E Faapefea Ona ʻManuia Ou Ala’?

“MANUIA”—o se upu e fiafia i ai tagata! Ua taulau manuia nisi i a latou pisinisi ma ua mauʻoa ma taʻutaʻua. O nisi ua moomoo ina ia taulau manuia ae ua iʻuvale o latou faamoemoega.

E tele ina faalagolago lou taulau manuia i mea e taulaʻi i ai lou olaga. E aofia ai foʻi nisi vala tāua se lua, o le auala e faaaogā ai lou taimi ma le malosi, ma lou tausolomua e faia se mea.

Ua iloa e le toʻatele o Kerisiano o le auai i le auaunaga faataimi atoa, ua latou maua ai le faamalieina sili. O le avea o le auaunaga faataimi atoa ma a latou galuega, ua fesoasoani i talavou ma ē matutua ina ia taulau manuia ai. Ona o le lē fiafia o nisi e auai i le talaʻiga, ua faatulaga lua ai le talaʻiga i o latou olaga ae taulaʻi atu i sini e ese mai. Aiseā ua tupu ai lenei mea? O le ā e mafai ona fai ina ia lē galo ai iā te oe mea e sili ona tāua? O ā mea e ao ona e faia, ona “manuia ai lea o ou ala”?​—Iosua 1:8.

Isi Mea e Fai i le Aʻoga ma Mea e te Fiafia e Fai

E manaʻomia ona iai i talavou Kerisiano se vaaiga paleni e faatatau i le auaunaga i le Atua moni, ma le faia o isi mea. E faamālō atu i ē o loo faia faapea, ma e mautinoa o le a iʻu manuia o latou olaga.

Peitaʻi ua matuā aafia nisi talavou Kerisiano i isi meafai i le aʻoga ma mea e latou te fiafia e fai. Atonu e lē leaga nei mea. Peitaʻi, e tatau i talavou Kerisiano ona fesili ifo iā i latou lava: ʻO le ā le tele o loʻu taimi ua alu i le faia o nei mea? O ai o le a matou faatasitasi ai? O ā amioga e faaalia e tagata o loo matou faatasitasi i nei mea? O le ā e ono avea ma taulaʻiga o loʻu olaga?’ E te ono iloa, o lou pupū atu i le faia o nei mea, o le a faaitiitia ai lou taimi ma lou malosi e faatumau ai le lua faiā ma le Atua. O lea, e tāua tele le faatulaga o mea e tatau ona e faamuamua.​—Efe. 5:15-17.

Manatu i le mea na tupu iā Vili. * Na ia taʻua: “I le 12 o oʻu tausaga, na ou auai atu ai i se kalapu voli polo. Sa tele faailoga na ou maua. Sa ou maua foʻi le avanoa e avea ai ma tagata taʻutaʻua i taaloga.” Mulimuli ane, na amata ona popole Vili i aafiaga i lona itu faaleagaga ona o lona pupū i taaloga. I se tasi aso, na moe ai a o faitau lana Tusi Paia. Na ia mātauina foʻi, ua itiiti lona fiafia i le galuega talaʻi. Na ia toe faapea mai: “Sa alu uma loʻu malosi i taaloga ma ou iloa ai ua itiiti loʻu maelega i mea faaleagaga. Na ou iloa e leʻi lava aʻu taumafaiga.”

Aʻoaʻoga Maualuluga

Ua iai i se Kerisiano le matafaioi faale-Tusi Paia o le tausia o lona aiga, e aofia ai ma lo latou itu faaletino. (1 Timo. 5:8) Peitaʻi, pe e manaʻomia se tikeri mai se iunivesite e faia ai lenā mea?

O se mea lelei le iloiloina o aafiaga e ono oo i le faiā a se tasi ma Ieova, ona o le auai i aʻoaʻoga maualuluga. Seʻi faataʻitaʻi lenei mea e ala i se faaaʻoaʻoga faale-Tusi Paia.

