Skip to content

Skip to table of contents

Po o Aogā Au Faafiafiaga?

Po o Aogā Au Faafiafiaga?

 Po o Aogā Au Faafiafiaga?

“Ia faamautinoa pea po o ā mea e fiafia i ai le Alii.”—EFE. 5:10.

1, 2. (a) Ua faaalia faapefea i le Afioga a le Atua e finagalo Ieova ia tatou olioli i le olaga? (e) Pe a manatu i faafiafiaga o se ʻmeaalofa mai i le Atua,’ o le a uunaʻia ai i tatou e fai le ā?

E TATOU te maua i le Tusi Paia faamatalaga e faaalia mai ai, e finagalo Ieova e lē gata ia tatou maua le ola, ae ia olioli foʻi i le olaga. O se faaaʻoaʻoga, ua taʻua i le Salamo 104:14, 15, o loo faatupu aʻe e Ieova “meaʻai mai i le laueleele, ma le uaina e faafiafia ai le loto o le tagata, ma le suāuu e faamomosi ai foliga, ma le meaʻai e faamalosi ai le tino o le tagata.” E moni e faatupu e Ieova mea totō ina ia maua mai ai le saito, gaʻo ma le uaina ina ia fafagaina ai i tatou. Ae o le uaina foʻi e mafai ona “faafiafia ai le loto.” O le uaina e lē o se mea e matuā manaʻomia ina ia faatumauina ai le ola, ae ua saunia ina ia maua ai le olioli. (Fai. 9:7; 10:19) Ioe, e finagalo Ieova ia tatou fiafia, ma ia faatumulia o tatou loto i le “olioli.”—Galu. 14:16, 17.

2 O lea la, e lē afāina pe afai e tatou te faatulaga se taimi, e “vaavaai lelei [ai] i manufelelei o le lagi” ma “lili o le vao,” pe olioli i nisi o mea e faafouina ma faafiafiaina ai o tatou olaga. (Mata. 6:26, 28; Sala. 8:3, 4) O se olaga lelei, o se “meaalofa lea mai i le Atua.” (Fai. 3:12, 13) Pe a manatu i taimi mo faafiafiaga o se vaega o lenā meaalofa, o le a uunaʻia ai i tatou e faaaogā lenā meaalofa i se auala e faafiafiaina ai Lē na foaʻiina mai lenā meaalofa. *

Fai ni Filifiliga Lelei i Faafiafiaga

3. Aiseā e talafeagai ai ona iloa e eseese ituaiga faafiafiaga e fiafia i ai tagata?

3 O ē e iai se vaaiga paleni e faatatau i faafiafiaga, e lē gata e latou te iloa e eseese ituaiga faafiafiaga e fiafia i ai tagata, ae e faatapulaa foʻi faafiafiaga e ao ona latou faia. Aiseā? Ina ia iloa le tali, seʻi o tatou faatusatusa faafiafiaga i meaʻai. E eseese ituaiga meaʻai a le isi atunuu i le isi atunuu. O le mea moni, o meaʻai e fiafia iai tagata o le isi vaipanoa, atonu e lē manaia i le tofo a tagata o le isi vaipanoa. I se tulaga talitutusa, o faafiafiaga e manatu i ai Kerisiano i le isi itu o le lalolagi e lelei, atonu e lē fiafia i ai Kerisiano i isi atunuu. E faapena foʻi Kerisiano e nonofo i se vaipanoa se tasi, o se mea e manatu se tasi e fiafia i ai (atonu pe faitau se tusi manaia), e ono manatu i iai le isi e lē manaia; o se mea e manatu se tasi e faafouina ai (atonu pe tiʻetiʻe uila solo), e ono manatu i ai le isi e vaivai ai. Peitaʻi, e tatou te ioe e faapea, i mataupu faapena e pei o meaʻai ma faafiafiaga, e eseese lava mea e fiafia i ai tagata.—Roma 14:2-4.

