Skip to content

Skip to table of contents

Pe e Tatau Ona Papatiso Talavou?

Pe e Tatau Ona Papatiso Talavou?

 Pe e Tatau Ona Papatiso Talavou?

UA FAAPEA mai Tau, * o se tamā Kerisiano mai Filipaina: “Ua ou fiafia lava ina ua avea loʻu afafine ma auauna a Ieova, ma ou te mautinoa ua fiafia foʻi o ia.” Na tusi se tasi tamā mai Eleni: “E matuā faafiafiaina i maʻua ma laʻu avā ona sa papatiso la ma fanau e toʻatolu, ma avea o ni Molimau a Ieova a o talavou i latou. O loo latou agaʻigaʻi pea i luma faaleagaga, ma o loo olioli i le auaunaga iā Ieova.”

E faafiafiaina mātua Kerisiano pe a papatiso a latou fanau, ae i nisi taimi e latou te lagona ai foʻi le popole. Na faapea mai se tasi tinā: “Sa ou matuā fiafia, ae toe popole foʻi.” Aiseā na feteenaʻi ai faalogona o lenei tinā? Na ia toe taʻua: “Ou te malamalama, e tali atu laʻu tama tama iā Ieova mo ana lava filifiliga.”

O le auauna atu iā Ieova o se tasi o ana Molimau papatiso, o se sini e ao ona taulaʻi i ai fanau uma. Peitaʻi, atonu e taumānatu mātua matataʻu i le Atua, ʻOu te iloa o loo agaʻigaʻi i luma laʻu tama, ae pe e lava lona malosi faaleagaga e teena ai faaosoosoga e faia amioga lē mamā, ma faamaoni pea iā Ieova?’ E ono fesili ifo isi iā i latou lava, ʻPe a tofotofoina e saʻilia meafaitino, po o le a faaauau pea ona auauna olioli ma le maelega laʻu tama i le Atua?’ O lea la, o ā ni fautuaga mai le Tusi Paia e fesoasoani i mātua ina ia iloa ai, po ua tatau ona papatiso a latou fanau?

Avea ma Soo—Le Manaʻoga e Sili Ona Tāua

E lē o taʻua i le Tusi Paia tausaga patino o se tasi ina ia papatiso ai, ae o loo taʻu mai ai le tulaga faaleagaga e manaʻomia, ina ia agavaa ai e uia lenā laasaga. Na faatonuina e Iesu ona soo: “[Ia] fai tagata o nuu uma lava ma soo, ma papatiso atu iā i latou.” (Mata. 28:19) O lea la, e tatau ona papatiso i latou ua uma ona avea ma soo o Keriso.

O le ā lenei mea e taʻua o le soo? Ua faamatalaina i le Insight on the Scriptures: “O le uiga autū o lenei upu, e faatatau atu iā i latou o ē e lē gata e talitonu i aʻoaʻoga a Keriso, ae latou te mulimulituʻi foʻi i ai.” Pe e mafai e fanau lāiti ona avea ma soo moni o Keriso? Na tusi mai se tasi tuafafine, o lē sa avea ma  misionare i Amerika i Saute i le silia i le 40 tausaga, e uiga iā te ia ma ona uso e toʻalua: “E ui lava sa matou lāiti, ae sa lava lo matou matutua e iloa ai e matou te mananaʻo e auauna iā Ieova ma ola i le Parataiso. Sa fesoasoani lo matou tuuina atu iā Ieova, e manumalo ai i faaosoosoga na tulaʻi mai a o talavou. E matou te leʻi salamō i le filifiliga sa matou faia, e tuuina atu o matou ola i le Atua a o lāiti.”

E faapefea ona e iloa ua avea lou alo ma soo o Keriso? Ua taʻua i le Tusi Paia: “E mafai ona iloa le tama i lana amio pe e lelei ma tonu ana mea e fai.” (Faata. 20:11) Seʻi iloilo nisi o amioga e faia e se talavou e iloa ai ʻlona agaʻigaʻi i luma’ o se soo.​—1 Timo. 4:15.

