Skip to content

Skip to table of contents

Faaauau Ona Ou Pisi i le Faalapotopotoga a Ieova

Faaauau Ona Ou Pisi i le Faalapotopotoga a Ieova

 Faaauau Ona Ou Pisi i le Faalapotopotoga a Ieova

Faamatalaina e Vernon Zubko

NA OU ola aʻe i se faatoʻaga e lata i Stenen, o se nuu i le itumalo o Saskatchewan, i Kanata. Sa galulue malosi oʻu mātua o Fred ma Adella, e tausia i matou ma loʻu tuafafine matua o Aurellia, o aʻu ma oʻu tei laiti o Alvin, Allegra ma Daryl, i le itu faaleagaga ma le faaletino. I aso nei, o loo matou lotofaafetai pea i o matou mātua ona o le aʻoaʻoina o i matou i le upu moni.

O loʻu tamā o se Kerisiano faauuina, ma sa talaʻi ma le lē fefe. Sa galue malosi e tausia le aiga, ae sa ia faailoa atu foʻi i tagata uma o ia o se Molimau. E talanoa i taimi uma e uiga i le upu moni. E lē galo iā te aʻu lana faaaʻoaʻoga o le maelega ma le lototele. E masani ona ia fai mai iā te aʻu, “Ia faaauau ona pisi i le faalapotopotoga a Ieova, ona e ʻalofia ai lea o le tele o faafitauli.”

Sa masani ona matou talaʻi i ala tetele i Stenen ma nuu tuaoi. E leʻi faigofie lenā galuega iā te aʻu. O nuu uma e iai ni tamaiti fia malolosi, e ō mai ma ula mai iā i matou o le fanau iti. Ina ua valu oʻu tausaga, sa ou tū i se tulimanu o le auala ma faaali atu Le Olomatamata ma le Ala Mai! a o siʻo aʻu e ni tamaiti. Na latou seʻi ese loʻu pulou fou ma sili i luga o se pou i oʻu autafa. O le mea e faafetai ai, na iloa mai e se uso matua na vaavaaia aʻu le mea na tupu. Na sau ma fesili mai, “Vern, e iai se mea o tupu?” Na vave lava ona sosola tamaiti. E ui sa ou lē fiafia i le mea na tupu, ae na ou iloa ai, pe a talaʻi i ala tetele, e tatau ona savali solo ae aua le tūtū faamalō e pei o se pou. O lenā toleniga a o oʻu tuputupu aʻe, na ou lototele ai foʻi e talaʻi mai i lea fale i lea fale.

Na ma papatiso ma Alvin iā Me 1951 ina ua 13 oʻu tausaga. Ou te manatua na faalaeiau i matou e le uso na faia le lauga o le papatisoga, o Jack Nathan, ia aua neʻi uma se masina ae e leʻi talanoa e uiga iā Ieova. * Sa manatu lo matou aiga i le auaunaga paeonia, o le galuega sili lea e ao ona fai. O lea i le 1958 ina ua uma aʻu aʻoga, na ou siitia ai i Winnipeg, i Manitoba ina ia paeonia ai. E ui sa fiafia loʻu tamā e ma te galulue i le pisinisi a le aiga o sē e faamafolafolaina laupapa, ae sa la matuā faalaeiauina ma tinā le auaunaga faataimi atoa, ma lagolagoina loʻu siitia atu.

Se Nofoaga Fou ma se Paga Fou

I le 1959, na valaaulia ai e le ofisa o le lālā so o se tasi e mafai, ia siitia atu i Quebec lea sa matuā manaʻomia ai ni tagata talaʻi. Na ou alu atu i Montreal ma paeonia ai. Oka se suiga! Sa matuā fou mea uma i loʻu olaga a o ou aʻoaʻoina le gagana Falani, ma faamasani  i se aganuu fou. Na fai mai le ovasia matagaluega iā te aʻu, “Ia aua lava neʻi e fai atu, ‘O le auala lenei e fai ai i lo matou nuu.’” O se fautuaga lelei lenā.—1 Kori. 9:22, 23.

Sa leai saʻu paga paeonia ina ua ou siitia atu i Quebec. Peitaʻi, na avea Shirley Turcotte, o se tuafafine talavou na ma feiloaʻi i Winnipeg, ma aʻu paga tumau ina ua ma faaipoipo iā Fepuari i le 1961. E sau foʻi o ia mai i se aiga e alolofa iā Ieova. Ae ou te leʻi matuaʻi iloaina i lenā taimi, o le a avea o ia ma sē e faamalosi ma faalaeiau iā te aʻu a o faagasolo tausaga.

