Skip to content

Skip to table of contents

Pe E te Manatua?

Pe E te Manatua?

 Pe E te Manatua?

Pe na e fiafia i le faitauina o lomiga fou o Le Olomatamata? Seʻi vaai pe e mafai ona e taliina fesili o loo mulimuli mai:

• E faapefea ona e fesoasoani i lau fanau e iloa o latou tiutefai?

Ia “faia le faaaʻoaʻoga” mo lau tama ina ia iloa ona faatino ona tiutefai. (Ioa. 13:15) Ia talafeagai mea e te faatalitalia; a o faasolo ina matua lau tama, ia aʻoaʻo e iloa tumamā, ia taunuu i le taimi saʻo ma fai ana meaaʻoga. Ia avatu ni faatonuga ina ia aʻoaʻo ai o ia e faatino ona tiutefai.—5/1, itulau e 19-20.

• Aiseā na lē faasalaina ai e le Atua Arona ona o le faia o le tamaʻi povi auro?

Na solia e Arona le tulafono a le Atua i le ifo i tupua. (Eso. 20:3-5) Ae na faatoga atu Mose i le Atua mo Arona, ma na “malosi tele” lana tatalo faatauanau. (Iako. 5:16) Sa iai se talaaga faamaoni o Arona. E ui na faatauanau e tagata Arona e faia se tamaʻi povi, ae na ia faaalia mulimuli ane e leʻi iai lona loto i lea gaoioiga, auā na ʻau atu o ia faatasi ma atalii o Levi i le itu a Ieova. (Eso. 32:25-29)—5/15, itulau e 21.

• O fea sa tū ai Ofeira lea e taʻua i le Tusi Paia na maua ai le auro?

Na fausia e Solomona ni vaa i Esiokape e aumai ai auro mai i Ofeira. (1 Tu. 9:26-28) O lenā taulaga o vaa sa i le pito i luga o le Fagaloa o Aqaba, e lata i le mea o loo iai Elata ma Aqaba i aso nei, i tala ane o le Sami Ulaula. Atonu la sa tū Ofeira i Arapi e lata i le Sami Ulaula, po o talafatai o Aferika po o Initia.—6/1, itulau e 15.

• O le ā le “pasama o Kiliata”? (Iere. 8:22)

O le uu pasama o se suāuu manogi ma o se apulupulu mai i laau eseese na maua i Kiliata, i le itu i sasaʻe o le vaitafe o Ioritana ma isi nofoaga. Na aogā e togafiti ai manuʻa. O le tulaga pagatia o Isaraelu na tatau ai ona latou saʻili se vaifofō, ae e leʻi faia faapea e le nuu. (Iere. 8:9)—6/1, itulau e 21-22.

• O le ā e ono fesoasoani i se Kerisiano e onosaia ai le mulilua o se paaga?

Pe afai o loo taumafai le paaga o loo mamā e ola e tusa ai ma taʻiala o le Tusi Paia, e lē tatau la ona ia lagona le nofosala ona o le lē faamaoni o le paaga mulilua. E silafia e le Atua e te manaʻomia se faamāfanafanaga ma se faalaeiauga. Atonu o le a Ia saunia faamāfanafanaga e ala mai i uso Kerisiano.—6/15, itulau e 30-31.

• E faapefea ona e fesoasoani i sē ua maʻi?

Ia faalogologo lelei. (Fai. 3:1, 7) Ia tigā alofa ma fetuutuunaʻi. (Roma 12:15) Ia faalaeiau ma lotofesoasoani. (Kolo. 4:6; 1 Ioa. 3:18) Ia fesootaʻi pea i ai. (Faata. 17:17)—7/1, itulau e 10-13.

• E faapefea ona tatou iloa e leai se amataga o le Atua?

Na faaalia e Mose lenei manatu i le tatalo. (Sala. 90:2) Ua talafeagai la ona ave iā Ieova le faalupega tutasi o le “Tupu o le vavau.” (1 Timo. 1:17)—7/1, itulau e 28.

• E faapefea ona e aʻoaʻo lau fanau ia fiafia e faitau?

O se siʻomaga māfana ma le faaaʻoaʻoga a mātua, e aogā e fiafia ai tamaiti e faitau. Ia iai foʻi ni a latou tusi. Ia faitau atu i lau fanau. Ia faitau faatasi ma talanoa i mea ua outou faitauina. Fai i le fanau e faitau mai iā te oe ma faalaeiau e fai mai ni fesili.—7/15, itulau e 26.

• Aiseā na lē faavave atu ai Iesu e faamālōlō lana uō ua maʻi, o Lasalo?

E taunuu atu Iesu, ua fā aso talu ona oti Lasalo. O le faatalitali o Iesu na mafai ai ona avatu se molimau e sili ona lelei e uiga i lona Tamā, ma iʻu ai ina talitonu le toʻatele. (Ioa. 11:45)—8/1, itulau e 14-15.

• O ā “mea maualuluga”?

E tele ina faasino atu i nofoaga taalaelae i mea mautiʻetiʻe po o isi nofoaga o tapuaʻiga sesē. O nisi taimi na faatutū ai fata faitaulaga, poutū ma pou paia, ma isi mea e faaaogā e fai ai tapuaʻiga e inosia e le Atua. (Nu. 33:52)—8/1, itulau e 23.