4. Aiseā e ao ai ona tatou faatapulaa ituaiga o faafiafiaga e tatou te filifilia? Ia faataʻitaʻi.

4 Peitaʻi, e tatou te iloa foʻi e lē avea le eseese o ituaiga faafiafiaga e fiafia i ai tagata, ma faatagaga e alu faasoloatoa ai. Ina ia faataʻitaʻi, seʻi toe manatu i le faataʻitaʻiga i meaʻai. E ui atonu e mafai ona tatou aai i so o se ituaiga o meaʻai, ae e lē faapea o le a tatou ʻaina ai se meaʻai ua leaga. O le ʻaina o lenā meaʻai e lē o se mea atamai, ma e mafai ona lamatia ai lo tatou soifua mālōlōina. I se tulaga talitutusa, e ui atonu e mafai ona tatou faia so o se ituaiga o faafiafiaga e lelei, ae o le a tatou lē faia ai faafiafiaga e lamatia ai le ola, sauā pe faaleagaina ai foʻi le tulaga tau amio. O le faia o na faafiafiaga, o le a feteenaʻi ma mataupu silisili o le Tusi Paia, ma lamatia ai lo tatou  soifua mālōlōina faaletino po o le faaleagaga. Ina ia faamautinoa e tatou te fuafua lelei, e ao ona tatou muaʻi iloilo pe faamata e aogā nisi o faafiafiaga o loo tatou fiafia i ai. (Efe. 5:10) E mafai faapefea ona tatou faia faapea?

5. E mafai faapefea ona tatou iloa pe faamata o ōgatusa a tatou faafiafiaga ma tapulaa a le Atua?

5 Ina ia aogā faafiafiaga iā i tatou ma lelei i le silafaga a Ieova, e tatau ona ōgatusa ma tapulaa maʻoti ua aumaia i le Afioga a le Atua. (Sala. 86:11) Ina ia iloilo pe faamata o le tulaga lenā o loo iai se faafiafiaga e te fiafia i ai, atonu e te faia se lisi o mea e ao ona iloilo. E tolu fesili e faia aʻe ai lenā lisi, lea e mafai ona aotele i upu nei, o ā, o le ā le tele, ma o ai. Seʻi o tatou iloiloina auauaʻi na fesili.

O ā Mea o Loo Aofia Ai?

6. O ā faafiafiaga e manaʻomia ona tatou teena, ma aiseā?

6 A o leʻi faia se faafiafiaga, o le fesili muamua e te fesili ifo ai iā te oe lava, ʻO ā ituaiga o faafiafiaga ou te fiafia i ai?’ A o e saʻilia le tali, e tāua ona manatua, e lua vaega ua faatulagaina i ai faafiafiaga. I le vaega muamua, e aofia ai mea e matuā lē tatau ona tatou faia; a o le vaega lona lua, e aofia ai mea atonu e mafai ona tatou filifili e fai. O le ā le vaega muamua? O le tele o faafiafiaga i lenei lalolagi amioleaga, ua faaautū i mea e matuā solia ai ma le lē kea mataupu silisili o le Tusi Paia ma tulafono a le Atua. (1 Ioa. 5:19) O Kerisiano moni, e maumauaʻi e leai atu i na ituaiga uma o faafiafiaga. E aofia ai faafiafiaga o loo faamatilatila mai ai le fiafia i faiga sauā lē alofa, faiga faatemoni, tauatane ma le tauafafine, ata ma faamatalaga o faiga matagā tau feusuaʻiga, faiga sauā po o isi faiga e matuā lē mamā. (1 Kori. 6:9, 10; faitau le Faaaliga 21:8.) E tusa lava po o fea e tatou te iai, ae e mafai ona faamaonia atu iā Ieova e tatou te “ʻinoʻino i le leaga,” e ala i le teena o na ituaiga faafiafiaga.—Roma 12:9; 1 Ioa. 1:5, 6.

7, 8. E faapefea ona tatou fuafua pe lelei pe lē lelei se faafiafiaga? Ia faataʻitaʻi.

7 O le vaega lona lua o faafiafiaga, e aofia ai ituaiga o faafiafiaga e lē o taʻusalaina tuusaʻo mai i le Afioga a le Atua. I na tulaga, a o leʻi filifilia se faafiafiaga, e tatau ona tatou fuafua lelei lea faafiafiaga e tusa ai o le silafaga a Ieova i le mea e lelei, e pei ona faailoa mai i mataupu silisili o le Tusi Paia. (Faata. 4:10, 11) Ona tatou faia lea o se filifiliga e maua ai se lotofuatiaifo mamā. (Kala. 6:5; 1 Timo. 1:19) E mafai faapefea ona tatou faia faapea? Manatu i le mea lenei: A o leʻi taumafaina se meaʻai fou e tatou te lē masani ai, e tatou te mananaʻo ia iloa muamua po o ā mea o loo faia ai lenā meaʻai. I se tulaga talitutusa, a o leʻi faia pe auai i se ituaiga o faafiafiaga, e manaʻomia ona tatou iloilo po o ā mea e aofia ai i lenā faafiafiaga.—Efe. 5:17.

