Skip to content

Skip to table of contents

Tetee Atu i Tala Pepelo a Satani

Tetee Atu i Tala Pepelo a Satani

 Tetee Atu i Tala Pepelo a Satani

‘⁠AUA neʻi ʻolegia outou. E lē mafai e lo outou Atua ona laveaʻi iā te outou. Ia lolo mai ona outou lē oo lea i ni puapuaga!’ O le autū lenā o le feʻau a Ravesaki, o se avefeʻau na auina mai e Sanerivi, le tupu o Asuria, e faaoo atu i tagata i Ierusalema. Ua osofaʻia e ʻautau a le tupu le nuu o Iuta. Na fuafua upu a le avefeʻau ina ia faavaivaia ai loto o tagata i Ierusalema, ma faamataʻu ai i latou ina ia siilima ane.—2 Tu. 18:28-35.

Sa lauiloa tagata Asuria i le faasauā ma le lē alolofa. Na latou faatupu le fefe i o latou fili e ala i le faia o ni faamatalaga mataʻutia, i le auala lē alofa na latou faia ai a latou pagota. E tusa ai o le faamatalaga a le tusitala o Philip Taylor, na latou faaaogāina “se faiga taufaamataʻu faatasi ai ma faamatalaga sesē, ina ia taofiofi ai tagata na latou faatoʻilaloina, ma faamataʻu ai isi fili i faamatalaga e uiga i lo latou matuā sauā i isi, ma faamatalaga e faasesē ai o latou mafaufau.” O faamatalaga pepelo o se auupega malosi. Ua faapea mai Taylor, ua fuafuaina “e faaleaga ai le mafaufau.”

O Kerisiano moni, e latou te “lē o tau ma tagata a o . . . agaga leaga,” o lona uiga, o foafoaga agaga ua fouvale i le Atua. (Efe. 6:12) O lo latou matai o Satani le Tiapolo. O loo faaaogā foʻi e Satani faiga sauā faatasi ma tala pepelo.

Ua faapea mai Satani e mafai ona ia aveesea le faamaoni o i tatou uma taʻitoʻatasi. I aso o le augātamā o Iopu, na faapea atu Satani iā Ieova le Atua: “O mea uma . . . ua iai i le tagata e avatu e ia e sui ai lona ola.” I se isi faaupuga, ia matuā tuu atu i ai omiga, ma mulimuli ane, o le a lē faamaoni ai le tagata i le Atua. (Iopu 2:4) Pe e saʻo Satani? Pe e tofu i tatou uma ma se mea e vaivai ai—o se mea e sili atu, ma e ono mafai ona lafoaʻia ai o tatou talitonuga ina ia faasaoina ai o tatou ola? E manaʻo Satani ia tatou mafaufau faapena. O lea la, ua ia faaaogā faamatalaga pepelo ina ia totō ai i o tatou mafaufau lenā manatu. Seʻi o tatou talanoaina nisi o ana metotia e faia ai faapea, ma iloilo le auala e tatou te tetee atu ai iā te ia.

‘⁠Ua Faavaeina i Latou i le Eleele’

Na faaaogā e Satani Elifasa, o se tasi o uō e toʻatolu na asiasi atu iā Iopu, e finau atu e faapea, e matuā vaivai lava tagata. I le faasino atu i tagata o “ē ua nonofo i fale omea,” na ia fai atu iā Iopu: “Ua faavaeina [i latou] i le eleele! E vave ona tuʻimomoia i latou e se tasi i lo o se lelefua. E tuʻimomomoina i latou mai i le taeao e oo i le afiafipō; e fano i latou e faavavau e lē toe manatuaina e se tasi.”—Iopu 4:19, 20.

I isi vaega o le Tusi Paia, o loo faatusa ai i tatou i ni “ipu omea”—o ni ipu mataʻetaʻe ua faia i le ele. (2 Kori. 4:7) E tatou te vaivai ona o le agasala tuufaasolo ma le lē lelei atoatoa. (Roma 5:12) Pe a tuua na o i tatou, e aafia gofie i tatou i osofaʻiga a Satani. Ae ona o ni Kerisiano, e tatou te maua le fesoasoani mai iā Ieova. E ui lava i o tatou vaivaiga, ae e tāua i tatou i le silafaga a le Atua. (Isa. 43:4) E lē gata i lea, e foaʻi mai e Ieova le agaga paia iā i latou e talosaga atu ai iā te ia. (Luka 11:13) E mafai e lona agaga ona aumaia iā i tatou le “mana lea e sili atu i le malosi o tagata,” ma mafai ai ona tatou feagai ma so o se puapuaga e aumaia e Satani iā i tatou. (2 Kori. 4:7; Fili. 4:13) Pe afai e tatou te tetee atu i le Tiapolo ma ‘⁠mausalī i le faatuatua,’ o le a faatumauina ma faamalosia i tatou e le Atua. (1 Pete. 5:8-10) O lea la, e lē tatau ai ona tatou fefefe iā Satani le Tiapolo.

