI?

Aiseā sa sili ai ona agavaa Iesu e faaali mai lona Tamā?

Na faapefea ona faaali atu e Iesu lona Tamā i isi?

O ā auala e mafai ona e faataʻitaʻi ai iā Iesu i le faaalia atu o le Tamā i isi?

1, 2. O le ā le fesili ua iso ai le toʻatele o tagata, ma aiseā?

ʻO AI le Atua?’ Ua iso le toʻatele o tagata i le tali o lenā fesili. O se faataʻitaʻiga, e ui lava ina talitonu le toʻatele o ē e taʻua i latou lava o Kerisiano, o le Atua o se Tolutasi, ae i le taimi e tasi, o nisi o i latou e taʻutino mai e faigatā ona malamalama i lenei aʻoaʻoga. Na tusi mai se tusitala ma o se taʻitaʻi lotu foʻi, e lē mafai ona faamatalaina le aʻoaʻoga o le Tolutasi, ona e iai lava mea e lē oo i ai le malamalama o le tagata. E talitonu isi tagata i le faaevolusione. E latou te faapea mai e leai se Atua, ma o mea matagofie uma lava o le foafoaga ia tatou te vaaia, na teʻi lava ua iai. Nai lo o le faapea mai o Charles Darwin, o sē na faasalalauina le aʻoaʻoga o le evolusione, e leai se Atua, ae na ia faapea mai, e lē o iai i le tagata le tomai e malamalama atoatoa ai e faatatau i le Atua.

2 Po o ā lava talitonuga o le toʻatele o tagata, ae e latou te mafaufau loloto pea i fesili e uiga i le Atua. Peitaʻi, e lē o toe fia saʻili le toʻatele i le Atua, pe afai e latou te lē maua se tali e faamalieina ai. O le mea moni, “ua faatauasoina [e Satani] manatu o i latou o ē e lē talitonu.” (2 Kori. 4:4) E lētioa la fenuminumiaʻi ma lē iloa e le toʻatele o tagata le mea moni e uiga i le Tamā, o Lē na foafoaina le lagi ma le lalolagi!—Isa. 45:18.

3. (a) O ai e faaalia mai le Tamā iā i tatou? (e) O ā fesili o le a tatou iloiloina?

3 Peitaʻi, e tāua tele mo tagata ona aʻoaʻoina le upu moni e faatatau i le Atua. Aiseā? Ona e na o ē lava e valaau “i le suafa o Ieova” e faasaoina. (Roma 10:13) O le valaau i le suafa o le Atua, e aofia ai le iloa lelei o Ieova ma ona uiga. Na faailoa atu e Iesu lenei upu moni tāua i ona soo. Sa ia faaali atu iā i latou le Tamā. (Faitau le Luka 10:22.) Aiseā sa na o Iesu na mafai ona faaalia atu le Tamā i isi? Na faapefea ona ia faia lenā mea?  O le ā foʻi le auala e mafai ai ona tatou faataʻitaʻi iā Iesu i le faaali atu o le Tamā i isi? Seʻi o tatou iloiloina fesili nei.

E NA O IESU LAVA E AGAVAA

4, 5. Aiseā sa sili ai ona agavaa Iesu e faaali mai lona Tamā?

4 Sa sili atu ona agavaa Iesu e faaali mai lona Tamā. Aiseā? A o leʻi faia isi foafoaga agaga, ua leva lava ona soifua Iesu o se foafoaga agaga i le lagi, “o le Atalii e toʻatasi o le Atua.” (Ioa. 1:14; 3:18) E na o Iesu lava sa iai a o leʻi faia isi foafoaga, ma sa mafai ona uaʻi atoatoa atu iā te ia lona Tamā. Na faasolosolo ina aʻoaʻoina e Iesu mea e faatatau i lona Tamā ma ona uiga, i le faitau afe o tausaga na la galulue faatasi ai. A o faasolosolo ina māfana le la mafutaga, na atili faamalosia ai lo la alofa mo le isi. (Ioa. 5:20; 14:31) Seʻi tomānatu i le tele o mea na mafai ona aʻoaʻoina e Iesu e faatatau i uiga o lona Tamā!—Faitau le Kolose 1:15-17.

