Skip to content

Skip to table of contents

Aiseā E te Tuuina Atu ai iā Ieova?

Aiseā E te Tuuina Atu ai iā Ieova?

 Aiseā E te Tuuina Atu ai iā Ieova?

“O le pō nei na tū mai ai iā te aʻu se agelu a le Atua, o lē o loo oʻu tapuaʻi i ai.”—GALU. 27:23.

1. O ā laasaga ua uma ona faia e i latou o le a papatisoina, ma o ā fesili ua lāgā ai?

“E FAAVAE i le taulaga togiola a Iesu Keriso, po ua e salamō mai i au agasala ma tuuina atu oe iā Ieova e faia lona finagalo?” O se tasi nei o fesili o fesili e lua e taliina e tagata o le a papatisoina i le faaiʻuga o le lauga o le papatisoga. Aiseā e manaʻomia ai e Kerisiano ona tuuina atu i latou iā Ieova? E faapefea ona aogā iā i tatou le tuuina atu i le Atua? Aiseā e lē taliaina ai e le Atua le tapuaʻiga a se tasi, pe a lē tuuina atu iā te ia? Ina ia malamalama i tali, e manaʻomia ona tatou iloiloina muamua po o le ā lea mea o le tuuina atu.

2. O le ā le uiga o le tuuina atu o se tasi iā Ieova?

2 O le ā le uiga o le tuuina atu o se tasi i le Atua? Ia mātau le auala na faamatala ai e le aposetolo o Paulo le la faiā ma le Atua. I luma o tagata na iai i se vaa na toetoe a goto, na taʻua ai e Paulo Ieova o “le Atua, o lē o loo oʻu tapuaʻi i ai.” (Faitau le Galuega 27:22-24.) O Kerisiano moni uma o tagata o Ieova. Ae o le lalolagi uma o loo “nofo toʻilalo i le pule a lē o loo leaga.” (1 Ioa. 5:19) E avea Kerisiano ma auauna a Ieova pe a latou faia se tuuina atu e talia e ia e ala i le tatalo. O lenā tuuina atu o se tautoga a le tagata lava ia. Ona mulimuli ane lea papatisoina i le vai.

3. O le ā na faailogaina i le papatisoga o Iesu, ma e faapefea ona mulimuli ona soo i lana faaaʻoaʻoga?

3 Na saunia e Iesu se faaaʻoaʻoga mo i tatou ina ua ia filifili e fai le finagalo o le Atua. Talu ai na fanau mai o ia i totonu o le nuu ua tuuina atu, o Isaraelu, o lona uiga la ua uma ona tuuina atu o ia i le Atua. Peitaʻi, i lona papatisoga, na ia faia ai se mea e sili atu nai lo le mea na manaʻomia i le Tulafono. O loo taʻua i le Afioga a le Atua na ia faapea atu: “Faauta! Le Atua e, ua ou sau e fai lou finagalo.” (Epe. 10:7; Luka 3:21) O le papatisoga la o Iesu, na faailogaina ai lona ofoina atu o ia i le Atua e fai le finagalo o lona Tamā. E mulimuli ona soo i lana faaaʻoaʻoga pe a latou sauni mo le papatisoga. Peitaʻi, o lo latou papatisoga i le vai,  o se faailoaga lenā i isi ua uma ona latou tuuina atu i le Atua e ala i le tatalo.

Le Auala e Aogā ai le Tuuina Atu

4. O le ā ua tatou iloa mai i le faigāuō a Tavita ma Ionatana, e faatatau i se maliega?

4 O le tuuina atu o se Kerisiano, o se mataupu e tāua tele. E sili atu nai lo o se maliega. E faapefea la ona aogā iā i tatou le tuuina atu? Seʻi o tatou iloiloina aogā e maua mai i le faia o se maliega i ni faiā faaletagata. O se faaaʻoaʻoga, o faigāuō. Ina ia olioli i le faaeaga o le iai o sau uō, e tatau ona e talia le tiute tauave o le avea o oe ma uō. E aofia ai i lenā tulaga lou ioe o lau matafaioi le faaalia o le manatu mamafa i lau uō. O se tasi o faigāuō e sili ona mataʻina o loo faamatalaina i le Tusi Paia, o le faigāuō a Tavita ma Ionatana. Sa oo lava ina la osia se feagaiga o le faauōga. (Faitau le 1 Samuelu 17:57; 18:1, 3.) E ui lava e seāseā ona iai ni faigāuō faapena, ae o le tele lava o faigāuō e mafai ona tumau pe a manatu mamafa le tasi i le isi, pe ioe i lana matafaioi i le la faigāuō.—Faata. 17:17; 18:24.

