Skip to content

Skip to table of contents

Ia Faaaogā ma le Tomai “le Pelu a le Agaga”

Ia Faaaogā ma le Tomai “le Pelu a le Agaga”

 Ia Faaaogā ma le Tomai “le Pelu a le Agaga”

“Ia talia . . . le pelu a le agaga, o le afioga lea a le Atua.”—EFE. 6:17.

1, 2. E faapefea ona tatou tali atu i le manaʻoga mo nisi tagata talaʻi o le Malo?

I LE silafia o manaʻoga faaleagaga o le motu o tagata, na taʻu atu ai e Iesu i ona soo: “E telē le galuega o le seleselega, ae e toʻaitiiti le ʻaufaigaluega. O le mea lea, ia outou ʻaiʻoi atu ai i le Alii o le seleselega, ina ia auina mai se ʻaufaigaluega e faia le seleselega.” E leʻi gata ai i inā le mea na faia e Iesu. Ina ua uma ona fetalai atu i na upu, na “valaau atu o ia i ona soo e toʻasefulu lua” ma auina atu i latou e talaʻi, pe fai le galuega o le “seleselega.” (Mata. 9:35-38; 10:1, 5) Mulimuli ane, “ona tofia lea e [Iesu] o le isi toʻafitu sefulu, ma aauina atu i latou taʻitoʻalua” e fai lenā lava galuega.—Luka 10:1, 2.

2 O loo matuā manaʻomia foʻi i aso nei nisi tagata talaʻi o le Malo. O ē na auai i le faamanatuga i le lalolagi aoao i le tausaga faaleauaunaga o le 2009, e 18,168,323. E 10 miliona ua sili atu ai i lo le aofaʻiga atoa o Molimau a Ieova. O le mea moni, ua matua le fanua mo le seleselega. (Ioa. 4:34, 35) O lea, e ao ai ona tatou talosaga atu mo nisi tagata faigaluega. Ae e faapefea ona tatou gaoioi e ōgatusa ma na talosaga? E tatou te faia faapea e ala i le avea o ni faifeʻau e fua tele mai, a o tatou auai ma le maelega i le galuega talaʻi o le Malo ma le faia o isi ma soo.—Mata. 28:19, 20; Mare. 13:10.

3. O le ā le vaega autū a le agaga o le Atua, i le fesoasoani iā i tatou ina ia avea o ni tagata talaʻi e fua tele mai?

3 Na talanoaina i le mataupu ua mavae le auala ua fesoasoani ai iā i tatou le taʻitaʻiga a le agaga o le Atua, ina ia “taʻutaʻu atu le afioga paia a le Atua ma le lototele.” (Galu. 4:31) E fesoasoani foʻi lenā agaga iā i tatou ina ia avea ai o ni tagata talaʻi tomai. O se tasi o auala e faaleleia ai lo tatou fua tele mai i le faiva, o le faaaogā lelei lea o le meafaigaluega aupito sili ua saunia e Ieova le Atua—o lana Afioga tusia, le Tusi Paia. O le tusi e mai i le agaga paia. (2 Timo. 3:16) O le feʻau o loo iai na faagaeeina e le Atua. O lea la, pe a tatou faamatalaina lelei le upu moni o le Tusi Paia i la tatou faiva, o lona uiga ua taʻitaʻia i tatou e le agaga paia. Ae tatou te leʻi talanoaina le auala e faia ai faapea, seʻi o tatou mafaufau i le malosi o lenā Afioga.

‘E Matuā Malosi le Afioga a le Atua’

4. O le ā le suiga e mafai e le feʻau a le Atua o loo i le Tusi Paia, ona faia i se tagata?

4 Maʻeu le malosi o le feʻau o loo i le Afioga a le Atua! (Epe. 4:12) I se uiga faafaatusa, o le feʻau mai i le Tusi Paia e sili ona maai i so o se pelu e faia e tagata, auā e mafai ona ati faafaatusa ma vaevaeina ai gaugātino ma aano o ivi. E oo atu le upu moni o le Tusi Paia i totonu o se tagata, ma ati atu i ona mafaufauga ma faalogona, ma faaalialia ai lona tagata moni i totonu. E mafai e lenā upu moni ona aumaia le mana e suia ai, ma suia moni ai se tagata. (Faitau le Kolose 3:10.) Ioe, e mafai e le Afioga a le Atua ona suia olaga!

