Skip to content

Skip to table of contents

Ia Tumau Ona Olioli i Taimi o Faigatā

Ia Tumau Ona Olioli i Taimi o Faigatā

 Ia Tumau Ona Olioli i Taimi o Faigatā

“Ia fiafia i latou uma o ē faatuatua iā [Ieova]; ia latou alalaga fiafia e faavavau.”—SALA. 5:11.

1, 2. (a) O ā nisi o mea ua faapogaia ai le matuā mafatia i aso nei? (e) E ese mai i mala o loo taatele i tagata uma, o le ā e ao i Kerisiano moni ona tutumau ai?

O LOO fesagaʻi Molimau a Ieova ma mala lea e aafia ai le toʻatele o tagata. O le toʻatele o tagata o le Atua ua aafia fua ona o solitulafono, taua, ma isi faiga lē tonu. Ua matuā mafatia tagata ona o mala faalenatura, le mativa, faamaʻi ma le oti. Na tusia ma le tonu e le aposetolo o Paulo e faapea: “Ua tatou iloa o loo ōi faatasi pea ma tigā faatasi foafoaga uma e oo mai i aso nei.” (Roma 8:22) Ua tatou tofo foʻi i āuga o lo tatou tulaga lē lelei atoatoa. Tatou te ono faapea ifo e pei o le tupu o Tavita: “Ua oo lava aʻu agasala i luga o loʻu ulu; e pei o se avega mamafa, ua mafatia ai lava aʻu.”—Sala. 38:4.

2 E ese mai i mala o loo taatele i tagata uma, o loo tauave e Kerisiano moni le laau faafaatusa e faapuapuagatia ai. (Luka 14:27) Ioe, i le pei o Iesu, e inosia ma sauāina ona soo. (Mata. 10:22, 23; Ioa. 15:20; 16:2) O lea la, o le mulimuli i le Keriso e manaʻomia ai ona matuā faamalolosi ma tutumau, a o tatou faatali atu i faamanuiaga o le lalolagi fou.—Mata. 7:13, 14; Luka 13:24.

3. E faapefea ona tatou iloa e lē manaʻomia i Kerisiano ona ola i se olaga e mafatia, ina ia faafiafia ai le Atua?

3 Po o le uiga o lenei manatu e tuliloa e Kerisiano moni se olaga e augapiu ma se olioli  ma le fiafia? Pe e tatau ona iloga o tatou olaga i le faanoanoa ma le lotomomomo seʻia oo mai le iʻuga? O le mea moni, e finagalo Ieova ia tatou fiafia a o tatou faatalitali i le faataunuuga o ana folafolaga. E iai taimi o loo faamatala ai i le Tusi Paia tagata tapuaʻi moni, o tagata e fiafia. (Faitau le Isaia 65:13, 14.) Ua faapea mai le Salamo 5:11: “Ia fiafia i latou uma o ē faatuatua iā [Ieova]; ia latou alalaga fiafia e faavavau.” Ioe, e mafai ona tofo i le matuā olioli, le filemu o le mafaufau ma le faamalieina, e oo lava i taimi e sili ona faigatā. Seʻi o tatou talanoaina pe faapefea ona fesoasoani le Tusi Paia iā i tatou e fesagaʻia o tatou puapuaga, ma tumau pea ona olioli.

O Ieova o “le Atua Fiafia”

4. O ā faalogona o le Atua pe a teena lona finagalo?

4 Seʻi fai ma faataʻitaʻiga Ieova. I le avea ma Atua e ona le malosi uma lava, ua ia puleaina le vateatea aoao. E lē mativa o ia i se mea ma e na te lē manaʻomia se tasi. Peitaʻi, e ui i lona mana e lē mafaatusalia, ae na matuā faanoanoa Ieova ina ua fouvale se tasi o ona atalii agaga ma avea ma Satani. Sa faanoanoa le finagalo o le Atua ina ua mulimuli ane aufaatasi atu ai nisi agelu i le fouvalega. Seʻi manatu foʻi i le matuā tigā o faalogona o le Atua ina ua fulitua iā te ia ana foafoaga e sili ona lelei i le lalolagi, o Atamu ma Eva. Talu mai lenā taimi, e faitau piliona ē na tupuga mai iā i laʻua ua tetee i le pule a Ieova.—Roma 3:23.

