Skip to content

Skip to table of contents

Po o Fai Sou Sao e Atia‘e ai Sauniga Faa-Kerisiano?

Po o Fai Sou Sao e Atia‘e ai Sauniga Faa-Kerisiano?

 Po o Fai Sou Sao e Atiaʻe ai Sauniga Faa-Kerisiano?

“Pe a outou potopoto faatasi, . . . ia faia mea uma e atiaʻe ai.”—1 KORI. 14:26.

1. E tusa ai o le 1 Korinito mataupu e 14, o le ā le sini autū o sauniga faa-Kerisiano?

‘OKA se manaia o le sauniga!’ Po o lou lagona lenā ina ua uma se sauniga i le Maota mo Sauniga? E lē taumatea o le mea moni lenā! E mautinoa o sauniga a le faapotopotoga o se puna o faalaeiauga, ae e lē tatau ona faateʻia ai i lenā mea. Auā e pei lava o aso o uluaʻi Kerisiano, o le sini autū o a tatou sauniga, ia faamalosia faaleagaga ai i latou uma e auai. Seʻi mātau le auala ua faamamafa ai e le aposetolo o Paulo lenā sini autū o sauniga faa-Kerisiano, i lana tusi muamua i Kerisiano i Korinito. E tele taimi o loo taʻua ai i le mataupu e 14, e tatau ona tasi le sini o vaega uma o loo faia i sauniga a le faapotopotoga, ia “atiaʻe ai le faapotopotoga.”—Faitau le 1 Korinito 14:3, 12, 26. *

2. (a) E faapefea ona avea sauniga o se mea e atiaʻe ai? (e) O le ā le fesili o le a tatou talanoaina?

 2 Ua tatou iloa o le māfuaaga sili e atiaʻe pe faalaeiau ai sauniga, ona o le taʻitaʻiga a le agaga o le Atua. O lea la, e tatou te amata sauniga uma i se tatalo mai i le loto iā Ieova, e talosagaina ai le faamanuia a lo tatou Tamā i le lagi i la tatou faatasiga e ala i lona agaga paia. Ae ua tatou iloa foʻi e mafai e tagata uma o le faapotopotoga, ona fai se sao ina ia avea ai polokalame o le sauniga o se mea e atiaʻe ai. O lea la, o ā ni laasaga e tatou te faia ina ia mautinoa ai e avea sauniga o loo faia i le Maota mo Sauniga i vaiaso taʻitasi, o se puna o le faafouina ma faalaeiauga faaleagaga?

3. Aiseā e tāua ai sauniga faa-Kerisiano?

3 Ina ia tali lenei fesili, o le a tatou iloiloina nisi o vala o a tatou sauniga e tatau ona manatua e i latou o loo taulimaina. O le a tatou talanoaina foʻi le auala e mafai ai e le faapotopotoga atoa, ona fai se sao i le avea o sauniga o ni faatasiga e atiaʻe ai mo ē uma e auai. E tatou te fiafia i lenei mataupu ona o a tatou sauniga o ni faatasiga paia. O lea, o le auai i sauniga ma fai se sao, o ni vaega tāua o la tatou tapuaʻiga iā Ieova.—Sala. 26:12; 111:1; Isa. 66:22, 23.

Se Sauniga e Suʻesuʻe ai le Tusi Paia

4, 5. O le ā le sini o le Suʻesuʻega o le Olomatamata?

4 E tatou te mananaʻo uma lava e maua aogā atoatoa mai i la tatou Suʻesuʻega faalevaiaso o le Olomatamata. O lea la, ina ia manino lelei i le sini autū o lenā sauniga, seʻi o tatou autalu nisi o suiga ua faia i le lomiga o le Olomatamata ma mataupu mo suʻesuʻega.

5 Na amata mai i le lomiga o Ianuari 15, 2008, o le uluaʻi lomiga mo suʻesuʻega o Le Olomatamata, ona faaopoopo i ai se mea fou tāua i luma o le faavaa. Pe na e mātauina lenā mea? Tagaʻi lelei i le faavaa o le mekasini lenā e te uuina. I le pito ane i lalo o le olo, e te mātauina ai se Tusi Paia o loo tatala. Ua faamamafa mai ai i lenā mea le māfuaaga e tatou te faia ai le Suʻesuʻega o le Olomatamata. Ina ia suʻesuʻeina ai le Tusi Paia e ala i le fesoasoani a lenei mekasini. Ioe, i la tatou Suʻesuʻega faalevaiaso o le Olomatamata, o loo “faamatala” ai le Afioga a le Atua, ma o loo “faamalamalama” ai foʻi e pei o aso o Neemia.—Nee. 8:8; Isa. 54:13.

