Skip to content

Skip to table of contents

Le Auala ua Lavea‘iina ai i Tatou i le Togiola

Le Auala ua Lavea‘iina ai i Tatou i le Togiola

 Le Auala ua Laveaʻiina ai i Tatou i le Togiola

“O lē e faatuatua i le Alo e maua e ia le ola e faavavau. A o le tagata e lē usiusitaʻi i le Alo, e lē maua e ia le ola, ae tumau pea le toʻasā o le Atua iā te ia.”—IOA. 3:36.

1, 2. O le ā se tasi o māfuaaga na muaʻi lomia ai le Olomatamata a Siona?

UA TAʻUA i le lomiga lona fā o lenei mekasini iā Oketopa 1879 e faapea: “E leai se tagata e suʻesuʻe māeʻaeʻa i le Tusi Paia e na te lē talisapaia le tāua o le maliu o Keriso.” Na faaiʻu lenā mataupu i le manatu tāua lenei: “Seʻi o tatou faaeteete i so o se mea e taʻufaatauvaaina pe faalēaogāina ai le maliu o Keriso, o le taulaga o le leleiga mo agasala.”—Faitau le 1 Ioane 2:1, 2.

2 O se māfuaaga na muaʻi lomia ai le Olomatamata a Siona (o le uluaʻi igoa lea o lenei tusi) iā Iulai i le 1879, ina ia puipuia ai le aʻoaʻoga a le Tusi Paia e uiga i le togiola. O mea na tusia ai na saunia ai “meaʻai i le taimi tatau.” Auā i le faaiʻuga o le senituri lona 17, na amata ai ona masalomia e le toʻatele na faapea mai o Kerisiano le avea o le maliu o Iesu ma togiola mo a tatou agasala. (Mata. 24:45) E toʻatele foʻi i lenā taimi na talitonu i le aʻoaʻoga o le evolusione, o se manatu e feteenaʻi ma le mea moni e faapea, ua paʻū le tagata mai i le tulaga lelei atoatoa. Ua aʻoaʻo e tagata e talitonu i le evolusione, e mafai e le tagata ona faaleleia o ia lava ma e lē manaʻomia ai se togiola. O lea, ua talafeagai lelei ai le timaʻiga a Paulo iā Timoteo: “Ia e leoleoina le mea ua tuuina atu iā te oe, ma ʻaloʻalo ese mai i upu lē aogā e faaleaga ai mea paia, ma feteenaʻiga i le mea ua taʻua ma le pepelo o le ‘poto.’ Ua liliuese nisi mai i le faatuatua  ona o le faalialiavale o lenā poto.”—1 Timo. 6:20, 21.

3. O ā fesili o le a tatou iloiloina?

3 E mautinoa e te lē o manaʻo e ‘liliuese mai i le faatuatua.’ O lea la, e lelei pe a manatunatu i fesili nei: Aiseā ou te manaʻomia ai le togiola? O le ā le auala na faigatā ai le togiola? E faapefea ona aogā iā te aʻu lenei sauniuniga tāua e laveaʻiina ai mai le toʻasā o le Atua?

Laveaʻiina Mai i le Toʻasā o le Atua

4, 5. O le ā e faamaonia ai o loo tumau pea le toʻasā o le Atua i lenei faiga amioleaga o mea?

4 Ua faaalia i le Tusi Paia ma mea na tutupu i aso ua mavae, talu ona agasala Atamu, ua “tumau pea” le toʻasā o le Atua i le fanau a tagata. (Ioa. 3:36) Ua faamaonia lea mea ona e leai se tagata ua sao mai i le oti. Ua lē mafai e le pulega a Satani ona puipuia tagata mai i mala o loo tutupu pea, ma e leai se malo a tagata e mafai ona faamalieina manaʻoga autū o ona tagatānuu uma. (1 Ioa. 5:19) O lea la, ua faaauau ai ona mafatia tagata i taua, solitulafono, ma le mativa.