Se Talaʻiga i le Tolotolo o Gaspé

Na tofia i maʻua o ni paeonia faapito i Rimouski, i Quebec, ina ua tuanaʻi le lua tausaga talu ona ma faaipoipo. I le tausaga na sosoo ai i le tau e fuga ai laau, na talosaga mai ai le ofisa o le lālā iā i maʻua e malaga ma talaʻi i le tolotolo o Gaspé, i le talafatai i sasaʻe o Kanata. O la ma tofiga, ia totō fatu o le upu moni i le tele e ma te mafai ai. (Fai. 11:6) Na ma tuu i la ma taavale le silia i le 1,000 mekasini ma tusi e lata i le 400, ma meaʻai ma lavalava, ma alu loa se malaga e talaʻi mo le masina atoa. Na ma talaʻi i nuu taʻitasi i le tolotolo o Gaspé. Na lapataʻia i le leitiō faasalalau e faapea ua ō mai Molimau a Ieova, ma fai atu ia aua neʻi taliaina a ma tusi. Peitaʻi, o le toʻatele o tagata e leʻi malamalama i le faasalalauga ma manatu o loo faalauiloa mai a ma lomiga, o lea na latou talia ai lomiga.

Talu ai e leʻi leva ona faataga le galuega talaʻi i lenā taimi i nisi o vaipanoa o Quebec, o nisi la taimi na taofia ai e leoleo le talaʻiga. O le mea lenā na tupu i se tasi o aai na toetoe o aiga uma na ma tuu i ai lomiga. Na fai mai se leoleo iā i maʻua e matou te ō i le ofisa o leoleo, ma na ma usiusitaʻi i ai. Na ou iloa ane, na faia e le lōia a le aai se faatonuga ia taofi la ma talaʻiga. Talu ai e leʻi iai le taʻitaʻi leoleo i lona ofisa i lenā aso, na ou faaali atu ai i le lōia se tusi aloaʻia mai i le ofisa o le lālā i Toronto, o loo faamatalaina ai la ma aiā e talaʻi. Ina ua faitau e le lōia le tusi, na vave ona tali mai: “Vaai, ou te lē o manaʻo i se vevesi. O le patele na fai mai iā te aʻu e taofi le lua talaʻiga.” Talu ai na ma mananaʻo ia iloa e tagata e lē o solitulafono la ma galuega, na ma toe vave foʻi ai i le oganuu lea na taofi ai i maʻua e le leoleo, ma toe faaauau le talaʻiga.

Ina ua ma toe foʻi i le taeao e sosoo ai e vaai le taʻitaʻi leoleo, na lē fiafia o ia ina ua faalogo na taofia la ma galuega. Oka, a e faalogo i tala a le taʻitaʻi leoleo na fai i le telefoni i le lōia, na matuā ita lava! Na fai mai le taʻitaʻi leoleo a toe iai se isi faafitauli, e tatau ona ma telefoni saʻo atu iā te ia, ona ia foʻia lea o le mataupu. E ui lava foʻi o i maʻua o ni tagata mai i se isi nuu ma e tau lē lelei la ma faa-Falani, ae na agalelei ma talimālō mai tagata iā i maʻua. Ae na ma taumānatu, ‘⁠Po o le a latou iloa ea le upu moni?’ Na ma maua le tali i tausaga mulimuli ane ina ua ma toe foʻi i ai, e fausia Maota mo Sauniga i le tolotolo o Gaspé. Na ma iloa ane o le toʻatele o i latou na ma talaʻi i ai ua avea nei ma o ma uso. Ioe, o Ieova e na te faatupuina.—1 Kori. 3:6,7.

