Alu i mataupu o loo iai

Alu i le lisi o mataupu

Ia Faia Taulaga ma le Lotoatoa mo Ieova

Ia Faia Taulaga ma le Lotoatoa mo Ieova

 Ia Faia Taulaga ma le Lotoatoa mo Ieova

“O so se mea e tou te faia, ia galue i ai ma le lotoatoa, e pei o loo faia iā Ieova.”​—KOLO. 3:23.

PE MAFAI ONA E TALIINA FESILI NEI?

O ā auala e tatou te viia ai Ieova i a tatou gaoioiga i aso faisoo?

O ā taulaga e tatou te faia i la tatou tapuaʻiga i le Atua?

E mafai faapefea ona ofo atu a tatou meafaitino iā Ieova?

1-3. (a) Ina ua maliu Iesu i luga o le laau e faapuapuagatia ai, po o lona uiga ua lē o toe manaʻomia e Ieova so o se taulaga mai iā i tatou? Faamatala. (e) O le ā le fesili ua lāgā e tusa ai o taulaga i aso nei?

I LE uluaʻi senituri T.A., na faailoa atu ai e Ieova i ona tagata e faapea o le taulaga togiola a Iesu ua soloia ai le Tulafono a Mose. (Kolo. 2:13, 14) O taulaga uma lava na ofo atu e tagata Iutaia mo le faitau selau tausaga, e lē o toe manaʻomia ma e lē o toe aogā. Ua faataunuu e le Tulafono lona fuafuaga, o le avea ma “taʻitaʻitama e taʻitaʻia . . . iā Keriso.”—Kala. 3:24.

2 E lē o le uiga o lenā manatu e faapea ua lē o toe naunau Kerisiano e faia ni taulaga. O le mea moni, na taʻua e le aposetolo o Peteru e manaʻomia ona “ofo atu . . . taulaga faaleagaga e fiafia i ai le Atua, e ala iā Iesu Keriso.” (1 Pete. 2:5) E lē gata i lea, na faamanino mai e le aposetolo o Paulo, o vala uma lava o le olaga o se Kerisiano ua tuuina atu, e ono manatu i ai e pei o se “taulaga.”—Roma 12:1.

3 O lea la, e faia e se Kerisiano taulaga mo Ieova, e ala i le ofo atu o nisi o mea iā Ieova, po o le faataulaga o nisi o mea mo ia. E tusa ai o mea ua tatou iloa e faatatau i taulaga na ofo atu e tagata Isaraelu, e faapefea ona tatou mautinoa o loo talia e Ieova taulaga uma o loo tatou faia i aso nei?

I LE OLAGA I ASO FAISOO

4. O le ā e tatau ona tatou manatua e faatatau i mea masani o le olaga i aso faisoo?

4 I o tatou olaga i aso faisoo, e foliga mai e faigatā ona faafesootaʻi a tatou gaoioiga ma le faia o taulaga iā Ieova. O feʻau i le fale, aʻoaʻoga, galuega totogi, faia o faatauga ma isi mea faapena, e foliga mai e leai sona aafiaga i mataupu faaleagaga. Peitaʻi, afai ua  tuuina atu lou ola iā Ieova pe faamoemoe e faia faapea i se taimi lata mai, e tāua la ona manatua, o nei mea masani o le olaga e mafai moni lava ona aafia ai la tatou faiā ma Ieova. O i tatou o Kerisiano mo le 24 itula i le aso. E tatau ona faatatauina mataupu silisili o le Tusi Paia i vala uma o o tatou olaga. O le pogai lea ua faalaeiau ai i tatou e Paulo: “O so o se mea e tou te faia, ia galue i ai ma le lotoatoa, e pei o loo faia iā Ieova ae e lē o tagata.”—Faitau le Kolose 3:18-24.

5, 6. O le ā e fesoasoani iā i tatou e filifili ai le auala e tatau ona tatou amioaʻi ma laʻei ai?

