Skip to content

Skip to table of contents

Ia Mataala Pea, e Pei o Ieremia

Ia Mataala Pea, e Pei o Ieremia

 Ia Mataala Pea, e Pei o Ieremia

‘E mataala pea Ieova e tusa ai ma lana upu ina ia faataunuuina.’—IERE. 1:12.

1, 2. O le ā le sootaga o le “mataala pea” o Ieova, ma le laau o le sekati?

O LE sekati, o se tasi lea o laau e vave ona fuga mai i luga o atumauga o Lepanona ma Isaraelu. E amata ona iloa atu ona fua matagofie lanu piniki ma papaʻe, i le faaiʻuga o Ianuari po o le amataga o Fepuari. O le uiga o le igoa faa-Eperu o le sekati, “o sē ua ala mai.”

2 Ina ua tofia e Ieova Ieremia e fai ma ana perofeta, sa faaaogā lenei tulaga masani o le sekati e faataʻitaʻia ai se mea moni tāua. I le amataga o le faiva a le perofeta, na ia vaaia ai i se faaaliga se tātupu o lenā laau. O le ā na uiga i ai? Na fetalai Ieova: “Ou te mataala pea e tusa ai ma laʻu upu ina ia faataunuuina.” (Iere. 1:11, 12) E pei lava ona vave ona “ala mai” pe fuga mai le sekati, sa faapea foʻi ona “alapō” Ieova i se uiga faafaatusa, e auina atu ana perofeta e lapataʻia ona tagata i iʻuga leaga o le lē usiusitaʻi. (Iere. 7:25) E leʻi mālōlō o ia, ae na “mataala pea” seʻia oo ina faataunuuina lana afioga faavaloaga. I le 607 T.L.M., i le taimi atofaina, na oo mai ai le faasalaga a Ieova i le nuu fouvale o Iuta.

3. O le ā le mea e tatou te mautinoa e uiga iā Ieova?

3 E faapena foʻi aso nei, e mataala ma faamaoni pea Ieova ina ia faataunuu lona finagalo. E na te lē lafoaʻia le faataunuuina o ana fetalaiga. E faapefea i le faamaoni o Ieova ona aafia ai oe? Pe e te ioe o loo “mataala” Ieova i lenei tausaga e 2011, i le faataunuuina o ana folafolaga? Pe afai o loo tatou taumasalosalo i folafolaga mautinoa a  Ieova, o le taimi lenei e ao ona feala ai mai i so o se tulaga e tulemomoe ai faaleagaga. (Roma 13:11) Talu ai o ia o le perofeta a Ieova, o lea na mataala ai pea Ieremia. O le iloiloina o le auala ma le pogai na mataala ai pea Ieremia i lona tofiga mai i le Atua, e aogā e iloa ai le auala tatou te filigā ai i le galuega ua tuuina mai e Ieova.

Se Feʻau Faanatinati

4. O ā luʻi na feagai ma Ieremia i le taʻuina atu o lana feʻau, ma aiseā na faanatinati ai?

4 Atonu o le lata i le 25 o tausaga o Ieremia, na tofia ai e Ieova o se tagata vāai. (Iere. 1:1, 2) Peitaʻi sa ia manatu ua na o ia o se tamaitiiti, e lē agavaa e tautala atu i toeaiina o le nuu, o tane ua matutua ma o loo umia le pule. (Iere. 1:6) Sa tatau ona ia folafola atu sala ogaoga faafaamasinoga ma faasalaga, aemaise lava i ositaulaga, perofeta pepelo ma taʻitaʻi, faapea ē na filifilia “le ala na mulimuli i ai isi” ma “tumau . . . pea ona lē faamaoni.” (Iere. 6:13; 8:5, 6) O le a faatamaʻia le malumalu matagofie na faia e le tupu o Solomona, lea ua autausagā o fai ma autū o le tapuaʻiga moni. O le a faatafunaina Ierusalema ma Iuta, ma ave faapagotaina ona tagata. E manino mai, sa matuā faanatinati le feʻau lea sa tatau ona taʻu atu e Ieremia!