5. Na faapefea ona maua pea e se pologa, aogā mai le auauna atu i se matai lelei?

5 O loo faamatalaina i le Tulafono na avatu e le Atua iā Isaraelu, se isi faiā e mafai ona maua ai e tagata ni aogā e ala i le faia o se maliega. Pe afai e manaʻo se pologa e maua le saogalemu e ala i le auauna pea i se matai lelei, sa mafai ona la faia se maliega tumau ma le matai. Ua faapea mai le Tulafono: “Afai e fai atu ma le maumauaʻi le pologa, ‘Ou te alofa tele i loʻu matai, i laʻu avā ma oʻu atalii; Ou te lē manaʻo e alu o se tagata saʻoloto,’ ona aumai lea o ia e lona matai ma faalatalata i le Atua moni ma faatū i tala ane o le faitotoʻa po o le pou o le faitotoʻa; ona tui ai lea o lona taliga i se mea maʻai e lona matai, ma nofo pologa ai o ia i lona matai i lona olaga atoa.”—Eso. 21:5, 6.

6, 7. (a) E aogā faapefea i tagata le faia o ni maliega? (e) O le ā ua faaalia mai ai i lenā tulaga e uiga i la tatou faiā ma Ieova?

6 O le faaipoipoga o se faiā e manaʻomia ai se maliega e sili atu. E lē o se maliega i se konekarate, ae i se tagata. E lē mafai ona saogalemu moni ni tagata se toʻalua ua nonofo ae leʻi faaipoipo; faapea foʻi le la fanau. Ae o ulugalii ua tautō le tasi i le isi i se faaipoipoga mamalu, ua iā i latou se māfuaaga malosi mai le Tusi Paia e taumafai ai e foʻia i le alofa o latou faafitauli, pe a tulaʻi mai.—Mata. 19:5, 6; 1 Kori. 13:7, 8; Epe. 13:4.

7 I taimi o le Tusi Paia, sa maua e tagata aogā mai i le faia o ni konekarate tumau i pisinisi ma galuega. (Mata. 20:1, 2, 8) O le tulaga foʻi lenā o loo iai i aso nei. O se faataʻitaʻiga, e aogā iā i tatou le iai o se maliega tusitusia, po o se konekarate tusitusia e tumau, a o tatou leʻi amataina se pisinisi fou pe amata ona faigaluega i se kamupani. O lea la, pe afai e mafai e maliega ona faamalosia ai faiā e pei o faigāuō, faaipoipoga ma galuega totogi, e mautinoa foʻi la, o le faia o se tuuina atu atoatoa iā Ieova o le a matuā aogā i la lua faiā! Seʻi o tatou iloiloina aogā na maua e tagata i taimi ua mavae, ona o le tuuina atu iā Ieova le Atua, ma le auala na sili atu ai lenei mea i lo na o se maliega.

Aogā o le Tuuina Atu o Isaraelu i le Atua

8. O le ā le uiga o le tuuina atu o Isaraelu i le Atua?

8 Na tuuina atu le nuu atoa o Isaraelu iā Ieova ina ua latou faia se tautoga i le Atua. Na faapotopoto e Ieova i latou e lata ane i le Mauga o Sinai, ma fetalai atu: “Afai tou te matuā faalogo i loʻu leo ma tausi i laʻu feagaiga, ona avea lea o outou ma aʻu oloa tāua i lo o isi nuu uma.” Ona tali faatasi mai lea o le nuu: “O mea uma ua fetalai mai ai Ieova ua matou malilie e fai.” (Eso. 19:4-8) O le tuuina atu sa sili atu le mea na uiga iai mo Isaraelu, i lo le tau ina malilie e fai se mea. O lona uiga na latou tapuaʻi atu iā Ieova, ma avea ai i latou ma “oloa tāua” a Ieova.

