Skip to content

Skip to table of contents

O Ositaulaga ua Avea ma Tupu, e Manuia ai Tagata Uma

O Ositaulaga ua Avea ma Tupu, e Manuia ai Tagata Uma

 O Ositaulaga ua Avea ma Tupu, e Manuia ai Tagata Uma

“O outou o ʻse vaega ua filifilia, o ositaulaga ua avea ma tupu, o le nuu paia, o tagata ua faapitoa mo le Atua.’”—1 PETE. 2:9.

PE E MAFAI ONA E FAAMATALA?

O anafea na muaʻi faia ai e Ieova le folafolaga e faatatau i ositaulaga ua avea ma tupu?

Ua faapefea i sui o le feagaiga fou ona faia aʻe ai ositaulaga ua avea ma tupu?

O ā aogā o le a aumaia e ositaulaga ua avea ma tupu i tagata?

1. Aiseā ua taʻua ai le “talisuaga afiafi a le Alii” o le Faamanatuga, ma o le ā lona fuafuaga?

I LE afiafi o Nisani 14 i le tausaga 33 T.A., na faamanatu ai e Iesu ma ona aposetolo e toʻa 12 le Paseka faa-Iutaia mo le taimi mulimuli. Ina ua uma ona faatonu e Iesu Iuta le Sekara, o lē e faalata e alu ese mai le potu, ona ia faailoa atu lea o se faamanatuga fou na taʻua mulimuli ane o “le talisuaga afiafi a le Alii.” (1 Kori. 11:20) Na faalua ona fetalai Iesu, “Ia faia pea lenei mea e fai ma faamanatuga iā te aʻu.” O lenei sauniga ua taʻua foʻi o le Faamanatuga. O se sauniga faapitoa e tatou te manatua ai mea na faia e Keriso, aemaise lava lona maliu mo i tatou. (1 Kori. 11:24, 25) I le usitaʻia o lenā poloaʻiga, ua faamanatu ai e Molimau a Ieova i le lalolagi aoao le Faamanatuga i tausaga taʻitasi. I le tausaga lenei, e paʻū le Aso 14 o Nisani o le kalena faa-Iutaia, i le Aso Tofi, Aperila 5, 2012 pe a goto le lā.

2. O le ā le fetalaiga a Iesu e uiga i le areto ma le uaina?

2 Na taaofaʻi e Luka gaoioiga ma fetalaiga a Iesu i lenā taimi, i ni fuaiupu se lua: “Ua ia tago . . . i le areto, ua fai le faafetai, ua vaevae ma avatu iā i latou, ma faapea atu: ʻO le faatusa lenei o loʻu tino ou te avatu mo outou. Ia faia pea lenei mea e fai ma faamanatuga iā te aʻu.’ Ua faapea foʻi ona fai i le ipu ina ua uma le talisuaga afiafi, ua ia fetalai atu: ʻO lenei ipu, o le faatusa lea o le feagaiga fou e ala i loʻu toto lea o le a faamaligiina mo outou.’” (Luka 22:19, 20) O le ā le malamalamaga o le ʻauaposetolo i fetalaiga nei a Iesu?

3. O le ā le malamalamaga o le ʻauaposetolo e uiga i le areto ma le uaina?

3 Ona o le ʻauaposetolo o ni tagata Iutaia, na latou malamalama lelei i taulaga na faia i manu, ia na ofo atu e ositaulaga i le Atua i le malumalu i Ierusalema. O na taulaga na faia ina ia maua ai le finagalo malie o Ieova,  ma o le tele o nei taulaga na faia ina ia faamagalo ai agasala. (Levi. 1:4; 22:17-29) O lea la, ina ua fetalai atu Iesu i ona aposetolo e uiga i lona tino ma lona toto o le a ʻavatu ma faamaligiina mo i latou,’ sa latou malamalama lelei i le uiga o na upu, o le a avatu lona soifua lelei atoatoa e fai ma taulaga. O le a avea ma taulaga e matuā sili atu le aogā nai lo o taulaga i manu.

4. O le ā le uiga o le fetalaiga a Iesu: “O lenei ipu, o le faatusa lea o le feagaiga fou e ala i loʻu toto”?

4 Ae faapefea upu a Iesu e faapea, “o lenei ipu, o le faatusa lea o le feagaiga fou e ala i loʻu toto”? Sa iloa e le ʻauaposetolo le valoaga e uiga i le feagaiga fou, lea e faamauina i le Ieremia 31:31-33. (Faitau.) I le fetalaiga lenei a Iesu, ua ia faailoa mai ai lenā feagaiga fou, e suitulaga i le feagaiga o le Tulafono lea na osia e Ieova ma le nuu o Isaraelu e ala iā Mose. Pe sa fesootaʻi na feagaiga e lua?