 O se Tagata “o Loo Inu i le Amiolētonu”

Na fesili Elifasa e faapea: “O ai ea le tagata e mamā ai o ia, po o ai ea foʻi se tasi e fanau mai i se fafine e tonu ai o ia?” Ona ia tali atu lea: “Faauta! Ua lē faatuatua [le Atua] i ona tagata paia, ma ua lē mamā foʻi le lagi i lana silafaga. E matuā sili ai ona inosia ma piʻopiʻo se tasi, o se tagata o loo inu i le amiolētonu e pei o le vai!” (Iopu 15:14-16) Na taʻu atu e Elifasa iā Iopu e lē taʻuamiotonuina e Ieova se tagata. O loo faaaogā foʻi e le Tiapolo mafaufauga sesē faapena. E manaʻo o ia ina ia tatou popole e uiga i mea sesē i aso ua mavae, ma soona faitio ai iā i tatou lava, ma manatu ai ua lē mafai ona togiolaina i tatou. E manaʻo foʻi o ia ina ia tatou soona faamamafa mea ua faatalitalia mai e Ieova iā i tatou, ae manatu māmā i Lona agalelei, faamagalo ma le lagolagosua.

O le mea moni, “ua agasala tagata uma lava, ma ua lē ausia le mamalu o le Atua.” E leai se tagata lē lelei atoatoa e mafai ona ausia tapulaa lelei atoatoa a Ieova. (Roma 3:23; 7:21-23) Ae peitaʻi, e lē o le uiga o lenā mea e faapea ua lē aogā i tatou iā te ia. Ua silafia e Ieova, “o le uluaʻi gata . . . , ua igoa foʻi o le Tiapolo ma Satani,” o lē o loo ia faaaogā sesē lo tatou tulaga agasala. (Faaa. 12:9, 10) Ona ua silafia e le Atua “o le efuefu lava i tatou,” ua faapalepale mai ai iā i tatou ma lē “vaavaai masei pea” iā i tatou.—Sala. 103:8, 9, 14.

Pe afai e tatou te lafoaʻi se ala leaga ma faalatalata atu iā Ieova ma se loto saʻo ma se uiga salamō, “e na te matuā faamagaloina lava” i tatou. (Isa. 55:7; Sala. 51:17) E ui lava “e pei o le ʻie mūmū sesega” a tatou agasala, ae ua faapea mai le Tusi Paia, “o le a paʻepaʻe e pei o le kiona.” (Isa. 1:18) O lea la, seʻi o tatou maumauaʻi e aua lava neʻi faavaivai e faia le finagalo o le Atua.

Ona o lo tatou tulaga agasala, e lē mafai ai ona tatou maua se tulaga amiotonu i luma o le Atua i la tatou lava auala. E lē gata ua leiloa le ola lelei atoatoa ma le faamoemoe o le ola e faavavau o Atamu ma Eva, ae ua faapea foʻi i tatou uma. (Roma 6:23) Ae peitaʻi, ona o lona alofa tele i tagata, na faia ai e Ieova le sauniuniga ina ia faamagalo ai a tatou agasala, pe afai e tatou te faatuatua i le taulaga togiola a lona Alo, o Iesu Keriso. (Mata. 20:28; Ioa. 3:16) Maʻeu se faailoaga ofoofogia o le “agalelei faifua” o le Atua! (Tito 2:11) Ua mafai ona togiola ai i tatou! Aiseā la e tatou te talitonu ai fua i le manatu o Satani e faapea, e lē mafai ona togiolaina i tatou?

‘⁠Tago Atu i Ona Ivi ma Ona Aano’

Na faapea atu Satani, afai e oo ni mafatiaga iā Iopu, o le a lafoaʻia lona faatuatua. I le luʻia o Ieova, na faapea atu le Tiapolo: ‘⁠Tago atu i ona ivi ma ona aano, pe e lē faifai ai o ia i ou lava luma.’ (Iopu 2:5) E matuā fiafia le Fili o le Atua pe afai e mafai ona ia faapogaia i tatou e lagona, ua tatou lē toe aogā ona o o tatou tulaga mamaʻi.