5. O ā auala e mafai ona taʻitaʻia ai i tatou e le Tusi Paia, ma o le ā le iʻuga?

5 E lē gata i lea, o le Tusi Paia o se tusi o le atamai e lē mafaatusalia. O loo iai faamatalaga aogā e faailoa atu ai i tagata le auala e ola ai i lenei lalolagi fenuminumiaʻi. Ua faamalamalamaina e le Afioga o le Atua, e lē gata o o tatou ala i le taimi nei, ae faapea foʻi le lumanaʻi. (Sala. 119:105) O se fesoasoani tele iā i tatou pe a feagai ma faafitauli, pe faia ni faaiʻuga i le filifilia o a tatou uō, faafiafiaga, galuega, laʻei, ma  isi lava mea. (Sala. 37:25; Faata. 13:20; Ioa. 15:14; 1 Timo. 2:9) O le faatatauina o mataupu silisili o loo i le Afioga a le Atua, e mafai ai ona tatou feutagaʻi lelei ma isi. (Mata. 7:12; Fili. 2:3, 4) I se auala faafaatusa, o le malamalama lelei o le ala o loo i o tatou luma, e mafai ai ona tatou manatunatu i aafiaga faaumiumi o a tatou filifiliga. (1 Timo. 6:9) Ua valoia foʻi i le Tusi Paia le fuafuaga a le Atua mo le lumanaʻi, e fesoasoani ai iā i tatou e saʻili se olaga e ōgatusa ma lenā fuafuaga. (Mata. 6:33; 1 Ioa. 2:17, 18) Maʻeu se olaga faamalieina e mafai ona olioli ai se tagata, pe a taʻitaʻia lona olaga e mataupu silisili a le Atua!

6. Aiseā e avea ai le Tusi Paia o se auupega malosi i la tatou taua faaleagaga?

6 Seʻi mafaufau foʻi i le avea o le Tusi Paia o se auupega malosi i la tatou taua faaleagaga. Na taʻua e Paulo le afioga a le Atua, o “le pelu a le agaga.” (Faitau le Efeso 6:12, 17.) Pe a lelei ona faamatala atu, e mafai e le feʻau a le Tusi Paia ona faasaʻoloto ai tagata mai i le pule a Satani. O se pelu e faasaoina ai ola, ae e lē faaumatiaina ai i latou. Pe e lē tatau la ona tatou taumafai e faaaogā ma le tomai?

Ia Saʻo Ona Taulimaina

7. Aiseā e tāua ai ona iloa lelei faaaogā “le pelu a le agaga”?

7 E faatoʻā mafai ona faaaogā lelei e se fitafita ana auupega i le taua, pe afai e faataʻitaʻi ma iloa lelei faaaogā na auupega. E faapena foʻi le faaaogāina o “le pelu a le agaga” i la tatou taua faaleagaga. Na tusi Paulo e faapea: “Ia e taumafai malosi e avea oe ma lē ua finagalo malie i ai le Atua, o se tagata faigaluega e leai se mea e mā ai, e na te taulimaina ma le saʻo le upu moni.”—2 Timo. 2:15.

8, 9. O le ā e fesoasoani iā i tatou ina ia malamalama ai i le uiga o mea o fai mai ai le Tusi Paia? Aumai se faaaʻoaʻoga.

8 O le ā e fesoasoani iā i tatou ina ia “taulimaina ma le saʻo le upu moni” i la tatou faiva? Ae tatou te leʻi faamatala manino atu i isi le mea o fai mai ai le Tusi Paia, e manaʻomia ona tatou malamalama lelei i lona uiga. E manaʻomia ai i lenei mea ona uaʻi atu i faamatalaga o loo siʻomia ai se fuaiupu. O lona uiga, o faamatalaga e muamua atu ma mulimuli mai i se upu po o se fuaiupu, ma e fesoasoani e faamanino ai le uiga.