Faamaoniga o le Avea ma Soo

Pe e usitaʻi lou alo iā te oe? (Kolo. 3:20) Pe e na te faia feʻau e faatonu i ai e fai? Ua faapea mai le Tusi Paia e uiga iā Iesu ina ua 12 ona tausaga: “Ua gauaʻi pea o ia [i ona mātua].” (Luka 2:51) E moni, e iai taimi e lē usiusitaʻi ai le fanau i mātua. Peitaʻi, o Kerisiano moni e latou te ʻmulimulituʻi i tulaga aao o Iesu.’ O fanau uma la ua fia papatiso, e tatau ona mātaulia i lo latou usiusitaʻi i o latou mātua.—1 Pete. 2:21.

Mātau mai fesili nei: Po o ʻfaaauau pea ona saʻili muamua le malo’ e lou alo, e ala i le faia o sona sao i le talaʻiga? (Mata. 6:33) Pe e lotomalie lou alo e alu i le talaʻiga, pe seʻi vaganā ua e faamalosia o ia ona faatoʻā alu lea? Po o malamalama lelei i lana avega tauave o se tagata talaʻi e leʻi papatisoina? Pe e naunau e toe foʻi e asi i latou i le oganuu sa faaalia le fiafia? Pe e lototele e faailoa atu i isi tamaiti i le aʻoga ma faiaʻoga, o ia o se Molimau a Ieova?

Pe e tāua i lou alo le auai atu i sauniga a le faapotopotoga? (Sala. 122:1) Pe e naunau e fai sona sao i le Suʻesuʻega o Le Olomatamata ma le Suʻesuʻega faale-Tusi Paia a le Faapotopotoga? Pe e na te faia ma le lotoatoa se sao i le Aʻoga o le Faiva Faatiokarate?—Epe. 10:24, 25.

Pe e taumafai malosi lou alo e tausia le mamā tau amio, e ala i le ʻalofia o aumea leaga i le aʻoga po o se isi lava nofoaga? (Faata. 13:20) O ā ituaiga o musika, ata tifaga, polokalame i le TV, taaloga vitiō ma polokalame i le Initaneti, e fiafia i ai lou alo? Pe e atagia mai i ana upu ma gaoioiga, lona manaʻo e ola e ōgatusa ma tapulaa a le Tusi Paia?

O le ā le tele o lona malamalamaga i le Tusi Paia? Pe e mafai ona ia faamatala mai mea ua ia aʻoaʻoina a o faia le Tapuaʻiga a le Aiga? Pe e mafai ona ia faamatala aʻoaʻoga faavae a le Tusi Paia? (Faata. 2:6-9) Pe e naunau e faitau le Tusi Paia ma lomiga a le vasega o le pologa faamaoni ma le faautauta? (Mata. 24:45) Po o naunau e fia malamalama atili e uiga i mau ma aʻoaʻoga a le Tusi Paia?

E mafai ona fesoasoani nei fesili iā te oe e iloa ai le agaʻigaʻi i luma faaleagaga o lou alo.  Pe a māeʻa ona iloilo nei fesili, e te ono manatu e iai nisi mea e manaʻomia ona ia faaleleia a o leʻi papatiso. Peitaʻi, pe afai ua faamaonia mai i le auala o loo ia ola ai, ua avea o ia ma soo ma ua uma ona tuuina atu lona ola i le Atua, e te ono manatu la ua tatau loa ona papatiso lau tama.