5, 6. (a) O faapefea ona faaaogā e Ieova i aso nei le vasega faa-Ieremia? (e) O ā manatu o le a tatou talanoaina?

5 Ua saunia ma le alofa e Ieova mo tagata i aso nei se vaega o Kerisiano faauuina, o ē ua galulue e pei o ni tagata vāai faafaatusa ina ia lapataʻi atu e uiga i lana faamasinoga i lenei lalolagi. Ua tele tausaga o uunaʻia e lenei vasega faa-Ieremia tagata, ia mataala i nei taimi ua tatou soifua ai. (Iere. 6:17) Ua faamatilatila mai i le Tusi Paia e lē faatuai Ieova, ae e tausisi i le taimi. O le a oo mai lona aso i le taimi tonu, i se itula e lē o faatalitalia e tagata.—Sefa. 3:8; Mare. 13:33; 2 Pete. 3:9, 10.

6 Ia manatua o loo mataala pea Ieova ma o le a aumaia lana lalolagi fou amiotonu i le taimi tonu. O le iloaina o lenā mea e tatau ona uunaʻia ai le vasega faa-Ieremia ia tutumau, ma fesoasoani foʻi i isi mamoe ia mataala pea i le matuā faanatinati o la latou feʻau. E faapefea ona aafia ai oe? Na faaalia e Iesu e ao i tagata uma ona filifili po o le a latou auauna iā Ieova. Seʻi o tatou talanoaina uiga e tolu sa fesoasoani iā Ieremia e mataala ai pea i lona tofiga, ma e fesoasoani iā i tatou e faia foʻi faapea.

Alofa i Tagata

7. Faamatala le auala na uunaʻia ai e le alofa Ieremia, e talaʻi pea e ui i tulaga faigatā.

7 O le ā na uunaʻia ai Ieremia e talaʻi pea e ui i tulaga faigatā? O lona alofa i tagata. Sa iloa e Ieremia na faapogaia e leoleo mamoe pepelo le tele o faigatā na fesagaʻi ma tagata. (Iere. 23:1, 2) O le iloaina o lenei mea, sa fesoasoani iā te ia e faia ai lana galuega i le alofa. Sa manaʻo ia faalogo ma usitaʻia e tagata o lona nuu fetalaiga a le Atua. O lona alofa tele na māfua ai ona tagi ona o le mala o le a oo iā i latou. (Faitau le Ieremia 8:21; 9:1.) O loo taʻua ma le manino i le tusi o Auega, le alofa tele ma le manatu mamafa o Ieremia i le suafa o Ieova ma tagata. (Aue. 4:6, 9) Pe a e vaai atu i aso nei i tagata ua pei o ni “mamoe ua faamanuʻalia ma agaleagaina, ua leai so latou leoleo mamoe,” pe e te lē naunau ai e taʻu atu iā i latou le tala faamāfanafanaloto e uiga i le Malo o le Atua?—Mata. 9:36.

8. O le ā e faaalia ai e leʻi ita Ieremia ona o mafatiaga?

Sa mafatia Ieremia i faiga a tagata sa fia fesoasoani i ai, ae e leʻi tauimasui atu pe ita. Sa faapalepale ma agalelei, e oo lava foʻi i le tupu amio piʻopiʻo o Setekaia! Ina ua tuuina  atu e Setekaia Ieremia ia fasiotia, sa augani atu pea i ai Ieremia ia faalogo i le siʻufofoga o Ieova. (Iere. 38:4, 5, 19, 20) Po o malosi lo tatou alofa i tagata e pei o le alofa o Ieremia?

