Skip to content

Skip to table of contents

O se Agalelei Faifua le Avea ma Auauna a Ieova

O se Agalelei Faifua le Avea ma Auauna a Ieova

 O se Agalelei Faifua le Avea ma Auauna a Ieova

“O i tatou lava o auauna a Ieova.”—ROMA 14:8.

1, 2. (a) O le ā le faaeaga ua tatou maua? (e) O ā fesili o le a tatou iloiloina?

MAʻEU se faaeaga na tuuina atu i le nuu o Isaraelu ina ua fetalai atu Ieova iā i latou: ‘E avea outou ma aʻu oloa tāua i lo o isi nuu uma.’ (Eso. 19:5) I aso nei, ua iai foʻi i tagata o le faapotopotoga Kerisiano le faaeaga o le avea ma auauna a Ieova. (1 Pete. 2:9; Faaa. 7:9, 14, 15) O se faaeaga e tatou te maua ai aogā e faavavau.

2 E lē gata o se faaeaga, ae o le avea ma auauna a Ieova o se tiute tauave foʻi. Atonu e taumānatu nisi: ‘Po o le a mafai ona ou faia mea o loo finagalo mai ai Ieova iā te aʻu? Po o le a ia teena aʻu pe a ou faia se agasala? Po o le avea ma auauna a Ieova o le a ou lē toe maua ai se saʻolotoga?’ E tāua ona iloilo na manatu. Ae e iai se isi fesili e ao ona mafaufau muamua i ai: O ā aogā e maua i le avea ma auauna a Ieova?

O le Avea ma Auauna a Ieova e Iʻu ai i le Fiafia

3. Na faapefea ona aogā iā Raava lana filifiliga e auauna iā Ieova?

3 Po o maua e i latou ua avea ma auauna a Ieova ni aogā mai lea tulaga? Seʻi manatu iā Raava, o se fafine talitane na ola i Ieriko anamua. E lē taumatea na tausia aʻe o ia ina ia tapuaʻi i tapuaʻiga matagā i atua o Kanana. Peitaʻi, ina ua ia faalogo i manumalo na avatu e Ieova iā Isaraelu, na ia iloa ai o Ieova o le Atua moni. O lea sa lamatia ai lona ola ina ua ia  puipuia tagata filifilia o le Atua, ma na faalagolago lona faasaoina i ia tagata. Ua taʻua i le Tusi Paia: “Pe e leʻi faapena foʻi ona taʻuamiotonuina Raava le fafine talitane i ana galuega, ina ua ia talileleia avefeʻau ma aauina atu i laʻua i se isi ala?” (Iako. 2:25) Ia manatu i faamanuiaga na oo iā te ia ina ua avea ma se tasi o tagata mamā o le Atua, o tagata na aʻoaʻoina i le Tulafono a le Atua i ala o le alofa ma le faamasinotonu. Maʻeu lona fiafia ina ua ia tuua lona olaga na iai muamua! Na faaipoipo atu o ia i se tane Isaraelu ma tausia aʻe lana tama tama, o Poasa, e avea ma auauna lelei a le Atua.—Iosua 6:25; Ruta 2:4-12; Mata. 1:5, 6.

4. O ā faamanuiaga na maua e Ruta ona o lana filifiliga e auauna iā Ieova?

Sa filifili foʻi Ruta o Moapi e auauna iā Ieova. A o laʻitiiti, atonu na tapuaʻi o ia iā Kimosa ma isi atua o Moapi, ae na oo ina ia iloa le Atua moni, o Ieova, ma faaipoipo atu i se tane Isaraelu o lē na aumau i lona nuu. (Faitau le Ruta 1:1-6.) Mulimuli ane, a o malaga atu i Peteleema Ruta ma le avā a le uso o lona toʻalua, o Orepa, faatasi ai ma le tinā o a la tane, o Naomi, sa uunaʻia e Naomi nei tamaʻitaʻi e toe foʻi i o la aiga. E ono lē faigofie mo i laʻua ona nonofo i Isaraelu. Na toe foʻi Orepa “i lona nuu ma ona atua,” ae e leʻi faia faapea e Ruta. Sa ia faaalia le faatuatua ma na ia iloa le Atua sa manaʻo e auauna i ai. Na ia faapea atu iā Naomi: “Aua e te finau mai iā te aʻu ina ia ou tuulafoaʻi iā te oe, ia ou lē mulimuli atu iā te oe; auā o le mea e te alu i ai, ou te alu i ai, o le mea e te moe ai i le pō, ou te moe ai foʻi i le pō. O lou nuu e fai ma oʻu nuu, ma o lou Atua, o loʻu Atua foʻi lea.” (Ruta 1:15, 16) Talu ai na ia filifili e auauna iā Ieova, sa faamanuiaina ai Ruta i le Tulafono a le Atua, lea sa saunia ai ni faatulagaga faapitoa mo fafine ua oti a latou tane, o ē matitiva ma ē e leai ni o latou fanua. Sa ia maua le fiafia, puipuiga ma le saogalemu i aao o Ieova.