9 Ina ia malamalama lelei i se fuaitau mai le Tusi Paia, e manaʻomia ona tatou iloiloina faamatalaga o loo siʻomia ai lenā fuaitau. Ua faataʻitaʻi mai e le faamatalaga a Paulo o loo i le Kalatia 5:13 lenā mea. Na ia tusi e faapea: “Le ʻauuso e, na valaauina outou i le saʻolotoga. Ae aua neʻi avea lenei saʻolotoga ma mea e faamalie ai tuʻinanauga o le tino, ae ia pologa le tasi i le isi i le alofa.” O le ā le saʻolotoga sa talanoa i ai Paulo i inei? Pe sa faasino atu o ia i le saʻolotoga mai i le agasala ma le oti, mai i le saisaitia i talitonuga sesē, po o se isi mea? Ua faaalia i faamatalaga o loo siʻomia ai, sa talanoa Paulo e uiga i le saʻolotoga lea e māfua ona ua ‘faasaʻolotoina mai i le malaia o le Tulafono.’  (Kala. 3:13, 19-24; 4:1-5) Sa faasino atu o ia i le saʻolotoga faa-Kerisiano. O i latou e talisapaia lenā saʻolotoga, e pologa le tasi i le isi ona o le alofa. Ae o i latou e lē alolofa, na fefaaleagaʻi ma feʻainaʻi.—Kala. 5:15.

10. Ina ia malamalama lelei i le uiga o mau o le Tusi Paia, o ā ituaiga faamatalaga e tatau ona tatou iloiloina, ma e faapefea ona tatou mauaina?

10 Ina ia malamalama lelei i le uiga o se mau, e tatau foʻi ona tatou iloiloina isi faamatalaga, e pei o ai na tusia le tusi o le Tusi Paia, o anafea na tusia ai, ma o ā tulaga na iai ina ua tusia. E aogā foʻi le iloa o le fuafuaga na tusia ai le tusi, ma pe afai e mafai, e tatau ona iloa aganuu a tagata, o a latou amioga, ma faiga faalotu na faia i na aso. *

11. O le ā e ao ona tatou faaeteete i ai pe a faamatala atu le Tusi Paia?

11 E tele mea e aofia ai i le “taulimaina ma le saʻo o le upu moni,” i lo le tau ina faamatalaina atu ma le saʻo o upu moni o le Tusi Paia. E tatau ona tatou faaeteete e aua le faaaogāina le Tusi Paia e faafefe ai tagata. E ui e mafai ona tatou faaaogā le Tusi Paia e puipuia ai le upu moni, e pei ona faia e Iesu ina ua tofotofoina o ia e le Tiapolo, ae o le Tusi Paia e lē o se auupega e fasiupu ai la tatou ʻaufaalogologo. (Teu. 6:16; 8:3; 10:20; Mata. 4:4, 7, 10) E tatau ona tatou utagia le apoapoaʻiga a le aposetolo o Peteru: “Ia faapaiaina le Keriso le Alii i o outou loto, ma ia nofosauni pea e tali atu i luma o tagata uma e fesili mai iā te outou i le māfuaaga o lo outou faamoemoe, a ia faia faapea faatasi ma le agamalu ma le matuā faaaloalo lava.”—1 Pete. 3:15.

12, 13. O ā “mea ua matuā mautū” e mafai e le upu moni o le Afioga a le Atua ona lepetia? Aumai se faaaʻoaʻoga.

12 Pe a taulimaina ma le saʻo, o le ā e mafai e le upu moni o le Afioga a le Atua ona faataunuu? (Faitau le 2 Korinito 10:4, 5.) E mafai e le upu moni o le Tusi Paia ona lepetia “mea ua matuā mautū,” o lona uiga, e faaalialia ai aʻoaʻoga sesē, o faiga leaga, ma filosofia o loo atagia mai ai le poto o tagata lē lelei atoatoa. E mafai ona tatou faaaogā le Tusi Paia e lepetia ai so o se manatu “e tetee i le poto i le Atua.” E mafai ona faaaogā aʻoaʻoga a le Tusi Paia e fesoasoani ai i isi ina ia faaōgatusa o latou manatu ma le upu moni.

