Skip to content

Skip to table of contents

Ua Fesili Mai le ‘Aufaitau

Ua Fesili Mai le ‘Aufaitau

 Ua Fesili Mai le ʻAufaitau

Po ua feteenaʻi le Esekielu 18:20 lea e faapea mai, “e lē nofosala le atalii ona o mea sesē a le tamā,” ma le Esoto 20:5 lea e faapea mai, e faasalaina e Ieova “atalii ona o mea sesē a o latou tamā”?

E lē o feteenaʻi ia mau. O le tasi mau o loo taulaʻi atu i le tiute tauave a tagata taʻitoʻatasi, ae o le isi ua faailoa mai ai, o mea sesē a se tagata e ono iai ni aafiaga i ē e tupuga mai iā te ia.

Ua faaalia i faamatalaga o loo iai i le mataupu e 18 o le Esekielu, le tiute tauave a le tagata lava ia. Ua taʻua i le fuaiupu e 4, “o le tagata ola e agasala, e oti lava o ia.” Ae faapefea le tagata e “amiotonu . . . ma ua ia faia le mea tonu ma le amiotonu”? “E ola pea lava o ia.” (Eseki. 18:5, 9) O lea la, pe a oo i tausaga ua mafai ai ona fai ana lava filifiliga, e faamasinoina tagata taʻitoʻatasi “e tusa ma lona ala.”—Eseki. 18:30.

Ua faataʻitaʻia mai lenei mataupu silisili i le mea na tupu i le tagata sa Levī e igoa iā Koru. A o alu le malaga a le nuu o Isaraelu i le toafa, sa lē faamalieina Koru i faaeaga na ia maua i le auaunaga. Ina ia faoa le tofi o le faiva faaositaulaga, na fouvale ai Koru ma isi tagata iā Mose  ma Arona, o ē na fai ma sui o Ieova. Ona o gaoioiga faamaualuluga i le taumafai e faoa lenei tofiga e leʻi tuuina atu iā i latou, na faaumatia ai e Ieova Koru ma lana ʻaufouvale. (Nu. 16:8-11, 31-33) Peitaʻi, e leʻi auai atalii o Koru i le fouvalega. E leʻi nofosala i latou i le silafaga a le Atua, ona o le agasala a lo latou tamā. O lo latou faamaoni iā Ieova na faasaoina ai o latou lava ola.—Nu. 26:10, 11.

Ae faapefea le lapataʻiga o loo i le Esoto 20:5, o se vaega o le Tulafono e Sefulu? Seʻi manatu foʻi i le tulaga na iai i lenā vaitaimi. Na osia e Ieova le feagaiga o le Tulafono ma le nuu o Isaraelu. Ina ua uma ona faalogo atu i āiāiga o le feagaiga, na faailoa atu e tagata Isaraelu i le lautele e faapea: “O mea uma ua fetalai mai ai Ieova ua matou malilie e fai.” (Eso. 19:5-8) Na ulu atu le nuu atoa i se faiā faapitoa ma Ieova. O upu la o loo i le Esoto 20:5, sa taulaʻi patino atu i le nuu atoa.

Ina ua tumau tagata Isaraelu i le faamaoni iā Ieova, e tele faamanuiaga na olioli ai le nuu. (Levi. 26:3-8) Ae o nisi taimi sa tuufaafeagai le mea na tupu. Ina ua teena e le nuu o Isaraelu Ieova ma mulimuli atu i atua sesē, e leʻi faamanuiaina ma puipuia i latou e Ieova, ae na malaia le nuu. (Faama. 2:11-18) E moni sa iai nisi na tumau pea lo latou faamaoni ma tausia poloaʻiga a le Atua, e ui lava i le ifo i tupua na iai i le nuu. (1 Tu. 19:14, 18) Atonu na feagai tagata faamaoni ma nisi o tulaga faigatā ona o agasala a le nuu, ae na faaalia e Ieova le alofa faamaoni iā i latou.

Ina ua lotomaaa Isaraelu i le solia ma le loto i ai o taʻiala a Ieova, ma iʻu ai ina faifai isi nuu i lona suafa, sa finagalo loa Ieova e faasala lona nuu, e ala i le faatagataina ona ave faapagota i latou i Papelonia. O le mea moni, o lenei mea e aofia ai le faasalaina o tagata taʻitoʻatasi ma lona nuu atoa. (Iere. 52:3-11, 27) Peitaʻi, ua faaalia i le Tusi Paia na matuā nofosala le nuu atoa o Isaraelu, ma o lea na aafia ai le tupulaga e tolu, fā, pe sili atu foʻi ona o mea sesē a o latou augātamā, e pei ona taʻua i le Esoto 20:5.

O loo iai foʻi i le Afioga a le Atua tala e faatatau i aiga na aafia ona o mea sesē a mātua. Na faatigā e le ositaulaga sili o Eli le finagalo o Ieova, e ala i le tuu pea o ona atalii amio lē mamā ma “lē aogā,” e fai le faiva o ositaulaga. (1 Samu. 2:12-16, 22-25) Talu ai na sili ona faamamaluina e Eli ona atalii nai lo o Ieova, na poloaʻia ai e le Atua o le a aveesea le faiva o le ositaulaga sili mai i lona aiga, lea na amata mai iā Aviata, o le lona fā o tupulaga na tupuga mai iā Eli. (1 Samu. 2:29-36; 1 Tu. 2:27) Ua faataʻitaʻia mai le mataupu silisili o loo i le Esoto 20:5, i le faaaʻoaʻoga a Kiasi. Sa ia faaaogā sesē lona tulaga o se auauna a Elisaia, ina ia maua ai ni meafaitino mai i le faamālōlōina o le taʻitaʻiʻau Suria o Naamanu. E ala iā Elisaia, na faailoa atu ai e Ieova le faasalaga, i le faapea atu: “E pipii atu . . . iā te oe ma au fanau i aso uma lava le lepela o Naamanu.” (2 Tu. 5:20-27) O lea la, na aafia ē na tupuga mai iā Kiasi ona o āuga o lana mea sesē.

Ona o Lē na foafoaina mea ma o le Foaʻi Ola, ua iā Ieova le aiā e filifili ai po o lē fea faasalaga e tonu ma talafeagai. Ua faaalia i faaaʻoaʻoga ua taʻua i luga, e ono aafia fanau po o tupulaga mulimuli mai, i āuga leaga o agasala a o latou tuaa. Peitaʻi, e ‘⁠faafofoga Ieova i le alaga a ē ua puapuagatia,’ ma o tagata taʻitoʻatasi e liliu atu ma le faamaoni iā te ia, e latou te ono maua lona finagalo malie ma sina mapusaga.—Iopu 34:28.

[Ata i le itulau 29]

Na nofosala Koru ma lana ʻaufouvale ona o a latou gaoioiga