5. O le ā ua e mātauina e faatatau i tagata o loo auauna ma le faamaoni iā Ieova?

5 Atonu o loo e silafia nisi o ē ua uma ona tuuina atu i latou lava iā Ieova, ma ua loa ona auauna ma le faamaoni iā te ia. Ia fesili atu i ai pe na faapefea ona aogā iā i latou le auauna atu iā Ieova. E ui lava e leai se isi e lē iai ni ona faafitauli, ae e tele faamaoniga e lagolagoina ai le moni o upu a le faisalamo: “E fiafia foʻi le nuu e fai Ieova ma o latou Atua!”—Sala. 144:15.

Mea ua Tonu Ona Faafinagaloina e Ieova

6. Aiseā e lē tatau ai ona tatou manatu e faigatā ona fai mea e finagalo ai Ieova?

6 Atonu e te taumānatu pe mafai ona e faia mea e finagalo mai ai Ieova. E faigofie ona manatu e faigatā ona avea ma auauna a le Atua, ola e tusa ai ma ana tulafono, ma tautala i lona suafa. O se faaaʻoaʻoga, na lagona e Mose lona lē agavaa ina ua auina atu e tautala atu i tagata Isaraelu ma le tupu o Aikupito. Peitaʻi, sa tonu le mea na finagalo i ai le Atua e faia e Mose. Na ‘aʻoaʻo foʻi Ieova iā te ia i mea  na te faia.’ (Faitau le Esoto 3:11; 4:1, 10, 13-15.) Talu ai na talia e Mose lea fesoasoani, na ia maua ai le fiafia ona o le faataunuuina o le finagalo o le Atua. O lea la, e tonu foʻi mea e faafinagaloina e Ieova mai iā i tatou. E na te silafia lo tatou tulaga lē lelei atoatoa, ma e finagalo e fesoasoani mai iā i tatou. (Sala. 103:14) O le auauna i le Atua o se soo o Iesu, e lē o se mea e faigatā tele, ae e faafouina ai, auā o le ola i se olaga faapena e aogā i isi ma e faafiafia ai le finagalo o Ieova. Na fetalai Iesu: “Ia outou ō mai iā te aʻu . . . , ona ou faafouina ai lea o outou. Ia outou amoina laʻu amo ma faaaʻoaʻo mai iā te aʻu, auā o aʻu o lē e agamalu ma lotomaulalo.”—Mata. 11:28, 29.

7. Aiseā e te mautinoa ai e fesoasoani mai Ieova ina ia e fai mea ua ia faatalitalia mai iā te oe?

7 E saunia pea e Ieova faalaeiauga e tatou te manaʻomia, pe afai e faalagolago atu iā te ia mo le malosi. O se faataʻitaʻiga, o Ieremia e lē o se tagata e lototele e tautala atu. Ina ua tofia o ia e Ieova e avea ma Ana perofeta, na faapea atu Ieremia: “Auē, Ieova e, le Alii Pule Silisili Ese! O aʻu nei e lē iloa tautala, auā ua na o aʻu o se tamaitiiti.” Mulimuli ane, na ia faapea atu: “Ou te lē toe tautala foʻi i lona suafa.” (Iere. 1:6; 20:9) Peitaʻi, ona o le fesoasoani a Ieova, na mafai ai ona talaʻi atu e Ieremia mo le 40 tausaga, se feʻau e lē fiafia i ai tagata. Na faaauau ona faamalosia o ia e Ieova i upu nei: “Ou te faatasi ma oe, e faaola ma laveaʻi iā te oe.”—Iere. 1:8, 19; 15:20.