13 Seʻi fai ma faaaʻoaʻoga le tulaga o se fafine e nofo i Initia ua 93 ona tausaga. Mai lava i lona laʻitiiti, na aʻoaʻoina o ia e talitonu i le toe ola mai o le tagata i se isi tino. Ae ina ua ia suʻesuʻeina le Tusi Paia e ala i fetusiaʻiga ma lana tama tama e nofo i se isi atunuu, sa ia talia ma le fiafia mea na ia aʻoaʻoina e uiga iā Ieova ma ana folafolaga. Ae peitaʻi, na mauaa i lona mafaufau le aʻoaʻoga o le toe ola mai o le tagata i se isi tino, na tetee ai o ia ina ua tusi mai lana tama e uiga i le tulaga o le tagata ua oti. Na faapea atu o ia: “Ou te matuā lē malamalama lava i le upu moni o la outou Tusi Paia. E aʻoaʻo e  lotu uma e iai se mea e i totonu o i tatou e lē mafai ona oti. Sa ou talitonu pea e oti le tino, ae e iai se vaega e lē vaaia e toe ola mai pea lava i isi tino, pe tusa ma le 8,400,000 taimi. E faapefea ona lē saʻo lenei mea? Po o lona uiga e sesē le tele o lotu?” Pe mafai e “le pelu a le agaga” ona lepetia lenā talitonuga ua matuā mautū? Ina ua uma nisi talanoaga faale-Tusi Paia e uiga i le mataupu, na ia tusi atu i ni nai vaiaso mulimuli ane e faapea: “O lea ua amata ona ou malamalama i le upu moni e uiga i le oti. Ua ou matuā fiafia lava e iloa, pe a oo mai le toetū, o le a mafai ona tatou feiloaʻi ma ē e pele iā i tatou ua maliliu. Maʻimau pe ana vave oo mai le Malo o le Atua.”

Faaaogā Ina ia Faatalitonu Ai

14. O le ā le uiga o le faatalitonu o tagata e tatou te talaʻi i ai?

14 O le faaaogāina lelei o le Tusi Paia i le faiva, e lē na o le siiina atu o mau. Sa talanoa atu Paulo i se auala e “faatalitonu” ai, ma e tatau foʻi ona faapena i tatou. (Faitau le Galuega 19:8, 9; 28:23.) Ina ia “faatalitonu,” o lona uiga ia “ioe mai le tagata.” O lē na te faatalitonuina, e “matuā talitonu ma le mautinoa i se mea.” Pe a tatou faatalitonu se tagata e talia le aʻoaʻoga a le Tusi Paia, o lona uiga ua tatou maua o ia ma ua ia faatuatua i lenā aʻoaʻoga. Ina ia faataunuu lenei mea, e manaʻomia ona tatou faatalitonu tagata, i le moni o mea o loo tatou fai atu ai. E mafai ona tatou faia lenei mea i auala o loo mulimuli mai.

15. E faapefea ona e tataʻi manatu i le Tusi Paia i se auala e atiaʻe ai le faaaloalo i le Tusi Paia?

15 Ia tataʻi manatu i le Afioga a le Atua, i se auala e atiaʻe ai le faaaloalo i le Tusi Paia. Pe a e faitau atu se mau, ia taulaʻi atu le manatu i le tāua o le iloaina o le manatu o le Atua i le mataupu. Pe a uma ona fai atu se fesili ma tali mai lē e ona le fale, atonu e te manaʻo e fai atu se faamatalaga e faapea, ‘Seʻi o ta vāai po o le ā le finagalo o le Atua i le mataupu.’ Pe e te fesili atu foʻi, ‘O le ā se fetalaiga a le Atua e uiga i lenei tulaga?’ O le faia o ni fesili faapenei a o leʻi faitauina atu le mau, e faamatilatila ai o le Tusi Paia e mai i le Atua, ma e fesoasoani e faatāua ai i le mafaufau o lē o loo faalogologo le Tusi Paia. E tāua le faia faapea, aemaise lava pe a tatou molimau atu i se tasi e talitonu i le Atua, ae e lē iloa aʻoaʻoga a le Tusi Paia.—Sala. 19:7-10.

16. O le ā e fesoasoani iā te oe e faamalamalama lelei atu ai mau?

16 E lē gata ia faitau atu, ae ia faamatala atu foʻi. Sa fai ma masani a Paulo le “faamatala atu ma faamaonia e ala i mea ua tusia,” ia mea na ia aʻoaʻoina atu. (Galu. 17:3) E masani lava e sili atu i le tasi manatu e iai i se mau o le Tusi Paia, ma e ono manaʻomia ona e faamamafa faaupuga autū e faatatauina i le mataupu o loo lua talanoaina. E te ono faia faapea e ala i le toe taʻua o upu o loo iai manatu autū, pe e ala i le fai atu o ni fesili e fesoasoani i le tagata o le aiga e mātauina ai na manatu autū. Ona faamatala atu lea o le uiga o lenā vaega o le mau. Pe a uma lenā, ia fesoasoani i le tagata e iloa le auala e na te faatatauina ai e ia lava le mau.