Lototele Mai i le Atua

9. E faapefea ona tatou iloa na maua mai i le Atua le lototele o Ieremia?

9 Ina ua fetalai atu Ieova i le taimi muamua iā Ieremia, sa ia faia ni faamolemolega. Ua tatou iloa mai i inei, e leʻi fanau mai o ia o sē e lototele ma maumauaʻi. Ae o le malosi uiga ese lea sa faaalia e Ieremia i lona tofiga o se perofeta, na maua ona o lona faalagolago atoatoa i le Atua. Ioe, sa faatasi Ieova i le perofeta “e pei o se toa malosi e mataʻutia,” ma na lagolagoina ma faamalosia ai Ieremia ia faatino lona tofiga. (Iere. 20:11) Ona o le lototele o Ieremia, na iʻu ai ina manatu nisi tagata i le taimi o le faiva a Iesu, e faapea ua toetū mai Ieremia!—Mata. 16:13, 14.

10. Aiseā e faapea atu ai ua “pule i atunuu ma malo” le vaega totoe faauuina?

10 Talu ai o Ieova o le “Tupu o atunuu,” o lea na ia faatonu ai Ieremia e taʻu atu se feʻau faafaamasinoga i nuu ma malo. (Iere. 10:6, 7) Ae o le ā le auala ua “pule [ai] i atunuu ma malo” le vaega totoe faauuina? (Iere. 1:10) I le pei o le perofeta anamua, ua tuuina mai e le Pule Silisili Ese i le aoao o mea se tofiga i le vasega faa-Ieremia. O lea, ua iai i auauna faauuina a le Atua le pule e taʻu atu faasalaga i atunuu ma malo i le lalolagi aoao. Talu ai ua tuuina mai i ai e le Atua Silisili Ese le pule atoa ma le faaaogāina o le gagana manino o lana Afioga Paia, o lea ua faalauiloa atu ai e le vasega faa-Ieremia o le a tafiesea ma faaumatia e le Atua i le taimi atofaina ma i lana auala, atunuu ma malo o loo iai i aso nei. (Iere. 18:7-10; Faaa. 11:18) O loo maumauaʻi le vasega faa-Ieremia ia aua neʻi faavaivai i lo latou tofiga mai i le Atua, o le faalauiloa atu lea o feʻau faafaamasinoga a Ieova i le lalolagi atoa.

11. O le ā e fesoasoani iā i tatou e talaʻi ai pea ma le lē faavaivai, pe a feagai ma tulaga faigatā?

11 O se mea masani le lotovaivai pe a feagai ma teteega, le lē fiafia mai ma tulaga faigatā. (2 Kori. 1:8) Ae ia tatou pei o Ieremia, ia faamalolosi pea ma aua le lotovaivai. Tau ina ia taʻitoʻatasi i tatou ma ōle atu pea i le Atua, ia faalagolago iā te ia ma “lototetele” ona o lana fesoasoani. (1 Tesa. 2:2) I le avea ai ma tagata tapuaʻi moni, ia faaauau pea ona mataala i o tatou tofiga mai i le Atua. E ao ona tatou maumauaʻi e talaʻi pea ma le lē faavaivai le faaumatiaga o lotu pepelo ua taʻua o Kerisiano, lea na faaāta mai e le nuu lē faamaoni o Ierusalema. E lē gata o le a faalauiloa atu e le vasega faa-Ieremia “le tausaga e faaalia mai ai e Ieova lona agalelei,” ae faapea foʻi “le aso e tauimasui ai e lo tatou Atua.”—Isa. 61:1, 2; 2 Kori. 6:2.