5 O gaoioiga masani a se Kerisiano i aso faisoo e lē o ni vaega o lana auaunaga paia. Peitaʻi, ona ua faalaeiau e Paulo i tatou ia galulue “ma le lotoatoa, e pei o loo faia iā Ieova,” ua uunaʻia ai i tatou e mafaufau e faatatau i vala uma o o tatou olaga. E faapefea la ona tatou faatatau lenei manatu iā i tatou lava? Po o talafeagai a tatou amio ma onomea o tatou lavalava i taimi uma? A o auai i gaoioiga masani o le olaga, po o tatou matamumuli e faailoa atu o i tatou o ni Molimau a Ieova, ona o le auala o loo tatou amioaʻi pe laʻei ai? E lē tatau ona tupu lenā tulaga iā i tatou! E lē mananaʻo tagata o Ieova e faia so o se mea e taʻuvalea ai le suafa silisili o le Atua.—Isa. 43:10; 2 Kori. 6:3, 4, 9.

6 Seʻi o tatou iloiloina pe faapefea ona aafia vala eseese o le olaga i se faanaunauga ia galue “ma le lotoatoa, e pei o loo faia iā Ieova.” A o tatou faia faapea, ia manatua, o taulaga uma na ofo atu e tagata Isaraelu iā Ieova, sa tatau ona ofo atu mea e sili ona lelei sa iā i latou.—Eso. 23:19.

LE AUALA O LOO AAFIA AI LOU OLAGA

7. O le ā e aofia ai i le tuuina atu faa-Kerisiano?

7 Ina ua tuuina atu oe lava iā Ieova, sa e faia lenā filifiliga e aunoa ma le faatalatū, a ea? O lona uiga sa e faapea atu, o le a e faamuamua Ieova i vala uma lava o lou olaga. (Faitau le Eperu 10:7.) O se filifiliga lelei lenā. E mautinoa ua e maua ni iʻuga e sili ona lelei ina ua e saʻili po o le ā le finagalo o Ieova i se mataupu, ma taumafai e gaoioi e tusa ai ma lona finagalo. (Isa. 48:17, 18) O tagata o le Atua e paia ma olioli ona e latou te faaatagia atu uiga o Lē o loo faatonuina i latou.—Levi. 11:44; 1 Timo. 1:11.

8. Aiseā e tāua ai ona tatou manatua sa paia i le silasila a Ieova taulaga na ofo atu e tagata Isaraelu?

8 O taulaga na ofo atu e tagata Isaraelu iā Ieova, sa manatu i ai e paia. (Levi. 6:25; 7:1) O le upu Eperu ua faaliliuina i le “paia,” o lona uiga, o le vavaeese mai, matuā tuutoina atu, po o le faapaiaina i le Atua. Ina ia talia e Ieova a tatou taulaga, e tatau ona vavaeese mai i so o se mea lē mamā o lenei lalolagi. E lē tatau ona tatou  fiafia i so o se mea e inosia e Ieova. (Faitau le 1 Ioane 2:15-17.) E manino mai, e tatau ona tatou ʻalofia so o se tasi po o so o se mea e faaleagaina ai i tatou i le silafaga a le Atua. (Isa. 2:4; Faaa. 18:4) E uiga atu foʻi i le lē faatagaina o o tatou mata e vaavaai atu pea i mea po o faiga lē mamā, pe mafaufau foʻi e faatatau i na mea.—Kolo. 3:5, 6.

9. O le ā le tāua o amio e faaalia e se Kerisiano i isi, ma aiseā?

9 Na uunaʻia e Paulo uso talitonu: “Aua neʻi galo le faia o mea lelei, ma le tufa atu o mea i isi, auā o taulaga faapena e matuā fiafia i ai le Atua.” (Epe. 13:16) O lea la, afai o la tatou masani o le amio lelei ma faia mea lelei i isi, o le a silasila i ai Ieova o se taulaga e na te taliaina. O lenei uiga e faaalia atu ai, o i tatou o Kerisiano moni.—Ioa. 13:34, 35; Kolo. 1:10.