6. (a) O le ā le suiga ua faia i le Suʻesuʻega o le Olomatamata? (e) O le ā e tatau ona manatua e tusa ai o mau ua faapea mai e “faitau”?

6 Talu ai o le Tusi Paia o la tatou tusi autū, ua faia ai se suiga i le Suʻesuʻega o le Olomatamata. O nisi o mau o loo i mataupu mo suʻesuʻega, o loo faapea mai e “faitau.” Ua faalaeiauina i tatou uma e mulimuli i a tatou Tusi Paia a o faitauina nei mau i le taimi o le sauniga. (Galu. 17:11) Aiseā? Pe a tatou vāai i fautuaga a le Atua i a tatou lava Tusi Paia, e telē se aafiaga iā i tatou. (Epe. 4:12) O lea la, a o leʻi faitauina na mau, e tatau ona faamautinoa e lē o loo faia le suʻesuʻega, ua lava le taimi e tuu atu i le aofia e suʻe ai nei mau ma faitau faatasi.

Ua Lava le Taimi e Fai ai Tali

7. O le ā le avanoa ua tatou maua i le taimi o le Suʻesuʻega o le Olomatamata?

7 Ae o le isi suiga i mataupu mo suʻesuʻega o le Olomatamata, e fesootaʻi atu i le uumi o mataupu. I tausaga talu ai nei, ua pupuu mataupu. O lea la, i le taimi o le Suʻesuʻega o le Olomatamata, ua faaitiitia le taimi e faitau ai palakalafa ae faatele le taimi e fai ai tali. Ua toʻatele tagata o le faapotopotoga ua maua le avanoa e faaalia ai lo latou faatuatua. E mafai ona faia e ala i le tali i fesili, fai se faatatauga o se mau, faamatala se mea na tupu e faaalia ai le atamai  o le usitaʻia o taʻiala o le Tusi Paia, pe i nisi auala. E tatau foʻi ona talanoaina ata.—Faitau le Salamo 22:22; 35:18; 40:9.

8, 9. O le ā le vaega a le faisuʻesuʻega o le Olomatamata?

Peitaʻi, o le a lava lenā taimi e faia ai ni tali se tele pe afai e faapupuu tali a le aofia, ma e lē tele ni faamatalaga faaopoopo a lē o loo faia le Suʻesuʻega o le Olomatamata. O le ā la e fesoasoani i le faisuʻesuʻega ina ia faatulaga lelei ai le tele e fai ai ana faamatalaga ma tali a le aofia, ma avea ai le sauniga o se mea e atiaʻe ai mo tagata uma?

9 Ina ia tali le fesili, seʻi manatu i se faataʻitaʻiga. O se Suʻesuʻega a le Olomatamata e lelei ona fai, ua pei o se teu fugālaau e manaia i le vaai. E pei ona faia aʻe se teu telē i ni fugālaau eseese se tele, e faapea foʻi le Suʻesuʻega o le Olomatamata, e tele tali eseese e faia ai. Ma e pei ona eseese le lapopoʻa ma lanu o fugālaau taʻitasi i totonu o se teu, e faapea foʻi ona eseese le uumi ma le auala e fai ai tali i le taimi o le sauniga. Ae o le ā le vaega a le faisuʻesuʻega? O ni nai ana faamatalaga, ua pei o ni nai laulaau lanu meamata ua faaopoopo i totonu o se  teu. O nei laulaau e lē o le vaega autū o le teu, ae ua na o ni nai mea e teuteu ma mau lelei ai le teu. I se tulaga tutusa, e ao ona manatua e le faisuʻesuʻega o lana vaega e lē ia fai uma e ia manatu, ae ia fai ni nai manatu e faaopoopo atu ai i faaupuga o viiga a le faapotopotoga. Ioe, pe a lelei ona tuufaatasi tali eseese a le faapotopotoga ma ni nai manatu faaopoopo a le faisuʻesuʻega, o le a fiafia le aofia e faalogologo i nei manatu uma.

