Skip to content

Skip to table of contents

Faatuatua iā Ieova, “le Atua o Faamāfanafanaga Uma”

Faatuatua iā Ieova, “le Atua o Faamāfanafanaga Uma”

 Faatuatua iā Ieova, “le Atua o Faamāfanafanaga Uma”

“Ia viia le Atua o le Tamā o lo tatou Alii o Iesu Keriso, le Tamā o le alofa mutimutivale, ma le Atua o faamāfanafanaga uma.”—2 KORI. 1:3.

1. O le ā e manaʻomia e tagata e tusa lava po o le ā lo latou matutua?

TALU mai lava le taimi na tatou fananau ai, e tatou te manaʻomia se faamāfanafanaga. Pe a manaʻomia e se pepe se faamāfanafanaga, ona tagi lea ina ia faailoa mai ai iā i tatou. Atonu ua manaʻo e sii o ia po ua fia ʻai foʻi. E oo lava i le taimi ua tatou matutua ai, e masani ona tatou manaʻomia se faamāfanafanaga, aemaise lava pe a feagai ma tulaga faigatā.

2. O le ā le faamautinoaga ua aumaia e Ieova mo ē e faatuatua iā te ia?

2 E masani ona aumai e o tatou aiga ma uō sina faamāfanafanaga iā i tatou. Peitaʻi, o nisi taimi e iai mea e tutupu e tatou te mafatia ai, ae e lē mafai ona latou faia i ai se mea. E na o le Atua e mafai ona aumaia iā i tatou faamāfanafanaga, e tusa lava po o le ā le matuā faigatā o lo tatou tulaga ua i ai. Ua faamautinoa mai e lana Afioga iā i tatou: “E latalata Ieova iā i latou uma e valaau atu iā te ia, . . . e faafofoga foʻi o ia i a latou alaga, ma ia faaolaina i latou.” (Sala. 145:18, 19) Ioe, “o loo silasila mai fofoga o Ieova i ē e amiotonu, ma e faafofoga mai foʻi ona taliga i la latou alaga atu mo se fesoasoani.” (Sala. 34:15) Peitaʻi afai e tatou te fia maua le lagolagosua ma le faamāfanafanaga a le Atua, e tatau ona tuu atu lo tatou faatuatuaga iā te ia. Na faamanino mai e le faisalamo o Tavita lenā mea ina ua pese e faapea: “E avea Ieova ma mauga e sulufaʻi i ai so o se tasi ua nutimomoia, o le mauga e sulufaʻi i ai i taimi o puapuaga. E faatuatua iā te oe o ē e iloa lou suafa, Ieova e, e te lē tuua lava o ē o loo saʻili iā te oe.”—Sala. 9:9, 10.

3. Na faapefea ona faataʻitaʻia mai e Iesu le alofa o Ieova i Ona tagata?

3 E pele iā Ieova ona tagata tapuaʻi. Na faamanino mai e Iesu lenei mea ina ua ia fetalai: “Pe e lē faatauina atu ea ni tamaʻi manulele se lima i tupe iti e lua? Ae e lē galo i le Atua se tasi o na tamaʻi manulele. Ae ua faitaulia lauulu uma o o outou ulu. Aua neʻi outou fefefe; e sili atu ona tāua outou nai lo tamaʻi manulele e tele.” (Luka 12:6, 7) E ala i le perofeta o Ieremia, na taʻu atu e Ieova i Ona tagata anamua e faapea: “O le alofa e faavavau na ou alofa ai iā te oe. O le mea lea na ou tosina mai ai oe i loʻu alofa faamaoni.”—Iere. 31:3.

