Skip to content

Skip to table of contents

Ia Maua le Agaga o le Atua, ae Lē o le Agaga o le Lalolagi

Ia Maua le Agaga o le Atua, ae Lē o le Agaga o le Lalolagi

 Ia Maua le Agaga o le Atua, ae Lē o le Agaga o le Lalolagi

“Tatou te leʻi maua le agaga o le lalolagi, a o le agaga mai i le Atua ina ia tatou iloa ai mea ua foaʻi mai ma le agalelei e le Atua iā i tatou.”—1 KORI. 2:12.

1, 2. (a) O le ā le taua o loo tauina e Kerisiano? (e) O ā fesili o le a tatou talanoaina?

O LOO tau se taua e Kerisiano moni. Peitaʻi, e malosi, atamai ma poto tele lo tatou fili e tau. Talu ai o loo iā te ia se auupega malosi, ua toetoe ai o tagata uma ua ia pulea. Ae e lē tatau ona manatu e leai so tatou malosi e tetee ma manumalo ai. (Isa. 41:10) Ua iā i tatou se puipuiga malosi ma e lē faatoʻilaloina.

2 E tatou te lē o tauina se taua moni, ae o se taua faaleagaga. O lo tatou fili o Satani le Tiapolo, ma o lana auupega autū o “le agaga o le lalolagi.” (1 Kori. 2:12) O lo tatou puipuiga sili mai i ana osofaʻiga, o le agaga lea o le Atua. Ina ia manumalo i lenei taua ma malolosi pea faaleagaga, ia ōle atu mo le agaga o le Atua ma faaalia le fua o lenā agaga i o tatou olaga. (Kala. 5:22, 23) O le ā le agaga o le lalolagi, ma aiseā ua matuā taatele ai ana taaʻiga? E faapefea ona iloa ua taaʻina i tatou i le agaga o le lalolagi? O ā lesona e aʻoaʻoina mai iā Iesu i le mauaina o le agaga o le Atua, ma le teena o le agaga o le lalolagi?

Aiseā ua Matuā Taatele ai le Agaga o le Lalolagi?

3. O le ā le agaga o le lalolagi?

3 O le agaga o le lalolagi e tupuga mai iā Satani, “le pule o le lalolagi,” ma e feteenaʻi ma le agaga paia o le Atua. (Ioa. 12:31; 14:30; 1 Ioa. 5:19) O loo puleaina faanaunauga ma uunaʻia gaoioiga a tagata o le lalolagi. Ona o le malosi o lenei agaga, ua faia ai e tagata mea e feteenaʻi ma le finagalo o le Atua.

4, 5. Ua faapefea ona taatele le agaga lea ua uunaʻia e Satani?

4 Ua faapefea ona matuā taatele le agaga ua uunaʻia e Satani? Muamua, na faasesē e Satani Eva i le faatoʻaga i Etena. Na ia faatalitonu Eva e sili ona lelei lona olaga pe a aunoa ma le pule a le Atua. (Kene. 3:13) E ese le pepelo o Satani! (Ioa. 8:44) Ona ia faaaogā lea o le fafine ina ia faaosooso ai Atamu ia lē faamaoni iā Ieova. Talu ai ua lē usitaʻi Atamu, o lea ua agasala ai tagata uma ma ua tele ina taaʻina i le uiga lē usiusitaʻi o Satani.—Faitau le Efeso 2:1-3.

5 Na taaʻina foʻi e Satani se vaega o agelu, o ē ua avea ma temoni. (Faaa. 12:3, 4) Na latou  fouvale i le Atua i se taimi a o leʻi oo mai le Lolo i aso o Noa. Na talitonu na agelu e sili pe a tuua o latou tulaga i le lagi, ae faamalie o latou tuʻinanauga matagā i le lalolagi. (Iuta 6) Ua toe liu na temoni i o latou tino agaga, ma ua ʻau ma Satani e “faasesēina le lalolagi atoa.” (Faaa. 12:9) E faanoanoa ona e toetoe o tagata uma e latou te lē o iloa taaʻiga a temoni.—2 Kori. 4:4.