5. O le ā le mea e pito sili ona faanoanoa ai Ieova?

5 O loo faatuputeleina pea le fouvalega a Satani. Pe tusa ma le 6,000 tausaga, o silasila mai Ieova i le ifo i tupua, sauā, fasioti tagata, ma feusuaʻiga e lē masani ai. (Kene. 6:5, 6, 11, 12) E lē gata i lea, ua faafofoga o ia i pepelo e inosia ma upu leaga. E oo lava i tagata tapuaʻi moni o le Atua e iai taimi ua latou faatigā ai iā te ia. Ua faamatala e le Tusi Paia se tasi o na tulaga i upu nei: “Na faalasi naʻuā ona latou faaonoono iā te ia i le vao; na latou faalili lava iā te ia i le vao. Na latou toe tofotofo lava i le Atua; ma latou faaonoono i le Paia o Isaraelu.” (Sala. 78:40, 41) E mautinoa le matuā tigā o lagona o Ieova pe a teena o ia e ona tagata. (Iere. 3:1-10) E manino mai, e tutupu mea leaga, ma e matuā faanoanoa Ieova pe a tutupu na mea.—Faitau le Isaia 63:9, 10.

6. E faapefea ona fesagaʻia e Ieova tulaga faigatā?

Peitaʻi, e lē avea le tigā ma le faanoanoa ma itu e taofia ai o ia mai le gaoioi. Pe a aliaʻe faafitauli, e vave ona gaoioi Ieova ina ia faaitiitia  aafiaga leaga ona o le mea ua tupu. E iai foʻi tulaga e umi se taimi e alu ai, ina ia faataunuu lana fuafuaga. Pe a manatu i nei gaoioiga lelei, o loo taulaʻi ma le olioli Ieova i le faamaonia o le tonu o lana pule silisili ese, ma faamanuiaga e maua e ona tagata tapuaʻi faamaoni. (Sala. 104:31) Ioe, e ui i le faalumaina o ia, ae e tumau pea Ieova o “le Atua fiafia.”—1 Timo. 1:11; Sala. 16:11.

7, 8. E faapefea ona tatou faaaʻoaʻo iā Ieova pe a lē sologa lelei le tulaga o mea?

7 O le mea moni, e lē mafai ona faatusatusa atu i tatou iā Ieova pe a tuu mai i lo tatou tomai e foʻia ai faafitauli. Peitaʻi, e mafai ona tatou faaaʻoaʻo iā Ieova a o tatou fesagaʻi ma puapuaga. O le tulaga masani lava le faanoanoa pe a lē sologa lelei mea, ae e lē manaʻomia ona tumau ai i lenā tulaga. Ona sa faia i tatou i le faatusa o Ieova, ua iā i tatou le tomai e mafaufau ai ma le atamai, ua mafai ai ona tatou iloiloina o tatou faafitauli ma faia ni gaoioiga talafeagai i le taimi tatau.

8 O se tasi o vala tāua e fesoasoani iā i tatou e foʻia ai faafitauli o le olaga, o le iloa lea e iai mea e lē mafai ona tatou taulimaina. O le popole i na faafitauli e na ona atili ai ona lē fiafia ma lē maua ai le olioli i le tapuaʻiga moni. Pe a uma ona uia laasaga talafeagai e foʻia ai se faafitauli, e sili ona lelei le aua ona toe mafaufau i ai, ae taulaʻi atu i gaoioiga e sili ona aogā. O loo faataʻitaʻia mai e tala o le Tusi Paia o loo sosoo mai lenei manatu.