8. E faaalia faapefea e tatou te faatuatua iā Ieova?

8 E pei lava ona faamalosia e Ieova Mose ma Ieremia, e faapea foʻi ona ia fesoasoani mai iā i tatou e fai mea ua ia finagalo i ai i Kerisiano i aso nei. O le vala tāua lava, o le faalagolago lea i le Atua. Ua taʻua i le Tusi Paia: “Ia e faatuatua iā Ieova ma lou lotoatoa, ae aua le faalagolago i lou lava malamalama. Ia e manatua o ia i ou ala uma, ona ia faasaʻoina lea o ou ala.” (Faata. 3:5, 6) Ua faaalia e tatou te faatuatua iā Ieova, pe a tatou talia le fesoasoani ua ia saunia e ala mai i lana Afioga ma le faapotopotoga. Pe afai e tuu atu iā Ieova e na te taʻitaʻia o tatou ala i le olaga, e leai la se mea o le a taofia ai i tatou mai le faamaoni atu iā te ia.

E Tausia e Ieova Ona Tagata Taʻitoʻatasi

9, 10. O le ā le puipuiga ua folafola mai i le Salamo e 91?

9 A o mafaufau e tuuina atu i latou iā Ieova, e ono taumānatu nisi i le matuiā o le faia o se agasala, ma nofosala ai ma teena e Ieova. O le itu e fiafia ai, ua saunia e Ieova le puipuiga e tatou te manaʻomia ina ia leoleoina ai la tatou faiā tautele ma ia. Seʻi o tatou vāai i le auala o loo faamatala mai ai i le Salamo e 91 lenā tulaga.

10 E amata faapea lenā Salamo: “O lē e nofo i le mea lilo o iai Lē e Silisili Ese e mau o ia i le paolo o Lē e ona le malosi uma lava. Ou te fai atu iā Ieova: ‘O oe o loʻu sulufaʻiga ma o loʻu ʻolo malosi, o loʻu Atua o lē ou te faatuatua i ai.’ Auā e laveaʻi e ia oe mai i le mailei a lē e puʻe manulele.” (Sala. 91:1-3) Ia mātau, ua folafola mai e le Atua e na te puipuia i latou o ē e alolofa ma faatuatuaina o ia. (Faitau le Salamo 91:9, 14.) O le ā le puipuiga na ia faasino i ai? Na iai taimi na puipuia ai e Ieova ola o ana auauna i aso anamua, ina ia faasaoina ai le gafa e tau atu i le Mesia folafolaina. Peitaʻi, o le toʻatele o isi tane faamaoni na faafalepuipuiina, faataugāina, ma fasiotia ona o uunaʻiga leaga a le Tiapolo, ina ia faaliliu ese i latou mai le faamaoni atu i le Atua. (Epe. 11:34-39) Na latou maua le lototele ina ia tumau ai, auā na puipuia faaleagaga i latou e Ieova mai le lamatiaga o le lē faamaoni. O lea la, ua manino mai o le Salamo e 91, o se folafolaga o le puipuiga faaleagaga.

11. O le ā “le mea lilo o iai Lē e Silisili ese,” ma o ai ua puipuia e Ieova i inā?

11 O lea la, o “le mea lilo o iai Lē e Silisili ese” ua taʻua e le faisalamo, o se nofoaga faafaatusa o le puipuiga faaleagaga. O i latou e nonofo ai i inā, ua mau faatasi ma le Atua o ni ana mālō, ma ua puipuia i latou mai i so o se mea po o se tasi ua faamataʻuina lo latou  faatuatua ma le alofa i le Atua. (Sala. 15:1, 2; 121:5) O se mea lilo ona e lē mafai ona iloa e tagata lē talitonu. I inei, o loo puipuia ai e Ieova i latou o ē ua peiseaʻī o loo faapea atu: ‘O oe o loʻu Atua o lē ou te faatuatua i ai.’ Pe afai e tatou te tumau ai i lenei nofoaga malupuipuia, e lē tatau ona tatou popole i le lē mauaina o le finagalo malie o le Atua, ona ua maileia i se mailei a Satani, “lē e puʻe manulele.”