9. Na faapefea ona aogā iā Isaraelu le tuuina atu i le Atua?

9 Na maua e tagata Isaraelu aogā mai le auauna  atu iā Ieova. Sa ia tausia ma le faamaoni i latou e pei ona tausia e se matua alofa lana tama. Na fetalai atu le Atua iā Isaraelu: “Pe e mafai ona galo i se tinā lana tama o loo susu, ma lē alofa i le tama tama a lona manava? E galo foʻi i nei tinā ae e lē galo oe iā te aʻu.” (Isa. 49:15) Na tuuina atu e Ieova iā i latou le taʻitaʻiga e ala i le Tulafono, o faalaeiauga mai i perofeta, ma le puipuiga e ala i agelu. Ua tusi se faisalamo e faapea: “Ua ia taʻuina atu lana afioga iā Iakopo, o ana tulafono ma iʻuga o ana faamasinoga iā Isaraelu. E na te leʻi faia faapea i se isi lava atunuu.” (Sala. 147:19, 20; faitau le Salamo 34:7, 19; 48:14.) E pei lava ona tausia e Ieova le nuu na auauna atu iā te ia i taimi ua mavae, e faapea foʻi ona ia tausia i latou ua tuuina atu iā te ia i aso nei.

Le Pogai e Ao ai Ona Tatou Tuuina Atu i le Atua

10, 11. Pe na tatou fananau mai i le aiga o le Atua i le aoao o mea? Faamatala.

10 A o mafaufau e tuuina atu ma papatiso, atonu e taumānatu nisi e faapea, ‘Aiseā e lē mafai ai ona ou tapuaʻi i le Atua e aunoa ma loʻu tuuina atu iā te ia?’ E manino le māfuaaga pe a tatou manatunatu i lo tatou tulaga moni i luma o le Atua. Ia manatua, ona o le agasala a Atamu, ua tatou fananau uma mai ai e lē o ni tagata o le aiga o le Atua. (Roma 3:23; 5:12) O le tuuina atu o i tatou i le Atua, o se manaʻoga e tāua tele ina ia talia ai i lona aiga i le aoao o mea. Seʻi o tatou vāai i le māfuaaga.

11 E leai se tasi o i tatou e iai se tamā moni e mafai ona ia aumaia le ola lelei atoatoa iā i tatou, e pei ona sa finagalo i ai le Atua. (1 Timo. 6:19) E tatou te leʻi fananau mai o ni atalii o le Atua, auā ina ua agasala le uluaʻi ulugalii, na vavae ese le fanau a tagata mai i lo latou Tamā alofa ma Lē na foafoaina i latou. (Faatusatusa i le Teuteronome 32:5.) Mai lava i lenā taimi, ua lē avea le lalolagi o tagata ma ni tagata o le aiga o Ieova i le aoao o mea, ma ua vavaeese mai i le Atua.

12. (a) E faapefea ona avea tagata lē lelei atoatoa ma tagata o le aiga o le Atua? (e) O ā laasaga e ao ona tatou muaʻi faia a o leʻi papatiso?

12 Ae ui i lea, e mafai e i tatou taʻitoʻatasi ona talosaga atu i le Atua e talia i tatou i lona aiga o ni auauna ua faamaonia. * E faapefea ona tupu lenā mea i tagata agasala e pei o i tatou? Na tusi Paulo e faapea: “A o fai i tatou ma ona fili, na tatou toe lelei ai ma le Atua e ala i le maliu o lona Alo.” (Roma 5:10) I le papatisoga, e tatou te talosaga atu i le Atua mo se lotofuatiaifo lelei ina ia finagalo malie mai o ia iā i tatou. (1 Pete. 3:21) Peitaʻi, e iai laasaga e tatau ona tatou faia a o leʻi papatiso. E ao ona tatou iloa le Atua, ia iloa ona faatuatua iā te ia, salamō, ma suia o tatou ala. (Ioa. 17:3; Galu. 3:19; Epe. 11:6) Ae o loo iai foʻi se isi mea e manaʻomia ona fai a o leʻi talia i tatou i le aiga o le Atua. O le ā lenā mea?