Olioli le Loto

12. Aiseā e tatou te fai atu ai na tumau le olioli o Ieremia, ma aiseā na ia faia ai faapea?

12 Sa olioli Ieremia i lana galuega. Na faapea atu o ia iā Ieova: “Na maua au afioga, ona ou ʻai ai lea; ma na avea foʻi lau afioga ma mea e fiafia ma olioli ai loʻu loto; auā ua taʻua aʻu i lou suafa, Ieova e.” (Iere. 15:16) Sa avea o se faaeaga iā Ieremia le fai ma sui o le Atua moni ma talaʻi atu ana afioga. Seʻi mātau, na mou atu le olioli o Ieremia ina ua amata ona mafaufau i tauemuga a tagata. Ae na toe olioli o ia ina ua manatu i le lelei ma le tāua o lana feʻau.—Iere. 20:8, 9.

13. Aiseā e tāua ai ona suʻesuʻe i upu moni loloto faaleagaga ina ia olioli ai pea?

13 Ina ia olioli pea i le galuega talaʻi i aso nei, e ao ona tatou aai i “meaʻai aano,” o upu moni loloto ia o le Afioga a le Atua. (Epe. 5:14) E tupu le faatuatua pe a matuā suʻesuʻe i le Tusi Paia. (Kolo. 2:6, 7) E tatou te iloa ai e faafiafiaina le finagalo o Ieova i a tatou gaoioiga. Pe afai o loo faigatā ona maua se taimi e faitau ma suʻesuʻe ai le Tusi  Paia, e ao ona toe iloilo a tatou faasologa. E tusa lava pe e na o ni nai minute i aso taʻitasi e suʻesuʻe ma manatunatu loloto ai, ae o le a atili ai ona tatou mafuta vavalalata atu iā Ieova, ma ‘fiafia ma olioli ai le loto’ e pei lava o Ieremia.

14, 15. (a) O le ā na iʻu i ai ona o le tumau faamaoni o Ieremia i lona tofiga? (e) O le ā e ioe i ai tagata o le Atua i aso nei e uiga i le galuega talaʻi?

14 Sa taʻu atu ma le lē faavaivai e Ieremia lapataʻiga ma feʻau faafaamasinoga a Ieova, ae na tāua foʻi iā te ia lona tofiga “ia fausia . . . ma totōina.” (Iere. 1:10) Sa maua iʻuga lelei o lana galuega o le fausia ma totō. Sa faasaoina nisi o tagata Iutaia ma tagata e lē o ni Isaraelu, mai i le faaumatiaga o Ierusalema i le 607 T.L.M. Na aofia ai tagata sa Rakapā, Epetemeleka ma Paruka. (Iere. 35:19; 39:15-18; 43:5-7) O nei uō faamaoni ma matataʻu i le Atua a Ieremia, ua faaāta mai ai i latou i aso nei e faamoemoe e ola e faavavau i le lalolagi, o ē ua avea ma uō a le vasega faa-Ieremia. E matuā fiafia le vasega faa-Ieremia e atiaʻe i le itu faaleagaga lenei “motu o tagata e toʻatele.” (Faaa. 7:9) Ua faapea foʻi ona matuā faamalieina nei aumea faamaoni a le ʻaufaauuina, i le fesoasoani atu i tagata lotofaamaoni ia iloa le upu moni.

 15 E ioe tagata o le Atua o le talaʻia o le tala lelei e lē gata o se auaunaga i le lautele iā i latou e faalogo i ai, ae o se gaoioiga foʻi tau tapuaʻiga i lo tatou Atua. Pe e tatou te maua se tasi e faalogo mai pe leai, ae o le faia o le auaunaga paia iā Ieova e ala i le talaʻi, e tatou te matuā olioli ai.—Sala. 71:23; faitau le Roma 1:9.

“Ia Mataala Pea” i Lou Tofiga!

16, 17. Ua faaalia faapefea i le Faaaliga 17:10 ma le Sapakuka 2:3 le faanatinati o o tatou taimi?