12. O ā tulaga e lamatia ai la tatou faiā ma le Atua?

12 O ā tulaga e lamatia ai la tatou faiā tautele ma le Atua? Ua taʻua e le faisalamo nisi o nei mea, e aofia ai ‘⁠se faamaʻi e savali i le pōuliuli, ma se faaumatiaga e tupu i le tutonu o le lā.’ (Sala. 91:5, 6) Ua maileia e “lē e puʻe manulele” le toʻatele o tagata i le faanaunauga manatu faapito o le fia tutoʻatasi. (2 Kori. 11:3) Ua ia maileia isi e ala i le faatuputupulaʻia o le matapeʻapeʻa, faamaualuga, ma le manaʻo tele i meafaitino. Ae ua ia faasesēina isi e ala i filosofia e pei o le lotonuu, evolusione, ma lotu sesē. (Kolo. 2:8) Ua maileia foʻi le toʻatele i le mailei o feusuaʻiga lē mamā. O nei mala e faaleagaina ai i le itu faaleagaga, ua māfua ai ona mou atu le alofa o le faitau miliona o tagata mo le Atua.—Faitau le Salamo 91:7-10; Mata. 24:12.

Ia Leoleoina Lou Alofa i le Atua

13. E faapefea ona puipuia e Ieova i tatou mai i tulaga e lamatia ai lo tatou lelei faaleagaga?

13 E faapefea ona puipuia e Ieova ona tagata mai i nei lamatiaga faaleagaga? Ua faapea mai le salamo: “E na te faatonuina ana agelu e faatatau iā te oe, e leoleo iā te oe i ou ala uma.” (Sala. 91:11) E taʻitaʻia ma puipuia i tatou e agelu ina ia talaʻi atu le tala lelei. (Faaa. 14:6) E lē gata i agelu, ae o loo puipuia foʻi i tatou e toeaina Kerisiano mai le faasesēina i manatu pepelo, e ala i lo latou taofimau i le Tusi Paia pe a aʻoaʻo atu. E latou te avatu le fesoasoani i tagata taʻitoʻatasi o loo tauivi e manumalo i ni uiga faalelalolagi. (Tito 1:9; 1 Pete. 5:2) Ua saunia foʻi e “le pologa faamaoni ma le faautauta” meaʻai faaleagaga, ina ia puipuia ai i tatou mai i le aʻoaʻoga o le evolusione, faatosinaga o tuʻinanauga lē mamā, le saʻilia o ʻoa ma tulaga taualoa, ma le tele o isi tuʻinanauga ma taaʻiga lē lelei. (Mata. 24:45) O le ā ua fesoasoani iā te oe ina ia teena ai nisi o na lamatiaga?

14. E faapefea ona tatou faaaogā lelei le puipuiga ua saunia mai e le Atua?

14 O le ā e ao ona tatou fai ina ia tumau ai i le “mea lilo” a le Atua e puipuia ai? E pei ona tatau ona tatou puipuia pea i tatou mai i lamatiaga faaletino, e pei o faalavelave faafuaseʻi, le ʻau solitulafono po o faamaʻi pipisi, e faapea foʻi ona tatau ona tatou puipuia pea i tatou mai i lamatiaga faaleagaga. O lea la, e ao ona tatou faaaogā lelei le taʻitaʻiga ua saunia mai e Ieova mo i tatou, e ala mai i lomiga, sauniga a le faapotopotoga ma fonotaga. E tatou te saʻili atu mo ni fautuaga mai i toeaina. E tatou te maua foʻi aogā mai i uiga eseese e faaalia e o tatou uso ma tuafāfine Kerisiano. E fesoasoani a tatou faatasiga ma le faapotopotoga  ina ia tatou atamamai ai.—Faata. 13:20; faitau le 1 Peteru 4:10.

15. Aiseā e te mautinoa ai, e puipuia e Ieova oe mai i so o se mea e te ono lē maua ai lona finagalo malie?

15 E tatou te mautinoa e mafai e Ieova ona puipuia i tatou, mai i so o se mea e tatou te ono lē maua ai lona finagalo malie. (Roma 8:38, 39) Ua ia puipuia le faapotopotoga mai i fili malolosi faalotu ma faalemalo, o ē o lo latou sini, e lē ina ia fasiotia i tatou, ae ia vavaeeseina i tatou mai i lo tatou Atua paia. Ua faamaonia le moni o le folafolaga a Ieova: “O so o se auupega ua faia e faasagatau iā te oe e lē manuia.”—Isa. 54:17.

O Ai e Aumaia le Saʻolotoga?