13. Aiseā e ao ai i se tasi ona fai se tautoga o le tuuina atu i le Atua, ina ia avea ai o se tasi o Lona aiga o tagata tapuaʻi ua faamaonia?

13 A o leʻi avea se tasi ua vavaeese mai i le Atua ma tagata o le aiga o le Atua o auauna ua faamaonia, e manaʻomia ona ia faia se taʻutinoga aloaʻia iā Ieova. Ina iloa le māfuaaga, seʻi manatu i se tamā faaaloalogia e alofa i se tamaitiiti ua maliliu ona mātua, ma ua manaʻo e vaetama o ia e avea ma sui o lona aiga. Ua lauiloa lea tamā o se tagata lelei. Peitaʻi, a o leʻi talia le tamaitiiti e avea ma ona atalii, e manaʻo le tamāloa i le tamaitiiti e taʻutino atu. Ua faapea atu le tamāloa, “A o oʻu leʻi taliaina oe e avea ma oʻu atalii, ou te fia iloa po o le a e alofa ma faaaloalo mai iā te aʻu o sou tamā.” Seʻi vaganā ua lotomalie le tamaitiiti e fai se taʻutinoga aloaʻia, ona faatoʻā talia lea o ia e le tamāloa i lona aiga. Pe e lē o se gaoioiga talafeagai ea lea? I se tulaga tutusa, e na o i latou ua lotomalilie e faia se tautoga o le tuuina  atu iā Ieova, o le a ia taliaina i lona aiga. Ua faapea mai le Tusi Paia: “Ia tuuina atu o outou tino o le taulaga ola, e paia, ma e mālie i le Atua.”—Roma 12:1.

O se Gaoioiga o le Alofa ma le Faatuatua

14. I le ā le auala e avea ai le tuuina atu o se faailoaga o le alofa?

14 O le faia o se tautoga o le tuuina atu i le Atua, o se faailoaga o lo tatou alolofa moni iā Ieova. E mafai ona talitutusa ma le tautoga o se faaipoipoga. E faailoa atu e se alii faaipoipo Kerisiano lona alofa e ala i le tautō e faamaoni i le tamaʻitaʻi faaipoipo, e tusa lava po o le ā e tupu. O se taʻutinoga i le tagata, ae e lē na o se folafolaga e fai se mea. Ua iloa e le alii faaipoipo Kerisiano, e lē mafai ona la nonofo ma le tamaʻitaʻi faaipoipo pe afai e na te lē faia se tautoga o le faaipoipoga. I se auala tutusa, e lē mafai ona tatou maua atoatoa aogā o le avea ma tagata o le aiga o Ieova, pe a lē faia se tautoga o le tuuina atu. E ui lava la i le lē lelei atoatoa, ae e tatou te tuuina atu i le Atua ona e naunau e tapuaʻi atu iā te ia ma maumauaʻi e faamaoni atu iā te ia, e tusa lava po o le ā e tupu.—Mata. 22:37.

15. E faapefea ona avea le tuuina atu o se gaoioiga o le faatuatua?

15 O le tuuina atu o i tatou lava i le Atua, o se gaoioiga o le faatuatua. Aiseā? O lo tatou faatuatua iā Ieova ua tatou mautinoa ai, o le mafuta vavalalata atu i le Atua e aogā mo i tatou. (Sala. 73:28) Ua tatou iloa e lē faigofie i taimi uma ona savavali ma le Atua a o ola faatasi ma “le tupulaga faapiʻopiʻo ma le taufaasesē,” ae e tatou te faatuatua i le folafolaga a le Atua e na te lagolagoina i tatou i a tatou taumafaiga. (Fili. 2:15; 4:13) Ua tatou iloa e tatou te lē lelei atoatoa, ae e mautinoa e alofa mutimutivale mai Ieova e oo lava i taimi e tatou te sesē ai. (Faitau le Salamo 103:13, 14; Roma 7:21-25.) E tatou te mautinoa o le a tauia e Ieova a tatou taumafaiga e tumau i le faamaoni iā te ia.—Iopu 27:5.

E Maua le Fiafia i le Tuuina Atu i le Atua

16, 17. Aiseā e maua ai le fiafia pe a faia se tuuina atu iā Ieova?