5 E manino mai la, e lē o iai le faamanuiaga a Ieova i lenei faiga amioleaga o mea. Na fai mai Paulo: “Ua faaalia le toʻasā o le Atua mai i le lagi i amioga faalēmataʻu.” (Roma 1:18-20) O lea la, o i latou e lē salamō ae ola pea i ni olaga e lē fiafia i ai le Atua, e lē sao mai i iʻuga o a latou amioga. Ua faailoa atu i aso nei le toʻasā o le Atua i feʻau faafaamasinoga ua sasaa atu e pei o ni mala i le lalolagi a Satani. O loo maua na faamatalaga i le tele o a tatou lomiga e faavae i le Tusi Paia.—Faaa. 16:1.

6, 7. O le ā le galuega o loo taʻimua ai Kerisiano faauuina, ma o le ā le avanoa o loo matala pea mo tagata i le lalolagi a Satani?

6 Po o le uiga o lenei mea ua tuai tele mo tagata ona ō ese mai i le pulega a Satani, ma maua le finagalo malie o le Atua? E leai, auā o loo matala pea le avanoa e fai ai se leleiga ma Ieova. O loo taʻimua Kerisiano faauuina, “o sāvali o sui o Keriso,” i le faiva i le lautele lea ua talosaga atu ai i tagata o nuu uma: “Ia outou toe lelei ma le Atua.”—2 Kori. 5:20, 21.

7 Ua taʻua e Paulo, o Iesu e “laveaʻiina i tatou mai i le toʻasā o le Atua o loo faaloloʻi mai.” (1 Tesa. 1:10) O lenā faaaliga mulimuli o le toʻasā o Ieova, o le a iʻu i le faaumatiaga e faavavau o tagata agasala e lē salamō. (2 Tesa. 1:6-9) O ai o le a sao ai? Ua taʻua i le Tusi Paia: “O lē e faatuatua i le Alo e maua e ia le ola e faavavau. A o le tagata e lē usiusitaʻi i le Alo, e lē maua e ia le ola, ae tumau pea le toʻasā o le Atua iā te ia.” (Ioa. 3:36) Ioe, o i latou uma o loo ola ma faatuatua iā Iesu ma le togiola, o le a sao mai i le aso mulimuli o le toʻasā o le Atua pe a oo mai le iʻuga o lenei faiga o mea.

Le Auala na Saunia ai le Togiola

8. (a) O le ā le faamoemoe matagofie na tuu atu iā Atamu ma Eva? (e) Na faapefea ona faamaonia o Ieova o le Atua e atoatoa lona faamasinotonu?

8 Na faia Atamu ma Eva e lelei atoatoa. Pe ana tumau ona la usiusitaʻi i le Atua, po o penei o tumu le lalolagi i a la fanau fiafia, e  latou te ola faatasi i le Parataiso. Ae e faanoanoa, ona na solia ma le loto i ai e o tatou uluaʻi mātua le poloaʻiga a le Atua. O le iʻuga, ua faasalaina i laʻua i le oti e faavavau ma tutuliesea mai i le Parataiso. I le taimi na maua ai fanau a Atamu ma Eva, ua aafia tagata i le agasala, ma iʻu ai ina matutua ma feoti le uluaʻi ulugalii. Ua faamaonia ai e faamaoni Ieova i lana fetalaiga, auā o ia o le Atua e atoatoa lona faamasinotonu. Na lapataʻia e Ieova Atamu, pe a aai i le fua faasāina e iʻu ai i le oti, ma o le mea lenā na tupu.

9, 10. (a) Aiseā ua feoti ai ē na tupuga mai iā Atamu? (e) E faapefea ona tatou sao mai i le oti e faavavau?