16. Aiseā e lē mafai ai e le lalolagi ona aumaia iā i tatou le saʻolotoga?

16 Po o le avea ma auauna a Ieova o le a aveesea ai lo tatou saʻolotoga? E leai, o le avea ma auauna a le lalolagi e aveesea ai lo tatou saʻolotoga. Ua vavaeese le lalolagi mai iā Ieova, ma ua pulea e se atua sauā o lē ua faapologaina tagata. (Ioa. 14:30) O se faaaʻoaʻoga, ua faaaogā e le faiga o mea a Satani tulaga faigatā tau tamaoaiga, ina ia aveesea ai le saʻolotoga o tagata. (Faatusatusa i le Faaaliga 13:16, 17.) Ua iai foʻi i le agasala le malosi taufaasesē ina ia faapologaina ai tagata. (Ioa. 8:34; Epe. 3:13) E ui lava la ina folafola mai e tagata lē talitonu e maua le saʻolotoga pe a latou uunaʻia se olaga e feteenaʻi ma aʻoaʻoga a Ieova, ae o so o se tasi e faalogo atu iā i latou, e vave tele ona faapologaina i se olaga agasala ma lē mamā.—Roma 1:24-32.

17. O le ā le saʻolotoga ua aumaia e Ieova iā i tatou?

17 Peitaʻi, pe afai e tatou te faatuatua iā Ieova, o le a ia faasaʻolotoina i tatou mai i mea uma e mafai ona faaleagaina ai. I se tulaga tutusa, ua pei lo tatou tulaga o se tagata ua ia faatuatuaina se fomaʻi tipitipi tomai, e na te mafai ona faasaoina lona ola mai i se maʻi tugā e lamatia ai. Ua iai iā i tatou uma se tulaga e lamatia ai le ola, o le agasala. Seʻi vaganā ua tatou faatuatua iā Ieova, e faavae i le taulaga a Keriso, faatoʻā mafai lea ona faasaʻolotoina i tatou mai i āuga o le agasala ma ola e faavavau. (Ioa. 3:36) E pei ona faateleina lo tatou mautinoa i se fomaʻi tipitipi pe a tatou iloa lona talaaga lelei, o le a faapea foʻi ona faateleina lo tatou faatuatua iā Ieova a o faaauau ona tatou aʻoaʻoina e faatatau iā te ia. O lea la, e tatou te toʻaʻaga e suʻesuʻe le Afioga a le Atua, auā o le a fesoasoani lenā iā i tatou e alolofa atu ai iā te ia, i se auala e lē toe fefefe ai e avea ma ana auauna.—1 Ioa. 4:18.

18. O le ā le iʻuga o le a oo iā i latou o ē auauna iā Ieova?

18 Ua tuuina mai e Ieova i tagata uma le saʻolotoga e filifili ai. Ua faapea mai lana Afioga: “Ia e filifili i le ola ina ia e ola ai pea, o oe ma lau fanau, e ala i le alofa iā Ieova lou Atua.” (Teu. 30:19, 20) E finagalo o ia e tatou te faaalia atu lo tatou alolofa mo ia, e ala i le faia o la tatou lava filifiliga e auauna iā te ia. Nai lo le aveesea ai o lo tatou saʻolotoga, o le auauna i le Atua e tatou te alolofa i ai, e mautinoa o le a tatou maua ai pea le fiafia.

19. Aiseā o se agalelei faifua ai le avea ma auauna a Ieova?

19 Ona o ni tagata agasala, e lē tatau ai la ona tatou auauna atu i se Atua e lelei atoatoa. Ae ua mafai ona o le agalelei faifua o le Atua. (2 Timo. 1:9) Na tusi Paulo e faapea: “Afai tatou te ola, e tatou te ola mo Ieova, ma afai tatou te oti, e tatou te oti mo Ieova. O lea la, pe tatou te ola pe e tatou te oti, o i tatou lava o auauna a Ieova.” (Roma 14:8) E mautinoa o le a tatou lē salamō ona o le filifili e auauna iā Ieova.

E Faapefea Ona E Tali?

• O ā ni aogā o le avea ma auauna a Ieova?

• Aiseā e mafai ai ona tatou faia mea o loo finagalo mai ai Ieova iā i tatou?

• Ua faapefea ona saunia e Ieova le puipuiga mo ana auauna?

[Fesili mo le Suʻesuʻega]

[Ata i le itulau 8]

Fesili atu i isi po o ā aogā ua latou maua ona o le auauna atu iā Ieova

[Ata i le itulau 10]

O ā nisi o auala ua saunia mai ai e Ieova le puipuiga?