Po o Taaʻina Oe i le Agaga o le Lalolagi?

6. E faapefea ona aafia i tatou i le agaga o le lalolagi?

6 E toʻatele tagata e lē o iloa taaʻiga a Satani, ae ua aʻoaʻoina Kerisiano moni i le Tusi Paia ia iloa ana togafiti. (2 Kori. 2:11) Peitaʻi, e aafia i tatou i le agaga o le lalolagi, pe a tatou tuu atu i tatou e taaʻina i lenā agaga. Seʻi o tatou iloiloina ni fesili se fā, e iloa ai po o taaʻina i tatou i le agaga o le Atua po o le agaga o le lalolagi.

7. O le ā se isi auala ua taumafai Satani e vavaeese ai i tatou mai iā Ieova?

7 O le ā o taʻu atu e uiga iā te aʻu i faafiafiaga ou te fiafia i ai? (Faitau le Iakopo 3:14-18.) Ua taumafai Satani e vavaeese i tatou mai i le Atua, e ala i le faatupu i o tatou loto o le fiafia i faiga sauā. Ua iloa e le Tiapolo e inosia e Ieova so o se tasi e fiafia i le sauā. (Sala. 11:5) Ina ia lolo atu i o tatou tuʻinanauga faaletino, ua faaaogā e Satani tusi, ata tifaga, musika ma taaloga vitiō, ma o nisi o na taaloga ua faataʻitaʻi mai ai i ē e taaalo, amioga lē mamā ma faiga sauā. E tusa pe tatou te naunau pea i le mea saʻo, ae e fiafia tele Satani pe a iai taimi e naunau ai o tatou loto i ana uunaʻiga leaga.—Sala. 97:10.

8, 9. O ā fesili e ao ona fesili ifo ai iā i tatou lava e tusa ai o faafiafiaga?

8 O ē ua mauaina le agaga o le Atua, ua uunaʻia ia amio mamā, faatupu le filemu ma alofa mutimutivale. Ia fesili ifo iā i tatou, ‘Po o faatupu e faafiafiaga ou te filifilia, ni uiga lelei iā te aʻu?’ O le atamai mai i lugā e “lē faatagāfai.” O ē e taaʻina i le agaga o le Atua, e latou te lē talaʻi atu amioga mamā ma le filemu i isi, ae fiafia e matamata i ata o faiga sauā ma amioga lē mamā taufeusuaʻiga i o latou fale.

9 E finagalo Ieova ia tapuaʻi atu tau lava o ia. Peitaʻi, e fiafia Satani pe a faia e tagata se gaoioiga se tasi e tapuaʻi atu ai iā te ia, e pei ona manaʻo ai iā Iesu. (Luka 4:7, 8) Tatou te ono fesili ifo: ‘Po o avea faafiafiaga ou te filifilia, ma pogai ou te lē tapuaʻi atu ai tau lava o le Atua? Po o faafaigatā pe faafaigofie ai ona ou teena le agaga o le lalolagi? Po o le a amata atu nei ona suia faafiafiaga ou te filifilia?’

10, 11. (a) O le ā le uiga ua uunaʻia e le agaga o le lalolagi e tusa ai o meafaitino? (e) O le ā le uiga ua faalaeiauina i le Tusi Paia?

10 O le ā loʻu manatu i meafaitino? (Faitau le Luka 18:24-30.) Ua uunaʻia e le agaga o le lalolagi “tuʻinanauga o mata,” e ala i le faatupuina o le matapeʻapeʻa ma le manaʻo tele i meafaitino. (1 Ioa. 2:16) Ua faatupu ai i tagata le uiga fia mauʻoa. (1 Timo. 6:9, 10) E faatalitonuina i tatou e lenā agaga, o le tele o meafaitino e maua ai se olaga malupuipuia ma tumau. (Faata. 18:11) Peitaʻi, pe afai e sili atu lo tatou naunau i tupe i lo le alolofa i le Atua, o le a manumalo Satani. O lea ia tatou fesili ifo, ‘Po o pupū atu loʻu olaga i le saʻilia o meafaitino ma faafiafiaga?’