9 Talu ai ua tatou tupuga mai iā Atamu, ua tuufaasolo mai ai iā i tatou le tino augavale ua aafia i le agasala ma le oti, auā na agasala Atamu ae tatou te e leʻi fananau mai. O lea ua aafia ai i tatou i le faasalaga o le oti. Ana aveesea e Ieova le faasalaga o le oti e aunoa ma le totogia muamua o se togiola, semanū ua lē faamaoni la o ia i lana upu. E pei ua faaaofia e Paulo i tatou uma i lona faapea mai: “Ua tatou iloa e faaleagaga le Tulafono; a o aʻu o le tagata faaletino, ua faatauina atu i le agasala. Auē o aʻu le tagata malaia! O ai na te laveaʻiina aʻu mai i le tino e iʻu ai i loʻu oti?”—Roma 7:14, 24.

10 E na o Ieova e mafai ona saunia le faavae e tusa o lana tulafono e faamagalo ai a tatou agasala, ma tuusaʻoloto ai mai le faasalaga o le oti e faavavau. Na auina mai e ia lona Alo pele mai i le lagi e fanau mai o se tagata lelei atoatoa, ma foaʻi atu lona ola e togiola ai i tatou. E leʻi pei Iesu o Atamu ona sa tumau pea ona lelei atoatoa o ia, auā “e leʻi faia e ia se agasala.” (1 Pete. 2:22) O lea, sa mafai ona tupuga mai iā Iesu se fanau o tagata e lelei atoatoa. Ae peitaʻi na lotomalie o ia e fasiotia e fili o le Atua, ina ia mafai ai ona vaetamaina e ia le fanau agasala a Atamu ma ola ai e faavavau i latou e faatuatua iā te ia. Ua faamatalaina i le Tusi Paia: “E toʻatasi le Atua, ma e toʻatasi foʻi le puluvaga i le va o le Atua ma tagata, o le tagata lea o Keriso Iesu, o lē na ofoina atu o ia lava e fai ma togiola e fetaui lelei mo tagata uma.”—1 Timo. 2:5, 6.

11. (a) E faapefea ona faataʻitaʻia aogā o le togiola? (e) O ai uma e aogā i ai le togiola?

11 E mafai ona faataʻitaʻia le togiola i le tulaga o tagata ua gaoia e se faletupe amio piʻopiʻo a latou tupe uma na teu ai. Ua talafeagai ona faafalepuipui i latou e ana le faletupe mo le tele o tausaga. Ae faapefea i latou na afāina fua i lenei gaoioiga? Ua matitiva ma ua leai se mea e latou te mafaia, seʻi vaganā ua faatau e se tagata e alofa ma mauoloa le faletupe, ma toe faafoʻi uma tupe a nei tagata. I se auala faapena, ua faatau ai e Ieova le Atua ma lona Alo le fanau a Atamu e ala i le toto maligi o Iesu, ma faamagaloina ai a latou agasala. O le mea lenā na faapea mai ai Ioane le Papatiso e uiga iā Iesu: “Faauta! O le Tamaʻi Mamoe a le Atua, o lē e na te aveeseina le agasala a le lalolagi!” (Ioa. 1:29) O le lalolagi o tagata ua aveesea a latou agasala, e aofia ai e lē na o ē o loo ola, a o ē foʻi ua oti.

E Faigatā le Togiola

12, 13. O ā ni mea tatou te aʻoaʻoina mai i le lotomalie o Aperaamo e ofo atu Isaako e fai ai le taulaga?

12 E lē mafai ona tatou malamalama lelei i le faigatā o le togiola i lo tatou Tamā o i le lagi ma lona Alo pele. A ua faamatala mai i le Tusi Paia mea na tutupu e fesoasoani iā i tatou e mafaufau loloto ai i lenei mataupu. Seʻi manatu foʻi i lagona o Aperaamo a o malaga mo aso e tolu i Moria, ona o le usiusitaʻi i le poloaʻiga a le Atua: “Faamolemole, ia ave lou atalii, o lou atalii e toʻatasi, o lē e te alofa faapelepele i ai o Isaako, ma malaga atu i le laueleele o Moria ma ofo mai ai o ia e fai ma taulaga mū, i se tasi o mauga ou te faasino atu iā te oe.”—Kene. 22:2-4.

