Skip to content

Skip to table of contents

Ia Faatumauina Lou Lotoatoa iā Ieova

Ia Faatumauina Lou Lotoatoa iā Ieova

 Ia Faatumauina Lou Lotoatoa iā Ieova

ʻLoʻu atalii e, ia e iloa le Atua o lou tamā ma ia auauna atu iā te ia ma le lotoatoa.’—1 NO. 28:9.

IA SAʻILI TALI O FESILI NEI:

O le ā le fatu faafaatusa?

O le ā le auala e mafai ona tatou faaaogāina e iloilo ai o tatou loto?

E mafai faapefea ona tatou auauna iā Ieova ma le lotoatoa?

1, 2. (a) O le ā le vaega o le tino lea e masani ona faamatalaina i se auala faafaatusa e le Afioga a le Atua? (e) Aiseā e tāua ai ona tatou malamalama i le uiga o le fatu faafaatusa?

E MASANI lava ona faamatalaina i le Afioga a le Atua vaega o le tino i se auala faafaatusa. O se faaaʻoaʻoga, na taʻua e Iopu: “E lē o iai se faasauā i oʻu alofilima.” Na faapea mai le tupu o Solomona: “O se tala ua lelei e lololo ai ponaivi.” Sa faamautinoa atu e Ieova iā Esekielu: “Ua ou faia lou muāulu . . . ia sili ona malō nai lo o se maa malō.” Na tusi atu le aposetolo o Paulo iā Timoteo: “E liliuese foʻi o latou taliga mai i le upu moni.”—Iopu 16:17; Faata. 15:30; Eseki. 3:9; 2 Timo. 4:4.

2 E tasi lava le vaega o le tino e tele taimi e taʻua ai faafaatusa i le Tusi Paia. Na taʻua lenei vaega o le tino i le tatalo a le fafine faamaoni o Hana: “Ua olioli loʻu loto [i le uluaʻi gagana e uiga atu i le fatu] iā Ieova.” (1 Samu. 2:1) E toetoe afe taimi e taʻua ai le fatu e tusitala o le Tusi Paia, ae e tele ina faaaogā i se auala faafaatusa, e faasino atu i le loto. O lea la, e tāua tele ona tatou malamalama i le uiga tonu o loo faasino atu i ai le “loto,” ona o loo faapea mai le Tusi Paia, e manaʻomia ona tatou leoleoina.—Faitau le Faataoto 4:23.

O LE Ā LE FATU FAAFAATUSA?

3. E mafai faapefea ona tatou malamalama i le uiga o le fatu faafaatusa o loo i le Tusi Paia? Ia aumai se faataʻitaʻiga.

3 E ui lava e lē o aumaia i le Afioga a le Atua se faamatalaga maʻoti e faatatau i le fatu faafaatusa po o le loto, ae e mafai lava ona tatou malamalama i le uiga o lenā upu. E faapefea? O se faataʻitaʻiga, seʻi mafaufau i se ata matagofie o loo faia aʻe i maa ninii e felanulanuaʻi. Ina ia malamalama i le ata atoa, e lē lava lo tatou uaʻi atu i se maa e tasi, ae e ao ona tatou vaai i maa ninii uma  ua tuufaatasi. I se tulaga talitutusa, e manaʻomia ona tatou iloilo isi vaega o le Tusi Paia o loo faaaogā ai le upu “loto,” ina ia mafai ai ona malamalama i lona uiga. O le ā la le fatu faafaatusa?

4. (a) I le Tusi Paia, o le ā o loo faasino atu i ai le upu “loto”? (e) O le ā le uiga o le fetalaiga a Iesu o loo faamauina i le Mataio 22:37?

