Skip to content

Skip to table of contents

E Tāua le Tausi Taimi

E Tāua le Tausi Taimi

 E Tāua le Tausi Taimi

E LĒ faigofie le tausi taimi, po o le taunuu i le taimi tonu. O le mamao o le mea e malaga i ai, le pisi o auala, ma le pisi foʻi o le faasologa, o ni luʻitau ia e faafaigatā ai ona tausi i le taimi. Peitaʻi e tāua tele le taunuu i le taimi tonu. O se faataʻitaʻiga i totonu o galuega, o se tagata e tausi taimi e vaai i ai o sē e faamoemoeina ma toʻaga. Ae o le tagata faiaga, e aafia ai galuega a isi, ma le lelei o se galuega, ma le tilivaina o mea o loo manaʻomia mai e isi. O le faiaga e misi ai e se tamaitiiti aʻoga se vasega, ma lē agaʻigaʻi ai i luma. O lou faiaga i le taimi ua faatulagaina i le falemaʻi po o le fomaʻi nifo, e ono aafia ai le togafitiga o lou maʻi.

E iai nofoaga e lē o faatāuaina ai le tausi taimi, ma e mafai ona avea ai ma a tatou masani le tuai. Afai o le tulaga lenā, e tāua tele lo tatou atiaʻe o se faanaunauga ia tausi taimi. O le malamalama i le tāua o le tausi taimi, e mautinoa e aogā iā i tatou e vave taunuu ai. O ā ni māfuaaga o le tāua o le tausi taimi? E faapefea ona tatou taulau i le tausia o le taimi? Ma o ā aogā e tatou te maua mai ai?

O Ieova—O le Atua Tausi Taimi

O le māfuaaga sili e tatou te mananaʻo ai e tausi taimi, ona e tatou te fia faaaʻoaʻo i le Atua o loo tatou tapuaʻi i ai. (Efe. 5:1) O  Ieova o le faaaʻoaʻoga sili o le tausi taimi. E lē tāitai ona tuai. E mulimulituʻi i lana faasologa i le faataunuuina o lona finagalo. O se faaaʻoaʻoga, ina ua tonu iā Ieova o le a faaumatia le lalolagi amioleaga i le lolo, na ia fetalai iā Noa: “Ia e faia se vaa mo oe i le laau o le kofa.” A o lalata atu i lenā taimi, na faatonu e Ieova Noa e ulu atu i le vaa ma faapea atu: “E toe fitu aso ona ou faatotōina ifo lea o le timu i le lalolagi, mo ao e fā sefulu ma pō e fā sefulu; ma ou te soloiesea o meaola ma tagata uma na ou faia mai i le fogāeleele.” Ma, “ina ua mavae aso e fitu ona oo mai ai lea o le vai o le lolo i le lalolagi.” (Kene. 6:14; 7:4, 10) Seʻi manatu i le mea semanū e tupu iā Noa ma lona aiga pe ana lē iai i totonu o le vaa i le taimi tonu. Na manaʻomia ona latou tausi taimi, e pei o le Atua o loo latou tapuaʻi i ai.

E tusa o le 450 tausaga talu ona mavae le Lolo, na taʻu atu ai e Ieova iā Aperaamo, o le a ia maua se atalii o lē e ala mai ai le Fanau  folafolaina. (Kene. 17:15-17) Na fetalai le Atua, o le a fanau mai Isaako “i lenei taimi atofaina i le tausaga lea.” Pe na tupu lenā mea? Ua taʻu mai i le Tusi Paia: “Ua tō Sara, ona ia fanaua lea o le atalii o Aperaamo ina ua toeaina o ia, i le taimi atofaina lea na fetalai mai ai le Atua iā Aperaamo.”—Kene. 17:21; 21:2.

E tele faataʻitaʻiga o loo i le Tusi Paia e faaalia ai le tausi taimi o le Atua. (Iere. 25:11-13; Tani. 4:20-25; 9:25) Ua taʻu mai e le Tusi Paia, ia tatou faatalitali pea i le aso faamasino o Ieova i le lumanaʻi. E ui ina foliga ua “tuai mai” i le manatu o tagata, ae ua tatou mautinoa “e lē faatuai mai.”—Sapa. 2:3.

E Tāua le Tausi Taimi i le Tapuaʻiga

Sa tatau i tane Isaraelu uma ona iai i le taimi ma le nofoaga ua faatulagaina mo “aso o tausamiga iā Ieova.” (Levi. 23:2, 4) Na filifili foʻi e le Atua taimi e ofo atu ai taulaga patino. (Eso. 29:38, 39; Levi. 23:37, 38) Pe e lē o faaalia ai ea e finagalo le Atua ia tausi taimi ana auauna i la latou tapuaʻiga?

I le uluaʻi senituri, na faatonuina e le aposetolo o Paulo le ʻauuso Korinito i le auala e fai ai sauniga a Kerisiano, e faapea: “Ia faia mea uma i se tulaga talafeagai ma le maopoopo.” (1 Kori. 14:40) E faapena foʻi faatasiga a Kerisiano mo tapuaʻiga, e tatau ona amata i le taimi tonu. E lē o suia lava le finagalo o Ieova i le tausia o le taimi. (Mala. 3:6) O le ā e tatou te fai ia avea ai o ni ē e tausi taimi i faatasiga faa-Kerisiano?

