Skip to content

Skip to table of contents

Fesili Mai le ‘Aufaitau

Fesili Mai le ‘Aufaitau

 Fesili Mai le ʻAufaitau

Aiseā na ita ai Mose i atalii e toʻalua o Arona o Eleasaro ma Itamaro ina ua mavae le oti o o la uso o Natapu ma Aviu, ma na faapefea ona faaleleia le ita o Mose?—Levi. 10:16-20.

E leʻi pine talu ona faavaeina le tofiga faaositaulaga mo le auaunaga i le faleʻie, ae faasalaina loa i le oti e Ieova atalii o Arona o Natapu ma Aviu, ina ua la faamū mea manogi ae e leʻi faatonuina i laʻua e fai. (Levi. 10:1, 2) Na faatonu e Mose atalii o loo ola o Arona e aua neʻi faanoanoa ona o o la uso ua feoti. Mulimuli ane, na ita ai Mose iā Eleasaro ma Itamaro ona e la te leʻi aai i le ʻoti o le taulaga mo agasala. (Levi. 9:3) Aiseā na ita ai Mose?

O tulafono na tuuina atu e Ieova iā Mose, na faamaʻoti atu ai ia ʻai e le ositaulaga o loo ofoina atu le taulaga o agasala, se vaega o le taulaga i le lotoā o le faleʻie o le feiloaʻiga. O le faia faapea sa manatu i ai ua faamagaloina agasala a i latou na aumaia le taulaga. Ae peitaʻi, pe afai e ave se vaega o le toto o le taulaga i le Mea Paia, le potu muamua o le faleʻie, e lē tatau la ona ʻaina le taulaga. A ia susunuina.—Levi. 6:24-26, 30.

E foliga mai ina ua mavae atu mea na tutupu i lenā aso, na iloa ai e Mose e manaʻomia ona faamautinoa ua faatinoina tulafono uma a Ieova. Ina ua iloa e Mose ua susunuina le ʻoti o le taulaga, ona ia fesili atu lea ma le ita iā Eleasaro ma Itamaro pe aiseā na lē aai ai i le taulaga e pei ona faatonuina, auā e leʻi avatuina lona toto i le Mea Paia i luma o Ieova.—Levi. 10:17, 18.

O Arona na tali atu iā Mose, auā e mautinoa na malie o ia i le mea na faia e ona atalii. Pe a fua i le faasalaina i le oti o ona atalii e toʻalua, atonu na mafaufau ai Arona pe e mafai e se ositaulaga ona ʻai ma se lotofuatiaifo lelei i le taulaga o agasala i lenā aso. Atonu na manatu o ia o le aai i le taulaga, o le a lē fiafia ai Ieova, e ui e lē tuuaʻia i latou i le mea sesē na fai e Natapu ma Aviu.—Levi. 10:19.

Aemaise lava atonu na manatu Arona, ona o le uluaʻi aso lea na faatino ai e sui o lona aiga o latou tiute faaositaulaga, sa tatau ona faatinoina ma le faaeteete ina ia faafiafia ai le Atua, e oo lava i mea iti. Ae peitaʻi, ua faalumaina e Natapu ma Aviu le suafa o Ieova, ma ua oo atu ai lona toʻasā iā i laʻua. O lea atonu na manatu ai Arona, e lē tatau ona aai i le taulaga paia sui o le aiga o ositaulaga na faia lenā agasala.

E foliga mai na talia e Mose le tali a lona uso, auā o loo faapea mai le mau: “Ua faalogo Mose i lea tala ona malie ai lea o ia.” (Levi. 10:20) E mautinoa foʻi, na faamalieina Ieova i le tali a Arona.