4 E faaaogāina e tusitala o le Tusi Paia le upu “loto,” ina ia faamatalaina ai lo tatou tagata lilo i totonu. E aofia ai vala e pei o o tatou faanaunauga, manatunatuga, uiga, vaaiga, tomai, uunaʻiga, ma sini. (Faitau le Teuteronome 15:7; Faataoto 16:9; Galuega 2:26.) Peitaʻi, e lē o taimi uma e faasino atu ai le upu “loto” i na vala uma. O se faaaʻoaʻoga, na fetalai Iesu: “Ia e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa.” (Mata. 22:37) I inei, o loo faasino atu le upu “loto” i faalogona ma faanaunauga moni o se tagata. Ina ua taʻu eseese mai e Iesu le loto, ola, ma le mafaufau, sa ia finagalo e faamamafa le manatu, e tatau ona faaalia lo tatou alofa i le Atua, e lē gata i o tatou faalogona, o le auala o loo tatou ola ai, ma le auala o loo faaaogā ai o tatou mafaufau. (Ioa. 17:3; Efe. 6:6) Peitaʻi, a taʻua loa na o le upu “loto,” o lona uiga o lo tatou tagata lilo i totonu.

LE MĀFUAAGA E MANAʻOMIA AI ONA LEOLEOINA O TATOU LOTO

5. Aiseā e tatou te mananaʻo ai e faia le mea sili e auauna ai iā Ieova ma le lotoatoa?

5 E tusa ai o le loto, sa faamanatu atu e le tupu o Tavita iā Solomona e faapea: ʻLoʻu atalii e, ia e iloa le Atua o lou tamā ma ia auauna atu iā te ia ma le lotoatoa ma le lotofiafia; auā e suʻesuʻe e Ieova loto uma lava, e silafia foʻi e ia o mafaufauga ma faanaunauga uma.’ (1 No. 28:9) Ioe, e suʻesuʻeina e Ieova loto uma, e aofia ai ma o tatou loto. (Faata. 17:3; 21:2) E faatoʻā mafai ona maua sa tatou faiā ma Ieova, aemaise se lumanaʻi fiafia, pe a finagalo malie o ia i mea o loo i o tatou loto. O lea la, ua iai māfuaaga lelei e tatou te usitaʻia ai le fautuaga a Tavita, e ala i le faia o le mea sili e auauna ai iā Ieova ma le lotoatoa.

6. O le ā e tatau ona tatou iloa e faatatau i la tatou filifiliga maumauaʻi e auauna iā Ieova?

6 I le avea ai o i tatou o ni Molimau a Ieova, ua faaalia i a tatou galuega maelega lo tatou faanaunauga loloto e auauna i le Atua ma le lotoatoa. Ae ua tatou iloa, o aafiaga malolosi mai i le lalolagi leaga a Satani ma o tatou faanaunauga agasala, e mafai ona faavaivaia ai la tatou filifiliga maumauaʻi e auauna iā Ieova ma le lotoatoa. (Iere. 17:9; Efe. 2:2) Ina ia faamautinoa e lē tupu lenā tulaga, e tatau ona iloiloina o tatou loto i taimi uma. E faapefea ona tatou faia lenā mea?

7. E faapefea ona iloa le tulaga moni o o tatou loto?

7 E lē mafai e se tagata ona iloa lo tatou tagata lilo i totonu, e pei lava ona lē mafai e se tasi ona iloa atu totonugalemu o se laau. Peitaʻi, i le Lauga a Iesu i le Mauga, na ia taʻua ai e pei lava ona faaalia i fua o le laau le tulaga o loo iai, e faapena foʻi ona faaalia le tulaga moni o o tatou loto i a tatou gaoioiga masani. (Mata. 7:17-20) Seʻi o tatou iloiloina se tasi o nei gaoioiga.