Sa avea Paruka ma failautusi a le perofeta  o Ieremia. Na iai le taimi na amata ai ona saʻilia e Paruka mea tetele, nai lo le uaʻi atu i lona faaeaga o le auauna iā Ieova. Na silafia e Ieova lenei mea ma lapataʻia ai o ia e ala mai iā Ieremia: “Ua e saʻili ea mo oe mea tetele? Aua e te saʻilia.”​—Iere. 45:5.

O ā “mea tetele” na saʻilia e Paruka? Atonu sa ia manaʻo e taʻutaʻua i le faiga o mea a Iutaia, po o le fia mauaina o le tele o meafaitino. Po o le ā lava le tulaga, ae na galo iā te ia mea e sili ona tāua, o mea faaleagaga. (Fili. 1:10) Peitaʻi na faalogo Paruka i le lapataʻiga a Ieova e ala mai iā Ieremia, ma faasaoina ai o ia ina ua faaumatia Ierusalema.​—Iere. 43:6.

O le ā se lesona tatou te aʻoaʻoina mai i lenei tala? O le aʻoaʻiga na maua e Paruka e faaalia ai sa iai se mea na faalētonu. Sa ia saʻilia mea tetele mo ia lava. Pe afai ua lava lou tomai e tausia ai oe lava, e lē tau manaʻomia la le alu uma o lou taimi, tupe ma taumafaiga e auai ai i aʻoaʻoga maualuluga, ina ia faamalie ai ou lava faanaunauga po o faanaunauga o ou mātua ma tauaiga.

Ia manatu iā Kolio, o lē e faapolokalameina komepiuta. Ona o uunaʻiga mai i ana aumea, na ave ai isi ana mataupu faaopoopo. E leʻi umi, ae faaitiitia lona taimi mo mea faaleagaga. Ua faapea mai o ia: “E lē toʻafilemu loʻu mafaufau. E ōia loʻu lotofuatiaifo, ona e lē o ausia oʻu sini faaleagaga na faataatitia.”

Ua Alu Uma le Taimi i Galuega Totogi

Ua uunaʻia Kerisiano e le Afioga a le Atua ia galulue mamafa, ma ia avea ma tagata faigaluega po o ni pule e maufaatuatuaina. Na tusi le aposetolo o Paulo: “O so o se mea e tou te faia, ia galue i ai ma le lotoatoa, e pei o loo faia iā Ieova ae e lē o tagata.” (Kolo. 3:22, 23) Peitaʻi, e ui o se mea lelei le galulue mamafa, ae e iai se isi mea e sili atu​—o se faiā lelei ma Lē na foafoaina i tatou. (Fai. 12:13) Pe afai e alu uma le taimi o se Kerisiano i lana galuega totogi, o le a oo ina faatulaga lua mea faaleagaga.

O le pisi tele o se Kerisiano i lana galuega totogi, e oo ai ina matuā vaivai ma lē tausia ai lona lava paleni faaleagaga, ma lē mafai ai ona fesoasoani atu i lona aiga. Na iloa e le Tupu o Solomona “o luuga e lua o galuega mamafa” e vaavaalua ma “le ʻai a le matagi.” Pe a alu uma le taimi o se Kerisiano i galuega totogi, e iʻu ai ina ola popole i taimi uma. E oo ai ina avea ma pologa i lana galuega ma matuā aafia ai lona soifua mālōlōina. Afai o le tulaga lea, po o le a ia “olioli . . . ma fiafia i mea lelei ona o ana galuega  mamafa uma”? (Fai. 3:12, 13; 4:6) Ae e sili atu ona tāua, po o lava se malosi o totoe i le tino ma faalogona, e faia ai ona tiute i le aiga ma mea faaleagaga?

Na alu uma le taimi o Sevesi, o lē e nofo i Europa i Sasaʻe, i lana pisinisi o le faia o togālaau. Na ia faapea mai: “Na viiviia tele aʻu e tagata o le lalolagi ona o loʻu tomai, ma le māeʻa lelei o galuega ou te faia. Ae na matuā afāina loʻu itu faaleagaga ma ou lē toe auai ai i le talaʻiga. E leʻi umi ae ou lē toe auai i sauniga. Sa ou lē amanaʻia fautuaga mai toeaina ona o loʻu faamaualuga, ma ou lē toe aufaatasi ai ma le faapotopotoga.”