5. O ā faamanuiaga na ono maua e le nuu o Isaraelu ona o le feagaiga o le Tulafono?

5 Ioe, na fesootaʻi lelei fuafuaga o nei feagaiga. Ina ua faailoa atu e Ieova le feagaiga o le Tulafono, na ia fetalai atu i le nuu: “Afai tou te matuā faalogo i loʻu leo ma tausi i laʻu feagaiga, ona avea lea o outou ma aʻu oloa tāua i lo o isi nuu uma, auā o aʻu e ona le lalolagi atoa. E avea outou ma malo o ositaulaga ma le nuu paia.” (Eso. 19:5, 6) O le ā le malamalamaga o tagata Isaraelu e uiga i nei upu?

LE FOLAFOLAGA E UIGA I OSITAULAGA UA AVEA MA TUPU

6. O le ā le folafolaga na fesoasoani le feagaiga o le Tulafono ina ia faataunuuina?

6 Sa malamalama lelei le nuu o Isaraelu i le uiga o le upu “feagaiga,” ona sa osia e Ieova ni feagaiga aloaʻia ma o latou augātamā o Noa ma Aperaamo. (Kene. 6:18; 9:8-17; 15:18; 17:1-9) I se vaega o le feagaiga a Ieova ma Aperaamo, na Ia folafola ai e faapea: “O lau fanau e maua ai e nuu uma o le lalolagi faamanuiaga.” (Kene. 22:18) Na faia e Ieova le feagaiga o le Tulafono ina ia fesoasoani i le faataunuuina o lenei folafolaga. E faavae i lenā feagaiga, na ono mafai ona avea Isaraelu ma “oloa tāua [a Ieova] i lo o isi nuu uma.” Mo le ā le fuafuaga? Ina ia avea ma “malo o ositaulaga” mo Ieova.

7. O le ā le uiga o le faaupuga, o se “malo o ositaulaga”?

7 Sa malamalama foʻi le nuu o Isaraelu i tupu ma ositaulaga, ae e na o Mekisateko na faamaonia e Ieova e umia tofiga e lua i le taimi e tasi, o le avea ma tupu ma ositaulaga. (Kene. 14:18) E ala i le feagaiga o le Tulafono, na ofo atu ai e Ieova i le nuu o Isaraelu le avanoa e faia aʻe se “malo o ositaulaga” e filifilia mai i lo latou nuu. Na taʻua mulimuli ane i Tusitusiga Paia e uiga i nei tagata filifilia, “o ositaulaga ua avea ma tupu,” o lona uiga ua avea ma tupu ae i le taimi e tasi ua avea foʻi ma ositaulaga.—1 Pete. 2:9.

8. O ā matafaioi a ositaulaga ua tofia e le Atua?

8 E pulea e se tupu se malo. Ae o le ā le matafaioi a se ositaulaga? Ua taʻua i le Eperu 5:1: “O ositaulaga sili uma ua filifilia mai i tagata, ua tofia ina ia faia le galuega a le Atua mo tagata, ma ofo atu e ia o meaalofa ma taulaga mo agasala.” O lea la, na tofia e Ieova se ositaulaga, e fai ma sui o tagata agasala i Ona luma. E talosaga atu o ia iā Ieova ia faamagalo agasala a tagata e ala i le ofoina atu o taulaga. E avea foʻi se ositaulaga ma sui o Ieova i luma o tagata, e ala i le aʻoaʻoina o i latou i tulafono a le Atua. (Levi. 10:8-11; Mala. 2:7) O nei auala, e fesoasoani ai se ositaulaga na tofia e le Atua i tagata agasala ina ia toe faia se leleiga ma le Atua.

9. (a) O le ā sa tatau ona faia e tagata Isaraelu ina ia maua ai le avanoa e avea ai ma “malo o ositaulaga”? (e) Aiseā na tofia ai e Ieova nisi e avea ma ositaulaga i totonu o Isaraelu? (i) Aiseā na lē mafai ai ona avea tagata Isaraelu ma “malo o ositaulaga” i lalo o le feagaiga o le Tulafono?