TAULAGA I LE TAPUAʻIGA

10, 11. O le ā le silasila a Ieova i la tatou faiva ma le tapuaʻiga faa-Kerisiano, ma o le ā se aafiaga o lenei mea iā i tatou?

10 O se tasi o auala e tatou te faia ai mea lelei mo isi, o le ʻtaʻutaʻu atu i le lautele o lo tatou faamoemoe.’ Po o e faaaogā avanoa uma e molimau atu ai? Na taʻua e Paulo lenei galuega tāua faa-Kerisiano, o se ʻtaulaga o viiga, o le fua o laugutu, e faailoa atu ai i tagata le suafa o le Atua.’ (Epe. 10:23; 13:15; Ho. 14:2) E lelei ona mafaufau po o le ā le tele o le taimi o loo tatou talaʻia ai le tala lelei, ma le auala e talaʻi atu ai. O le tele o vaega i le Sauniga o le Auaunaga e fesoasoani iā i tatou e mafaufau ai e faatatau i lenei mataupu. Peitaʻi, ona o la tatou galuega talaʻi ma le molimau atu lē fuafuaina o ni “taulaga o viiga,” o se vaega o la tatou tapuaʻiga, o lea la e tatau ai ona tatou faia le mea e sili ona lelei e tatou te mafaia. E moni e eseese o tatou tulaga, ae o le tele o le taimi e tatou te faaalu e faalauiloa atu ai le tala lelei, e masani lava ona faailoa atu ai lo tatou talisapaia o mea faaleagaga.

11 E mafai ona tatou tapuaʻi atu e lē aunoa iā Ieova, e tusa lava pe e tatou te i le fale pe i le faapotopotoga. E finagalo Ieova ia tatou faia faapea. E moni e lē o toe manaʻomia ona tatou tausia se mālōlōga faa-Sapati pe malaga i Ierusalema mo ni tausamiga, peitaʻi o loo iai ni lesona e tatou te aʻoaʻoina mai i na tulafono. O loo tumau ona faatalitalia i tatou e le Atua ia tuua galuega masani o le olaga, ina ia mafai ai ona suʻesuʻe lana Afioga, tatalo, ma auai i sauniga faa-Kerisiano. Ma e tatau i  ulu o aiga ona taʻimua i le faia o le tapuaʻiga a le aiga faatasi ma tagata o o latou aiga. (1 Tesa. 5:17; Epe. 10:24, 25) E lelei ona fesili ifo iā i tatou lava e tusa ai o a tatou gaoioiga faaleagaga, ʻPe e mafai ona faaleleia le auala ou te tapuaʻi atu ai i le Atua?’

12. (a) O le ā e mafai ona faatusa i ai i aso nei mea manogi na ofo atu i le tapuaʻiga i aso anamua? (e) E faapefea ona ofo atu a tatou tatalo e pei o se mea manogi?

12 Na pese le tupu o Tavita iā Ieova: “Tau ina ia saunia laʻu tatalo e pei o le mea manogi i ou luma.” (Sala. 141:2) Seʻi mafaufau e faatatau i au tatalo—i le tele o loo e tatalo ai ma mea o loo e tatalo atu ai. Ua faatusa e le tusi o Faaaliga “tatalo a le ʻaupaia” i mea manogi, i le uiga faapea o tatalo e talia e Ieova, ua pei o se mea e manogi lelei. (Faaa. 5:8) I Isaraelu anamua, sa tatau ona lelei ma saʻo le auala e sauniunia ai mea manogi sa masani ona ofo atu iā Ieova. Na faatoʻā talia e Ieova na mea pe afai na ofo atu e tusa ai ma taʻiala na ia faatulagaina. (Eso. 30:34-37; Levi. 10:1, 2) I se tulaga talitutusa, afai e tatou te tatalo i le auala na faatonuina i tatou e Ieova e tatalo atu ai, ma manatu i le tatalo o se mea e paia, e mautinoa o le a talia mai e Ieova a tatou tatalo.