E Tāua le Magafagafa

9. Na faapefea ona faaalia e Hana le magafagafa?

9 Seʻi manatu i le faaaʻoaʻoga a Hana, le tinā o le perofeta o Samuelu. Sa faanoanoa ona na lē mafai ona maua sana tama. Sa tauemua ma faifaia o ia ona o lona lē fanau. Sa iai taimi na lotovaivai ai Hana, lea na tagi ai ma ua lē ʻai. (1 Samu. 1:2-7) I se tasi o taimi na alu atu ai o ia i le malumalu, “ua tiga lona loto, ua ōle atu iā Ieova, ma ua tagi tele.” (1 Samu. 1:10) Ina ua mavae ona faatoga atu ma le loto Hana iā Ieova, ona fai atu lea o Eli le faitaulaga sili iā te ia: “Alu ia oe ma le manuia; ia foaʻi mai foʻi e le Atua o Isaraelu le mea na e faatoga atu ai iā te ia.” (1 Samu. 1:17) O le taimi lea, ua iloa e Hana ua ia faia mea uma e tatau ona ia fai. O lona tulaga e lē fanau sa leai se mea e mafai ona fai i ai. Sa faaalia e Hana le magafagafa. Ona ia “alu ai lava lea . . . ua ʻai o ia ua lē toe mata faanoanoa.”—1 Samu. 1:18.

10. O le ā le vaaiga talafeagai na faaalia e Paulo ina ua fesagaʻi ma se faafitauli e lē mafai ona ia foʻia?

10 Sa faaalia e le aposetolo o Paulo se vaaiga faapena ina ua fesagaʻi ma faafitauli. Sa iai se tulaga faigatā na matuā mafatia ai o ia. Sa ia taʻua lenā tulaga o se “mea matuitui i le tino.” (2 Kori. 12:7) Po o le ā lava le pogai, sa faia e Paulo le mea na te mafai ina ia aveesea ai lea tulaga faigatā, ma tatalo iā Ieova mo se mapusaga. E faafia ona talosaga atu Paulo iā Ieova e uiga i le mataupu? E faatolu. Ina ua uma ona ōle atu faatolu, na faailoa mai e le Atua iā Paulo e lē faavavega ona aveesea le “mea matuitui i le tino.” Sa talia e Paulo lenei tulaga ma uaʻi atu i le auaunaga iā Ieova ma le loto atoa.—Faitau le 2 Korinito 12:8-10.

11. O le ā le vaega a le tatalo ma le faatoga e fai i lo tatou faafetaiaʻia o mala?

11 E lē o le uiga o nei faataʻitaʻiga e faapea, e lē tatau ona tatou tatalo atu iā Ieova e uiga i mataupu e mafatia ai. (Sala. 86:7) Nai lo lea, ua timaʻi mai le Afioga a le Atua iā i tatou: “Aua neʻi popole i se mea, ae ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai.” O le a faapefea ona tali mai Ieova i na faatoga ma manaʻoga? Ua faapea atili mai le Tusi Paia: “Ona leoleoina ai lea o o outou loto ma mafaufau i le filemu mai le Atua, lea e silisili i mea uma lava e manatu i ai, e ala iā Keriso Iesu.” (Fili. 4:6, 7) Ioe, atonu e lē aveesea e Ieova lo tatou faafitauli, ae e mafai ona ia tali mai i a tatou tatalo e ala i le leoleoina o o tatou mafaufau. Pe a uma ona tatalo atu e  faatatau i se mataupu, atonu e tatou te iloa ai le mataʻutia o le soona uaʻi atu i popolega.