“Seʻi o Tatou Ofo Soo Atu ai i le Atua Taulaga o Viiga”

10. O le ā le manatu o uluaʻi Kerisiano i sauniga a le faapotopotoga?

10 O le faamatalaga a Paulo e uiga i sauniga faa-Kerisiano o loo i le 1 Korinito 14:26-33, ua tatou malamalama ai i le auala na fai ai na sauniga i le uluaʻi senituri. Ua tusi se tasi faitofā o le Tusi Paia e faatatau i nei fuaiupu: “O le mea mataʻina i le sauniga a se Ekalesia anamua, e toetoe o tagata uma na auai e manatu ua iā te ia le faaeaga ma le tiute tauave e faia se sao i lea sauniga. E leʻi auai se tagata e tau ina ia nofo ma faalogologo, ae na auai e lē gata ia maua ni manatu ae ia faasoa atu foʻi.” O lea la, sa manatu uluaʻi Kerisiano i sauniga a le faapotopotoga o ni avanoa e faaalia ai lo latou faatuatua.—Roma 10:10.

11. (a) O le ā e matuā saosaolaumea i le avea o sauniga o ni taimi e atiaʻe ai, ma aiseā? (e) O ā fautuaga e ao ona faatatauina ina ia faaleleia ai a tatou tali i sauniga? (Tagaʻi i le faaopoopoga pito i lalo.)

11 O le faaalia atu o lo tatou faatuatua i sauniga e matuā saosaolaumea e “atiaʻe ai le faapotopotoga.” E mautinoa e te ioe mai e tusa po o le ā le tele o tausaga o tatou auai i sauniga, ae e tatou te fiafia pea e faalogologo i tali a o tatou uso ma tuafāfine. E matuā pāʻia o tatou loto i se tali mai i le loto a se tagata talitonu ua matua; e faalaeiauina i tatou i se tali manino a se toeaina alofa; ma e tatou te ʻataʻata pe a fai e se tamaitiiti sana ia lava tali e faaalia ai lona alofa moni iā Ieova. O lea la, o le faia o ni tali, e tatou te saosaolaumea uma ai i le avea o sauniga faa-Kerisiano o ni taimi e atiaʻe ai. *

12. (a) O le ā le lesona mai i faaaʻoaʻoga a Mose ma Ieremia? (e) O le ā le vaega a le tatalo i le faia o tali?

12 Ae o ē e matamumuli, e faigatā tele ona fai ni tali. Pe afai o lou tulaga lenā, atonu e fesoasoani iā te oe pe a e manatua e lē na o oe o tupu ai lenā tulaga. E oo lava foʻi i auauna faamaoni a le Atua e pei o Mose ma Ieremia, na la faaalia e lē faigofie ona la tautatala atu i luma o tagata. (Eso. 4:10; Iere. 1:6) Ae e pei ona fesoasoani Ieova i na auauna anamua ina ia vivii atu iā te ia i luma o tagata, o le a fesoasoani foʻi le Atua iā te oe ina ia ofo atu taulaga o viiga. (Faitau le Eperu 13:15.) E faapefea ona e maua le fesoasoani a Ieova ina ia manumalo ai i le fefe e fai ni tali? Muamua, ia sauniuni lelei mo le sauniga. A o leʻi alu i le Maota mo Sauniga, ia tatalo iā Ieova ma talosaga patino atu iā te ia mo le lototele ina ia e fai ai se tali. (Fili. 4:6) Ona ua e talosaga atu i se mea “e tusa ma lona finagalo,” e te mautinoa la o le a tali mai Ieova i lau tatalo.—1 Ioa. 5:14; Faata. 15:29.

 O Sauniga e ‘Atiaʻe, Faalaeiau, ma Faamāfanafana’ Ai

13. (a) O ā aogā e tatau ona maua e i latou o loo auai i a tatou sauniga? (e) O le ā le fesili e faapitoa ona tāua i toeaina?

13 Ua taʻua e Paulo o se tasi o fuafuaga tāua o sauniga, ina ia ‘⁠atiaʻe, faalaeiau, ma faamāfanafana’ ai i latou o loo auai. * (1 Kori. 14:3.) E faapefea i toeaina Kerisiano i aso nei ona faamautinoa, ua faalaeiauina ma faamāfanafanaina uso ma tuafāfine i a latou vaega i sauniga? Ina ia tali lenā fesili, seʻi o tatou talanoaina se sauniga na faia e Iesu a o leʻi leva ona toetū o ia.

14. (a) O ā mea na tutupu a o leʻi oo i se sauniga na faatulaga e Iesu? (e) Aiseā na faagaeetia ai le ʻauaposetolo ina ua “faalatalata atu Iesu ma fetalai atu iā i latou”?