17. E faapefea ona e fetufaaʻi ma isi i le Tusi Paia, i se auala e faatalitonu ai?

17 Ia fetufaaʻi i le Tusi Paia, i se auala e faatalitonu ai. I le faaaogāina o ʻaiʻoiga faatauanau mai le loto ma finauga talafeagai, na ‘fetufaaʻi ai Paulo ma isi i Tusitusiga Paia,’ i se auala e faatalitonu ai. (Galu. 17:2, 4) Ia taumafai e pāʻia loto o tagata e pei ona faia e Paulo. Ia “utufia mai” po o ā mea o i le loto i le faaaogāina o fesili agalelei e atagia atu ai lou naunau i le tagata. (Faata. 20:5) ʻAlofia upu tutui. A ia  tautala atu i upu manino ma ia saʻo. E tatau ona lagolagoina e ni faamaoniga talafeagai. E tatau ona faavae au faamatalaga i le Afioga a le Atua. E sili pe a faaaogā se mau se tasi, ia faamatala lelei ma faataʻitaʻi le manatu, nai lo o le faitau faavave o ni mau se lua po o se tolu. O le faaaogāina o faamaoniga e lagolagoina ai, e mafai foʻi ona faaopoopo ai le ‘faatauanau i ou laugutu.’ (Faata. 16:23) I nisi taimi e tatau ai ona faia ni saʻiliʻiliga e maua ai nisi faamatalaga. O le fafine e 93 tausaga lea na taʻua muamua, sa ia fia iloa le pogai ua matuā taatele ai le aʻoaʻoga e ola pea le agaga. Ina ua malamalama i le mea e māfua mai ai lenā aʻoaʻoga, ma le auala na ofi atu ai i le tele o lotu i le lalolagi, sa lava lenā e faatalitonu ai o ia e talia le aʻoaʻoga a le Tusi Paia e uiga i lea mataupu. *

Faaauau Ona Faaaogā ma le Tomai

18, 19. Aiseā e tatau ai ona tatou faaauau ona faaaogā ma le tomai “le pelu a le agaga”?

18 Ua taʻua i le Tusi Paia: “O loo suia le tulaga o mea a lenei lalolagi.” O tagata amioleaga ua faateteleina lo latou leaga. (1 Kori. 7:31; 2 Timo. 3:13) O le mea lea, e tāua ai ona tatou faaauau ona lepetia “mea ua matuā mautū” e ala i le faaaogāina o “le pelu a le agaga, o le afioga lea a le Atua.”

19 Maʻeu lo tatou fiafia ona ua iā te i tatou le Afioga a le Atua, le Tusi Paia, auā e mafai e le mana o le feʻau o loo i ai ona liaʻi ese aʻoaʻoga sesē, ma pāʻia ai loto o tagata faamaoni! E leai se mea ua mautū e malosi atu nai lo o lenā feʻau. O lea la, seʻi o tatou taumafai malosi e faaaogā ma le atamai “le pelu a le agaga,” i la tatou galuega mai le Atua, o le folafola atu o le Malo.

[Faamatalaga pito i lalo]

^ pala. 10 O lomiga e sili ona lelei e maua ai faamatalaga e uiga i tusi o le Tusi Paia, “O Tusi Paia Uma Lava e Moni Aʻiaʻi ma Aogā,” Insight on the Scriptures, ma mataupu i Le Olomatamata, e pei o le “O Loo Ola le Afioga a Ieova.”

^ pala. 17 Tagaʻi i le sāvali Pe e Iai Sou Agaga e Lē Mafai Ona Oti?

O le ā se Mea na E Aʻoaʻoina?

• E malosi faapefea le Afioga a le Atua?

• E faapefea ona tatou ‘taulimaina ma le saʻo le upu moni’?

• O le ā e mafai ona fai e le feʻau a le Tusi Paia i “mea ua matuā mautū”?

• E faapefea ona e faaleleia lou taumafai e faatalitonu tagata i le faiva?

[Fesili mo le Suʻesuʻega]

[Pusa/Ata i le itulau 12]

Le Auala e Faaaogā ai le Afioga a le Atua e Faatalitonu Ai

▪ Atiaʻe le faaaloalo i le Tusi Paia

▪ Faamatala le Tusi Paia

▪ Fetufaaʻi ma le mautinoa ina ia pāʻia ai le loto

[Ata i le itulau 11]

E tatau ona e faaaogā ma le tomai “le pelu a le agaga”