E Mafai e Fanau Ona Viia Ieova

Sa faaalia le faamaoni e le toʻatele o auauna a le Atua, i le taimi o talavou ma a o lāiti foʻi. O nisi o na auauna faamaoni e aofia ai Iosefa, Samuelu, Iosia ma Iesu. (Kene. 37:2; 39:1-3; 1 Samu. 1:24-28; 2:18-20; 2 No. 34:1-3; Luka 2:42-49) E lē taumatea sa aʻoaʻoina lelei a o lāiti afafine e toʻafā o Filipo, o ē sa faia valoaga.—Galu. 21:8, 9

Ua faapea mai se tasi o Molimau i Eleni: “Sa ou papatiso i le 12 o oʻu tausaga. Ou te leʻi salamō ona o le faia o lenā filifiliga. Ua 24 nei tausaga talu mai lenā taimi, ae e 23 tausaga ua ou auai ai i le auaunaga faataimi atoa. Na fesoasoani tele iā te aʻu le alofa iā Ieova e feagai ai ma faafitauli a o talavou. Ua sili atu nei loʻu malamalama i le Tusi Paia, nai lo le taimi a o 12 oʻu tausaga. Ae na ou alofa iā Ieova, ma manaʻo e auauna iā te ia e faavavau. Ua faafiafiaina aʻu ona o Lana fesoasoani mai, ina ia ou faaauau ai pea i le auaunaga.”

Pe matua pe laʻitiiti, e tatau ona papatiso se tasi, pe afai e faamaonia ua avea o ia ma soo moni. Na tusi le aposetolo o Paulo: “O le loto e faatuatua ai e maua ai le amiotonu, a o le gutu e taʻutino atu ai i luma o tagata, e maua ai le faaolataga.” (Roma 10:10) Pe a uia e se talavou ua avea ma soo o Keriso le laasaga tāua o le papatisoga, ua ausia e ia ma ona mātua se matatiʻa tāua. Aua neʻi iai se mea e taofia ai oe ma lau fanau mai le mauaina o lenā fiafiaga sili.

[Faaopoopoga i lalo]

^ pala. 2 Ua suia nisi o igoa.

[Ata i le itulau 5]

Le Manatu Saʻo i le Papatisoga

E manatu nisi mātua e aogā le papatiso o a latou fanau, ae e iai foʻi lamatiaga, e tai pei o le mauaina o se laisene ave taavale. Peitaʻi, pe e lamatia ea le lumanaʻi manuia o se tagata ona ua papatiso ma faia le auaunaga paia? Ua tali mai le Tusi Paia e leai. Ua faapea mai le Faataoto 10:22: “O le faamanuiaga a Ieova, e faatamaoaiga ai ma e na te lē faaopoopo i ai se tigā.” Na tusi atu Paulo i le talavou o Timoteo: “E moni, e tele mea e maua mai le faamaoni i le Atua ma le lotomalie.”—1 Timo. 6:6.

E moni, e lē faigofie le auauna iā Ieova. Na feagai Ieremia ma le tele o faafitauli a o auauna o se perofeta a le Atua. Ae ui i lea, na ia tusia e uiga i lana tapuaʻiga i le Atua moni: “Na avea . . . lau afioga ma mea e fiafia ma olioli ai loʻu loto; auā ua taʻua aʻu i lou suafa, Ieova e, le Atua o ʻau.” (Iere. 15:16) Na iloa e Ieremia o le auaunaga iā Ieova, o le pogai lea o lona olioli. O le lalolagi a Satani o le pogai lea o le tele o faafitauli. E manaʻomia e mātua ona fesoasoani i a latou fanau, ia iloa le tāua o na manatu e lua.—Iere. 1:19.

 [Pusa/Ata i le itulau 6]

Pe e Tatau Ona Tolopō le Papatisoga a Laʻu Tama?

E iai taimi e ui ina agavaa le fanau e papatiso, ae e ono filifili mātua e tatau ona tolopō le papatisoga. O ā ni māfuaaga mo le faia faapea?