13 Ua taunuu Aperaamo i le nofoaga na  faasino atu e le Atua. Mafaufau i lagona mafatia o Aperaamo a o fusifusia lima ma vae o Isaako, ma faataoto o ia i luga o le fata faitaulaga na ia faia. Pagā le faigatā iā Aperaamo o le sii aʻe i luga le naifi e fasioti ai lona atalii! Mafaufau foʻi i lagona o Isaako a o taoto i luga o le fata faitaulaga, ma faatalitali tigā o le tuiina o ia i le naifi ma iʻu ai ina oti. Na fetaui lelei le taimi na taofia ai e le agelu a Ieova Aperaamo. E fesoasoani le mea na faia e Aperaamo ma Isaako, e tatou te malamalama ai i le faigatā iā Ieova ona faataga sui o Satani e fasiotia Lona Alo. O le gauaʻi o Isaako iā Aperaamo ua faataʻitaʻia lelei ai le lotomalie o Iesu ia puapuagatia ma maliu mo i tatou.—Epe. 11:17-19.

14. O le ā se mea na tupu iā Iakopo e fesoasoani iā i tatou e talisapaia ai le faigatā o le togiola?

14 E mafai foʻi ona faataʻitaʻia le faigatā o le togiola i se mea na tupu iā Iakopo. Sa sili ona alofa Iakopo iā Iosefa i ona atalii uma. Ae e faanoanoa, ona sa matauʻa uso o Iosefa ma ʻinoʻino iā te ia. E ui i lea, na malie Iosefa e auina atu o ia e lona tamā e vaai po o ā mai ona uso. O le taimi lea o loo latou leoleoina ai mamoe a Iakopo pe tusa ma le 60 maila (100 km) i mātū o lo latou aiga i Heperona. Seʻi mafaufau i lagona o Iakopo ina ua foʻi mai ona atalii ma le ofu tele o Iosefa ua lilofia i le toto! Na teʻi o ia ma faapea atu: “O le ofu talaloa lava lenei o si oʻu atalii! Atonu ua ʻaina o ia e se manufeʻai! Ua saeia lava Iosefa!” Na matuā aafia Iakopo i nei mea, ma e tele aso o faavauvau o ia ona o Iosefa. (Kene. 37:33, 34) Peitaʻi e lē pei le tali mai a Ieova o tagata lē lelei atoatoa. O le mafaufau loloto i lenei mea na tupu iā Iakopo, e aogā iā i tatou e tau malamalama ai i faalogona o le Atua, ina ua faileagaina lona Alo ma fasiotia ma le lē alofa i le lalolagi.

Aogā o le Togiola

15, 16. (a) Na faapefea ona talia e Ieova le togiola? (e) Ua faapefea ona aogā iā te oe le togiola?

15 Na toe faatūina e Ieova le Atua lona  Alo faamaoni i se tino mamalu faaleagaga. (1 Pete. 3:18) E 40 aso na faaali atu ai Iesu i ona soo ina ua toe faatūina mai, ma faamalosia lo latou faatuatua ma saunia i latou mo le galuega talaʻi tele o loo i luma. Ona afio aʻe lea o ia i le lagi. O i inā na ia ofo atu ai i le Atua le tāua o lona toto maligi mo ona soo faamaoni, o ē e faatuatua i le tāua o lana taulaga togiola. Na talia e Ieova le togiola a Keriso e ala i lona tofia o ia e liligi ifo le agaga paia i ona soo sa faapotopoto i Ierusalema i le aso Penetekoso 33 T.A.—Galu. 2:33.

16 Na faalaeiau loa e nei soo faauuina o Keriso isi tagata ia papatiso i le suafa o Iesu Keriso, e faamagalo ai a latou agasala, ma sao ai mai i le toʻasā o le Atua. (Faitau le Galuega 2:38-40.) E mai i lenā aso tāua seʻia oo mai i le taimi nei, e faitau miliona tagata mai atunuu uma ua tosina mai i se faiā māfana ma le Atua ona o le faatuatua i le taulaga togiola a Iesu. (Ioa. 6:44) E tusa ai ma lenei mea, e manaʻomia ona tatou iloilo nisi fesili se lua: Po o iai nisi o i tatou ua maua le faamoemoe o le ola e faavavau ona o a tatou lava galuega lelei? Ona ua tatou maua lenei faamoemoe matagofie, pe faamata e mafai ona toe leiloa atu?