16 E iloa le faanatinati o le taimi ua tatou soifua ai, pe a iloilo le valoaga o loo i le Faaaliga 17:10. Ua iai nei le tupu lona fitu, le Pulega Fuifuilua a Amerika ma Peretania. Ua taʻua e uiga i lenā tupu: “Pe a oo mai [le malo malosi lona fitu o le lalolagi], e matuā puupuu lava le taimi e iai o ia.” Ua lata nei ina māeʻa lenā ‘taimi puupuu.’ Ua faamautinoa mai e le perofeta o Sapakuka e tusa ai o le iʻuga o lenei faiga amioleaga o mea: “Ua tuu le faaaliga mo ona aso atofaina . . . Ia faatalitali pea i ai; auā e oo mai lava. E lē faatuai mai.”—Sapa. 2:3.

17 Ia fesili ifo iā te oe lava: ‘Po o atagia moni atu i loʻu olaga le faanatinati o o tatou taimi? Po o faaalia i aʻu gaoioiga o loo oʻu faatalitalia ua lata ona oo mai le iʻuga? Po o faaalia i aʻu faaiʻuga ma mea e faamuamua, ou te lē o faatalitalia e vave ona oo mai le iʻuga, pe e lē mautinoa foʻi po o le a oo mai?’

18, 19. Aiseā e lē o se taimi lenei e faavaivai ai?

18 O loo faaauau pea le galuega a le tagata vāai. (Faitau le Ieremia 1:17-19.) O se mea e olioli ai ona o le tutūmausalī o le vaega totoe faauuina e pei o se “poutū uʻamea” ma se “aai malupuipuia.” O loo “fusia o [latou] sulugātiti i le upu moni” ma faamalosia i le Afioga a le Atua, seʻia iʻu ina faamāeʻaina la latou galuega ua tofia i ai. (Efe. 6:14) O loo naunau foʻi faapena le motu o tagata e toʻatele, e lagolagosua i le vasega faa-Ieremia i le faataunuuina o lo latou tofiga mai i le Atua.

19 E lē o se taimi lenei e faavaivai ai i le galuega o le Malo, ae e ao ona iloilo le tāua o le Ieremia 12:5. (Faitau.) O loo fesagaʻi i tatou uma ma faigatā e ao ona onosaia. E ono faatusaina nei faigatā i “tagata taufetuli” ia e tatou te taufetuli faatasi. Peitaʻi, a o lata tele mai le “puapuaga tele,” e tatou te faatalitalia le faateteleina o faigatā. (Mata. 24:21) E ono faatusaina le tauivi ma le tele o faafitauli i le lumanaʻi, i le tamoʻe e “taututuu ma ni solofanua.” E manaʻomia e se tagata se malosi e sili atu ina ia taututuu ai ma ni solofanua saosaoa. O lea e tāua tele ai ona onosaia faigatā o loo tatou fesagaʻia i aso nei, ina ia nofosauni ai e onosaia faigatā i le lumanaʻi.

20. O le ā ua e maumauaʻi e fai?

20 E mafai e i tatou uma ona faaaʻoaʻo iā Ieremia ma faataunuu ma le manuia lo tatou tofiga o le talaʻi! O uiga e pei o le alofa, lototele ma le olioli, na uunaʻia ai Ieremia e faatino ma le faamaoni lana faiva mo le 67 tausaga. O le fuga matagofie mai o le sekati, ua faamanatu mai ai iā i tatou o le a “mataala pea” Ieova e tusa ai ma lana upu ina ia faataunuuina. O lea la, ua iā i tatou le māfuaaga lelei e mataala ai foʻi. Sa “mataala pea” Ieremia, ma e mafai foʻi ona tatou faia faapea.

Pe E te Manatua?

• Sa faapefea ona aogā iā Ieremia le alofa, e ‘mataala ai pea’ i lona tofiga?

• Aiseā e manaʻomia ai le lototele mai i le Atua?

• Aiseā na olioli ai pea Ieremia?

• Aiseā e te ‘mataala ai pea’?

[Fesili mo le Suʻesuʻega]

[Ata i le itulau 31]

Po o le a faaauau pea ona e talaʻi e ui i teteega?