Skip to content

Skip to table of contents

I‘u Manuia le Tauiviga Faapitoa i Bulgaria

I‘u Manuia le Tauiviga Faapitoa i Bulgaria

 Iʻu Manuia le Tauiviga Faapitoa i Bulgaria

“E telē le galuega o le seleselega, ae e toʻaitiiti le ʻaufaigaluega. O le mea lea, ia outou ʻaiʻoi atu i le Alii o le seleselega, ina ia auina mai se ʻaufaigaluega e faia le seleselega.”—MATA. 9:37, 38.

MAʻEU le talafeagai o na fetalaiga a Iesu i Bulgaria, o se atunuu maugā matagofie i le itu i saute i sasaʻe o Europa! O loo matuā manaʻomia ai nisi ʻaufaigaluega, e talaʻi atu le tala lelei i le silia i le fitu miliona o tagata e nonofo ai. E tusa ma le 1,700 le ʻautalaʻi i inā, ae e lē mafai ona latou talaʻia le oganuu atoa. O lea na ioe ai le Vaega Pule e valaaulia Molimau e tautatala i le gagana Bulgaria o loo nonofo i isi atunuu, e auai i se tauiviga faapitoa na faia i le 2009. Na faatulaga e fitu vaiaso e fai ai le tauiviga a o taumāfanafana, ma iʻu ai i le Tauaofiaga Itumalo “Ia Faaauau Ona Mataala!” na faia i Sofia iā Aokuso 14-16, 2009.

E Toʻatele na Tali Mai

Na tomānatu uso i le ofisa o le lālā i Sofia pe e toʻafia o le a ō mai mai i Falani, Siamani, Eleni, Italia, Polani ma Sepania. Auā foʻi o le a faatupe e le tagata lava ia lana malaga ma faaaogā ona aso mālōlō e talaʻi ai. Maʻeu le fiafia ona i vaiaso taʻitasi, na faatupulaʻia le aofaʻi o tagata na talosaga e fia ō mai, seʻia oo atu le aofaʻi i le 292! Ona e toʻatele ē na fia ō mai, na tatau ai ona tofia atu nei tagata tauofo i aai eseese e tolu o Bulgaria: o Kazanlak, Sandanski, ma Silistra. Na valaaulia e ovasia o matagaluega i Bulgaria paeonia ma tagata talaʻi o le atunuu, ia auai foʻi i le tauiviga. O le iʻuga, e 382 tagata tauofo na talaʻia ma le maelega oganuu na seāseā talaʻia ai le tala lelei.

Na muamua ō atu uso mai i faapotopotoga latalata ane e suʻe ni nofoaga e api ai le ʻauuso. Na latou suʻeina ni fale mautotogi ma ni potu taugofie i faletalimālō. Na galulue filigā uso i Bulgaria e fesoasoani e faamautū mea e nonofo ai ma tausia nei uso ina ua taunuu mai. Na totogi ni fale i aai uma e tolu ina ia faia ai sauniga. O uso na asiasi mai na faatulaga e latou te faia sauniga a le faapotopotoga. O se fiafiaga le vaai atu i aai e lē o iai se Molimau, ua faapotopoto ai tagata talaʻi e 50 e vivii atu iā Ieova.

Na matuā maelega ē na ō mai mai i isi atunuu mo le tauiviga. O le taumāfanafana, e mafai ona oo atu le vevela i Bulgaria i le silia i le 40 tikeri Celsius (100 tikeri Fahrenheit). Peitaʻi e leʻi taofia ai nei uso ma tuafāfine maelega. E na o le tolu vaiaso na faia ai se molimau māeʻaeʻa i Silistra, o se aai i talaane o le vaitafe o Danube lea e silia i le 50,000 tagata e nonofo ai. O lea na faaauau atu ai le talaʻiga a uso i nuu latalata ane, ma oo atu ai i Tutrakan, lea e 35 maila (55 km) i sisifo o Silistra. E masani ona amata la latou talaʻiga i le 9:30 i le taeao. Pe a uma se meaʻai o le aoauli, e masani ona latou faaauau seʻia oo i le 7:00 i le afiafi po o tua atu foʻi. E faapena foʻi i Kazanlak ma Sandanski, o le maelega tele o nei uso tauofo na oo atu ai le tauiviga i nuu ma aai e tuaoi.

 O le ā na Faataunuuina?