8 O se faaaʻoaʻoga, atonu e te naunau i taaloga, ma e leai se afāina o lenā tulaga. E mafai ona avea taaloga o ni mea e mālie ma fiafia ai. Ae faapefea pe afai e te naunau i ni taaloga ona o uiga faasausili ma le faatautavā, e tele ina lamatia ai ola, manunuʻa ai, faia ai gaoioiga lē pulea ma soonafai, pe ona o uunaʻiga faalotonuu, po o nisi mea faapena? Pe a uma ona iloilo mea o loo aofia ai, atonu o le a e iloa e faigatā ona faaōgatusa ou manatu ma le finagalo o Ieova, ma le feʻau o le filemu ma le alofa lea e tatou te talaʻia atu i isi. (Isa. 61:1; Kala. 5:19-21) I le isi itu, pe afai e faia aʻe se faafiafiaga i mea e mamā i le silafaga a Ieova, atonu la e aogā ma faafouina ai oe i lenā faafiafiaga.—Kala. 5:22, 23; faitau le Filipi 4:8.

O le ā le Tele o le Taimi Ou te Faaalu Ai?

9. O le ā e faaalia mai ai i la tatou tali i le fesili, ʻO le ā le tele o le taimi o le a ou faaalu i faafiafiaga?’

9 O le fesili lona lua e te fesili ifo ai iā te oe lava, ʻO le ā le tele o le taimi o le a ou faaalu i  faafiafiaga?’ O la tatou tali i le fesili, o ā mea o loo aofia ai, o le a faaalia mai ai mea e tatou te naunau i ai—o mea e tatou te taliaina ma mea e tatou te lē taliaina. Peitaʻi, o le tali i le fesili, o le ā le tele o le taimi e alu ai, e faaalia mai ai mea o loo tatou faamuamua—o mea e tatou te faatāua ma mea e tatou te lē faatāuaina. E faapefea la ona tatou iloa po o talafeagai le faatāua lea o loo tatou ave i faafiafiaga?

10, 11. E faapefea i upu a Iesu o loo i le Mataio 6:33, ona fesoasoani iā i tatou e fuafua ai po o le ā le tele o le taimi e faaalu i faafiafiaga?

10 Na fetalai Iesu i ona soo: “Ia e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa, ma lou malosi atoa.” (Mare. 12:30) O lea la, e faamuamua i o tatou olaga lo tatou alofa iā Ieova. E tatou te faaalia lenei tulaga e ala i le mulimuli i le apoapoaʻiga a Iesu e faapea: “O lea, ia faaauau pea ona outou saʻili muamua le malo ma le amiotonu a le Atua, ona faaopoopoina ai lea o nei mea uma iā te outou.” (Mata. 6:33) E faapefea ona fesoasoani lenā faamatalaga iā i tatou, e fuafua ai po o le ā le tele o le taimi ma le faatāua e ave i faafiafiaga?

11 Mātau le manatu lenei: Na apoapoaʻi mai Iesu iā i tatou, “ia faaauau pea ona . . . saʻili muamua le malo.” E leʻi faapea mai, ia tatou ʻfaaauau pea ona saʻili na o le malo.’ E  manino mai, sa silafia e Iesu e ao ona tatou saʻili le tele o mea i le olaga e ese mai i le Malo. E tatou te manaʻomia fale e nonofo ai, meaʻai, lavalava, aʻoaʻoga, galuega, faafiafiaga ma isi mea e tele. Peitaʻi, i na mea uma, e na o le tasi le mea e tatou te saʻilia muamua—o mea e fesootaʻi atu i le Malo. (1 Kori. 7:29-31) O lenā upu moni faavae e tatau ona uunaʻia ai i tatou, e saʻilia mea ua tatou faatulagalua, e aofia ai faafiafiaga, i se auala e mafai ai ona faatino la tatou galuega autū—o le faia lea o mea e fesootaʻi atu i le Malo. Pe a tatou faia faapea, e mafai la ona aogā faafiafiaga e fuafua lelei.