11 Peitaʻi, ua faalaeiau i tatou i le Tusi Paia ia iai se vaaiga paleni i tupe, ma ia galulue malolosi e saunia meafaitino e talafeagai mo i tatou ma o tatou aiga. (1 Timo. 5:8) Ua fesoasoani le agaga o le Atua i ē e mauaina, ia faataʻitaʻi i le aaofoaʻi o Ieova, ma ua lauiloa ai o ni ē e matamau. E sili ona tāua iā i latou tagata i lo o meafaitino, ma e fiafia e tufa atu i isi a latou mea ua maua pe a fetaui. (Faata. 3:27, 28) E latou te faamuamua foʻi le auaunaga i le Atua, i lo le saʻilia o tupe.

12, 13. E ese mai i le agaga o le lalolagi, e faapefea i le agaga o le Atua ona taaʻina i tatou i le lelei?

 12 O lē fea agaga o atagia atu i oʻu uiga? (Faitau le Kolose 3:8-10, 13.) O loo faaauiluma e le agaga o le lalolagi galuega a le tino. (Kala. 5:19-21) E lē iloa i taimi e sologa lelei ai mea le agaga o loo taaʻina ai i tatou, ae o taimi e lē sologa lelei ai, e pei o le lē toe fia talanoa mai o se uso po o se tuafafine, faatigā pe agasala mai foʻi. E iloa foʻi le agaga o loo pulea i tatou, i a tatou amioga i totonu o aiga. E tāua la ona iloilo e le tagata ia lava. Ia fesili ifo, ‘I masina e ono ua mavae, po ua atili ai ona ou faaalia uiga o Keriso, po ua ou toe foʻi i masaniga leaga i le tautala ma amioga?’

13 E fesoasoani le agaga o le Atua ina ia tatou “toese le tagata tuai ma ana gaoioiga,” ae oofu “i le tagata fou.” E atili ai ona tatou alolofa, agalelei ma faamagalo isi, e tusa lava po ua tatau lo tatou lē malilie. E tatou te lē toe tali atu foʻi i ni mea sesē na faia mai, e ala i le “ita umi, ma le itaitagofie, ma le lotoa, ma le soona ʻeʻē, ma upu masoā.” Ae o le a tatou taumafai malosi ia “māfana lo [tatou] alofa.”—Efe. 4:31, 32.

14. O le ā le manatu o le toʻatele o tagata i le Afioga a le Atua?

14 Po o oʻu faatāua ma naunau i taʻiala tau amio a le Tusi Paia? (Faitau le Faataoto 3:5, 6.) Ua faaalia e le agaga o le lalolagi le tetee i le Afioga a le Atua. E teena e i latou ua taaʻina i lenei agaga, aʻoaʻoga a le Tusi Paia ia e lē logoleleia iā i latou, ae ua sili iā i latou uputuu ma filosofia a tagata. (2 Timo. 4:3, 4) A o nisi ua matuā lē amanaʻia lava le Afioga a le Atua. Ua latou fesiligia le moni ma le aogā o le Tusi Paia i o tatou aso, ma ua popoto i o latou lava manatu. Ua manatu māmā i tulafono mamā a le Tusi Paia i le mulilua, tauatane, tauafafine ma le teteʻa. Ua latou aʻoaʻoina “e lelei le leaga, ma e leaga le lelei.” (Isa. 5:20) Po o taaʻina i tatou i lenā agaga? Pe e tatou te faalagolago i le atamai o le tagata ma o tatou lava manatu, pe a feagai ma faafitauli? Po o tatou taumafai e mulimuli i fautuaga a le Tusi Paia?