4. Aiseā e mafai ai ona tatou faatuatuaina folafolaga a Ieova?

4 O le faatuatuaina o Ieova ma le faataunuuga o ana folafolaga, e aumaia ai iā i tatou faamāfanafanaga i taimi o faigatā. O lea e tatau ai ona tatou faatuatua i le Atua e pei o Iosua, o lē na taʻutino mai: “E leʻi iʻuvale se upu e tasi i upu lelei uma na fetalai mai ai Ieova lo outou Atua iā te outou. Ua faataunuuina uma iā te outou. E leʻi iʻuvale se tasi o na upu.” (Iosua 23:14) E lē gata i lea, e mafai foʻi ona tatou mautinoa, e tusa lava pe tatou te mafatia mo sina taimi i tulaga faigatā, ae “e faamaoni le Atua,” ma o le a lē taitai ona ia tuulafoaʻia ana auauna faamaoni.—Faitau le 1 Korinito 10:13.

5. E mafai faapefea ona tatou faamāfanafana atu i isi?

5 Ua taʻua e le aposetolo o Paulo Ieova o le “Atua o faamāfanafanaga uma.” “O le faamāfanafana,” o lona uiga ia faatoʻafimālie se tasi o loo mafatia pe faanoanoa. E mafai ona faia faapea e ala i le faaitiitia o lona mafatia po o le faavauvau, ma avatu iā te ia se faalaeiauga. E mautinoa o le mea lenei e faia e Ieova. (Faitau le 2 Korinito 1:3, 4.) E lē mafai e se mea po o se tasi ona taofia lo tatou Tamā i le lagi, o lea e na te  faaaogā ai so o se auala e manaʻomia, ina ia saunia ai faamāfanafanaga mo ē e alolofa iā te ia. Ona o lea, e mafai foʻi ona tatou faamāfanafana i uso talitonu “ua oo i ai so o se puapuaga.” E mafai ona tatou faia faapea e ala i le “faamāfanafanaga ua faamāfanafanaina ai i tatou e le Atua.” O nei faaupuga ua faailoa mai ai, e leai se isi e sili ona ia faamāfanafanaina ē o loo mafatia, nai lo o Ieova.

Feagai ma Māfuaaga o Mafatiaga

6. Taʻu mai ni faaaʻoaʻoga o ni mea e ono māfua ai ona tatou mafatia.

6 E tatou te manaʻomia faamāfanafanaga i le tele o vala o le olaga. O se tasi o māfuaaga sili e faanoanoa ai, o le maliu lea o se tasi e pele iā i tatou, aemaise lava se paaga faaipoipo po o se tasi o le fanau. E ono manaʻomia foʻi faamāfanafanaga, pe a aafia se tagata i faiga faailoga tagata pe faaituʻau. E manaʻomia foʻi e se tasi faamāfanafanaga ona o faalētonu tau i le soifua mālōlōina, le tulaga matua, mativa, faafitauli i faaipoipoga, po o tulaga pagatia ua iai le lalolagi.

7. (a) O ā ituaiga faamāfanafanaga e manaʻomia pe a feagai ma tulaga pagatia? (e) O le ā e mafai ona faia e Ieova ina ia faamālōlō ai se loto ua ʻmomomo ma nutimomoia’?

7 I taimi o mafatiaga, e tatou te ono manaʻomia ai faamāfanafanaga e faatoʻafimālie ai o tatou loto, mafaufau, faalogona, soifua mālōlōina faaletino ma le faaleagaga. O se faaaʻoaʻoga, seʻi manatu i le loto. Ua taʻu mai i le Afioga a le Atua, e mafai ona ʻmomomo ma nutimomoia’ o tatou loto. (Sala. 51:17) E mautinoa e mafai ona taulima e Ieova lenei tulaga, auā o loo “faamālōlō e ia o ē ua loto momomo, ma fusifusia o latou manuʻa tigā.” (Sala. 147:3) E oo lava foʻi i tulaga e sili ona faigatā, e mafai e le Atua ona aumaia le mapusaga i se loto ua mafatia, pe afai e tatou te tatalo atu iā te ia ma le faatuatua atoatoa ma usitaʻia ana faatonuga.—Faitau le 1 Ioane 3:19-22; 5:14, 15.