FOAʻI ATU MA TALIA MAI

13, 14. (a) O le ā le auaunaga na faia e Epaferoti ma le faapotopotoga i Filipi mo Paulo, ma o le ā le lagona o le aposetolo e faatatau i lenā auaunaga? (e) E faapefea ona tatou mulimuli i le faaaʻoaʻoga a Epaferoti ma le faapotopotoga i Filipi?

13 Pe itiiti pe tele se foaʻi tau tupe ua faia ina ia lagolagoina ai le galuega i le lalolagi aoao, ae e mafai ona vaai i ai e pei o se taulaga. (Mare. 12:41-44) I le uluaʻi senituri T.A., sa auina atu e le faapotopotoga i Filipi Epaferoti i Roma ina ia tausia manaʻoga faaletino o Paulo. E mautinoa o lenā sui o le faapotopotoga i Filipi, sa alu ma ave se tupe, o se meaalofa mai i le faapotopotoga. E lē o le taimi muamua lea na faaalia ai e le faapotopotoga i Filipi le limafoaʻi iā Paulo. O lo latou agalelei, na latou naunau ai ia aua neʻi popole Paulo i tulaga tautupe ae ia faaaogā le tele o lona taimi i le faiva. O le ā le manatu o Paulo e faatatau i lenei meaalofa? Sa ia taʻua “o se mea manogi lelei, o le taulaga talileleia, e matuā finagalo malie i ai le Atua.” (Faitau le Filipi 4:15-19.) Sa talisapaia moni e Paulo gaoioiga agalelei a Kerisiano i Filipi, ma e faapena foʻi Ieova.

14 I aso foʻi nei, e matuā talisapaia e Ieova foaʻi tauofo ua tatou faia mo le galuega i le lalolagi aoao. E lē gata i lea, ua ia folafola mai afai e faaauau ona faamuamua i o tatou olaga mea e fesootaʻi atu i le Malo, o le a ia tausia o tatou manaʻoga faaleagaga ma le faaletino.—Mata. 6:33; Luka 6:38.

IA FAAALIA LOU TALISAPAIA

15. O ā nisi o mea e te lotofaafetai ai iā Ieova?

15 E umi se taimi e tatou te manatunatu ai i le anoanoaʻi o māfuaaga e tatou te lotofaafetai ai iā Ieova. Pe e lē moni e tatau ona tatou faafetai atu iā te ia i aso taʻitasi mo le meaalofa o le ola? Ua ia aumaia mea uma e tatou te manaʻomia e ola ai—o meaʻai, lavalava, o fale faapea le ʻea o loo tatou mānavaina. E lē gata i lea, o lo tatou faatuatua e faavae i le poto saʻo o le Tusi Paia, e aumaia ai iā i tatou le faamoemoe. Ua talafeagai ona tatou tapuaʻi atu iā Ieova ma ofo atu taulaga o viiga iā te ia, ona o mea ua ia faia mo i tatou ma o ia o le Silisili Ese.—Faitau le Faaaliga 4:11.

16. E faapefea ona faaalia lo tatou lotofaafetai mo le taulaga togiola a Keriso?

16 Na taʻua i le mataupu ua mavae atu, o le taulaga togiola a Keriso o se meaalofa e sili ona matagofie ua aumaia e le Atua mo tagata. O le faailoaga mataʻina lea o  le alofa o le Atua mo i tatou. (1 Ioa. 4:10) E faapefea ona faaalia lo tatou lotofaafetai mo lenā meaalofa? Na taʻua e Paulo: “Ua faamalosia i matou ona o le alofa o le Keriso, ma o lo matou manatu lenei, e toʻatasi lē na maliu mo tagata uma; . . . ma na maliu o ia mo tagata uma, ina ia lē toe ola i latou mo i latou lava, ae ia ola mo ia o lē na maliu mo i latou ma toe faatūina mai.” (2 Kori. 5:14, 15) O lona uiga na faapea mai Paulo, afai e tatou te talisapaia le agalelei faifua o le Atua, e tatau la ona faaaogā o tatou olaga e viia ai le Atua ma Lona Alo. O lo tatou alofa ma le talisapaia o le Atua ma Keriso, e faaalia e ala i lo tatou usiusitaʻi ma naunau e talaʻi atu ma faia isi ma soo.—1 Timo. 2:3, 4; 1 Ioa. 5:3.