9 O le feagaiga o le Tulafono, na ofo atu ai i le nuu o Isaraelu le avanoa e avea ai ma  tupu ma ositaulaga mo “isi nuu uma.” Peitaʻi, sa iai se mea na tatau ona latou faia ina ia maua ai lenei avanoa matagofie. Na fetalai le Atua: “Afai tou te matuā faalogo i loʻu leo ma tausi i laʻu feagaiga.” Pe na ʻmatuā faalogo tagata Isaraelu i le leo o Ieova’? Ioe, peitaʻi e leʻi atoatoa ona latou faia faapea. (Roma 3:19, 20) Ona o lenā māfuaaga, na tofia ai e Ieova nisi e avea ma ositaulaga i totonu o Isaraelu, ae o nei ositaulaga e leʻi auauna o ni tupu. Sa latou faia taulaga i manu mo agasala a tagata. (Levi. 4:1–6:7) O nei agasala na aofia ai foʻi ma agasala a ositaulaga. (Epe. 5:1-3; 8:3) Sa talia e Ieova na taulaga, ae e leʻi aveesea atoatoa ai agasala a ē na ofoina atu taulaga. E leʻi mafai e le faiva faaositaulaga i lalo o le feagaiga o le Tulafono, ona maua atoatoa ai e tagata Isaraelu faamaoni se leleiga ma le Atua. E pei ona taʻua e le aposetolo o Paulo: “E lē mafai ona aveesea agasala e le toto o povi poʻa ma ʻoti.” (Epe. 10:1-4) Na malaia tagata Isaraelu ona o le solia o le Tulafono. (Kala. 3:10) Ona o lenā tulaga, na lē mafai ai ona latou auauna atu i isi tagata uma o ni ositaulaga ua avea ma tupu.

10. O le ā le fuafuaga o le feagaiga o le Tulafono?

10 E lē o le uiga o lenei manatu e faapea e leʻi mafai lava ona avea tagata Isaraelu ma “malo o ositaulaga,” e pei ona folafola mai e Ieova. Pe ana faapea na latou taumafai moni lava e usiusitaʻi iā Ieova, semanū e latou te maua lenei avanoa, ae e lē ala i le Tulafono. Aiseā? (Faitau le Kalatia 3:19-25.) Ina ia malamalama i lenei manatu, e ao ona tatou iloa le fuafuaga o le feagaiga o le Tulafono. Sa puipuia e le Tulafono tagata Isaraelu usiusitaʻi mai i tapuaʻiga sesē. Sa fesoasoani foʻi i tagata Isaraelu ia iloa ai o i latou o tagata agasala, ma e manaʻomia se taulaga e sili atu nai lo o taulaga na ofo atu e le ositaulaga sili. Sa avea ma taʻitaʻitama e taʻitaʻia atu ai i latou iā Keriso, po o le Mesia, o lona uiga o “Lē ua Faauuina.” Peitaʻi, pe a taunuu mai le Mesia, e na te faailoa mai le feagaiga fou na valoia e Ieremia. O ē na taliaina Keriso na valaaulia e avea ma vaega o le feagaiga fou, ma na avea moni ma “malo o ositaulaga.” Seʻi o tatou vāai pe faapefea.

LE FEAGAIGA FOU UA FAIA AʻE I OSITAULAGA UA AVEA MA TUPU

11. E ala iā Iesu, na mafai faapefea ona fai isi ma ositaulaga ua avea ma tupu?

11 I le 29 T.A., na avea ai Iesu mai Nasareta ma Mesia. Pe tusa o le 30 o ona tausaga, na ia ofo atu ai o ia lava e faia se mea faapitoa na finagalo ai Ieova iā te ia, ma na faailogaina lenei mea e ala i le papatisoga i le vai. Na fetalai mai Ieova e uiga iā Iesu, “o loʻu Atalii pele lenā,” ma na faauuina o ia, e lē i se suāuu, ae i le agaga paia. (Mata. 3:13-17; Galu. 10:38) O le faauuina o Iesu e le Atua na avea ai o ia ma Ositaulaga Sili, ma o le a fai ma Tupu i le lumanaʻi, ina ia maua ai aogā e i latou uma e talitonu iā te ia. (Epe. 1:8, 9; 5:5, 6) O lea, e ala iā Iesu, ua mafai ai ona fai moni isi ma ositaulaga ma tupu.