8. E faapefea ona fesoasoani mai Ieova iā i tatou pe a feagai ma mafatiaga o le mafaufau?

8 E masani ona manaʻomia e o tatou mafaufau ni faamāfanafanaga, ona e mafai ona matuā mafatia o tatou mafaufau ona o tofotofoga eseese. E lē mafai i so tatou lava malosi ona onosaia ai nei tofotofoga o le faatuatua. Peitaʻi, na pese le faisalamo: “Ina ua tele popolega o loʻu loto, na fiafia loʻu loto ona o au faamāfanafanaga.” (Sala. 94:19) E lē gata i lea, na tusi Paulo: “Aua neʻi popole i se mea, ae ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai; ona leoleoina ai lea o o outou loto ma mafaufau i le filemu mai i le Atua, e silisili i mea uma lava e manatu i ai, e ala iā Keriso Iesu.” (Fili. 4:6, 7) O le faitauina ma le manatunatu loloto i le Tusi Paia, o se fesoasoani sili lea e feagai ai ma mafatiaga o le mafaufau.—2 Timo. 3:15-17.

9. E mafai faapefea ona tatou feagai ma faalogona mafatia?

9 O nisi taimi, e tatou te ono matuā lotovaivai ma iʻu ai ina lofitūina i faalogona lē saʻo. Atonu e tatou te manatu e lē mafai ona tatou faatinoina se tiute tauave faale-Tusi Paia, po o se faaeaga o le auaunaga. E mafai foʻi e Ieova ona faamāfanafana ma fesoasoani mai iā i tatou i lenei vala. O se faataʻitaʻiga: Ina ua faatonuina Iosua e taʻitaʻia tagata Isaraelu faasaga i nuu malolosi sa fai ma fili, na faapea atu Mose i tagata: “Ia outou lototetele ma faamalolosi. Aua e te fefe pe mataʻu iā i latou, auā e savali Ieova lou Atua faatasi ma oe. Na te lē tuua oe, na te lē tuulafoaʻi lava iā te oe.” (Teu. 31:6) Faatasi ai ma le lagolagosua a Ieova, na mafai ai e Iosua ona taʻitaʻia tagata o le Atua i le Nuu o le Folafolaga, ma manumalo i o latou fili uma. Muamua atu i le Sami Ulaula, sa faapena foʻi ona fesoasoani ai Ieova iā Mose.—Eso. 14:13, 14, 29-31.

10. O le ā le fesoasoani e mafai ona tatou maua pe a aafia lo tatou soifua mālōlōina faaletino i mafatiaga?

10 O mea mataʻutia o loo tutupu, e mafai ona iai se aafiaga lē lelei i lo tatou soifua mālōlōina faaletino. O le mea moni, o le lelei o le taumafa, lava le mālōlō ma faamalositino, ma ia tumamā pea, e mafai ona iai se aafiaga lelei iā i tatou. Pe a iai se vaaiga lelei faaleagaga e faavae mai i le Tusi Paia, o le a mafai foʻi ona iai se aafiaga lelei i o tatou tino. O lea la, pe a feagai ma ni tulaga matuā  tigā, e tāua tele ona manatua mea na tutupu iā Paulo ma ana upu faalaeiau nei: “Ua omia i matou i puapuaga, ae e lē taofiofia ai; ua fememeaʻi i matou, ae e lē matuā fememeaʻi ai; ua sauāina i matou, ae e lē tuulafoaʻiina ai; ua lafotuina i matou, ae e lē faaumatia ai.”—2 Kori. 4:8, 9.