5 Na tofia e le Tamā le Alo ina ia avea ma Ana fofoga fetalai, o “Le Upu a le Atua.” (Faaa. 19:13) O lea la, e na o Iesu lava sa tofia faapitoa e faaali atu le Tamā i isi. O le māfuaaga lea na tusi ai Ioane, o Iesu o “le Upu,” o loo “i le fatafata o le Tamā.” (Ioa. 1:1, 18) O lenā faaupuga, sa faasino atu e Ioane i se aganuu na masani ai, pe a oo i taimi o taumafataga. E nofo latalata le isi tagata i le isi tagata, ina ia faigofie ai ona la talanoa. I se tulaga faapena, sa iai le Atalii “i le fatafata” o le Tamā, ma sa mafai ona faia ni a la talanoaga uigā.

6, 7. Na faapefea ona atili faamalosia le mafutaga a le Tamā ma le Atalii?

6 ʻNa avea le Atalii ma lē na matuā fiafia i ai le Atua i lea aso ma lea aso.’ (Faitau le Faataoto 8:22, 23, 30, 31.) E talafeagai la le faapea atu, na atili faamalosia le mafutaga a le Tamā ma le Atalii, a o la galulue faatasi, ma faataʻitaʻia foʻi e le Atalii uiga o lona Tamā. I le taimi na faia ai isi foafoaga atamamai e pei o agelu ma tagata, na vaaitino lava le Atalii i le auala na feagai ai Ieova ma i latou taʻitoʻatasi. Ona o lenā tulaga, na atili ai ona alofa ma faaaloalo le Atalii i le Tamā.

7 O le finauga lea na lāgā e Satani e faatatau i le tonu o le pule silisili ese a Ieova, na mafai ai e le Atalii ona aʻoaʻoina le auala e faaalia ai e Ieova le alofa, faamasinotonu, atamai, ma le mana pe a tulaʻi mai se tulaga faigatā. O lenā tulaga, na mafai ai ona sauniunia Iesu e onosaia tulaga faigatā, lea na mulimuli ane ia fesagaʻia i lana faiva i le lalolagi.—Ioa. 5:19.

8. E faapefea i faamatalaga mataʻina e faatatau iā Iesu, ona fesoasoani iā i tatou e aʻoaʻoina ai uiga o le Tamā?

8 Ona o le vavalalata o le la faiā, sa mafai ai e le Atalii ona faaali mai le tele o mea e faatatau i le Tamā, nai lo o se isi lava. O le ā se isi auala e sili atu e tatou te aʻoaʻoina ai le Tamā, nai lo o le manatunatu i mea na aʻoaʻoina ma faia e lona Atalii e toʻatasi? O se faataʻitaʻiga, faamata e mafai ona tatou malamalama atoatoa i le uiga o le upu “alofa,” pe afai e na ona faitau i ai i se lomifefiloi? E mautinoa e faigatā. Peitaʻi, o lo tatou manatunatu i faamatalaga a le Tusi Paia e faatatau i le faiva a Iesu, ma le auala na ia faaalia ai le alofa i isi, o i inā e mafai ai ona faateleina lo tatou malamalama e faatatau i le faaupuga, “o le Atua o le alofa lava ia.” (1 Ioa. 4:8, 16) E ese mai i le alofa, e iai foʻi isi uiga o le Atua sa faaalia e Iesu i ona soo a o iai i le lalolagi.

LE AUALA NA FAAALI MAI AI E IESU LONA TAMĀ

9. (a) O ā auala e lua sa faaali atu ai e Iesu lona Tamā i ona soo? (e) Ia aumai se faaaʻoaʻoga na faaaogā e Iesu e faaali atu ai lona Tamā.