O SE AUALA LELEI E ILOILOINA AI O TATOU LOTO

8. E tusa ai ma le fetalaiga a Iesu i le Mataio 6:33, e faapefea ona tatou faaalia atu mea o loo i o tatou loto?

8 I le Lauga i le Mauga, na fetalai atu Iesu i lana ʻaufaalogologo i le mea e tatau ona latou faia, ina ia faaalia ai o latou faanaunauga e auauna iā Ieova ma le lotoatoa. Na faapea atu o ia: “O lea, ia faaauau pea ona outou saʻili muamua le malo ma le amiotonu a le Atua, ona faaopoopoina ai lea o nei mea uma iā te outou.” (Mata. 6:33) Ioe, o mea e tatou te faamuamua i o tatou olaga, ua faaalia  moni ai faanaunauga, manatunatuga, ma fuafuaga i o tatou loto. O lea la, o le iloiloina o mea o loo faamuamua i o tatou olaga, o se tasi lea o auala lelei e iloa ai po o tatou auauna atu i le Atua ma le lotoatoa.

9. O le ā na valaaulia e Iesu nisi o tamāloloa e fai, ma o le ā ua faaalia i le auala na latou tali atu ai?

9 Seʻi o tatou iloilo se mea na tupu, ina ua māeʻa ona fetalai atu Iesu i ona soo ina ia faaauau pea ona saʻili muamua le Malo. O lenei mea, ua faaalia ai e mafai ona iloa le tulaga o le loto o le tagata, i mea e na te faamuamua i lona olaga. Ua faapea mai Luka, na “naunau lava [Iesu] e maliu atu i Ierusalema,” e ui lava sa ia silafia le mea o le a tupu iā te ia i inā. A o agaʻi atu ma ona aposetolo i le auala i Ierusalema, na feiloaʻi ai Iesu ma nisi o tamāloloa na ia valaaulia ina ia avea ma ona soo. Na lotomalilie na tagata e talia le valaaulia a Iesu, ae sa iai isi mea na latou mananaʻo e fai muamua. Na faapea mai se tasi tamāloa: “Tuu mai aʻu seʻi oʻu alu muamua e tanu loʻu tamā.” Ae ua faapea mai le isi: “Le Alii e, ou te mulimuli atu iā te oe, ae tuu mai aʻu seʻi oʻu alu muamua e faatofā i loʻu aiga.” (Luka 9:51, 57-61) Ua mafai ona tatou iloa mai i inei le telē o le eseesega i le filifiliga maumauaʻi a Iesu e faia le finagalo o le Atua, ma le tali faalotolotolua a na tamāloloa i le valaaulia a Iesu. O le faamuamua o o latou lava manaʻoga nai lo o manaʻoga o le Malo, ua faaalia ai e latou te leʻi auauna ma le lotoatoa i le Atua.

10. (a) O le ā le auala ua tatou tali atu ai i le valaaulia a Iesu ina ia avea ma ona soo? (e) O le ā le faataʻitaʻiga na taʻua e Iesu?

10 E ese mai le auala e tatou te tali atu ai nai lo na tamāloloa sa fia avea ma soo. Ua tatou taliaina le valaaulia a Iesu ina ia avea ma ona soo, ma ua tatou auauna nei iā Ieova i aso uma. O lenei auala, ua faaalia ai o tatou faalogona mai i le loto e faatatau iā Ieova. Ae e ui lava ina tatou pisi i le auaunaga iā Ieova, e ao ona tatou manatua atonu o loo iai pea i se tulaga lamatia o tatou loto. O le ā lenā lamatiaga? E tatou te iloa le tali mai i le fetalaiga a Iesu i ē na ia valaaulia e avea ma ona soo. Na ia lapataʻia i latou e faapea: “O le tagata e tago i le suōtosina ma tepa i tua, e lē tatau o ia mo le malo o le Atua.” (Luka 9:62) O le ā se mea ua mafai ona tatou aʻoaʻoina mai i lenei faataʻitaʻiga?

PO O O TATOU “PIPII I LE LELEI”?