12. E faapefea ona faatatauina le mataupu silisili o loo i le Luka 14:28, i faafiafiaga?

12 O lea la, pe a faaalu le taimi i faafiafiaga, o se mea lelei ona tatou fuafua muamua. (Luka 14:28) E ao ona fuafua po o le ā le tele o lo tatou taimi o le a alu i se faafiafiaga. Ona tatou filifili lea po o le ā le tele o lo tatou taimi o loo alu aogā. Pe afai e avea se faafiafiaga ma itu o le a faatalalē ai i mea tāua, e pei o suʻesuʻega faale-Tusi Paia a le tagata lava ia, tapuaʻiga a le aiga, auai i sauniga faa-Kerisiano po o le faia o se sao i le talaʻia o le Malo, o lona uiga la e lē o alu aogā lo tatou taimi. (Mare. 8:36) Ae afai o se faafiafiaga e fai mai lea taimi i lea taimi, e mafai ona faafouina ai i tatou e faaauau ona saʻilia mea e fesootaʻi atu i le Malo, e tatou te ono manatu la o loo alu aogā le taimi lea e faaalu i lenā ituaiga o faafiafiaga.

O Ai e Matou te Iai Faatasi?

13. Aiseā e tatau ai ona tatou iloilo ma le faaeteete i latou e tatou te iai faatasi i faafiafiaga?

13 O le fesili lona tolu e te fesili ifo ai iā te oe lava, ʻO ai i latou ou te manaʻo e matou te iai faatasi i taimi o faafiafiaga?’ E tāua tele ona iloilo lenei vala o faafiafiaga. Aiseā? Talu ai e matuā taaʻina le manaia po o le lē manaia o a tatou faafiafiaga, i le lelei po o le lē lelei o tagata o loo tatou iai faatasi. E masani lava, o le a atili ona e fiafia e taumafa se meaʻai, pe afai o loo tou taumamafa faatasi ma ni uō lelei. E faapena foʻi le faia o faafiafiaga, e masani lava ona e matuā fiafia e fai pe afai o loo tou faia faatasi ma ni aumea lelei. O lea la, e mautinoa lava o le toʻatele o i tatou, aemaise lava i talavou, e fiafia i se faafiafiaga o loo iai faatasi ma isi. Peitaʻi, ina ia faamautinoa o le a aogā se faafiafiaga, o se ala atamai le iloilo muamua po o ā ituaiga tagata e filifili e auai faatasi, ae po o ā foʻi ituaiga tagata e ao ona ʻalofia.—2 No. 19:2;  faitau le Faataoto 13:20; Iako. 4:4.

14, 15. (a) O le ā le faaaʻoaʻoga na faataatia e Iesu i le filifilia o uō lelei? (e) O ā fesili e tatau ona tatou fesili ifo ai iā i tatou lava e tusa ai o a tatou uō?

14 O le mulimuli i le faaaʻoaʻoga a Iesu i le filifilia o ē e latou te faatasitasi, o le a fesoasoani tele iā i tatou. Talu mai le amataga, sa alofa Iesu i tagata. (Faata. 8:31) A o iai i le lalolagi, sa ia faaalia le manatu alofa i ituaiga uma o tagata. (Mata. 15:29-37) Peitaʻi, sa silafia e Iesu e ese le faaleuō, ese le avea ma uō māfana. E ui sa faaleuō Iesu i le toʻatele o tagata, ae e na o ē na ausia ni agavaa patino na avea ma ana uō māfana. Na faapea atu Iesu i ona aposetolo faamaoni e toʻa 11: “O aʻu uō outou pe afai tou te faia mea ua ou poloaʻi atu ai.” (Ioa. 15:14; tagaʻi i le Ioane 13:27, 30.) E pau i latou na talia e Iesu o ni uō, o ē na mulimuli atu iā te ia ma auauna iā Ieova.