9 Na faapefea ona faaali atu e Iesu le  Tamā i ona soo, ma ē na mulimuli ane avea ma ona soo? E lua auala sa ia faia ai faapea: e ala i ana aʻoaʻoga, ma le auala na ia amioaʻi ai. Seʻi o tatou iloiloina muamua aʻoaʻoga a Iesu. O mea sa aʻoaʻoina e Iesu i ona soo, na faaalia ai le loloto o lona malamalama e uiga i manatu, faalogona, ma ala o lona Tamā. O se faaaʻoaʻoga, na faatusa e Iesu lona Tamā i se leoleo mamoe alofa, o lē na alu e saʻili se tasi o mamoe na sē mai i le lafu. Na taʻua e Iesu, ina ua toe maua e le leoleo mamoe le mamoe lea na sē, “e sili atu lona olioli ona o lea mamoe, nai lo o le isi iva sefulu iva e leʻi sē.” O le ā le faatatauga o lenā talafaatusa? Na faapea mai Iesu: “E faapena foʻi loʻu Tamā o i le lagi, e lē finagalo e faaumatia se tasi o i latou nei e faatauvaa.” (Mata. 18:12-14) O le ā se mea e mafai ona e aʻoaʻoina e faatatau iā Ieova mai i lenā talafaatusa? E tusa lava pe e iai taimi e te lagona ai ua faagaloina oe ma ua leai sou aogā, ia manatua, e manatu mamafa ma alofa mai pea lou Tamā i le lagi iā te oe. I lana silafaga, o oe o se tasi “o i latou nei e faatauvaa.”

10. Na faapefea ona faaali mai e Iesu lona Tamā e ala i le auala na ia amioaʻi ai?

10 O le auala lona lua sa faaaogā e Iesu e faaali atu ai lona Tamā i ona soo, o le auala na ia amioaʻi ai. O lea, ina ua fai atu le aposetolo o Filipo iā Iesu: “Ia e faailoa mai iā i matou le Tamā,” na tali atu Iesu: “O lē ua vaai mai iā te aʻu, ua vaai foʻi o ia i le Tamā.” (Ioa. 14:8, 9) Seʻi mātau nisi o faaaʻoaʻoga, i le auala sa faaalia ai e Iesu uiga o lona Tamā. Ina ua augani atu se tamāloa lepela iā Iesu ina ia faamālōlōina o ia, na paʻi atu Iesu i le tamāloa o lē sa “lilofia lona tino i le lepela,” ma faapea atu iā te ia: “Ou te loto i ai. Ia mamā ia oe.” Sa iloa lelei e le tamāloa lepela o le mana o Ieova lea sa tuuina atu iā Iesu, na mafai ai ona faamālōlōina o ia. (Luka 5:12, 13) I le taimi foʻi na maliu ai Lasalo, atonu na lagona e le ʻausoo le tigā alofa o le Tamā, ina ua ʻōi ma ootia le finagalo o Iesu,’ ma “tagi.” E ui lava sa silafia e Iesu o le a ia toe faatūina Lasalo, ae na ia lagona foʻi le tigā lea sa oo i le aiga ma uō a Lasalo. (Ioa. 11:32-35, 40-43) Atonu e iai ni tala o le Tusi Paia e faatatau iā Iesu e te fiafia i ai, lea e fesoasoani iā te oe e iloa ai le alofa mutimutivale sa faaalia e le Tamā.

11. (a) O le ā sa faaali mai e Iesu e faatatau i lona Tamā, ina ua ia faamamāina le malumalu? (e) E faapefea ona faamāfanafanaina ai i tatou ona o le mea na tupu?

11 Peitaʻi, o le ā le mea e te aʻoaʻoina mai i le faamamāina e Iesu o le malumalu? Seʻi mafaufau i le vaaiga lenei: Na faia e Iesu se sasa i maea, ma tutuliese tagata ma a latou mamoe ma povi mai i le malumalu. Na ia sasaa foʻi tupe a tagata suitupe ma fuli a latou laulau. (Ioa. 2:13-17) O na gaoioiga maumauaʻi, sa toe manatua ai e le ʻausoo upu faavaloaga a le tupu o Tavita: “Ua ʻaina lava aʻu i le maelega i lou fale.” (Sala. 69:9) O gaoioiga maumauaʻi sa faia e Iesu, na faaalia ai lona naunau moni ina ia  puipuia le tapuaʻiga moni. Pe e mafai ona e mātauina uiga o le Tamā i le mea na tupu? Ua faamanatu mai ai iā i tatou, e lē gata e iai i le Atua le mana e aveesea ai amioga leaga mai i lenei lalolagi, ae e naunau moni foʻi o ia e faia faapea. Seʻi manatu i faalogona o Ieova, a o ia silasila mai i amioga leaga i le lalolagi atoa! O faalogona o Ieova ma Iesu e faatatau i nei mea, e mafai ona faamāfanafanaina ai i tatou, pe a fesagaʻia faiga lē tonu.