11. E mafai faapefea ona togafitia se maʻi faaleagaga?

11 O nisi puapuaga e mafai ona iai se aafiaga e faaleagaina ai lo tatou soifua mālōlōina faaleagaga. E mafai foʻi e Ieova ona laveaʻiina i tatou mai lenei tulaga. Ua faamautinoa mai e lana Afioga: “E lagolago e Ieova i latou uma ua paʻuʻū, ma faatulaʻi i latou uma ua faanoʻunoʻu.” (Sala. 145:14) Ina ia maua se fesoasoani e togafitia ai se maʻi faaleagaga, e tatau ona tatou saʻili atu i le fesoasoani a toeaina Kerisiano. (Iako. 5:14, 15) Pe a manatua i taimi uma le faamoemoe faale-Tusi Paia o le ola e faavavau, e mafai ona fesoasoani e faamalosia ai i tatou i taimi e tofotofoina ai lo tatou faatuatua.—Ioa. 17:3.

Faaaʻoaʻoga o Faamāfanafanaga Mai i le Atua

12. Faamatala le auala na faamāfanafana ai e Ieova Aperaamo.

12 Na faapea mai se faisalamo: “[Ieova e] ia e manatua lau afioga i lau auauna, lea ua ou faatalitali i ai e tusa ma lau folafolaga. Ua avea ma faamāfanafanaga i loʻu tigā, auā o lau afioga ua faaolaina ai aʻu.” (Sala. 119:49, 50) Ua iā i tatou i aso nei le Afioga tusia a Ieova, lea o loo iai le tele o faaaʻoaʻoga o faamāfanafanaga mai i le Atua. O se faaaʻoaʻoga, sa mafatia Aperaamo ina ua ia iloa o le a faaumatia e Ieova Sotoma ma Komoro. Na fesili atu lenā augātamā faatuatua i le Atua: “Pe e te faaumatia ea o ē e amiotonu faatasi ma ē e amioleaga?” Sa faamāfanafanaina e Ieova Aperaamo e ala i le faamautinoa mai iā te ia e faapea, pe afai e na o le 50 tagata amiotonu o le a maua ai, o le a Ia lē faaumatiaina Sotoma. Peitaʻi, na faalima ona toe fesili atu Aperaamo iā Ieova: Ae faapefea pe afai e na o le 45, 40, 30, 20, pe na o le 10 tagata amiotonu? Sa faamautinoa mai ma le onosaʻi ma le agalelei e Ieova iā Aperaamo, o le a lē faaumatiaina Sotoma. E ui lava e leʻi atoa se toʻa sefulu o tagata amiotonu na iai i lenā vaipanoa, ae na faasaoina e Ieova Lota ma ona afafine.—Kene. 18:22-32; 19:15, 16, 26.

13. Na faaalia faapefea e Hana lona faatuatuaina o Ieova?

13 Sa matuā naunau le avā a Elekana, o Hana, ia maua sana tama. Ae sa lē fanau o ia, ma o lenā tulaga na matuā mafatia ai o ia. Sa ia tatalo atu iā Ieova e uiga i lea mataupu, ma na faapea atu le Ositaulaga Sili o Eli iā te ia: “Tau ina ia foaʻi mai e le Atua o Isaraelu le mea na e ōle atu ai.” O lenei faamatalaga na faamāfanafanaina ai Hana, “ma ua lē foliga popole foʻi o ia.” (1 Samu. 1:8, 17, 18) Sa faatuatua atu Hana iā Ieova, ma tuu  atu ma le mautinoa mea uma i Ona aao. E ui lava e leʻi iloa e Hana po o le ā le mea o le a tupu, ae sa maua e ia le filemu o le loto. Mulimuli ane, sa tali mai Ieova i lana tatalo. Sa tō o ia ma fanau mai se tama tama, ma faaigoa iā Samuelu.—1 Samu. 1:20.