12. O le ā na mafai ona faia ona o le taulaga a Iesu?

12 I le avea ai ma Ositaulaga Sili, o le ā le taulaga na mafai ona ofo atu e Iesu ina ia faamagaloina atoatoa ai le agasala tuufaasolo a tagata talitonu? O le fetalaiga a Iesu ina ua faavaeina le Faamanatuga o lona maliu, ua fesoasoani iā i tatou e malamalama ai, o loo faasino atu le taulaga i lona lava soifua lelei atoatoa o se tagata. (Faitau le Eperu 9:11, 12.) Ina ua uma ona faauuina Iesu e avea ma Ositaulaga Sili, sa lotomalie e tofotofoina ma aʻoaʻoina o ia seʻia oo i lona maliu. (Epe. 4:15; 5:7-10) Ina ua toe faatūina o ia, sa afio aʻe i le lagi ma ofo atu iā Ieova le tāua o lana taulaga. (Epe. 9:24) Mai i lenā taimi ma faasolo mai ai, ua mafai ona ʻaiʻoi atu Iesu iā Ieova mo ē e faatuatua i lana taulaga, ma fesoasoani iā i latou ia auauna i le Atua ma taulaʻi atu ia maua le ola  e faavavau. (Epe. 7:25) O lana taulaga foʻi na faamaonia ai le aogā o le feagaiga fou.—Epe. 8:6; 9:15.

13. O ā faamanuiaga e maua e i latou e iai i le feagaiga fou?

13 O ē e iai i le feagaiga fou, e ao foʻi ona faauuina i le agaga paia. (2 Kori. 1:21) Sa aofia ai tagata Iutaia faamaoni ona sosoo lea ma tagata o Nuu Ese. (Efe. 3:5, 6) O ā faamanuiaga e maua e i latou e iai i le feagaiga fou? E faamagaloina moni a latou agasala. Na folafola e Ieova e faapea: “Ou te faamagaloina a latou mea sesē, ma ou te lē toe manatuaina a latou agasala.” (Iere. 31:34) Ona ua faamagaloina e Ieova a latou agasala, ua mafai ai ona avea i latou ma “malo o ositaulaga.” Na tusi atu Peteru i Kerisiano faauuina: “O outou o ʻse vaega ua filifilia, o ositaulaga ua avea ma tupu, o le nuu paia, o tagata ua faapitoa mo le Atua, ina ia outou faalauiloa atu uiga silisili ona lelei’ o lē na valaauina outou mai i le pōuliuli i lona malamalama ofoofogia.” (1 Pete. 2:9) O loo sii mai i inei e Peteru fetalaiga a Ieova i le nuu o Isaraelu ina ua faailoa atu le Tulafono, ma faatatau atu na fetalaiga i Kerisiano ua iai i le feagaiga fou.—Eso. 19:5, 6.

MAUA E TAGATA UMA AOGĀ MAI I OSITAULAGA UA AVEA MA TUPU

14. O fea o le a auauna ai ositaulaga ua avea ma tupu?

14 O fea o le a auauna ai i latou ua iai i le feagaiga fou? E avea i latou o se vaega e auauna o ni ositaulaga i le lalolagi. E fai i latou ma sui o Ieova i luma o tagata, e ala i le talaʻi atu e faatatau i ona “uiga silisili ona lelei,” ma avatu meaʻai po o faatonuga faaleagaga. (Mata. 24:45; 1 Pete. 2:4, 5) Pe a maliliu ma toetutū mai, o le a latou auauna faatasi ma Keriso i le lagi o ni tupu ma ositaulaga, ma faataunuu atoatoa a latou matafaioi uma e lua. (Luka 22:29; 1 Pete. 1:3-5; Faaa. 1:6) I se faaaliga, na vaaia ai e le aposetolo o Ioane foafoaga agaga e toʻatele o loo i luma o le nofoālii o Ieova i le lagi. Ua latou usuina atu “se pese fou” i le “Tamaʻi Mamoe” e faapea: “O lou toto . . . na e faatauina mai ai tagata mo le Atua mai i ituaiga uma, ma gagana uma, ma nuu uma, ma atunuu uma, ma ua e faia i latou ma malo ma ositaulaga i lo tatou Atua, e latou te pule mai foʻi o ni tupu i le lalolagi.” (Faaa. 5:8-10) I se faaaliga mulimuli ane, ua taʻua ai e Ioane e faatatau i nei tupu: “E fai i latou ma ositaulaga a le Atua  ma le Keriso, e pule i latou o ni tupu faatasi ma ia mo le afe tausaga.” (Faaa. 20:6) O nei tupu atoa ai ma Keriso, ua faia aʻe ai ni ositaulaga ua avea ma tupu ina ia maua ai e tagata uma aogā.

15, 16. O ā aogā o le a aumaia i tagata e ositaulaga ua avea ma tupu?