14 Muamua, seʻi mātau mea na tutupu a o leʻi oo i lenā sauniga. A o lata ina fasiotia Iesu, na ‘tuua o ia e le ʻauaposetolo ae sosola,’ ma e pei ona valoia, na “taʻitoʻatasi [i latou] ma sola i lona lava aiga.” (Mare. 14:50; Ioa. 16:32) Ae ina ua toetū Iesu, na ia valaaulia ona soo lotomafatia ia auai i se sauniga faapitoa. * O lea, na “ō atu soo e toʻasefulu tasi i Kalilaia i le mauga e pei ona faatonuina ai i latou e Iesu.” Ina ua latou taunuu, na “faalatalata atu Iesu ma fetalai atu iā i latou.” (Mata. 28:10, 16, 18) Seʻi manatu i le faagaeetia o le ʻauaposetolo ina ua tausolomua Iesu e faafeiloaʻi i latou! O le ā na talanoaina e Iesu?

15. (a) O ā mataupu na talanoaina e Iesu, ae o le ā le mea e na te leʻi talanoaina? (e) O le ā le aafiaga o lenā sauniga i le ʻauaposetolo?

15 Na amata le fetalaiga a Iesu i se faalauiloaga: “Ua tuuina mai iā te aʻu le pule uma.” Ona ia tuu atu lea o se tofiga iā i latou: “O le mea lea, ia outou ō atu e fai tagata o nuu uma lava ma soo.” Ona faaiʻu lea i le faamautinoa atu iā i latou: “Ou te faatasi ma outou i aso uma lava.” (Mata. 28:18-20) Ae pe na e mātauina le mea e leʻi faia e Iesu? E na te leʻi otegiaina ona aposetolo, pe faaaogā lenā sauniga e fesiligia ai mea o loo i o latou loto, pe toe taʻua le taimi na latou lē faatuatua ai ina ia atili ai ona iā i latou le lagona nofosala. Nai lo o lea, na faamautinoa atu e Iesu e la te alolofa ma lona Tamā iā i latou, i le tuuina atu lea iā i latou o se tofiga tāua. Na faapefea i fetalaiga a Iesu ona aafia ai le ʻauaposetolo? Na matuā faamalosia, faalaeiau ma faamāfanafanaina ai i latou i lenā sauniga, ma mulimuli ane latou toe ‘aʻoaʻo atu ai ma folafola atu le tala lelei.’—Galu. 5:42.

16. E faapefea ona faaaʻoaʻo toeaina Kerisiano i aso nei iā Iesu, i le faia o sauniga e avea o se puna e faafouina ai?

16 Talu ai e faaaʻoaʻo toeaina i aso nei iā Iesu, o lea e latou te manatu ai i sauniga o ni avanoa ia e faamautinoa atu ai i uso talitonu le alofa e lē mavae o Ieova mo ona tagata. (Roma 8:38, 39) O lea, pe a fai vaega a toeaina i sauniga, e latou te taulaʻi atu i uiga lelei o o latou uso ae e lē o o latou vaivaiga. E latou te lē fesiligia mea o loo i loto o o latou uso. Nai lo lea, e atagia mai i a latou faamatalaga e latou te ioe o loo alolofa uso talitonu iā Ieova ma mananaʻo e fai le mea saʻo. (1 Tesa. 4:1, 9-12) E moni e iai taimi e tatau ai i toeaina ona avatu ni aʻoaʻiga i le faapotopotoga e faasaʻo ai, ae pe afai e na o ni nai tagata e manaʻomia ona faasaʻo, e sili la ona lelei pe a talanoa na o i latou ma na tagata. (Kala. 6:1; 2 Timo. 2:24-26) Pe a talanoa atu i le faapotopotoga atoa, e tatau i toeaina ona faamālō atu pe afai e talafeagai.  (Isa. 32:2) E latou te taumafai e talanoa atu i se auala faapena ina ia uma ane le sauniga, ua faafouina ma faamalosia tagata uma na auai.—Mata. 11:28; Galu. 15:32.

O se Puna o Faamāfanafanaga

17. (a) Aiseā ua sili atu ai ona tāua i le taimi nei ona avea a tatou sauniga o se puna o faamāfanafanaga? (e) O le ā e te faia ina ia avea ai sauniga o se mea e atiaʻe ai? (Tagaʻi i le pusa “Auala e Sefulu e Avea ai Sauniga ma Mea e Atiaʻe ai Oe ma Isi.”)