E Mafai Ona Taulau Manuia Lou Olaga

Ua uma ona tatou talanoaina gaoioiga e tolu, ia e mafai ona lamatia ai le itu  faaleagaga o se Kerisiano. Po o e aafia i se tasi o nei gaoioiga? Afai o lea, o le a aogā fesili, mau, ma faamatalaga o loo mulimuli mai, e fesoasoani iā te oe e iloa ai po o le a taulau manuia lou olaga.

Isi mea e fai i le aʻoga ma mea e te fiafia e fai: O le ā le tele o loo e aafia ai i na mea? Po ua alu uma lou taimi i na mea, ma ua e lē toe toʻaga ai i mea faaleagaga? Po ua faaitiitia lou fiafia e faatasitasi ma uso talitonu? Afai o lea, ia faaaʻoaʻo i le Tupu o Tavita o lē na augani atu iā Ieova: “Ia e faailoa mai iā te aʻu le ala ou te savali ai.”​—Sala. 143:8.

Sa fesoasoani se ovasia femalagaaʻi iā Vili o lē na taʻua muamua. Na faapea atu le ovasia iā te ia: “E ese lou talanoa fiafia i lau taaloga o le voli polo.” Ua faapea mai Vili: “Ua ou teʻi i lenā tala, ona ua ou iloa ua ova loʻu aafia i lenā taaloga. E leʻi umi, ae motusia aʻu sootaga ma uō i lenā kalapu ae faia ni uō i le faapotopotoga.” O loo auauna ma le maelega Vili iā Ieova i aso nei i lana faapotopotoga. Ua ia fautua mai: “Fesili atu i au uō, ou mātua, po o toeaina i le faapotopotoga, po o latou mātauina ua avea au meafai i le aʻoga ma fesoasoani, po ua faalavelavea ai la oulua faiā ma Ieova.”

Aiseā e lē faailoa atu ai i toeaina o lau faapotopotoga, ua e manaʻo e aapa atu mo nisi faaeaga i le auaunaga i le Atua? Pe e mafai ona e asiasi atu i tagata matutua ma fesoasoani iā i latou, atonu i le faia o a latou faatau po o nisi galuega fai i o latou aiga? Po o le ā lava lou matua, e mafai ona faia sou sao i le auaunaga faataimi atoa, ma faasoa atu i isi le tala lelei lea e te olioli ai.

Aʻoaʻoga maualuluga: Na lapataʻi mai Iesu e faasaga i le saʻilia o ʻlou lava viiga.’ (Ioa. 7:18) Po ua e ʻfaamautinoa mea e sili ona tāua’ i lau filifiliga e faatatau i aʻoga e maualuluga atu?​—Fili. 1:9, 10.

Na faia e Kolio o lē na faapolokalameina komepiuta, ni suiga i lona olaga. Na ia faapea mai: “Ona na ou ave i fale fautuaga a toeaina, na faafaigofie ai loʻu olaga. Na ou iloa ai e leʻi manaʻomia ona toe faalautele atu aʻu aʻoga, ona e alu uma ai loʻu taimi ma loʻu malosi.” Na amata ona toʻaga Kolio i meafai a le faapotopotoga. Mulimuli ane, na faauu o ia mai le aʻoga lea ua taʻua nei o le Aʻoga faale-Tusi Paia mo Uso Nofofua. Ioe, na ia ʻfaaaogā tatau le taimi’ e aʻoaʻoina atili ai le Afioga a le Atua.​—Efe. 5:16.