Ua Ma Maua se Tofi

Na fanau la ma tama teine o Lisa i le 1970. Na atili ai ona ma olioli ona o lenei tofi mai iā Ieova. O le tele o galuega o le fausiaina o Maota mo Sauniga na matou galulue faatasi ai ma Shirley ma Lisa. Ina ua uma aʻoga a Lisa, na faapea mai o ia: “Mom ma Dad, talu ai na lua lē toe paeonia mo se taimi ona o aʻu, o lea la o le a ou taumafai e toe faapaleni na tausaga e ala i le avea ma paeonia.” E silia i le 20 tausaga mulimuli ane o galue pea Lisa o se paeonia, ae i le taimi nei ua galulue faatasi ma lana tane o Sylvain. Ua la maua faatasi le faaeaga o le galulue i galuega faufale faavaomalo. O le sini o lo matou aiga, ia faafaigofie  o matou olaga ma faaavanoa atu i matou mo le auaunaga iā Ieova. E lē galo iā te aʻu upu a Lisa ina ua amata lana paeonia. O le mea moni, na ia uunaʻia aʻu e toe amata ona paeonia i le 2001, ma o loo faaauau e oo mai i le asō. O le paeonia ua faaauau ai pea ona ou iloa faalagolago atu iā Ieova i mea uma ou te faia, ma ia ola i se olaga faigofie ae e faamalieina ma fiafia.

O Galuega Faufale e Manaʻomia ai le Alofa ma le Faamaoni

Ua aʻoaʻoina aʻu e Ieova e faapea, pe afai e faaavanoa atu i tatou ma talia so o se tofiga e na te aumaia, e tele faamanuiaga o le a tatou maua. O se faaeaga tautele loʻu auauna i le Komiti o Faugāfale, ma galulue i galuega faufale i Quebec ma isi vaipanoa faatasi ma oʻu uso ma tuafāfine.

E ui lava o nisi uso atonu e latou te lē faia ni lauga mananaia mai i le pulelaa, ae e mataʻina la latou galulue i galuega o le fausiaina o Maota mo Sauniga. Ua tuu atoa i ai loto o nei uso pele i le galuega, ma iloa manino ai a latou taleni. O le iʻuga masani, o se fale matagofie mo le tapuaʻiga iā Ieova.

Na fesiligia aʻu, “O ā ni uiga e sili ona tāua i se tagata e tauofo e galue i galuega o le fausiaina o se Maota mo Sauniga?” E tusa ai ma mea ua ou iloa, e tatau i se tagata ona muamua alofa iā Ieova ma lona Alo faapea le ʻauuso. (1 Kori. 16:14) Lona lua, e ao ona faamaoni. Pe a tulaʻi mai mea i se auala e tatou te lē mananaʻo ai, ma o le a tupu lenei mea, o le a faaauau pea ona lagolagoina e se tagata faamaoni le taʻitaʻiga a le faalapotopotoga. O le faamaoni o le a uunaʻia ai foʻi o ia e tauofo i isi galuega faufale i le lumanaʻi.

Lotofaafetai iā Ieova

E ui lava na maliu loʻu tamā i le 1985, ae e lē galo iā te aʻu lana fautuaga ia faaauau ona ou pisi i le faalapotopotoga a Ieova. E lē taumatea o loo pisi pea o ia, e pei foʻi o isi o ē ua maua lo latou tofi i le vaega faalelagi o le faalapotopotoga a Ieova. (Faaa. 14:13) Ua 97 nei tausaga o mom. Talu ai ua pē le isi ona itu, ua lē manino la lana tautala e pei ona sa iai muamua, ae o loo ia malamalama pea i le Tusi Paia. E na te siiina mai mau o le Tusi Paia i ana tusi ma faalaeiau i matou, e faaauau ona auauna ma le faamaoni iā Ieova. E maʻeu le lotofaafetai o i matou o le fanau ona o le iai o ni mātua alolofa faapea!

Ou te matuā lotofaafetai foʻi iā Ieova mo laʻu avā ma le paga faamaoni o Shirley. E na te manatua pea le fautuaga a lona tinā, “O le a pisi tele Vern i le upu moni, ma e tatau ona e iloa faaavanoa atu o ia e galulue ma fesoasoani i isi.” Ina ua ma faaipoipo i le 49 tausaga ua tuanaʻi, na ma ioe o le a ma matutua faatasi, auauna iā Ieova, ma pe afai e faasaoina i maʻua i le iʻuga o lenei faiga o mea, o le a ma toe talavou faatasi ma faaauau ona auauna iā te ia e faavavau. Ioe, sa tele mea na matou faia “i le galuega a le Alii.” (1 Kori. 15:58) O le mea moni na tausia i matou e Ieova, ma faamautinoa ua matou maua mea lelei uma.

[Faaopoopoga i lalo]

^ pala. 6 Tagaʻi i Le Olomatamata o Setema 1, 1990, itulau e 10-14, mo le talaaga o le soifuaga o Jack Halliday Nathan.

[Ata i le itulau 31]

“O le sini o lo matou aiga, ia faafaigofie o matou olaga ma faaavanoa atu i matou mo le auaunaga iā Ieova”