15. Nai lo le faamoemoe i lo tatou lava atamai, o le ā e tatau ona fai?

15 Ua uunaʻia e le agaga o le Atua i tatou ia faatāua le Tusi Paia. E pei o le faisalamo, ua tatou talitonu o le afioga a le Atua, o le sulu lea i o tatou vae ma le malamalama i o tatou ala. (Sala. 119:105) Nai lo le faamoemoe i lo tatou lava atamai, e tatou te faalagolago ma le mautinoa i le Afioga a le Atua ina ia iloa ai le saʻo ma le sesē. Ua aʻoaʻoina i tatou e lē gata ia faatāua le Tusi Paia, ae ia naunau foʻi i tulafono a le Atua.—Sala. 119:97.

 Lesona Mai le Faaaʻoaʻoga a Iesu

16. O le ā e aofia ai i le mauaina o “le finagalo o Keriso”?

16 Ina ia maua le agaga o le Atua, e tatau ona pei o tatou manatu o “le finagalo o Keriso.” (1 Kori. 2:16) Ina ia iai “le mafaufau lava lea e tasi sa iā Keriso Iesu,” e ao ona tatou iloa ona mafaufauga ma ana gaoioiga ma faaaʻoaʻo i ai. (Roma 15:5; 1 Pete. 2:21) Ia mātau ni auala e tatou te faia ai faapea.

17, 18. (a) O le ā e tatou te aʻoaʻoina mai iā Iesu e uiga i le tatalo? (e) Aiseā e tatau ai ona tatou “talosaga atu pea”?

17 Tatalo mo le agaga o le Atua. Na tatalo Iesu mo le agaga o le Atua e fesoasoani iā te ia, a o leʻi feagai ma faigatā. (Luka 22:40, 41) Ia tatou ōle atu foʻi i le Atua mo lona agaga paia. E foaʻi tele mai e Ieova lona agaga paia i ē uma e ōle atu iā te ia ma le faatuatua. (Luka 11:13) Na fetalai Iesu: “Ia talosaga atu pea, ona foaʻiina mai ai lea iā te outou. Ia saʻili atu pea, ona outou maua ai lea. Ia tuʻituʻi atu pea ona tatalaina mai ai lea iā te outou. Auā o ē uma e talosaga atu, e foaʻiina mai iā i latou. O ē uma e saʻili atu, e maua e i latou. O ē uma e tuʻituʻi atu, e tatalaina mai iā i latou.”—Mata. 7:7, 8.

18 Pe a saʻili ina ia maua le agaga o Ieova ma lana fesoasoani, aua neʻi fiu e tatalo pea mo lenā agaga. E ao ona tatou tatalo e lē aunoa ma aua le faatopelauina. O nisi taimi e lē vave tali mai Ieova i ē e ōle atu iā te ia, ina ia faamautinoa pe e tāua iā i latou lea popolega, ma moni lo latou faatuatua. *

19. O le ā sa faia pea e Iesu, ma aiseā e tatau ai ona tatou faaaʻoaʻo iā te ia?

19 Ia matuā usiusitaʻi iā Ieova. Sa faia i taimi uma e Iesu le finagalo o lona Tamā. Sa iai le taimi na manaʻo ai Iesu e taulima se tulaga faigatā, i se auala e ese mai i le finagalo o lona Tamā. Ae o lona faatuatua na fai atu ai i lona Tamā: “E lē o loʻu loto, ae ia faia lou finagalo.” (Luka 22:42) Ia tatou fesili ifo, ‘Po o oʻu usitaʻi i le Atua e ui i tulaga faigatā?’ E tatau ona tatou usiusitaʻi i le Atua ina ia maua ai le ola. Ona o ia o Lē na faia i tatou, ma le Puna o le ola ma Lē e faatumauina, e tatau la ona tatou usiusitaʻi iā te ia i mea uma. (Sala. 95:6, 7) E sili le usiusitaʻi i taimi uma. E tatou te lē maua le finagalo malie o le Atua pe a lē usiusitaʻi.