Galuega totogi: Po ua alu uma lou taimi i galuega totogi, ma e lē toe toʻaga ai i mea faaleagaga? Po o lava le taimi e te talanoa atu ai i lou aiga? Po o faaleleia au lauga e fai i le faapotopotoga? Ae faapefea le faia o talanoaga ma isi e atiaʻe ai? Ia e “mataʻu i le Atua moni ma tausi i ana poloaʻiga,” ona e maua lea o faamanuiaga a Ieova ma ʻiloa ai mea lelei ona o lau galuega mamafa.’​—Fai. 2:24; 12:13.

O Sevesi lea na taʻua muamua, e leʻi taulau lana galuega o le fai togālaau, auā na gau lana pisinisi. Na ia liliu atu iā Ieova ina ua leai sana tupe ma ua tele ana aitalafu. Na toe faasaʻo e Sevesi lona tulaga, ma o loo auauna nei o se paeonia sauatoa ma o se toeaina i le faapotopotoga. Ua ia faapea mai: “Ou te lagona le filemu o le loto ma le mafaufau, pe a ou lotomalie i mea ua maua ma toʻaga i mea faaleagaga.”​—Fili. 4:6, 7.

Ia mafaufau lelei i mea e te fia faamuamuaina, ma māfuaaga e te manaʻo ai e faia faapea. O le auauna iā Ieova o le a maua ai se olaga taulau manuia. Ia avea ma mea autū o lou olaga.

E ono manaʻomia ona e faia ni suiga i lou olaga, e aofia ai le lafoaʻia o mea e lē tāua, ina ia e iloa ai “le finagalo o le Atua, lea e lelei, e mālie, ma lelei atoatoa.” (Roma 12:2) Ae e mafai ona ʻmanuia ou ala’ e ala i le auauna atu iā te ia ma le lotoatoa.

[Faaopoopoga i lalo]

[Pusa/Ata i le itulau 31]

E Faapefea Ona E Taulau Manuia?

Ona o le tele o mea e mafai ona e tosina ese ai, e faapefea la ona e taulaʻi atu pea i mea e sili ona tāua? Ia mafaufau lelei i mea e te faamuamuaina ma māfuaaga e te faia ai faapea, e ala i le manatunatu i fesili o loo mulimuli mai:

ISI MEA E FAI I LE AʻOGA MA MEA E TE FIAFIA E FAI

▪ O ā uiga o tagata e tou te faatasitasi pe a e auai i na mea?

▪ O le ā le tele o lou taimi o loo alu i nei mea?

▪ Po o le a avea na mea ma taulaʻiga o lou olaga?

▪ Po ua faoa uma e nei mea le taimi sa e faaaogā muamua mo mea faaleagaga?

▪ O ā ituaiga o tagata o le a e aumea atu i ai?

▪ Pe e sili atu lou fiafia e aumea atu i nei tagata nai lo o uso talitonu?

AʻOAʻOGA MAUALULUGA

▪ Pe afai ua lava lou tomai e tausia ai oe lava, pe e manaʻomia la ona alu lou taimi, tupe ma taumafaiga mo nisi aʻoaʻoga maualuluga?

▪ Pe e manaʻomia ona maua sou tikeri mai le iunivesite ina ia tausia ai oe?

▪ O le ā le aafiaga o lenā mea i lou auai i sauniga?

▪ Po ua e ʻfaamautinoa mea e sili ona tāua’?

▪ Pe e manaʻomia ona faamalosia lou mautinoa e mafai e Ieova ona tausia oe?

GALUEGA TOTOGI

▪ Po o mafai e le galuega ua e filifilia ona e ʻfiafia ai i mea lelei ona o au galuega mamafa uma’?

▪ Faamata o lava lou malosi o totoe i le tino ma faalogona, e faia ai ou tiute i le aiga ma mea faaleagaga?

▪ Po o lava lou taimi e te talanoa atu ai i lou aiga?

▪ Po o alu uma lou taimi i galuega totogi, ma e lē toe toʻaga ai i mea faaleagaga?

▪ Po ua afāina ai le tulaga lelei o au lauga e fai i le faapotopotoga?

[Ata i le itulau 30]

Na lapataʻia e Ieova Paruka i le saʻilia o mea tetele