14. Aiseā na manaʻomia ai e Tavita se faamāfanafanaga, ma o ai na ia liliu atu i ai?

14 O le tupu o Isaraelu anamua o Tavita, o se tasi lea o faaaʻoaʻoga o sē na faamāfanafanaina e le Atua. Talu ai o Ieova “e vaai i le loto,” ina ua ia filifilia la Tavita e avea ma tupu o Isaraelu mulimuli ane, sa ia silafia na tuutoina moni Tavita i le tapuaʻiga moni. (1 Samu. 16:7; 2 Samu. 5:10) Peitaʻi, mulimuli ane na faia e Tavita le mulilua ma Patesepa, ma taumafai e natia le agasala e ala i le fasiotia o le tane a Patesepa. Ina ua iloa e Tavita le matuiā o lana agasala, ona ia tatalo atu lea iā Ieova e faapea: “E tusa ma lou alofa faamaoni. Ia e tafiesea aʻu solitulafono e tusa ma le tele o lou alofa mutimutivale. Ia e matuā faamamā iā te aʻu mai i laʻu mea sesē, ma faamamā foʻi iā te aʻu mai i laʻu agasala. Auā ua ou iloa aʻu solitulafono, ma ua iai pea i oʻu luma laʻu agasala.” (Sala. 51:1-3) Sa salamō moni Tavita, ma na faamagalo o ia e Ieova. Peitaʻi, sa tatau ona feagai Tavita ma āuga o lana mea sesē na fai. (2 Samu. 12:9-12) E ui i lea, sa avea le alofa mutimutivale o Ieova ma puna o faamāfanafanaga i lana auauna lotomaulalo.

15. O le ā le fesoasoani na tuuina atu e Ieova iā Iesu ina ua lata i lona maliu?

15 A o i ai Iesu i le lalolagi, sa ia fesagaʻia le tele o tulaga faigatā. E leʻi taofia e Ieova nei tofotofoga o le faatuatua, ma na tumau pea le faamaoni o Iesu o se tagata lelei atoatoa, o lē sa faatuatuaina pea Ieova ma faasilisilia Lana pule silisili ese. Ina ua lata ona faalataina ma fasiotia Iesu, na tatalo atu iā Ieova: “E lē o loʻu loto, ae ia faia lou finagalo.” Ona faaali mai lea o se agelu iā Iesu ma faamalosi iā te ia. (Luka 22:42, 43) Sa tuuina atu e le Atua le faamāfanafanaga, le malosi ma le fesoasoani sa ia manaʻomia i lenā taimi.

16. O le ā e mafai ona fai e le Atua i mafatiaga e tatou te ono fesagaʻia, pe afai ua lamatia o tatou ola ona o le tausisia o le faamaoni?

16 E tusa lava foʻi pe e tatou te iai i se tulaga e lamatia ai le ola ona o le tutumau mausalī o ni Kerisiano, ae e mafai, ma o le a fesoasoani mai Ieova iā i tatou ina ia faamaoni atu pea iā te ia. E lē gata i lea, ua faamāfanafanaina i tatou i le faamoemoe o le toetū. Ma e tatou te matuā tulimataʻi atu i le aso o le a “faaumatia” ai le fili mulimuli, o le oti lea! (1 Kori. 15:26) E lē mafai ona galo iā Ieova ana auauna faamaoni o ē ua maliliu, faapea foʻi ma isi, ma o le a toe faatutūina mai i latou. (Ioa. 5:28, 29; Galu. 24:15) O le mautinoa i le folafolaga a Ieova e faatatau i le toetū, ua aumaia ai iā i tatou faamāfanafanaga ma se faamoemoe mautinoa i taimi o sauāga.

17. E faapefea ona faamāfanafanaina i tatou e Ieova pe a maliu se tasi e pele iā i tatou?

17 Maʻeu le faamāfanafanaina i le iloa ua iai i ē pele iā i tatou ua maliliu, le faamoemoe o le toe soifua mai i se lalolagi fou matagofie. O le a lē toe iai mea uma o loo māfua ai mafatiaga i aso nei! Ma o se faaeaga mo le “motu o tagata e toʻatele” o auauna a Ieova, o ē o le a faasaoina mai i le iʻuga o lenei faiga leaga o mea, le faafeiloaʻi ma aʻoaʻoina i latou o le a toetutū mai ma ola i luga o le lalolagi!—Faaa. 7:9, 10.