Na faia se talaʻiga mataʻina i nei vaiaso e fitu. E pei ona taʻua i aso o le ʻauaposetolo, e mafai ona faapea atu tagata o ia aai, ‘⁠Ua outou faatumu lo matou aai i a outou aʻoaʻoga.’ (Galu. 5:28) E tusa ma le 50,000 mekasini na tufa atu e Molimau a Ieova, ma amata ni suʻesuʻega faale-Tusi Paia e 482. O le mea e fiafia ai, na faatū se faapotopotoga i Silistra, ma ni vaega i Kazanlak ma Sandanski iā Setema 1, 2009. O se faalaeiauga le vaai atu ua agaʻigaʻi i luma faaleagaga ē na faatoʻā faalogo i le tala lelei a o fai le tauiviga.

O se tuafafine paeonia faapito mai i Sepania e tautala i le gagana Bulgaria, na talaʻi atu iā Karina i le uluaʻi vaiaso o le tauiviga, o se fafine i Silistra e faatau nusipepa i le alatele. Na fiafia Karina ma alu atu i le sauniga, ma na ioe e fai sana suʻesuʻega. E lē talitonu lana tane i le Atua, o lea na manaʻo ai Karina e fai lana suʻesuʻega i se paka. Na auai lana fanau teine e toʻalua i le suʻesuʻega. Na matuā talisapaia e le teine matua, o Daniela, le upu moni o le Tusi Paia. E tasi le vaiaso na ia faitauina ai le tusi o le Aʻoaʻoga a le Tusi Paia, ma faatatauina loa le aʻoaʻoga a le Tusi Paia e aua le ifo i tupua. Ona amata lea ona ia taʻu atu le upu moni i ana uō. E na o le tolu vaiaso talu ona auai mo le uluaʻi taimi i le sauniga a le faapotopotoga, ae faapea atu i le tuafafine na faia le suʻesuʻega: “Ua ou iloa o le upu moni lenei. O le ā laʻu mea e fai ina ia ou alu ai foʻi e talaʻi?” O loo faaauau ona agaʻigaʻi i luma Daniela faatasi ma lona tinā ma lona uso laʻitiiti.

Ina ua uma le talaʻiga i Kazanlak, na savali atu se uso Bulgaria e igoa iā Orlin, na sau mai i Italia mo le tauiviga, i le mea na api ai. Na talaʻi o ia i ni tama talavou se toʻalua na nofonofo i le nofoa o se paka. Na avatu e ia se tusi o le Aʻoaʻoga a le Tusi Paia iā i laʻua, ma faatulaga e toe asiasi atu i le aso e sosoo ai. I lenā asiasiga, na amata ai e Orlin se suʻesuʻega ma Svetomir ma faaauau i le aso na sosoo ai. E iva aso a ua faavalu ona fai le la suʻesuʻega. Na faapea atu Svetomir: “I le lua aso a o ta leʻi feiloaʻi, na ou tatalo i le Atua e fesoasoani mai ia ou iloa o ia. Na ou taʻutino atu i le Atua pe afai e fesoasoani mai iā te aʻu, o le a ou tuuina atu loʻu ola iā te ia.” Ina ua toe foʻi Orlin i Italia, na faaauau e uso i Bulgaria le suʻesuʻega a Svetomir, ma ua ia ave i fale le upu moni.

 Faamanuiaga e Tele mo Ē na Auai

O ā lagona o ē na faaaogā o latou aso mālōlō ma a latou lava tupe, e malaga ai i se isi atunuu e talaʻi atu le tala lelei? Na tusi se toeaina o loo galue i Sepania: “O le tauiviga na atili ai ona māfana uso Bulgaria o loo nonofo i Sepania. Na telē se aafiaga lelei i uso na auai.” Na tusi se ulugalii mai i Italia: “O se masina e sili ona manaia lenei i o ma olaga!” Na la fai mai atili: “O le tauiviga na suia ai o ma olaga ma o ma tulaga.” Na mafaufau lenei ulugalii pe mafai ona siitia atu e nonofomau i Bulgaria, i le mea o loo tele ai le manaʻoga mo le ʻautalaʻi. Na auai i le tauiviga i Silistra se tuafafine paeonia sauatoa nofofua mai i Sepania, e igoa iā Carina. Ina ua toe foʻi i Sepania, na faamavae mai i lana galuega ae siitia atu i Bulgaria e fesoasoani i le faapotopotoga fou i lenā aai. Sa lava tupe na ia faaputuina e nofo ai i Bulgaria mo le tausaga. Ua faapea mai Carina e tusa ai o lana filifiliga: “Ua ou matuā fiafia ona ua tuu mai e Ieova le avanoa ou te galue ai i inei i Bulgaria, ma ou te faamoemoe o le a ou nofo ai pea i inei mo se taimi umi. Ua lima aʻu suʻesuʻega faale-Tusi Paia, ma e toʻatolu o loo auai i sauniga.”