11. I le faataʻitaʻiga na taʻua e Iesu, o le ā le mea na tupu i le galuega a le tagata sa suaina le fanua, ma aiseā?

11 Ina ia mafai ona tatou malamalama lelei i le lesona mai i le faataʻitaʻiga na taʻua e Iesu, seʻi o tatou faaopoopo atili i ai nisi faamatalaga. O loo galue malosi se tagata faigaluega i le suaina o le fanua. A o galue, e mafaufau pea i lona aiga ma ana uō, faapenei o loo latou fiafia faatasi i meaʻai, musika, taliēega, ma maua se mālōlōga lelei. Ua matuā moomoo lava o ia i nei mea. Ua umi se taimi talu ona faia le galuega, ae ona o le malosi tele o lona faanaunauga mo mea faafiafia o le olaga, e uunaʻia ai pea lenei tagata faigaluega e tepa “i tua.” E ui lava o loo tele pea galuega e manaʻomia ona fai, ae o lea ua lē o toe uaʻi atu o ia i le suaina o le fanua, ma ua leaga ai le faatinoga o le galuega. E mautinoa le lē fiafia o le matai, ona o le lē uaʻi atu o lenei tagata i lana galuega.

12. E faapefea i se Kerisiano i aso nei ona tutusa lona tulaga, ma le tagata galue lea sa taʻua e Iesu i le faataʻitaʻiga?

12 Seʻi iloilo nei la se tulaga talitutusa e mafai foʻi ona tupu i aso nei. E mafai ona faaataina e le tagata faigaluega so o se Kerisiano lava, o lē e foliga mai o loo lelei lona tulaga faaleagaga, ae o le mea moni o loo iai i se tulaga lamatia. O se faataʻitaʻiga, seʻi o tatou mafaufau i se uso e auai lava pea i sauniga ma le faiva i le fanua. Ae i le taimi e tasi, e mafaufau pea o ia i nisi o mea e na te fiafia i ai o lenei lalolagi. E matuā moomoo  lava lona loto i na mea. E tele tausaga na auauna ai lenei uso i le Atua, ae ona o le malosi tele o lona faanaunauga mo nisi o mea o lenei lalolagi, na ia tepa ai “i tua.” E ui lava o loo tele pea galuega e manaʻomia ona faia i le auaunaga, ae e lē o toe uaʻi atu iai, ma ua lē o toe tutusa ma le auala sa ia faia ai muamua. (Fili. 2:16) E matuā faanoanoa lava Ieova “le Matai o le seleselega,” pe afai e lē tumau pea i le auaunaga se tasi o ana auauna.—Luka 10:2.

13. O ā mea e aofia ai i le auauna iā Ieova ma le lotoatoa?

13 E manino lava le lesona. E tele atu mea e aofia ai i le auauna iā Ieova ma le lotoatoa, nai lo o le tau ina auai pea i sauniga a le faapotopotoga ma le faiva i le fanua. (2 No. 25:1, 2, 27) Pe afai e faaauau pea ona naunau le loto o se Kerisiano i mea “i tua,” po o mea faafiafia o lenei olaga, o le a iai i se tulaga lamatia lana faiā ma Ieova. (Luka 17:32) O lea la, seʻi vaganā ua tatou matuā “ʻinoʻino i le leaga, ae pipii i le lelei,” ona faatoʻā ʻtatau lea o i tatou mo le malo o le Atua.’ (Roma 12:9; Luka 9:62) E tusa lava pe e foliga mai e aogā pe matagofie nisi o mea i le lalolagi a Satani, ae e tatau pea ona tatou faamautinoa e leai se mea e taofia i tatou mai i le auauna atu i le Atua ma le lotoatoa.—2 Kori. 11:14; faitau le Filipi 3:13, 14.

IA TUMAU ONA MATAALA!

14, 15. (a) Ua faapefea ona taumafai Satani e faaleagaina le tulaga o o tatou loto? (e) Ia aumai se faataʻitaʻiga o le mataʻutia o le auala o loo faaaogāina e Satani.