15 O ā aogā o le a aumaia e le 144,000 i tagata i le lalolagi? Ua faamatalaina i latou i le Faaaliga mataupu e 21 o se aai faalelagi, o le Ierusalema Fou, ma ua taʻua o le ʻfaletua o le Tamaʻi Mamoe.’ (Faaa. 21:9) Ua taʻua i le fuaiupu e 2 e oo i le 4: “Ua ou iloa foʻi le aai paia o Ierusalema Fou, ua alu ifo mai i le lagi mai i le Atua, ua saunia e faapei o se tamaʻitaʻi faaipoipo ua teuteuina mo lona alii. Ona ou faalogo lea i le leotele mai i le nofoālii e faapea: ʻFaauta! Ua iai i tagata le faleʻie o le Atua, e mau o ia ma i latou, e fai foʻi i latou ma ona tagata. E faatasi foʻi le Atua ma i latou. E na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.’” Maʻeu ni faamanuiaga matagofie! O le a lē toe iai ni loimata, le faavauvau, se tigā po o le tagiauē, auā o le a lē toe iai se oti. O le a lelei atoatoa tagata ma latou maua le leleiga atoatoa ma le Atua.

16 Ina ia faamatala atili faamanuiaga o le a aumaia e nei ositaulaga ua avea ma tupu, ua faapea mai le Faaaliga 22:1, 2: ʻUa ia faaali mai iā te aʻu se vaitafe o le vai o le ola, e manino e pei o se tioata, o loo tafe mai i le nofoālii o le Atua ma le Tamaʻi Mamoe e ala mai i le Ierusalema Fou. Ua iai i itu taʻitasi o le vaitafe laau o le ola o loo fua mai i fuata e taʻisefulu lua, ma e fua mai ai ni fua i masina taʻitasi. O lau foʻi o laau e faamālōlōina ai nuu.’ O lenei faaaliga, ua taʻu mai ai iā i tatou le auala o le a aveesea atoatoa ai mai i “nuu” po o tagata, le tulaga lē lelei atoatoa na tuufaasolo mai iā Atamu. Ioe, o le a “mavae atu mea muamua.”

O LE A FAATAUNUUINA ATOATOA GALUEGA A OSITAULAGA UA AVEA MA TUPU

17. E oo ane i le iʻuga o le pulega o le 1,000 tausaga, o le ā ua faataunuuina e ositaulaga ua avea ma tupu?

17 E oo ane i le iʻuga o le pulega o le 1,000 tausaga, ua fesoasoani ositaulaga ua avea ma tupu i le fanau a tagata ina ia ausia le tulaga lelei atoatoa. Ona tuuina atu ai lea e Keriso, o le Ositaulaga Sili ma o le Tupu, le fanau a tagata ua lelei atoatoa iā Ieova. (Faitau le 1 Korinito 15:22-26.) E oo ane i lenā taimi ua faataunuuina atoatoa galuega a ositaulaga ua avea ma tupu.

18. O le ā le auala o le a faaaogā ai e Ieova nei ositaulaga ua avea ma tupu, pe a faataunuuina atoatoa a latou galuega?

18 Pe a mavae le 1,000 tausaga, o le ā le auala o le a faaaogā ai e Ieova nei ositaulaga ua avea ma tupu? Ua taʻua i le Faaaliga 22:5, “o le a pule . . . i latou o ni tupu e faavavau, faavavau lava.” O ai o le a latou pule mai i ai? E lē o taʻua i le Tusi Paia. Ae o le a matuā faatāuaina pea i latou e Ieova. Ua latou maua le tino e lē pala ma le ola e lē mafai ona oti, ma sa latou fesoasoani foʻi i le fanau a tagata e lē lelei atoatoa. O lea la, e faaauau pea ona avea i latou ma tupu, ma faaaogāina e Ieova ina ia faataunuu ai ana fuafuaga e oo lava i le faavavau.

19. O le ā o le a faamanatu mai i ē o le a auai i le Faamanatuga?

19 O le a faamanatu mai iā i tatou nei aʻoaʻoga a le Tusi Paia, pe a auai i le Faamanatuga o le maliu o Iesu, o le a faia i le Aso Tofi, Aperila 5, 2012. E faaalia e le vaega totoe toʻaitiiti o Kerisiano faauuina le avea o i latou ma vaega o le feagaiga fou, e ala i le tagofia o le areto e lē faafefeteina ma le uaina mūmū. E faamanatu atu e lenei mea iā i latou le tāua o o latou faaeaga ma tiute tauave i le finagalo e faavavau o le Atua. Tau ina ia faaalia e i tatou uma o le a auai i le Faamanatuga, le matuā talisapaia o nei ositaulaga ua avea ma tupu, ua filifilia e Ieova le Atua ina ia maua ai e tagata uma aogā.

[Fesili mo le Suʻesuʻega]

[Ata i le itulau 29]

O le a aumaia e ositaulaga ua avea ma tupu aogā e tumau i le fanau a tagata