Ae peitaʻi, e lē teena i tatou e Ieova pe afai ua  lē toe mafai ona tatou faia mea uma na tatou faia muamua i le auaunaga iā te ia. E faapefea pe afai na osofaʻia sa tatou uō mamae ma manuʻa ai? Pe e tatou te manatu māmā iā te ia ona ua lē mafai ona ia toe faia le tele o mea mo i tatou, e pei ona sa ia faia muamua? O le mea moni e leai! E tatou te alolofa pea ma tausi iā te ia—aemaise lava pe afai na manuʻa o ia ona o le taumafai e faia mea mo i tatou. Pe e lē sili ea la le mea e tatou te faatalitalia mai iā Ieova? Ua taʻua i le Tusi Paia: “E lē amiolētonu le Atua e na te lē faagalogalo ai la outou galuega, ma le alofa ua outou faaali mai i lona suafa.”—Epe. 6:10.

O loo taʻua i le Tusi Paia se “tasi fafine mativa ua oti lana tane,” o lē atonu na tele tausaga o ia lagolagoina le tapuaʻiga i le Atua. Ina ua silasila atu Iesu o ia lafoina “ni tupe iti se lua” i le pusa e teu ai tupe i le malumalu, pe na ia manatu iā te ia ma lana foaʻi e lē aogā? Nai lo lea, sa ia viiviia o ia ona o le faia o mea uma na ia mafaia e lagolagoina ai le tapuaʻiga moni.—Luka 21:1-4.

Pe afai e tatou te tumau i le faamaoni, e mautinoa o le a tumau la tatou faiā ma Ieova, e tusa lava po o le ā le tele o mea leaga ua oo mai iā i tatou ona o le lē lelei atoatoa, e pei o le tino matua ma maʻi. E lē taitai ona tuulafoaʻia e le Atua i latou o ē e faamaoni, ona ua faatapulaa e mafatiaga lo latou malosi e auauna atu ai iā te ia.—Sala. 71:9, 17, 18.

Ia Talia “le Puloutau o le Faaolataga”

E mafai faapefea ona puipuia i tatou mai i faamatalaga pepelo a Satani? Na tusi le aposetolo o Paulo: “Ia maua pea e outou le mana mai i le Alii, ma le tele o lona malosi. Ia oofu i le ofutau atoatoa mai i le Atua, ina ia mafai ai ona outou tutū mausalī e tetee atu i togafiti a le Tiapolo.” O se tasi o vaega o lenā ofutau faaleagaga, o “le pulou o le faaolataga.” (Efe. 6:10, 11, 17) E faatatau i faamatalaga pepelo a Satani, e tatau ona tatou faamautinoa ua tatou talia lenā puloutau ma pulou ai pea. E puipuia e le puloutau o se fitafita lona ulu. O lo tatou “faamoemoe i le faaolataga”—o lo tatou mautinoa i le faataunuuina o folafolaga a le Atua e uiga i lana lalolagi fou matagofie, o le a puipuia ai o tatou mafaufau mai i tala pepelo a Satani. (1 Tesa. 5:8) E manaʻomia ona tatou faaolaola pea ma ia malosi lenā faamoemoe, e ala i lo tatou suʻesuʻe ma le filigā o le Tusi Paia.

Na onosaia e Iopu osofaʻiga mataʻutia ma le inosia a Satani. Sa matuā malosi le faatuatua o Iopu i le toetū, e oo lava i le faamataʻu mai o le oti e leʻi faavaivaia ai o ia. Na ia faapea atu iā Ieova: “E te valaau mai, ona ou tali atu ai lea iā te oe. Auā ua e matuā naunau i le galuega a ou aao.” (Iopu 14:15) E tusa lava pe na oti ai Iopu ona o le tumau i lona faamaoni, sa ia faatuatuaina e faapea o le alofa o le Atua i Ana auauna faamaoni, o le a uunaʻia ai o Ia e toe faatutū mai i latou mai i le oti.

Tau ina ia iā i tatou foʻi lenā lava mautinoa i le Atua moni. E mafai e Ieova ona faafetaiaʻia so o se mea e ono aumaia e Satani ma ana ʻau iā i tatou. Ia manatua foʻi, ua faamautinoa mai e Paulo i tatou e faapea: “E faamaoni le Atua, ma e na te lē tuua outou i se faaosoosoga e sili atu nai lo o le mea tou te lavātia, ae pe a oo mai le faaosoosoga, e saunia e ia se auala e sao ai outou, ina ia outou tumau ai.”—1 Kori. 10:13.

[Ata i le itulau 20]

E tāua iā Ieova lau auaunaga faamaoni

[Ata i le itulau 21]

Ia talia le puloutau o le faaolataga ma pulou ai pea