15 O lea la, pe a e manatunatu pe faamata e tatau ona e filifilia se tagata maʻoti e avea ma uō māfana pe leai, o se mea atamai le manatua o le fetalaiga a Iesu. Ia fesili ifo iā te oe lava i fesili nei: ʻPo o faaalia i upu ma gaoioiga a lenei tagata, o loo ia usitaʻia poloaʻiga a Ieova ma Iesu? Po o tutusa a ma amioga ma mea e ma te faatāuaina, e faavae mai i le Tusi Paia? Pe o le a avea le aumea atu iā te ia, ma itu e faalaeiau ai aʻu e faamuamua le Malo i loʻu olaga, ma avea ma auauna faamaoni a Ieova?’ Afai e te mautinoa o tali i na fesili o le ioe, ua e maua la se aumea lelei e mafai ona lua olioli faatasi i taimi o faafiafiaga.—Faitau le Salamo 119:63; 2 Kori. 6:14; 2 Timo. 2:22.

Po o Talafeagai a Tatou Faafiafiaga?

16. O ā mea e ao ona tatou iloa e tusa ai o a tatou faafiafiaga?

16 Sa tatou talanoaina puupuu vala e tolu o faafiafiaga—o ituaiga faafiafiaga, le tele o le taimi e faaalu ai, ma i latou e tatou te iai faatasi. Ina ia aogā a tatou faafiafiaga, e tatau ona ōgatusa nei vala taʻitasi ma tapulaa faale-Tusi Paia. O lea la, a o leʻi faia se ituaiga o faafiafiaga, e manaʻomia ona tatou iloiloina muamua. Pe a iloilo ituaiga o faafiafiaga, e tatou te fia iloa: ʻO ā mea o loo aofia ai? Pe e mamā pe matagā?’ (Faata. 4:20-27) E tusa ai o le taimi, e tatou te fia iloa: ʻO le ā le tele o le taimi o le a ou faaalu i lenei faafiafiaga? Po o talafeagai le umi pe leai?’ (1 Timo. 4:8) Ma e tusa ai o ē o le a iai faatasi, e ao ona tatou iloa: ʻO ai o le a matou auai faatasi i le faafiafiaga? Po o i latou o ni uō lelei pe leaga?’—Fai. 9:18; 1 Kori. 15:33.

17, 18. (a) E faapefea ona tatou iloiloina i tatou lava, ina ia iloa po o ōgatusa a tatou faafiafiaga ma tapulaa a le Tusi Paia? (e) O le ā e te maumauaʻi e fai pe a filifilia au faafiafiaga?

17 Pe afai e lē o ōgatusa se ituaiga o faafiafiaga ma tapulaa a le Tusi Paia i se tasi o nei vala e tolu, o lona uiga la e lē o talafeagai lea faafiafiaga. I le isi itu, pe afai e tatou te mautinoa o loo ōgatusa a tatou faafiafiaga ma tapulaa a le Tusi Paia i nei vala uma e tolu, o le a faamamaluina la Ieova ma aogā iā i tatou a tatou faafiafiaga.—Sala. 119:33-35.

18 O lea la, pe a oo mai i faafiafiaga, seʻi o tatou taumafai e filifili le mea saʻo, faaalu le taimi talafeagai e tatau ona alu ai, ma faia faatasi ma aumea lelei. Ioe, tau ina ia avea ma o tatou faanaunauga le mulimuli i le fautuaga a le Tusi Paia e faapea: “Pe tou te aai, pe inu, pe faia se tasi mea, ia faia mea uma lava ina ia faamamaluina ai le Atua.”—1 Kori. 10:31.

[Faaopoopoga i lalo]

^ pala. 2 I lenei mataupu, o le upu “faafiafiaga” o loo faasino atu i so o se mea e tatou te faia ina ia maua ai le fiafia. E aofia ai taaloga, faamalositino, tafaoga ma isi mea faapena.

Pe Mafai Ona E Faamatala?

E tusa ai o faafiafiaga, e mafai faapefea ona e faatatauina mataupu silisili o loo i le . . .

Filipi 4:8?

Mataio 6:33?

Faataoto 13:20?

[Fesili mo le Suʻesuʻega]

[Siata i le itulau 9]

(Tagaʻi i le lomiga mo le ata atoa)

Ituaiga

[Siata i le itulau 10]

(Tagaʻi i le lomiga mo le ata atoa)

Taimi

[Siata i le itulau 12]

(Tagaʻi i le lomiga mo le ata atoa)

O ai

[Ata i le itulau 10]

E faapefea ona tatou mulimuli i le faaaʻoaʻoga a Iesu i le filifilia o a tatou uō ma faafiafiaga?