Ia Olioli i le Faia o le Finagalo o le Atua

12. Aiseā e mataʻutia tele ai le faaumiumi ona lotomafatia se tasi?

12 Ua taʻua i le Faataoto 24:10 e faapea: “Afai e te faavaivai i le aso vale, ua itiiti lava lou malosi.” Ua faapea mai se isi faataoto: “A o le loto faanoanoa e momomo ai le agaga.” (Faata. 15:13) O nisi Kerisiano ua lotovaivai ma oo ai ina lē faaauau ona latou faitauina le Tusi Paia ma manatunatu loloto i le Afioga a le Atua. O a latou tatalo ua na o se mea e tau ina fai, ma atonu ua latou faaesea i latou mai i uso tapuaʻi. E manino mai, e mataʻutia tele le faaumiumi ona iai se tasi i le tulaga lotomafatia.—Faata. 18:1, 14.

13. O ā nisi o gaoioiga e mafai ona fesoasoani iā i tatou, e aveesea ai le lotovaivai ae maua le olioli?

13 I le isi itu, o le iai o se vaaiga saʻo o le a fesoasoani iā i tatou e taulaʻi atu ai i vala o o tatou olaga e maua ai le olioli. Na tusi Tavita e faapea: “Loʻu Atua e, ou te fiafia e fai lou finagalo.” (Sala. 40:8) Pe a faalētonu le tulaga o mea i o tatou olaga, e mautinoa e lē tatau ona taofia la tatou faasologa lelei o gaoioiga faaleagaga. O le mea moni, o le auala lelei e faafetaiaʻia ai le faanoanoa, o le faia lea o gaoioiga e maua ai le fiafia. Ua taʻu mai e Ieova iā i tatou e mafai ona maua le fiafia i le faitauina o lana Afioga ma suʻesuʻe i ai e lē aunoa. (Sala. 1:1, 2; Iako. 1:25) E tatou te maua “upu matagofie” e ala mai i le Tusi Paia ma sauniga faa-Kerisiano, lea e mafai ona faalaeiau ai i tatou ma maua le olioli.—Faata. 12:25; 16:24.

14. O le ā le faamautinoaga mai iā Ieova ua tatou maua ai le olioli i le taimi nei?

14 Ua aumai e le Atua iā i tatou le tele o māfuaaga e olioli ai. O le mea moni, o lana folafolaga i le faaolataga o le puna autū o le fiafia. (Sala. 13:5) Ua tatou iloa e tusa lava po o le ā o loo tupu iā i tatou i aso nei, i le iʻuga, o le a tauia e le Atua i latou e matuā saʻili iā te ia. (Faitau le Failauga 8:12.) Na ioeina e le perofeta o Sapakuka lenā faamautinoaga ina ua ia tusi e faapea: “E ui lava ina lē fuga mai le  mati, e leai foʻi ni fua i vine, e iʻu vale le fua o le olive, e lē tupu mai foʻi ni mea e ʻai i le fanua; e faaumatia le lafu mamoe i le lotoā e leai foʻi ni povi i le fale povi; a e peitaʻi aʻu, ou te olioli lava iā Ieova, ou te fiafia lava i le Atua o loʻu faaolataga.”—Sapa. 3:17, 18.

“Amuia le Nuu e Fai Ieova mo Latou Atua!”

15, 16. Taʻu mai nisi o meaalofa a le Atua o loo tatou olioli ai, a o faatalitali atu i faamanuiaga i le lumanaʻi.

15 A o tatou faatalitali atu i le lumanaʻi matagofie o le a tatou maua, e finagalo Ieova ia tatou olioli i mea lelei ua ia aumaia iā i tatou. Ua faapea mai le Tusi Paia: “Ua ou iloa e leai se mea lelei iā te i latou, na ona ia olioli le tagata, ma ia fai mea lelei i lona olaga nei. I le ma lea, ia taʻitasi le tagata ma ʻai, ma inu, ma fiafia i mea lelei i ana galuega uma; o le mea foaʻiina mai lea e le Atua.” (Fai. 3:12, 13) E aofia ai i le “fai o mea lelei” le faia o galuega lelei mo isi. Na taʻua e Iesu e sili le fiafia i le foaʻi atu i lo le talia. O gaoioiga agalelei i a tatou paaga, fanau, mātua, ma isi tauaiga, e aumaia ai le faamalieina sili. (Faata. 3:27) O le alofa, talimālō, ma le lotofaamagalo i o tatou uso ma tuafāfine faaleagaga, e maua ai foʻi le olioli ma faafiafiaina ai Ieova. (Kala. 6:10; Kolo. 3:12-14; 1 Pete. 4:8, 9) Ma o le faia o la tatou faiva ma se agaga faataulagaina, e tauia moni lava.