Le Auala e Taulau Ai

Ua iloa e isi le aogā o le fuafua mamao. (Faata. 21:5) O se faataʻitaʻiga, pe e atamai le fua o la tatou malaga ia taunuu tonu i le taimi e amata ai le sauniga? Pe lē o se mea atamai le vave malaga ina ia lē tuai ai, e tusa lava pe iai ni mea e “tutupu faafuaseʻi” a o malaga atu? (Fai. 9:11) Ua faapea mai se alii talavou e igoa iā Iose, * o lana masani o le tausi taimi: “O le mea e aogā i tagata uma ina ia taunuu ai i le taimi tonu, o le iloa lea o le umi e faimalaga ai.”

E talafeagai mo nisi ona fai ni fuafuaga e vave manava mai i a latou galuega, ia vave ai ona taunuu i le sauniga. O le mea lenā na faia e se Molimau i Aitiope ina ua ia iloa e 45 minute o le a tuai ai i sauniga a le faapotopotoga ona ua sui sifi i lana galuega. Na ia faatulaga se isi tagata faigaluega e vave amata lana sifi, e sui iā te ia i pō o sauniga. Ae ua malie foʻi le Molimau e galue i se sifi faaopoopo e fitu itula, mo lē o loo sui iā te ia.

Pe afai e iai a tatou fanau lāiti, e avea o se luʻi le taunuu i le sauniga i le taimi tonu. E masani ona paʻū atu i le tinā le saunia o fanau, ae e lelei foʻi ona fesoasoani atu isi tagata o le aiga. O loo tausia e Esperanza o se tinā mai Mekisikō se fanau e toʻavalu na o ia. O lo latou matutua e mai le 5 tausaga e oo i le 23 tausaga. Ua faamatala mai e Esperanza le auala ua mafai ai e lona aiga ona tausia le taimi: “E sauniuni e laʻu fanau teine matutua le vaega lāiti. E mafai ai ona faauma aʻu galuega i le fale ma ou sauni ai foʻi ina ia tuua le fale i le taimi ua faatulagaina.” Ua iai se taimi faatulagaina a lenei aiga e tuua ai le fale, ma e felagolagomaʻi tagata uma ia faia faapea.

Aogā o le Tausi Taimi i Sauniga

O le mafaufau i faamanuiaga e maua pe a vave taunuu i sauniga, e uunaʻia ai i tatou e fai mea uma e mafai e vave taunuu ai. Ua fai mai se tamaʻitaʻi talavou e igoa iā Sandra, o lana masani le vave taunuu i sauniga: “O le mea e sili ona ou fiafia ai i le vave taunuu, ona ou te maua ai le avanoa e feiloaʻi i uso ma tuafāfine, ma talatalanoa ma iloa lelei ai i latou.” Pe a tatou vave taunuu i le Maota  mo Sauniga, e tatou te maua aogā i le faalogologo atu i le tumau ma le auaunaga faamaoni a isi o loo auai. O lo tatou auai ma talatalanoa faalaeiau i isi, e iai foʻi se aafiaga lelei i o tatou uso ma tuafāfine, ma ‘⁠faatupu ai lo latou alofa ma galuega lelei.’—Epe. 10:24, 25.

O le pese ma le tatalo amata i sauniga uma, o se vaega tāua tele lea o la tatou tapuaʻiga. (Sala. 149:1) O a tatou pese e vivii atu ai iā Ieova, e faamanatu mai ai uiga e tatau ona tatou atiaʻe, ma faalaeiau ai i tatou e auai ma le olioli i le talaʻiga. Ae faapefea le tatalo amata? I aso anamua, na taʻua e Ieova le malumalu o lona “fale tatalo.” (Isa. 56:7) Ua tatou potopoto foʻi i aso nei e ofo atu tatalo i le Atua i a tatou sauniga. O le tatalo amata e lē gata e talosagaina ai le taʻitaʻiga a Ieova faapea lona agaga paia, ae e sauniunia ai foʻi o tatou mafaufau ma loto e talia mea o le a talanoaina. E tatou te finafinau ia taunuu i sauniga ma auai i le pese ma le tatalo amata.

Na taʻua e Elena ua 23 ona tausaga le māfuaaga o lona taunuu vave i sauniga e faapea: “Ou te mafaufau o se auala lea e faailoa atu ai loʻu alofa iā Ieova, ona o lona saunia mai o mea uma e faia ai, e aofia ai le pese ma le tatalo amata.” Pe e lē tatau ea ona iai sa tatou vaaiga faapena? Ioe, e tatau. O le mea lea, seʻi o tatou finafinau ai e atiaʻe lenā masaniga o le tausi taimi i galuega uma e tatou te faia, aemaise lava i mea e tatou te faia i la tatou tapuaʻiga i le Atua moni.

[Faaopoopoga i lalo]

^ pala. 12 Ua suia igoa.

[Ata i le itulau 26]

Ia vave ona sauniuni

[Ata i le itulau 26]

Ia lava le taimi auā mea e “tutupu faafuaseʻi”

[Ata i le itulau 26]

E maua aogā o le vave taunuu i sauniga