Skip to content

Skip to table of contents

Ia Tumau Ona Malosi Faaleagaga a o Tausia Sē o Ma‘i o le Aiga

Ia Tumau Ona Malosi Faaleagaga a o Tausia Sē o Ma‘i o le Aiga

 Ia Tumau Ona Malosi Faaleagaga a o Tausia Sē o Maʻi o le Aiga

INA ua maua o loo tupu se tuma e lata i le tuasivi o se Molimau e igoa iā Kim, na iloa ai ua maua o ia i le kanesa. * Ua faapea mai lana tane o Sitivi: “Ina ua fai se taotoga ma aveese ai le tuma, ona togafitia lea o Kim i togafiti masani o le kanesa. Ona o le togafitiga, na oo ai ina matuā vaivai o ia. Ua tau lē mafai foʻi ona gaoioi lona tino.”

Pe e mafai ona e mafaufau i le mafatia o Sitivi, a o vaavaai atu i si ana avā pele o tauivi ma lenei maʻi tigā? Atonu o loo iai sē e pele i lou aiga o loo mafatia i se maʻi e vaivai ai le tino, po o āuga foʻi o le tagata matua. (Fai. 12:1-7) Afai o le tulaga lenā, e tatau la ona tausia lelei oe ina ia tausia lelei ai le maʻi o lē e pele iā te oe. Afai e oo ina e vaivai faaleagaga, ona amata foʻi lea ona ōia ou faalogona ma faalētonu lou soifua mālōlōina, ma lē mafai ai ona e avatu le fesoasoani o loo manaʻomia e le tagata o lou aiga. E faapefea la ona tumau lou malosi faaleagaga, a o tausia se tauaiga e maʻi po ua matua? Ae o le ā e fai e nisi o le faapotopotoga pe afai e mafai, e faaalia atu ai lo latou magafagafa i na tagata mamaʻi?

E Faapefea Ona Tumau le Malosi Faaleagaga?

Ina ia tumau lou malosi faaleagaga ma le malosi faaletino a o tausia sē e maʻi o le aiga, ia e fetuutuunaʻi ma faasoa lelei lou taimi ma lou malosi. Ua faapea mai le Faataoto 11:2: “E iai le atamai i ē e faamaulalo.” I lenei mau, o le upu “faamaulalo,” o lona uiga ia e iloa le mea e gata mai ai le malosi o se tasi. Ina ia faamautinoa e te lē o soona faaalu lou malosi e sili atu i le mea e te mafaia, e tatau ona e iloilo lau faasologa faapea ma ou tiute tauave.

Na faaalia e Sitivi le atamai tele ma le  faamaulalo e ala i le toe iloilo o ana galuega fai. E lē gata i lana galuega totogi, ae na galue foʻi o ia o le sooupu o le tino o toeaina, ma o le ovasia o le auaunaga a le faapotopotoga a Molimau a Ieova i Aialani. O ia foʻi o se sui o le Komiti o Mataupu Tau Falemaʻi mo lona vaipanoa. Ua taʻua e Sitivi: “E lē taitai ona faitio mai Kim e faapea, ua ou tuulafoaʻia o ia e ala i le matuā uaʻi atu i nei tiute tauave. Ae na ou iloa, ua tele naʻuā mea ua ou faia nai lo o le mea ou te mafaia.” Na faapefea ona foʻia e Sitivi lea tulaga? Ua ia faapea mai: “Ina ua uma ona fai se iloiloga faatasi ma le tatalo, sa ou filifili ai e mālōlō mai i le avea ma sooupu. Sa faaauau ona ou galue o se toeaina, ae tuu atu i isi nisi o oʻu tiute tauave i le faapotopotoga, ina ia mafai ai ona ou uaʻi atu i le tausia o Kim.”

Na mulimuli ane faaleleia le soifua mālōlōina o Kim. Na toe tilofaʻia e Sitivi ma Kim lo la tulaga, ma na mafai e Sitivi ona toe faaauau i ona tiute tauave i le faapotopotoga, ona o le lagolagosua a lana avā. Ua faamatala mai e Sitivi: “Na ma iloa galulue e tusa ma mea e gata ai lo ma mafai, ona o lona maʻi. Ou te matuā lotofaafetai iā Ieova i lana fesoasoani, ma le lagolagosua ma le lē faitio a laʻu avā, e ui i le lē lelei o lona soifua mālōlōina.”