16 O loo taʻua i upu i le Failauga na sii mai muamua atu, mea e maua ai le fiafia i le olaga e pei o le ʻai ma inu. Ioe, e oo lava i taimi o loo feagai ai ma puapuaga, e mafai ona tatou maua le olioli i so o se meaalofa faaletino e tatou te maua mai iā Ieova. E lē gata i lea, o se lāgoto matagofie, se laufanua matagofie, o amioga mālie a meaola laiti, ma isi mea ofoofogia o le foafoaga, e mafai ona faatumulia ai i tatou i le maofa ma le olioli. A o tatou mafaufau i na mea, e tupu aʻe ai lo tatou alofa iā Ieova, auā o ia o Lē e foaʻi mai mea lelei uma.

17. O le ā o le a tatou maua ai le mapusaga atoatoa mai i tulaga faigatā, ae i le taimi nei, o le ā ua faamāfanafanaina ai i tatou?

17 O lea la, o lo tatou alofa i le Atua, le usiusitaʻi i ana poloaʻiga ma le faatuatua i le taulaga togiola, o le a maua ai le mapusaga atoatoa mai i tulaga faigatā o le olaga lē lelei atoatoa, ma tatou maua ai le olioli tumau. (1 Ioa. 5:3) Ae i le taimi nei, ua faamāfanafanaina i tatou i le iloa, o loo silafia lelei e Ieova mea uma o loo tatou puapuagatia ai. Na tusi Tavita e faapea: “Ou te fiafia ma ou olioli i lou alofa mai; auā ua e silasila i loʻu tigā; ua e silafia aʻu ina o puapuagatia.” (Sala. 31:7) Ona o lona alofa mo i tatou, o le a laveaʻia ai i tatou e Ieova mai i mea leaga.—Sala. 34:19.

18. Aiseā e tatau ai ona tele le olioli i tagata o le Atua?

18 A o tatou faatalitali i le faataunuuga o ana folafolaga, seʻi o tatou faaaʻoaʻo iā Ieova, le Atua fiafia. Tau ina ia tatou ʻalofia le oo ina vaivai faaleagaga ona o lagona lē lelei. Pe a tulaʻi mai faafitauli, tau ina ia taʻitaʻia i tatou e le tomai e mafaufau ai ma le atamai. O le a fesoasoani mai Ieova iā i tatou e pulea o tatou lagona, ma faia so o se laasaga e mafai ina ia faaitiitia ai aafiaga leaga ona o mea leaga e tutupu. Seʻi o tatou olioli i mea lelei mai iā te ia, i le faaletino ma le faaleagaga. O le mafuta vavalalata atu i le Atua, o le a mafai ai ona tatou olioli ona e pei ona taʻua e faapea, “amuia le nuu e faia Ieova mo latou Atua!”—Sala. 144:15.

O le ā ua E Aʻoaʻoina?

• Pe a faafetaiaʻia tulaga faigatā, e faapefea ona tatou faaaʻoaʻo iā Ieova?

• E faapefea ona fesoasoani le magafagafa iā i tatou e faafetaiaʻia ai tulaga faigatā?

• I taimi o puapuaga, e faapefea ona tatou maua le olioli i le faia o le finagalo o le Atua?

[Fesili mo le Suʻesuʻega]

[Ata i le itulau 16]

E matuā faanoanoa Ieova ona o mea leaga o loo tutupu

[Ē le Ata i le itulau 16]

© G.M.B. Akash/Panos Pictures

[Ata i le itulau 18]

Ua aumaia e Ieova iā i tatou auala e faatumauina ai le olioli