Skip to content

Skip to table of contents

Le Lomiga Faa-Peretania ua Faaupuina Faafaigofie

Le Lomiga Faa-Peretania ua Faaupuina Faafaigofie

 Le Lomiga Faa-Peretania ua Faaupuina Faafaigofie

E MATOU te fiafia e faailoa atu, e amata atu i lenei lomiga mo suʻesuʻega o Le Olomatamata, o le a lomia ai i masina taʻitasi se lomiga ua faaupuina faafaigofie i le gagana faa-Peretania, ma o le a faataʻitaʻi lenei faiga mo se tausaga. O le a iai mataupu mo suʻesuʻega, ma pe a lava le avanoa, o le a filifili mai foʻi ma ni mataupu faaopoopo. E matou te talitonu o lenei faiga o le a faamalieina ai manaʻoga faaleagaga o le toʻatele o Molimau a Ieova. Aiseā ua manatu ai faapea?

O le faa-Peretania o le gagana masani lea o loo tautatala ai o tatou uso i atunuu e pei o le Atu Solomona, Fiti, Ghana, Laiperia, Nigeria, Papua Niu Kini ma Kenya. E ui o loo tautatala o tatou uso i nei atunuu i gagana e masani ai tagata o le atunuu, ae e masani ona latou faaaogā le gagana faa-Peretania, e talanoa ai i sauniga a le faapotopotoga ma le faiva i le fanua. Peitaʻi, e latou te faaaogā le gagana faa-Peretania e faigofie atu i lo lea e faaaogā i a tatou lomiga. E iai foʻi isi tagata o Ieova ua siitia atu i atunuu, ia e tatau ona latou faaaogā ai le gagana faa-Peretania e fesootaʻi ai ma tagata, e tusa lava pe e itiiti so latou malamalamaga i lea gagana. E lē gata i lea, e lē o mafai ona latou auai atu i sauniga a le faapotopotoga e faia i la latou lava gagana.

O mataupu o loo tatou iloiloina i vaiaso taʻitasi i le Suʻesuʻega o le Olomatamata, o auala faapitoa ia ua saunia mai ai meaʻai faaleagaga mo i tatou i le taimi tatau. O lea, ina ia fesoasoani i tagata uma o loo auai ia aogā atoatoa iā i latou nei mataupu, ua faaaogā ai i le lomiga Faa-Peretania ua faaupuina faafaigofie, se gagana e faigofie le kalama ma le faatulagaina o upu. O lenei lomiga fou o le a ese foliga o lona faavaa. O tamaʻi ulutala, palakalafa, fesili autalu, ma ata i mataupu o suʻesuʻega, o le a tutusa ma ata o loo i le lomiga e masani ai. O lea la, e mafai e tagata uma ona mulimuli atu po o le ā lava le lomiga o loo iai, ma fai se sao i le Suʻesuʻega o le Olomatamata. Ina ia iloa le eseesega o le auala o loo faaupu ai lomiga e lua, tagaʻi i le faataʻitaʻiga i le pito i lalo mai le parakalafa e 2, o le mataupu muamua mo suʻesuʻega i lenei lomiga.

O lo matou faamoemoe ia avea lenei lomiga fou ma tali o tatalo a le toʻatele iā Ieova: “Ia e faamalamalama mai iā te aʻu, ina ia ou aʻoaʻoina ai au poloaʻiga.” (Sala. 119:73) E matou te mautinoa o le a mafai e i latou e itiiti se malamalamaga i le faa-Peretania, faapea ma nisi o fanau lāiti e tautatala i le faa-Peretania, ona sauniuni lelei mo le Suʻesuʻega o le Olomatamata i vaiaso taʻitasi. E tatou te faafetai ai iā Ieova ona o lona ʻalofa i le ʻauuso atoa,’ ua ia faaaogā ai le “pologa faamaoni ma le faautauta,” e aumaia le anoanoaʻi o meaʻai faaleagaga.​—1 Pete. 2:17; Mata. 24:45.

Vaega Pule o Molimau a Ieova