14 O le alofa mo Ieova na uunaʻia ai i tatou ina ia faia se tuuina atu iā te ia. Talu mai lenā taimi, o le toʻatele o i tatou ua maumauaʻi e auauna iā Ieova ma le lotoatoa. Peitaʻi, e lē o faavaivai ai Satani ma ana taumafaiga, i le taulaʻi pea e faaleagaina o tatou loto. (Efe. 6:12) O le mea moni, e na te iloa lelei e lē faigofie ona tatou tuulafoaʻia Ieova. O lea la, e faaaogā e Satani faiga faatogafiti o “lenei faiga o mea a le lalolagi,” e faasolosolo ona faavaivaia ai lo tatou maelega i le Atua. (Faitau le Mareko 4:18, 19.) Aiseā e taulau ai lenei auala a Satani?

15 Ina ia taliina lenā fesili, seʻi manatu i le faataʻitaʻiga lenei. Seʻi faapea o loo e faaaogāina se molī e malosi lona mumū e faitau ai se tusi, ae ua faafuaseʻi ona pa le matāuila.  E faigofie lava ona e iloa le mea ua tupu ona ua pogisa atoa le potu, ona e taumafai lea e toe sui se isi matāuila fou, ma toe malamalama atoa ai loa le potu. O le afiafi e sosoo ai, ua e toe faaaogāina le molī lava lea e tasi e faitau ai lau tusi. Peitaʻi, e te leʻi iloa e iai se tasi na suia le matāuila fou lea i se matāuila e itiiti ifo lona malosi. Atonu e te lē iloa le eseesega. I le aso e sosoo ai, na toe sui foʻi e se tagata le matāuila lea i se isi matāuila e vaivai ifo lona malosi, atonu e te lē iloa lava le eseesega. Aiseā? Ona ua faasolosolo lava ina faaitiitia le malosi o le mumū o le molī, ae e te lē o iloaina. I se uiga talitutusa, atonu e faasolosolo lava ina faavaivaia lo tatou maelega mo le auaunaga iā Ieova, ona o aafiaga mai i le lalolagi a Satani. Pe a tupu lenā mea, e peiseaʻī ua taulau manuia Satani i le faaitiitia o lo tatou maelega i le auaunaga iā Ieova. Pe a tatou lē mataala, o le a faigatā ona tatou iloa ua tatou oo i se tulaga faalētonu.—Mata. 24:42; 1 Pete. 5:8.

E TATAU ONA TATOU TATALO

16. E faapefea ona puipuia i tatou mai i togafiti a Satani?

16 E faapefea ona puipuia i tatou mai i togafiti a Satani, ma faaauau ona auauna iā Ieova ma le lotoatoa? (2 Kori. 2:11) E tatau ona tatou tatalo. Na faalaeiauina e Paulo ona uso talitonu ina ia “tutū mausalī e tetee atu i togafiti a le Tiapolo.” Ona ia uunaʻia lea o i latou: ʻIa faaauau ona tatalo i taimi uma, ma tatalo eseese uma ma faatoga eseese uma.’—Efe. 6:11, 18; 1 Pete. 4:7.

17. O le ā se lesona ua tatou aʻoaʻoina mai i le auala na faia ai tatalo a Iesu?

17 Ina ia tetee atu iā Satani, e atamai ona iā i tatou le vaaiga sa iā Iesu e faatatau i le tatalo, na atagia mai ai ona faalogona loloto e faatumauina lona lotoatoa mo Ieova. Seʻi mātau le faamatalaga na taʻua e Luka e faatatau i le auala na tatalo ai Iesu, i le pō a o lumanaʻi lona maliu: “Ua puapuagatia o ia, ma ua atili ai ona tatalo faatauanau.” (Luka 22:44) Sa tatalo faatauanau Iesu i le tele o taimi, peitaʻi o lea ua ia fesagaʻia tofotofoga sili ona faigatā o lona olaga i le lalolagi. Ona o lenei māfuaaga, “ua atili ai ona tatalo faatauanau” Iesu ma sa taliaina lana tatalo. O tatalo a Iesu ua faaalia ai, e sili atu ona faatauanau nisi o tatalo, nai lo o isi tatalo. O lea, o le faateteleina o le faigatā o tofotofoga ma togafiti a Satani, o le atili manaʻomia foʻi lea ona tatou tatalo faatauanau iā Ieova mo lana puipuiga.