Ou te popole neʻi papatiso laʻu tama, ae mulimuli ane faia e ia se agasala matuiā ma faateʻaina ai. Pe e saʻo ona talitonu o le a lē faasalaina e le Atua se talavou i ana amioga sesē, ona ua tolopōina lona papatisoga? Ua faasino atu upu nei a Solomona i talavou: “Ia e iloa o le a faamasinoina oe e le Atua moni ona o [au amioga].” (Fai. 11:9) Na faamanatu mai e Paulo i tagata uma e tusa lava po o le ā le matutua: “E taʻitasi . . . i tatou uma ma tala atu lana amio i le Atua.”—Roma 14:12.

Po ua papatiso pe e leʻi papatiso, ae e tali atu tagata tapuaʻi uma i le Atua. Aua neʻi galo, e puipuia e Ieova ana auauna e ala i le ʻlē tuua o i latou i se faaosoosoga e sili atu nai lo o mea latou te lavātia.’ (1 Kori. 10:13) E mafai ona latou faatuatua i le lagolagosua a le Atua pe a ʻfaaauau ona mafaufau lelei’ ma teena faaosoosoga. (1 Pete. 5:6-9) Ua tusi mai se tinā Kerisiano: “E tele atu māfuaaga e maua e fanau ua uma ona papatiso e taumamao mai ai i mea leaga a le lalolagi. Na papatiso laʻu tama tama a o 15 ona tausaga, ma ua ia manatu o le papatisoga o se puipuiga mo ia. Ua faapea mai o ia ʻE te lē manaʻo e faia se mea e feteenaʻi ma le tulafono a Ieova.’ O le papatisoga o se uunaʻiga malosi e faia ai le mea tonu.”

Afai na e aʻoaʻoina lau fanau ia usiusitaʻi iā Ieova e ala i au upu ma faaaʻoaʻoga, e mautinoa o le a faaauau ona latou faia faapea pe a māeʻa ona papatiso. Ua taʻua i le Faataoto 20:7: “E savali ma le faamaoni le tagata amiotonu. E fiafia lana fanau pe a mavae atu o ia.”

Ou te manaʻo ia ausia muamua e laʻu tama nisi o sini. E tatau i talavou ona iloa fai galuega, ina ia mafai ona tausia i latou lava i le lumanaʻi. Peitaʻi, e iai lamatiaga o le uunaʻia o i latou e faamuamua tulaga tau aʻoaʻoga ma le mauaina o tupe, nai lo le tapuaʻiga moni. Na fetalai Iesu e uiga i se “fatu,” po o le upu o le Malo, lea e leʻi fua mai: “O le fatu na lūlūina i le vao tuitui, o ia lea ua faalogo i le upu, ae ona o le popole i mea a lenei lalolagi ma le malosi taufaasesē o le ʻoa, ua fetinaʻiina ai le upu ma ua lē fua mai ai.” (Mata. 13:22) E mafai e fuafuaga e faamuamua sini faalelalolagi ae faatulaga lua mea faaleagaga, ona fetinaʻiina ai le faanaunauga o se talavou e auauna i le Atua.

Ua faapea mai se toeaina e uiga i talavou ua agavaa e papatiso, ae lē ioe i ai o latou mātua: “O le taofia o se talavou mai le papatisoina, e mafai ona faalavelavea ai lona agaʻigaʻi i luma, ma lotovaivai ai.” Na tusi foʻi se ovasia femalagaaʻi: “E ono lagona e le talavou le vaivai faaleagaga ma le lē aogā. E ono iʻu ai ina liliu atu o ia i le lalolagi, ina ia lagona ai ua taulau o ia i se mea.”

[Ata]

Pe e tatau ona faamuamua le alu i aʻoga iunivesite?

[Ata i le itulau 3]

E mafai e se tamaitiiti ona faamaonia lona avea ma soo

[Ata i le itulau 3]

Sauniuni ma faia se sao i sauniga

[Ata i le itulau 4]

Usiusitaʻi i mātua

[Ata i le itulau 4]

Auai i le talaʻiga

[Ata i le itulau 4]

Tatalo