17. O le ā lou manatu e tatau ona iai i le faamanuiaga o le avea ma uō a le Atua?

17 O le togiola o se meaalofa foaʻifua. Ae e ala i le faatuatua i ai, e faitau miliona tagata i aso nei ua avea ma uō a le Atua, ma maua ai le faamoemoe o le ola e faavavau i le parataiso i le lalolagi. Peitaʻi i le avea ma uō a Ieova, e lē faapea ua mautinoa ai o le a tumau la tatou faiā ma ia. O lea, ina ia sao mai i le aso o le toʻasā o le Atua i le lumanaʻi, e tatau ona faaauau pea ona matuā talisapaia “le togiola a Keriso Iesu.”—Roma 3:24; faitau le Filipi 2:12.

Ia Faatuatua Pea i le Togiola

18. O le ā e aofia ai i le faatuatua i le togiola?

18 Ua faaalia i le Ioane 3:36 o le mau autū o lenei mataupu, e aofia ai i le faatuatua i le Alii o Iesu Keriso le usiusitaʻi iā te ia. O le talisapaia o le togiola e tatau ona uunaʻia ai i tatou e ola e tusa ma aʻoaʻoga a Iesu, e aofia ai ana aʻoaʻoga e uiga i amioga. (Mare. 7:21-23) E oo mai le “toʻasā o le Atua” i ē e faia ma le lē salamō amioga e pei o le faitaaga, tausuaga matagā ma “amioga lē mamā uma,” e aofia ai le matamata pea i ata telenonoa ma feusuaʻiga.—Efe. 5:3-6.

19. O ā auala aogā e faaalia ai lo tatou faatuatua i le togiola?

19 O le talisapaia o le togiola e tatau ai ona tatou pisi i “galuega o le faamaoni i le Atua.” (2 Pete. 3:11) Ia lava se taimi e sema e tatalo faatauanau ai e lē aunoa, suʻesuʻe le Tusi Paia, auai i sauniga, fai le tapuaʻiga a le aiga, ma ia maelega e auai i le talaʻiga o le Malo. Ma “aua neʻi galo le faia o mea lelei, ma le tufa atu o mea i isi, auā o taulaga faapena e matuā fiafia i ai le Atua.”—Epe. 13:15, 16.

20. O le ā le faamanuiaga i le lumanaʻi e faatalitalia e tagata uma e faatuatua pea i le togiola?

20 Pe a oo mai le toʻasā o Ieova i lenei faiga amioleaga o mea, maʻeu le fiafia o le a iai ona ua tatou faatuatua i le togiola ma faaalia pea le talisapaia i le taimi nei! I le lalolagi fou ua folafola mai e le Atua, o le a faavavau ona tatou lagona le faafetai ona o lenei sauniuniga matagofie ua laveaʻiina ai i tatou mai i le toʻasā o le Atua.—Faitau le Ioane 3:16; Faaaliga 7:9, 10, 13, 14.

O le ā Lau Tali?

• Aiseā e tatou te manaʻomia ai le togiola?

• Aiseā na faigatā ai le togiola?

• O ā aogā e maua mai i le togiola?

• E faapefea ona tatou faaalia le faatuatua i le taulaga togiola a Iesu?

[Fesili mo le Suʻesuʻega]

[Ata i le itulau 13]

O loo matala pea le avanoa o le leleiga ma Ieova

[Ata i le itulau 15]

O le mafaufau loloto i mea na tutupu iā Aperaamo, Isaako ma Iakopo ua fesoasoani iā i tatou e talisapaia ai le faigatā o le togiola