18. (a) O le ā e tatau ona tatou fesili ifo ai iā i tatou lava e faatatau i tatalo, ma aiseā? (e) O ā vala e mafai ona aafia ai o tatou loto, ma i ā auala? (Tagaʻi i le pusa o loo i le itulau e 16.)

18 O ā iʻuga e maua mai ona o a tatou tatalo faatauanau? Na faapea mai Paulo: “Ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai; ona leoleoina ai lea o o outou loto . . . i le filemu mai i le Atua.” (Fili. 4:6, 7) Pe afai e tatou te mananaʻo e auauna iā Ieova ma le lotoatoa, e tatau ona tatou faia tatalo faatauanau ma ia faia e lē aunoa. (Luka 6:12) O lea, ia fesili ifo iā te oe: ʻPo o atili ona faatauanau aʻu tatalo? O le ā le tele e masani ona ou tatalo ai?’ (Mata. 7:7; Roma 12:12) O lau tali i na fesili, e faaalia ai le malosi o lou faanaunauga e auauna i le Atua.

19. O le ā e tatau ona e faia ina ia auauna ai pea iā Ieova ma le lotoatoa?

19 E pei ona tatou iloiloina, e tele mea e mafai ona tatou iloa e faatatau i o tatou loto, mai i mea e tatou te faamuamua i o tatou olaga. E tatou te mananaʻo e faamautinoa ia aua neʻi avea mea na tatou tuua, po o taaʻiga o loo faaaogāina e Satani, e faavaivaia ai la tatou filifiliga maumauaʻi e auauna iā Ieova ma le lotoatoa. (Faitau le Luka 21:19, 34-36.) O lea la, i le pei o Tavita, seʻi o tatou faatoga atu pea iā Ieova: “Ia e faia ina ia tasi loʻu loto.”—Sala. 86:11.

[Fesili mo le Suʻesuʻega]

[Pusa i le itulau 16]

VALA E TOLU E MAFAI ONA AAFIA AI O TATOU FATU

E pei ona faia a tatou taumafaiga mo le lelei o o tatou fatu faaletino, e faapena foʻi le tāua o taumafaiga e faamautinoa ai le lelei o o tatou fatu faafaatusa. Seʻi o tatou tilofaʻia ni vala se tolu:

1 Meaʻai Paleni: E manaʻomia e o tatou fatu le tele o meaʻai paleni. I se tulaga talitutusa, e tatou te manaʻomia ona faamautinoa o loo lava meaʻai faaleagaga e ala i le faia pea o suʻesuʻega totino, manatunatu loloto, ma auai i sauniga e lē aunoa.—Sala. 1:1, 2; Faata. 15:28; Epe. 10:24, 25.

2 Faamalositino: Ina ia maua le soifua mālōlōina, e manaʻomia ona faagaoioi o tatou tino i nisi o taimi. I se tulaga tutusa, o le maelega i le faiva—e ono faateleina ai a tatou galuega fai i le auaunaga—e faatumauina ai o tatou loto i se tulaga lelei.—Luka 13:24; Fili. 3:12.

3 Siʻomaga: Ua tatou soifua ma galulue i se lalolagi sili ona leaga, lea e mafai ona oo ai o tatou fatu ma le fatu faafaatusa i se tulaga pagātia. Ae ui i lea, e mafai ona faaitiitia na tulaga pagātia, pe a tatou auaufaatasi ma uso talitonu, o ē o loo manatu mamafa moni mo i tatou, ma o loo latou auauna foʻi ma le lotoatoa i le Atua.—Sala. 119:63; Faata. 13:20.