20. O le ā sa sili ona tāua iā Iesu, ma e faapefea ona tatou faaaʻoaʻo iā te ia?

20 Ia iloa lelei le Tusi Paia. Na taʻua e Iesu nisi mau mai i Tusitusiga Paia, ina ia teena ai osofaʻiga a Satani. (Luka 4:1-13) I le tali atu i faitioga a taʻitaʻi lotu, na faaaogā e Iesu le Afioga a le Atua e faamaonia ai ana fetalaiga. (Mata. 15:3-6) Na sili ona tāua iā Iesu le iloa ma le faataunuuina o tulafono a le Atua. (Mata. 5:17) Ia faaauau foʻi ona tatou ave i fale le poto mai i le Afioga a le Atua, e faamalosia ai le faatuatua. (Fili. 4:8, 9) O se luʻitau i nisi o i tatou le mauaina o se avanoa e fai ai suʻesuʻega a le tagata lava ia ma le suʻesuʻega a le aiga. Nai lo le tuu seʻi fai pe a maua se avanoa, ia tuu nisi mea ina ia iai se taimi e faia ai suʻesuʻega.—Efe. 5:15-17.

21. O le ā le faatulagaga e tatou te iloa lelei ai ma faatatauina le Tusi Paia?

21 Ina ia iai se taimi mo suʻesuʻega a le tagata lava ia ma le suʻesuʻega a le aiga, ua faatulaga e “le pologa faamaoni ma le faautauta” se afiafi i vaiaso taʻitasi mo le  Tapuaʻiga a le Aiga. (Mata. 24:45) Po o e faaaogā tatau lenei faatulagaga? Ina ia maua le finagalo o Keriso, ia faaaofia i au suʻesuʻega se iloiloga o aʻoaʻoga a Iesu i mataupu e te filifilia. E mafai ona e faaaogā le Watch Tower Publications Index e suʻe ai faamatalaga aogā i le mataupu o loo e suʻesuʻeina. O se faaaʻoaʻoga, mai i le 2008 e oo i le 2010, na iai se faasologa o mataupu e 12 i le Olomatamata mo le lautele, sa faaulutalaina “O Lesona Tatou te Aʻoaʻoina Mai iā Iesu.” E mafai ona e faaaogā nei mataupu i au suʻesuʻega. Na amata mai i le 2006, ona iai i le Ala Mai! le vaega faapitoa ua taʻua “O le ā Sau Tali?” Ua saunia lenei taligā fesili ina ia faaloloto ai lou malamalama i le Afioga a le Atua. Aiseā e lē faaaofia ai vaega faapena i la outou Tapuaʻiga a le Aiga i nisi taimi?

E Tatou te Manumalo i le Lalolagi

22, 23. E faapefea ona tatou manumalo i le lalolagi?

22 Ina ia taʻitaʻia i le agaga o le Atua, e ao ona tetee atu i le agaga o le lalolagi. E lē faigofie lenā mea. E tatau ona tauivi malosi ma finafinau. (Iuta 3) Ae e mafai ona tatou manumalo! Na fetalai Iesu i ona soo: “Ua puapuagatia outou i le lalolagi, ae ia lototetele! Ua ou manumalo i le lalolagi.”—Ioa. 16:33.

23 E mafai foʻi ona tatou manumalo i le lalolagi, pe a teena lona agaga ma faia mea uma ina ia maua ai le agaga o le Atua. Auā “afai e ʻau le Atua ma i tatou, o ai la e faasagatau mai?” (Roma 8:31) O le mauaina o le agaga o le Atua ma mulimuli i lana taʻitaʻiga ua taʻua i le Tusi Paia, e tatou te maua ai le lotomalie, filemu, fiafia ma le ola e faavavau i le lalolagi fou ua lata tele mai.

[Faamatalaga faaopoopo]

Pe E te Manatua?

• Aiseā ua taatele ai le agaga o le lalolagi?

• O ā fesili e fā e ao ona fesili ifo ai?

• O ā lesona e tolu e aʻoaʻoina mai iā Iesu i le mauaina o le agaga o le Atua?

[Fesili mo le Suʻesuʻega]

[Ata i le itulau 8]

Na faapefea ona avea nisi agelu ma temoni?

[Ata i le itulau 10]

Ua faaaogā e Satani le agaga o le lalolagi e pulea ai tagata, ae e mafai ona tatou sosola ese mai i na taaʻiga