 Seʻi manatu foʻi i le tulaga o Jerry, o se ovasia femalagaaʻi, ma lana avā o Maria. Sa tatau ona toe fetuunaʻi o la sini ina ia tausia o la mātua ua matutua. Ua faapea mai Maria: “O lo ma sini ma laʻu tane le galulue o ni misionare i se isi atunuu. Ae e na o Jerry le tama a ona mātua, ma na manaʻomia ona tausia i laʻua. O lea na ma filifili ai e nonofo i Aialani ina ia tausia i laʻua. O le faia faapea, na mafai ai ona ma tausia le tamā o Jerry i le taimi atoa na taofia ai i le falemaʻi a o leʻi maliu. O loo faaauau pea i le taimi nei ona matou fesootaʻi ma le tinā o Jerry, ma e ma te lē o mamao pe afai e na te manaʻomia se fesoasoani. O loo matuā fesoasoani ma lagolagosua le faapotopotoga a le tinā o Jerry, ma mafai ai ona ma tumau i le galuega femalagaaʻi.”

Le Auala e Fesoasoani ai Isi

Ina ua talanoa e uiga i sauniuniga faaletino e tatau ona fai i fafine matutua i le faapotopotoga ua oti a latou tane, na tusi Paulo: “Afai e lē tausi e se tasi i ē e tatau ona ia tausia, aemaise lava tagata o lona aiga, ua faafitia e ia le faatuatua, ma e sili lona leaga i lo le tagata e lē faatuatua.” Na faamanatu atu e Paulo i uso Kerisiano e faapea, ina ia “lelei i le silafaga a le Atua” a latou gaoioiga, e tatau ona latou tausia o latou mātua ua matutua ma mātua o o latou mātua, i le tulaga tau tupe. (1 Timo. 5:4, 8) Ae peitaʻi, e mafai ma e tatau i isi i le faapotopotoga ona fesoasoani atu.

Seʻi manatu i le tala iā Hakan ma Inger, o se ulugalii ua matutua e nonofo i Suetena. Ua fai mai Hakan: “Na matuā faateʻia i maʻua ina ua taʻu mai ua maua laʻu avā i le kanesa. Ona sa masani ona mālōlōina ma malosi Inger. Ae na ma ō atu i le falemaʻi i aso uma mo togafitiga, ma na lē lelei aafiaga o ona togafitiga. O le taimi lea sa nofo ai Inger i le fale, ma na tatau ona ou nofo ai ma aʻu e tausia o ia.” Na faapefea ona fesoasoani le faapotopotoga iā Hakan ma Inger?

Na faatulaga e toeaina o le faapotopotoga ina ia faalogologo mai le ulugalii i sauniga faa-Kerisiano, e ala i le telefoni. E lē gata i lea, na fesootaʻi atu uso ma tuafāfine e ala i le asiasi atu ma telefoni atu. Na lafo atu foʻi ni tusi. Ua faapea mai Hakan: “Na ma lagona le lagolagosua a uso faapea le fesoasoani a Ieova. Na tāua tele lenei fesoasoani e tumau ai ona ma malolosi faaleagaga. Ae faafetai ua toe malosi Inger, ma ua toe mafai ai ona ma auai i sauniga i le Maota o Sauniga.” Pe a faia e uso i le faapotopotoga mea e mafai ona latou faia ina ia fesoasoani ai i ē mamaʻi ma matutua, ua iloa ai o i latou o ni ‘uō moni e alolofa i taimi uma, ma o ni uso ua fananau mo taimi o puapuaga.’—Faata. 17:17.

E Tāua iā Ieova Au Taumafaiga

O le tausia o se tagata maʻi o le aiga, e mafai ona vaivai ai. Peitaʻi, na tusi le tupu o Tavita: “E fiafia o lē e gaoioi ma le magafagafa i lē ua faatauvaa,” e pei o se tagata maʻi o loo manaʻomia le fesoasoani.—Sala. 41:1.

Aiseā e fiafia ai i latou o loo tausia ē tigāina ma mamaʻi? Ua taʻua i le Faataoto 19:17: “O lē e faaalia le agalelei i lē e lē taualoa, ua nonō atu iā Ieova, ma o le a toe tauia o ia e Ia e tusa ma ana gaoioiga.” E matuā naunau mai le Atua moni i ana auauna faamaoni o ē ua mafatia i maʻi, ma e faamanuia o ia i ē e agalelei iā i latou. Na pese le faisalamo o Tavita e faapea: “E tausia o ia e Ieova i luga o le moega i lona maʻi; e te suia foʻi lona moega uma lava a o maʻi o ia.” (Sala. 41:3) Pe afai e feagai ma maʻi po o puapuaga lē o tausia ma le alofa se tagata maʻi, e tatou te mautinoa o le a fesoasoani Ieova iā te ia.

E ese le lelei o le iloa, o loo silafia ma finagalo malie Ieova le Atua i mea e tatou te faia e tausia ai se tagata maʻi o le aiga! E ui o lenā fesoasoani e manaʻomia ai ni a tatou taumafaiga, ae ua faamautinoa mai i le Tusi Paia, “o taulaga faapena e matuā fiafia i ai le Atua.”—Epe. 13:16.

[Faaopoopoga i lalo]

^ pala. 2 Ua suia igoa.

[Ata i le itulau 18]

Ia tumau ona malosi faaleagaga ma talia le fesoasoani a isi