16 O le tuuina atu iā Ieova e maua ai le fiafia, ona e aofia ai le foaʻi atu o i tatou lava. Na taʻua e Iesu se upu moni faavae ina ua ia fetalai: “E sili le fiafia e maua i le foaʻi atu i lo o le talia mai.” (Galu. 20:35) Sa tofo atoatoa Iesu i le fiafia o le foaʻi atu a o faia lana faiva i le lalolagi. Na iai taimi e leʻi mālōlō ai o ia, ma e leʻi taumafa, ina ia mafai ona fesoasoani i isi ia maua le ala i le ola. (Ioa. 4:34) Sa fiafia Iesu i le faafiafiaina o le finagalo o lona Tamā. Na fetalai Iesu: “Ou te faia pea mea e fiafia i ai lona finagalo.”—Ioa. 8:29; Faata. 27:11.

17 O lea la, na faasino e Iesu ona soo i le auala e maua ai se olaga faamalieina, ina ua ia fetalai: “A fia mulimuli mai se tasi iā te aʻu, ia faafitia e ia o ia lava.” (Mata. 16:24) O le faia faapea e tatou te mafuta vavalalata atu ai iā Ieova. Pe e lē moni ea, e leai se isi e sili atu  ona manatu mai ma le alofa iā i tatou nai lo o Iesu?

18. Aiseā e sili atu ai ona maua le fiafia i le ola e tusa ai ma lo tatou tuuina atu iā Ieova, i lo le tuuina atu i se mea po o se isi lava tagata?

18 E sili atu ona maua le fiafia i le tuuina atu o i tatou iā Ieova, ma ola e tusa ai o lenā tuuina atu e ala i le faia o lona finagalo, nai lo le tuuina atu i se mea po o se isi lava tagata. O se faataʻitaʻiga, o le toʻatele o tagata ua tuuina atu o latou ola i le saʻilia o le tamaoaiga faaletino, ae aunoa ma le mauaina o le fiafia ma le faamalieina moni. Peitaʻi, o i latou ua tuuina atu iā Ieova ua maua le fiafia tumau. (Mata. 6:24) Ua latou maua le fiafia i le tulaga mamalu o le avea ma “ʻaufaigaluega faatasi ma le Atua,” peitaʻi e latou te lē o tuuina atu i se galuega, ae o lo tatou Atua lototalisapaia. (1 Kori. 3:9) E matuā talisapaia e Ieova la latou auaunaga lē manatu faapito. O le a ia toe faafoʻisia ona tagata faamaoni i lo latou tulaga talavou, ina ia latou maua aogā mai i lana tausiga e faavavau.—Iopu 33:25; faitau le Eperu 6:10.

19. O le ā le faaeaga ua maua e i latou ua tuuina atu iā Ieova?

19 O le tuuina atu o lou ola iā Ieova, o le a e maua ai se faiā vavalalata ma ia. Ua faapea mai le Tusi Paia: “Ia outou mafuta vavalalata atu i le Atua, ona mafuta vavalalata mai lea o ia iā te outou.” (Iako. 4:8; Sala. 25:14) I le mataupu o sosoo mai, o le a tatou talanoaina ai le māfuaaga e tatou te mautinoa ai, o se mea lelei le filifili e auauna atu iā Ieova.

[Faamatalaga pito i lalo]

^ pala. 12 E faatoʻā avea “isi mamoe” a Iesu ma atalii o le Atua, pe a māeʻa le afe tausaga. Peitaʻi, talu ai ua latou tuuina atu i le Atua, e talafeagai la ona latou taʻua le Atua o le “Tamā” ma ua tonu ona taʻua i latou o ni tagata o le aiga e tapuaʻi iā Ieova.—Ioa. 10:16; Isa. 64:8; Mata. 6:9; Faaa. 20:5.

E Faapefea Ona E Tali?

• O le ā le uiga o le tuuina atu o se tasi i le Atua?

• E faapefea ona aogā iā i tatou le tuuina atu i le Atua?

• Aiseā e manaʻomia ai ona tuuina atu Kerisiano iā Ieova?

[Fesili mo le Suʻesuʻega]

[Ata i le itulau 6]

O le ola e tusa ai ma lo tatou tuuina atu, e iʻu ai i lo tatou fiafia tumau