O Loo i Lalo Ifo Aao o le Faavavau o le Atua

18, 19. Ua faapefea ona faamāfanafanaina auauna a le Atua pe a sauāina?

18 Na faamautinoa atu e Mose i tagata Isaraelu e ala i upu o se pese faamalosiau ma faamāfanafanaloto: “O lou lafitaga o le Atua mai i anamuā,  ma o loo i . . . lalo ifo aao o le faavavau.” (Teu. 33:27) Na mulimuli ane taʻu atu e le perofeta o Samuelu i tagata Isaraelu: “Aua neʻi outou liliuese mai i le mulimuli atu iā Ieova, ae ia outou auauna iā Ieova ma o outou lotoatoa. . . . e lē tuulafoaʻiina e Ieova lona nuu ona o lona suafa sili.” (1 Samu. 12:20-22) O le a lē tuulafoaʻiina i tatou e Ieova pe afai e tatou te pipiimau atu iā te ia i le tapuaʻiga moni. O le a ia tuuina mai i taimi uma le fesoasoani e tatou te manaʻomia.

19 E mautinoa o loo tuuina mai pea e le Atua i ona tagata le fesoasoani ma le faamāfanafanaga e manaʻomia i nei aso e sili ona faigatā. Ua silia i le selau tausaga o sauāina ma faafalepuipuiina le faitau afe o o tatou uso ma tuafāfine talitonu i le lalolagi aoao, ona o le auauna atu iā Ieova. O mea ua tutupu iā i latou ua faamaonia mai ai, e moni e faamāfanafanaina e Ieova ana auauna i taimi o faigatā. O se faaaʻoaʻoga, e 23 tausaga na faasala ai i le falepuipui se tasi o o tatou uso, i se atunuu sa avea muamua ma vaega o le Soviet Union, ona o ona talitonuga. E ui i lea, sa mafai lava ona maua le auala e faaoo atu ai meaʻai faaleagaga iā te ia, ina ia faamalosia ma faamāfanafanaina ai o ia. Na ia faapea mai: “A o faagasolo na tausaga uma, sa aʻoaʻoina aʻu ia faatuatua atu iā Ieova ma maua mai le malosi mai iā te ia.”—Faitau le 1 Peteru 5:6, 7.

20. Aiseā e tatou te mautinoa ai o le a lē tuulafoaʻiina i tatou e Ieova?

20 E tusa lava po o ā tulaga e tatou te ono fesagaʻia, e tāua ona teu i manatu upu faamāfanafanaloto a le faisalamo: “E lē tuulafoaʻiina e Ieova lona nuu.” (Sala. 94:14) E ui lava e tatou te manaʻomia faamāfanafanaga, ae ua iā i tatou foʻi le faaeaga tāua o le avatu o faamāfanafanaga i isi. E pei ona talanoaina i le mataupu o loo sosoo mai, e mafai ona fai so tatou sao i le faamāfanafanaina o ē mafatia i lenei lalolagi pagatia.

O le ā Lau Tali?

• O ā nisi o mea e ono māfua ai ona tatou mafatia?

• E faapefea ona faamāfanafanaina e Ieova ana auauna?

• O le ā e mafai ona faamāfanafanaina ai i tatou, pe a fesagaʻi ma tulaga e lamatia ai le ola?

[Fesili mo le Suʻesuʻega]

[Pusa/Ata i le itulau 25]

LE AUALA E FEAGAI AI MA MEA E MAFAI ONA AAFIA AI O TATOU . . .

loto Sala. 147:3; 1 Ioa. 3:19-22; 5:14, 15

mafaufau Sala. 94:19; Fili. 4:6, 7

faalogona Eso. 14:13, 14; Teu. 31:6

soifua mālōlōina faaletino 2 Kori. 4:8, 9

soifua mālōlōina faaleagaga Sala. 145:14; Iako. 5:14, 15