17 A o faateleina le leaga o le lalolagi a Satani, e ao la ona faamautinoa o loo avea a tatou sauniga faa-Kerisiano o se puna o faamāfanafanaga mo tagata uma. (1 Tesa. 5:11) Ua taʻua e se tuafafine o lē na la fesagaʻia ma lona toʻalua se faafitauli ogaoga i ni nai tausaga ua mavae: “O le iai i le Maota mo Sauniga e pei lava ua aapa mai aao alofa o Ieova iā i maʻua. A o ma iai i inā i taimi o sauniga, faatasitasi ma o tatou uso ma tuafāfine Kerisiano, na ma iloa ai e mafai ona tuu atu o ma popolega iā Ieova ma lagona ai le toʻafilemu o o ma loto.” (Sala. 55:22) Tau ina ia faalaeiauina ma faamāfanafanaina foʻi i latou uma e auai i a tatou sauniga. Ina ia faia faapea, seʻi faaauau ona fai la tatou sao ina ia avea ai sauniga o se mea e atiaʻe ai.

[Faaopoopoga i lalo]

^ pala. 1 Na valoia o le a muta nisi vala o sauniga a Kerisiano i le uluaʻi senituri. O se faataʻitaʻiga, e tatou te lē o toe “tautatala i gagana eseese” pe “faamatalaina . . . valoaga.” (1 Kori. 13:8; 14:5) E ui i lea, ua fesoasoani faatonuga a Paulo e tatou te iloa ai le auala e tatau ona fai ai sauniga faa-Kerisiano i aso nei.

^ pala. 11 Mo ni fautuaga i le auala e faaleleia ai a tatou tali i sauniga, tagaʻi i Le Olomatamata, Setema 1, 2003, itulau e 19-22.

^ pala. 13 E tusa ai ma le eseesega o le upu “faalaeiau” ma le “faamāfanafana,” ua faamatalaina i le Vine’s Expository Dictionary of Old and New Testament Words e faapea, o le upu Eleni ua faaliliuina i le “faamāfanafana” e faasino atu “i se uiga matuā alofa faapelepele e sili atu nai lo o le [faalaeiau].”—Faatusatusa i le Ioane 11:19.

^ pala. 14 Atonu o le taimi lea na taʻua mulimuli ane e Paulo ina ua ia faapea mai, na “faaali atu [Iesu] i le ʻauuso pe ā ma le toʻalima selau.”—1 Kori. 15:6.

E Faapefea Ona E Tali?

• O le ā le tāua o sauniga faa-Kerisiano?

• E faapefea ona saosaolaumea tali e fai i sauniga ina ia “atiaʻe ai le faapotopotoga”?

• O le ā e aʻoaʻoina mai i se sauniga na faia e Iesu ma ona soo?

[Fesili mo le Suʻesuʻega]

[Pusa/Ata i le itulau 22, 23]

AUALA E SEFULU E AVEA AI SAUNIGA MA MEA E ATIAʻE AI OE MA ISI

Sauniuni muamua. Pe a e suʻesuʻe muamua le mataupu o le a talanoaina i le Maota mo Sauniga, o le a atili ai ona e fiafia i sauniga ma manatua pea na manatu.

Auai e lē aunoa. Talu ai e matuā faalaeiauina pe a toʻatele tagata e auai, e tāua tele la lou auai.

Vave taunuu. Pe afai e te saofaʻi i lou nofoa a o leʻi amata, o le a e iai i le taimi o le pese amata ma le tatalo, o ni vaega o la tatou tapuaʻiga iā Ieova.

Ia sau ua lava tapena. Aumai lau Tusi Paia ma lomiga e faaaogā i le sauniga, ina ia mulimuli ai ma malamalama lelei i mea o loo talanoaina.

ʻAlofia mea e tosina ese ai. O se faataʻitaʻiga, ia faitau text i le telefoni pe a uma sauniga, ae e lē o taimi o sauniga. Ona e lē uaʻi atu ai lea i mea e patino iā te oe.

Fai se sao. Pe a toʻatele tagata e fai ni a latou tali, o le a faalaeiauina ma faamalosia foʻi le toʻatele i manatu eseese e faaalia ai le faatuatua.

Faapupuu au tali. O le faia faapea o le a maua ai e le isi toʻatele se avanoa e fai ai ni tali.

Faataunuu faaeaga. Talu ai ua avea ma tagata aʻoga o le Aʻoga o le Faiva Faatiokarate po o ē e faia vaega i le Sauniga o le Auaunaga, o lea ia sauniuni lelei, faataʻitaʻi muamua ma taumafai e aua neʻi lē faia ou faaeaga.

Faamālō i ē na fai sao. Taʻu i ē sa fai se vaega i le sauniga po o ē na fai ni tali, e matuā talisapaia a latou taumafaiga.

Miomiō faatasi. O faafeiloaʻiga māfana ma talanoaga faalaeiau a o leʻi amata ma taimi e uma ai sauniga, o le a faaopoopo atu ai i le manaia ma aogā e maua mai i le auai i sauniga.