17, 18. O ā auala ua faateleina ai e nisi a latou taulaga o viiga iā Ieova? Taʻu mai se faaaʻoaʻoga.

17 Pe e mafai ona e faaleleia taulaga o viiga o loo e ofo atu i le Atua? Pe a uma ona manatunatu e faatatau i mea lelei uma ua faia e Ieova mo i latou, ua uunaʻia ai le toʻatele e faatulaga o latou taimi ma mea e fai, ina ia faateleina so latou sao i le galuega talaʻi po isi mea e fesootaʻi atu i le auaunaga iā Ieova. O isi ua mafai ona paeonia lagolago mo se masina pe sili atu i tausaga taʻitasi, ae o isi ua mafai ona ulu atu i le auaunaga paeonia sauatoa. O isi ua auai i galuega o le fauina o fale e faaaogā mo le tapuaʻiga iā Ieova. Pe e lē o ni auala e sili nei ona lelei e faaalia ai le lototalisapaia o se tasi? Afai e saʻo le uunaʻiga e fai ai, ina ia faaalia ai le lotofaafetai, o le a talia e le Atua nei galuega o le auaunaga paia.

18 O le tele o Kerisiano ua uunaʻia e faaalia atu lo latou lotofaafetai iā Ieova. O se tasi o i latou na o Morena. Sa ia saʻilia tali o ana fesili faaleagaga i le Katoliko, o le lotu lea na ola aʻe ai, ma saʻili atu i filosofia a tagata Asia. Peitaʻi e na te leʻi mauaina ni tali e faamalieina ai. Ae ina ua ia suʻesuʻeina le Tusi Paia ma Molimau a Ieova, sa faamalieina lona galala faaleagaga. Sa lagona e Morena le lotofaafetai ona o tali manino mai i le Tusi Paia o ana fesili uma, ma o na tali na mausalī ai i lona mafaufau ia faaaogā lona olaga e faafetai atu iā Ieova, e ala i le faaaogā uma o lona malosi i le auaunaga iā te ia. Ina ua faatoʻā uma lona papatisoga, sa amata loa ona paeonia lagolago e faaauau pea, ma ina ua talafeagai ma lona tulaga, sa amata loa lana paeonia sauatoa. Ua tusa nei ma le 30 tausaga o loo faaauau pea o ia i le auaunaga faataimi atoa.

19. E mafai faapefea ona faateleina au taulaga o viiga iā Ieova?

19 E moni e toʻatele auauna faamaoni a Ieova e lē o mafai ona auauna o ni paeonia ona o o latou tulaga. Po o le ā lava le mea e mafai ona tatou faia i le auaunaga iā Ieova, ae e mafai e i tatou uma ona ofo atu taulaga faaleagaga e na te talia mai. E ao ona tatou faatatauina taʻiala o le Tusi Paia i a tatou amio ma ia manatua o loo fai i tatou ma sui o Ieova i taimi uma. I le faatuatua, e tatou te talitonu atoatoa o le a faataunuu e le Atua ana fuafuaga. E tatou te fesoasoani i le faasalalauina atu o le tala lelei e ala i galuega lelei. Ona o lo tatou matuā talisapaia o mea uma ua faia e Ieova mo i tatou, o lea la, seʻi faaauau ona tatou faia ma le lotoatoa taulaga iā Ieova.

[Fesili mo le Suʻesuʻega]

[Faamatalaga faaopoopo i le itulau 25]

Po o avea le agalelei o Ieova ma mea e uunaʻia ai oe ia faaleleia au taulaga o viiga?

[Ata i le itulau 23]

Pe e te faaaogā avanoa uma e avatu ai se molimau?