12, 13. O le ā e mafai ona e aʻoaʻoina e faatatau iā Ieova, mai i le auala na feagai ai Iesu ma ona soo?

12 Seʻi o tatou iloiloina se isi faaaʻoaʻoga—o le auala na feagai ai Iesu ma ona soo. Sa faaauau ona latou fefinauaʻi po o ai e sili. (Mare. 9:33-35; 10:43; Luka 9:46) Na silafia lelei e Iesu le manatu o Ieova e faatatau i le faamaualuga, ona sa tele le taimi na la mafuta faatasi ai. (2 Samu. 22:28; Sala. 138:6) Sa vaaia foʻi e Iesu uiga faamaualuga o Satani le Tiapolo, o lē e fiamatamuamua ma manatu faapito i lona lava lelei. E mautinoa lava le faanoanoa o Iesu i le vaai atu o faaalia e ona soo nei uiga, e ui sa ia aʻoaʻoina i latou. Sa latou manatu i lo latou lava lelei! Na ia vaaia foʻi lenei uiga i ē na ia tofia o ni aposetolo! Na faaalia e nei aposetolo lea uiga, seʻia oo lava i le aso mulimuli o le soifuaga o Iesu i le lalolagi. (Luka 22:24-27) Peitaʻi, na fautua atu pea ma le agalelei Iesu iā i latou, ma le mautinoa e iai lava le taimi e latou te aʻoaʻoina e faataʻitaʻi ai i le uiga lotomaulalo lea foʻi sa ia faaalia.—Fili. 2:5-8.

13 Pe e te lē o vaaia aafiaga lelei o uiga o le Tamā, i le auala na faaalia ai e Iesu le onosaʻi ma faasaʻo uiga lē lelei sa iai i ona soo? Pe e te aʻoaʻoina mea e faatatau i le Tamā, mai i aʻoaʻoga ma gaoioiga a Iesu? E lē tuulafoaʻia e le Tamā ona tagata, e ui lava e latou te fai mea sesē. Ona o lo tatou iloaina o uiga o le Atua, pe e lē uunaʻia ai la i tatou e faalatalata atu iā te Ia, ma faailoa atu lo tatou salamō pe a faia ni mea sesē?

NA LOTO LE ATALII E FAAALI MAI LONA TAMĀ

14. Na faapefea ona faaalia e Iesu, sa ia manaʻo e faaali atu i isi tagata faamatalaga e faatatau i lona Tamā?

14 E taumafai le toʻatele o taʻitaʻi o malo e pulea tagata, e ala i le lē faailoa atu iā i latou o faamatalaga e manaʻomia ona latou iloa. E ese mai ai Iesu, o lē sa loto e faailoa atu i isi tagata faamatalaga auʻiliʻili e faatatau i le Tamā. (Faitau le Mataio 11:27.) E lē gata i lea, sa foaʻi atu e Iesu i ona soo “le mafaufau ina ia [latou] iloa ai o lē e moni,” o Ieova le Atua. (1 Ioa. 5:20) O le ā le uiga o lenā manatu? Na fesoasoani Iesu i ona soo, ina ia malamalama i mea sa ia aʻoaʻoina e faatatau i le Tamā. E na te leʻi natia le mea moni e faatatau i lona Tamā i se aʻoaʻoga e pei o le Tolutasi, lea e lē mafai ona malamalama i ai se tagata.

15. Aiseā e leʻi taʻuina atu ai e Iesu i ona soo mea uma e na te iloa e faatatau i lona Tamā?

15 Pe na faaali atu e Iesu mea uma sa ia iloa e faatatau i lona Tamā? E leai, sa ia faaalia le atamai i lona lē taʻuina atu o mea uma i ona soo. (Faitau le Ioane 16:12.) Aiseā? Ona e leʻi mafai e ona soo ona “malamalama” i le tele o faamatalaga, i lenā taimi. Peitaʻi, na fetalai Iesu, e tele atu faamatalaga o le a faailoa atu iā i latou, pe a oo mai “le fesoasoani.” O lenei fesoasoani, o le agaga paia lea o le a taʻitaʻia i latou “i upu moni uma.” (Ioa. 16:7, 13) E pei ona faatalitali mātua atamamai seʻia oo le fanau i le matutua e malamalama ai i mea, ona faatoʻā taʻu lea i ai o nisi o faamatalaga, sa faapena foʻi Iesu, na ia faatalitali seʻia matutua faaleagaga ona soo, ina ia mafai ona malamalama ai i nisi o mea moni e faatatau i le Tamā. Sa agalelei Iesu, ma na ia manatua e iai le mea e gata ai le malamalama o ona soo.