Na manaʻo se tuafafine mai i Italia e auai i le tauiviga, ae ona e fou i lana galuega, e leʻi maua ai ni ona aso mālōlō. E ui i lea, na talosaga o ia e mālōlō mo se masina e aunoa ma se totogi, ae na nofosauni foʻi e faamavae mai i lana galuega pe a lē talia lana talosaga. Na faateʻia o ia ina ua faapea atu lona pule: “Ua lelei, ae e pau lenei o le mea: Ia e lafo mai saʻu tusi mai i Bulgaria.” Na talitonu le tuafafine ua tali Ieova i ana tatalo.

O se tuafafine talavou e igoa iā Stanislava mai i le aai o Varna i Bulgaria, e faigaluega i le vaiaso atoa i se galuega e lelei le totogi, na mālōlō mai i lana galuega ina ia auai i le tauiviga i Silistra. Na tagi o ia ina ua vaai i le olioli o le toʻatele o paeonia na ō mai mai i mea mamao, ina ia talaʻi atu le tala lelei i lona atunuu. Sa mafaufau o ia i le mea o loo ia faia i lona olaga, o le faamuamua lea o lana galuega e lelei le totogi. Ina ua uma le lua vaiaso ma ua toe foʻi i lona aiga, na faamavae loa mai i lana galuega ma avea ma paeonia sauatoa. O loo matuā fiafia o ia i le taimi nei, ona o loo ia manatua Lē na faia o ia a o talavou.—Fai. 12:1.

O se faaeaga le maelega i le auaunaga iā Ieova. E leai se isi mea sili e te faia, i lo o le faaaogā o lou taimi ma le malosi i le galuega e sili ona tāua, o le aʻoaʻo ma talaʻi atu le tala lelei. Po o iai ni auala e mafai ona faalautele atu ai lou sao i lenei galuega faasaoola? Atonu o loo iai ni vaega i lou atunuu o loo manaʻomia ai le ʻautalaʻi. Pe e mafai ona e siitia atu i na vaipanoa? Pe atonu foʻi e te aʻoaʻoina se isi gagana ina ia fesoasoani atu ai i tagata o lou atunuu, o loo galala mo le upu moni o le Tusi Paia. Po o ā lava suiga e te faia ina ia faalautele atu ai lau faiva, e mautinoa o le a matuā faamanuia Ieova iā te oe.—Faata. 10:22.

[Pusa/Ata i le itulau 32]

Se Aso Mataʻina

O le toʻatele o i latou na ō mai mai i atunuu o Europa e fesoasoani i le tauiviga faapitoa i Bulgaria, na fuafua e auai i le Tauaofiaga Itumalo “Ia Faaauau Ona Mataala!” lea na faia i Sofia. O se faalaeiauga sili mo uso ma tuafāfine le feiloaʻi ma le toʻatele o ē na asiasi mai mai i atunuu eseese. Na matuā faafiafiaina le aofia e 2,039, ina ua tatalaina e le uso o Geoffrey Jackson o le Vaega Pule, le Tusi Paia atoa O le Faaliliuga a le Lalolagi Fou i le gagana Bulgaria! Na faaalia e i latou uma na auai i lenā Aso Faraile lo latou lototalisapaia, e ala i le umi ona patipati ma le leotele. E toʻatele foʻi na fetagisi ona o le olioli. O lenei faaliliuga saʻo ma malamalamagofie, o le a fesoasoani i tagata lotofaamaoni o Bulgaria ina ia iloa Ieova.

[Faafanua i le itulau 30, 31]

(Tagaʻi i le lomiga mo le ata atoa)

BULGARIA

SOFIA

Sandanski

Silistra

Kazanlak

[Ata i le itulau 31]

Na faia se talaʻiga mataʻina i na vaiaso e fitu