 FAATAʻITAʻI IĀ IESU E ALA I LE FESOASOANI I ISI INA IA ILOA IEOVA

16, 17. Aiseā e mafai ai ona e faaali atu le Tamā i isi?

16 Pe a e masani lelei i se tagata ma talisapaia ona uiga alofa, pe e lē uunaʻia ai oe e taʻu atu i isi e faatatau iā te ia? A o iai Iesu i le lalolagi, sa ia talanoa e faatatau i lona Tamā. (Ioane 17:25, 26) Pe e mafai ona tatou faataʻitaʻi iā Iesu i le faailoa atu lea o Ieova i isi?

17 E pei ona tatou iloiloina, e sili atu ona malamalama Iesu e faatatau i lona Tamā, i lo o se isi lava tagata. Peitaʻi, sa lotomalie o ia e faailoa mai nisi o mea na ia iloa, e oo lava i le foaʻi o le tomai talafeagai i ona soo, ina ia malamalama ai i vala loloto o uiga o le Atua. Ua fesoasoani mai Iesu, ina ia tatou iloa lo tatou Tamā i se auala e lē o mafai ona malamalama ai le toʻatele o tagata i aso nei. E tatou te matuā lotofaafetai ona o le lotomalie o Iesu e faaali mai lona Tamā iā i tatou, e ala i ana aʻoaʻoga ma le auala na ia amioaʻi ai! O se matuā faaeaga lava le iloaina o Ieova. (Iere. 9:24; 1 Kori. 1:31) A o tatou taumafai e faalatalata atu iā Ieova, ua faalatalata mai foʻi o ia iā i tatou. (Iako. 4:8) O lea la, ua mafai ona tatou aʻoaʻoina isi, i mea ua tatou iloa e faatatau iā Ieova. E faapefea ona tatou faia lenā mea?

18, 19. O ā auala e mafai ona e faaali atu ai le Tamā i isi? Ia faamatala.

18 Pe a tatou faataʻitaʻi iā Iesu i a tatou faamatalaga ma amioga, o lenā ua tatou faaalia atu le Tamā i isi. Ia manatua, o le toʻatele e tatou te feiloaʻi i ai i le talaʻiga e lē iloa po o ai le Atua. Atonu ua faasesēina o latou manatu e uiga i le Atua, ona o aʻoaʻoga sesē. E mafai ona tatou faaaogāina le Tusi Paia e aʻoaʻoina ai i latou i le suafa o le Atua, o lana fuafuaga mo le fanau a tagata, faapea ona uiga. E lē gata i lea, e mafai e nisi o tala o le Tusi Paia ona tatou maua ai se isi malamalamaga e faatatau i uiga o le Atua, e tatou te leʻi iloa muamua. E mafai ona tatou talatalanoa ma isi i le faapotopotoga e faatatau i mea na tatou aʻoaʻoina, ma e faalaeiauina ai foʻi i latou.

19 E tatau ona tatou faataʻitaʻi iā Iesu, ma faaali atu le Tamā e ala i le auala e tatou te amioaʻi ai. Pe a mātau mai e tagata o loo atagia atu i a tatou amioga le alofa o Keriso, atonu o le a latou mananaʻo foʻi e iai sa latou faiā ma Iesu ma lona Tamā. (Efe. 5:1, 2) Na faalaeiauina i tatou e Paulo ina ʻia faaaʻoaʻo iā te ia, e pei ona ia faaaʻoaʻo iā Keriso.’ (1 Kori. 11:1) Maʻeu se faaeaga matagofie ua tatou maua o le fesoasoani atu lea i tagata e iloa uiga o Ieova, e ala i le auala e tatou te amioaʻi ai! Ioe, tau ina ia faaauau pea ona tatou faataʻitaʻi iā Iesu, e ala i le faaali atu o le Tamā i isi.

[Fesili mo le Suʻesuʻega]